• WANEA JEBUAREN: 1963

• VON WOON LAUNT: ENJLAUNT

• WAUT EKJ EA WIA: EKJ HAUD EENE SEA GOODE OABEIT

MIENE VEGONENHEIT:

Ekj wia en Croydon, em Sieden von London, jebuaren. Ekj wia daut saste von näajen Kjinja. Miene Elren staumden von de Karibik-Insel St. Vincent häa. Miene Mame wankt no de Methodisten-Kjoakj, oba ekj wull nuscht von Gott weeten. Ekj jleicht daut sea to studieren un välet to lieren. Wan doa nich School wia, dan wia ekj foaken bie de Likj dicht bie ons Tus un läsd väl Bieekja, waut ekj mie von de Bibliotäkj jeliet haud.

Nodäm daut ekj haud oppjehieet met no de School gonen, wort ekj mie eenich, daut ekj wull soone Menschen halpen, waut daut fäld. Ekj funk aun, met soone Menschen to schaufen, waut nich een Tus hauden un met soone, waut behindat ooda hoatlierich wieren. Dan jinkj ekj no de Uniwersität un studieed waut, waut met Doktarie to doonen haft. Nodäm aus ekj met de Uniwersität derch wia, kjrieech ekj onverhofs wichtje Oabeit un ekj kunn mie väl diere Sachen kjeepen. Miene Oabeit wia, Rot to jäwen äwa daut, waut ekj studieet haud. Un aules, waut ekj doatoo brukt, wia een kjliena Komputa un Internet. Ekj fluach foaken no veschiedne Lenda een poa Wäakj opp eemol un ekj bleef bie de baste Hotels, wua sea schmocke Omjäajenden wieren. Ekj leet mie daut soo rajcht scheen gonen, un to deeselwje Tiet kunn ekj uk schaufen. Ekj docht ekj haud daut baste Läwen, oba ekj hieed doawäajen kjeenmol opp, aun dee Menschen to denkjen, waut daut schwoa hauden.

WOO MIEN LÄWEN SIKJ DERCH DE SCHREFT JEENDAT HAFT:

Ekj wundad aul fa Joaren, to waut wie läwen. Oba ekj proowd kjeenmol, de Auntwuat en de Schreft to finjen. Miene jinjre Sesta Margaret wia eent von Jehova siene Zeijen jeworden. Un eenen Dach aune 1999 kjeem see un eent von äare Zeijen Frind no mie un äa Frint wia sea leeftolich to mie. Ekj weet nich, woo daut soo rajcht kjeem, oba ekj säd, daut ekj wudd met ar toop de Schreft studieren. Ekj kjeem nich bosich wieda met studieren, wäajens ekj soo drock wia.

Em Somma aune 2002 trock ekj nom Siedwasten von Enjlaunt. Doa deed ekj noch wieda bie de Uniwersität studieren toom mie noch wieda utlieren. Doa funk ekj aun, foakna no de Toopkomes to wanken, met mienen kjlienen Sän toop. Wan ekj daut uk sea jleicht, bie de Uniwersität to studieren, holp mie de Schreft studieren oba mea, daut bäta to vestonen, wuarom daut em Läwen soo väl Trubbels jeft un woo dee woaren jefikst woaren. Mie wort daut dietlich, daut et soo wia, aus Matäus 6:24 sajcht, daut eena nich kaun twee Haren deenen. Eena kaun bloos eenen deenen: Gott ooda daut Rikjtum. Ekj wist, daut ekj mie must eenich woaren, waut fa mie daut wichtichste em Läwen wia.

Een Joa ea wankt ekj foaken no eene Bibelstudium-Grupp, waut Jehova siene Zeijen bie wäm Tus hauden, un doa studieed wie daut Buak Gibt es einen Schöpfer, der an uns interessiert ist? * Daut holp mie to vestonen, daut bloos ons Schepfa Jehova de Menschen äare Trubbels leesen kaun. Bie de Uniwersität lieeden se ons oba, daut ons daut em Läwen nich aun Gott fält. Ekj wia sea doll. Twee Moonat nodäm aus ekj bie de Uniwersität aunjefongen haud to studieren, hieed ekj opp doamet un wort mie eenich, mea Tiet to brucken toom Jehova bäta kjanen lieren.

De Varzhen ut de Schreft, waut mie werkjlich holpen, mien Läwen to endren, wieren, Spricha 3:5-6 (PB): “Velot die opp däm HARN met dien gaunzet Hoat, un velot die nich opp dien ieejnet Vestaunt. Denkj aun am en aules waut du deist, un hee woat die dän rajchten Wajch wiesen.” Je mea ekj äwa Jehova sien Väanämen fa de Ieed lieed, un daut Jesus sien Läwen fa ons jejäft haud, je dolla jankad mie daut, mie onsen Schepfa hantojäwen. Ekj leet mie em Aprell 2003 deepen. Un no daut muak ekj mien Läwen soo bie sacht eefacha, om mea Tiet fa Gott to haben.

WOO MIE DAUT TOGOOD KJEEM:

Jehova aus Frint to haben, es fa mie väl mea wieet aus irjent sestwaut. Am kjanen to lieren, haft mie werkjlich ennalichen Fräd jejäft un ekj sie schaftich. Ekj frei mie uk sea, daut ekj kaun soone Frind haben, waut Jehova Gott leewen.

Ekj hool noch emma sea opp lieren. Un nu sie ekj sea schaftich äwa aul daut, waut ekj von de Schreft lia un bie de christelje Toopkomes. Ekj jleich daut uk, met aundre von mienen Gloowen to vetalen. Dit es nu daut väaschte en mien Läwen, wiels ekj de Menschen kaun halpen, nu aul een bätret Läwen to haben. Un daut jeft an uk de scheene Hopninj toom lota noch mol en eene niee Welt läwen. Von Juni 2008 aun sie ekj aul Pionia jewast un ekj sie nu schaftja un tofrädna aus jeemols ea. Ekj hab nu eenen woaren Senn em Läwen jefungen un fa daut sie ekj Jehova werkjlich dankboa.

• WANEA JEBUAREN: 1973

• VON WOON LAUNT: OOSTAREICH

• WAUT EKJ EA WIA: EKJ DEED OPP JELT SPÄLEN

MIENE VEGONENHEIT:

Ekj woss en de kjliene Staut Braunau en Oostareich opp. De Menschen doa wieren goot auf un doa jinkj daut sea frädlich too. En miene Famielje wia wie aula katoolsch.

Mie denkjt daut noch, aus ekj alf Joa wia, späld ekj eenen Dach Footbaul met mienen gooden Frint. Daut wia aune 1984. Dänselwjen Nomeddach kjeem dee todood en een Ojjlekj met een Foatich. Daut sad mie sea too, daut mien Frint storf. Fa Joaren no daut Ojjlekj docht ekj foaken, waut met ons woat, wan wie stoawen.

Aus ekj met de School opphieed, wia miene Oabeit met ellektrischet Fia to schaufen. Ekj funk aun, opp huage Sommen Jelt to spälen. Oba mie fäld daut doawäajen kjeenmol aun Jelt. Ekj spend uk väl Tiet en Sport nenn un jleicht willet Spell sea. Ekj jleicht daut sea, no soone Städen to wanken, wua se daunzten un wille Fasten hauden. Ekj fieed een schwienschet Läwen un daut jinkj bie mie bloos doarom, waut mie jankad, oba ekj wia nich schaftich.

WOO MIEN LÄWEN SIKJ DERCH DE SCHREFT JEENDAT HAFT:

Aune 1995 kjeem een elra Maun von Jehova siene Zeijen no miene Däa. Hee boot mie een Buak aun, waut doavon räd, waut de Schreft doaräwa sajcht, waut met ons woat, wan wie stoawen. Ekj haud daut noch emma schwoa doaräwa, daut mien Frint wia todood jekomen, un doawäajen neem ekj daut Buak. Ekj läsd nich bloos daut Kapitel äwa dän Doot, oba daut gaunze Buak!

Daut Buak brocht aul mienen Twiewel äwa dän Doot oppem kloaren, oba ekj lieed noch väl mea. Wiels ekj Kotolikj wia, dreid sikj mien Gloowen daut mieeschte om Jesus. Oba aus ekj de Schreft dan werkjlich studieed, holp mie daut, Frind to woaren met Jesus sienen Voda, Jehova Gott. Ekj wia soo schaftich to lieren, daut Jehova om ons todoonen es un daut hee well haben, daut wie am sellen kjanen lieren (Matäus 7:7-11). Ekj lieed, daut Jehova sikj kunn schaftich ooda truarich feelen. Ekj lieed uk, daut hee emma sien Wuat helt. Un doawäajen wull ekj mie de Profezeiungen ut de Schreft dolla unjastonen un woo dee sikj erfelt hauden. Waut ekj doa aules rutfunk, stoakjt mienen Gloowen aun Gott sea.

Boolt wort mie daut dietlich, daut Jehova siene Zeijen de eensje wieren, waut ekj kjand, waut werkjlich wullen de Menschen halpen, de Schreft to vestonen. Emma, wan ekj Bibelvarzhen en de Zeijen äare Bieekja sach, läsd ekj dee en miene katoolsche Bibel no. Je mea ekj studieed je dolla wort ekj en, daut ekj de Woarheit jefungen haud.

Je dolla ekj de Schreft studieed je dietelja wort mie daut, daut Jehova wull haben, daut ekj siene Jesazen sull nokomen. Von Efeesa 4:22-24 (PB) lieed ekj, daut ekj must von dän “oolen Mensch looskomen”, waut ekj ea wia, un daut ekj must een niea Mensch woaren, “dee no Gott sienem Bilt … jeschaufen” es. Ekj hieed met mien schwienschet Läwen opp un ekj wist uk, daut ekj must opphieren, opp Jelt to spälen, wiels daut eenen Mensch bloos bejierich moakt (1. Korinta 6:9-10). Un om daut to doonen, must ekj mie soone Frind sieekjen, waut uk Gott jefaulen wullen; daut wia mie kloa.

Daut aules to endren, wia nich leicht. Oba ekj funk aun, no de Toopkomes von Jehova siene Zeijen to wanken un mie fresche Frind to sieekjen enne Vesaumlunk. Ekj deed uk wieda perseenlich goot de Schreft studieren. Daut aules holp mie, uk noch aundre Sachen to endren, biejlikj no waut von Spell ekj horcht, waut ekj met mien Läwen doonen wull un uk woo ekj mie auntrock. Aune 1995 leet ekj mie aus eent von Jehova siene Zeijen deepen.

WOO MIE DAUT TOGOOD KJEEM:

Jelt un tietelje Sachen sent fa mie nu nich mea soo wichtich aus ea. Ekj wia emma sea leicht doll, oba nu sie ekj ruja. Un ekj moak mie uk nich mea soo väl Sorjen doaräwa, waut noch komen woat.

Ekj jleich daut sea, Poat von eene Grupp Menschen to sennen, waut Jehova oppe gaunze Welt deenen. Mank dise Menschen jeft daut soone, waut Schwierichkjeiten haben, oba doawäajen Gott tru deenen. Ekj sie schaftich, daut ekj nu miene Tiet un Krauft kaun brucken toom Jehova deenen un aundre Menschen halpen un nich bloos fa soont, waut mie scheen jeit, soo aus ea.

• WANEA JEBUAREN: 1963

• VON WOON LAUNT: ENJLAUNT

• WAUT EKJ EA WIA: EKJ WIA ONTOFRÄD ÄWA DAUT LÄWEN

MIENE VEGONENHEIT:

Ekj sie en Enjlaunt jebuaren un aus ekj rom säwen Joa wia, trock wie no Australien. Wie trocken no eene Städ, wua de Menschen sea jleichten, fa Scheengonen hantokomen. Wan miene Famielje uk nich rikj wia, haud wie doawäajen aules, waut ons fäld.

Wan mie daut aus Kjint uk aun nuscht fäld, wia ekj doawäajen kjeenmol werkjlich schaftich. Ekj wort sea ontofräd met daut Läwen. Mien Voda wia een Supa. Wäajen hee een Supa wia un soo aus hee miene Mame behaundeld, räakjend ekj am nich väl. Lota wort ekj en, waut hee beläft haud, aus Soldot en Malaysia, un dan kunn ekj vestonen, wuarom hee soo wia.

Enne Huachschool funk ekj aul aun, stoakjet to drinkjen. Aus ekj 16 wia, hieed ekj opp met no de School gonen un wia dan en de Armee. Ekj funk aun, Droggs to brucken un wort aufhenjich von Tobbak. Un ekj kjrieech uk een emma jratret Velangen no stoakjet. Ieescht deed ekj bloos Utgangswäakj supen oba lota jieda Dach.

Aus ekj rom 20 Joa wia, funk ekj aun to twiewlen, aus daut eenen Gott jeef. Ekj docht soo, wan daut opp iernst eenen Gott jeef, wuarom lat hee daut dan too, daut de Menschen lieden un stoawen? Ekj schreef mau rajcht Varzhen, waut sikj riemen, doaräwa, daut Gott de Schult haud fa aul daut schlajchte enne Welt.

Aus ekj 23 wia, veleet ekj de Armee. No daut schauft ekj opp veschiedne Städen. Ekj reisd mau rajcht no aundre Lenda fa een Joa, oba daut muak mie uk nich schaftja. Ekj sträwd no nuscht un mie intressieed uk nuscht em Läwen. De Iedee, mien ieejnet Hus to haben ooda ne goode Oabeit un een Wiedakomen to haben, hilt aula nuscht en fa mie. Dän eensjen Troost, waut ekj haud, wia, stoakjet drinkjen un Spell horchen.

Mie denkjt daut noch goot, daut doa eene Tiet wia, wua ekj sea doaräwa nodocht, wuarom wie verheipts läwen. Ekj wia en Poolen un besocht daut schlemme Loaga fa Faustjenomne en Auschwitz. Ekj haud doaräwa jeläst, waut fa grausomet se opp dee Städ jedonen hauden. Aus ekj doa stunt un sach, woo groot dit Loaga wia, sad mie daut sea too. Ekj kunn eefach nich bejriepen, woo Menschen kunnen soo grausom to aundre Menschen sennen. Mie denkjt daut noch, daut ekj met Tronen enne Uagen en daut Loaga romjinkj, un docht: “Wuarom passieed dit?”

WOO MIEN LÄWEN SIKJ DERCH DE SCHREFT JEENDAT HAFT:

Aune 1993, aus ekj trigj no Australien kjeem, funk ekj aun, en de Schreft no Auntwuaten to sieekjen. Een Stootje no daut kjeemen twee von Jehova siene Zeijen no mien Hus un dee kroagden mie no eenen Kongress, waut see doa dicht bie en een Stadion wudden haben. Ekj wort mie eenich doa hantogonen.

Een poa Moonat ea wia ekj bie dautselwje Stadion jewast bie een Sport-Späl. Oba dis Kongress wia gaunz aundasch. De Zeijen wieren frintlich, schmock aunjetrocken un dee äare Kjinja stalden sikj fein opp. Waut mie sea oppfoll wia, daut hundade von de Zeijen doa enne Medd opp daut Grauss Meddach eeten, oba aus dee sikj trigj dolsaten jinjen, wia doa nich een Bietskje Mell opp daut Grauss jebläwen. Daut späad sikj soo, daut dise Menschen werkjlich schaftich wieren un daut wia waut, waut mie uk jankad. Mie denkjt daut nich mea, om waut sikj de Räden opp dän Kongress haundelden, oba waut ekj nich vejäten kunn, wia, woo de Zeijen wieren.

Dän Owent docht ekj aun mienen Vada, waut de Schreft läsd un sikj veschiedne Jemeenten unjastonen haud. Joaren ea haud hee mie mol vetalt, daut Jesus säd, daut eena dee, von dän woaren Gloowen, aun daut kjanen kaun, waut dee doonen (Matäus 7:15-20). Dan wort ekj mie eenich, daut ekj mie daut weens mol must unjastonen, wuarom de Zeijen soo väl aundasch wieren. Daut ieeschte Mol en mien Läwen späad ekj eene Hopninj, daut ekj kunn een bätret Läwen haben.

De näakjste Wäakj kjeemen de twee Zeijen wada han, waut mie hauden nom Kongress jekroacht. Dee fruagen mie, aus ekj met an toop wull de Schreft studieren, un ekj säd jo. Un ekj funk uk aun, no de christelje Toopkomes to wanken.

Aus ekj de Schreft studieed, funk ekj gaunz aundasch aun, äwa Gott to denkjen. Ekj lieed, daut hee nich daut schlajchte un daut Lieden veuasoakt, un daut am daut uk toosat, wan Menschen schlajchtet doonen (1. Mose 6:6; Psalm 78:40-41). Ekj wort mie gaunz eenich, mien bastet to proowen, Jehova nich truarich to moaken. Ekj wull sien Hoat froo moaken (Spricha 27:11). Ekj hieed opp met supen un Tobbak brucken un ekj hieed uk opp, een schwienschet Läwen to fieren. Em Moaz 1994 leet ekj mie aus eent von Jehova siene Zeijen deepen.

WOO MIE DAUT TOGOOD KJEEM:

Ekj sie nu werkjlich schaftich un tofräd. Mie fält daut nu nich mea aun stoakjet toom proowen miene Trubbels fiksen. Ekj hab jelieet, aul miene Sorjen opp Jehova to schmieten (Psalm 55:23).

Ekj sie nu aul tieen Joa met eene schmocke Fru befriet, waut uk eent von Jehova siene Zeijen es. See heet Karen. Un ekj hab eene feine Steefdochta, waut Nella heet. Wie dree jleichen daut sea, een deel Tiet to brucken fa onsen christeljen Deenst un om aundre to halpen, de Woarheit äwa Gott to lieren. Nu hab ekj entlich een schaftjet Läwen.