Von kjlien aun jleicht ekj de Natua sea. Aus Famielje wia wie foaken buten bie de wundaschmocke Weela un Likjen, waut doa dicht bie onse Staut Jyväskylä medden en Finnlaunt wieren. Ekj hab uk noch emma de Tieren jejleicht. Bie kjlien jankad mie jieda Hunt un jieda Kaut, waut ekj sach, omtopaken. Aus ekj dan ella wia, stieed mie daut sea, daut de Tieren foaken soo schlajcht behaundelt worden. Irjentwanea jinkj ekj dan bie eene Organisazion bie, waut doafäa ensteit, de Tieren rajcht to behaundlen. Doa lieed ekj Menschen kjanen, waut uk soo dochten aus ekj.

Wie schauften toop doaropp, daut de Tieren sullen bäta behaundelt woaren. Biejlikj muak wie daut met veschiednet bekaunt, jinjen oppe Gauss nopp toom jachen un streeden jäajen soone Stuaren, waut ladane Sachen vekoften un soone Städen, wua se met Tieren Medizien un aundre Sachen testen. Wie stalden soogoa eene niee Organisazion opp, om fa de Tieren entostonen. Wiels wie met aule Jewault fa onse Sach streeden, haud wie foaken Trubbel met daut Jesaz. Ekj wort mieremol faust jenomen un must verem Rechta komen.

Soo aus ekj om de Tieren besorcht wia, wia ekj uk om aundret oppe Welt besorcht. Doaderch muak ekj met de Tiet bie väl Organisazionen met soo aus Amnesty International un Greenpeace. Ekj street fa de Oame, fa dee, waut Hunga lieden, un fa aundre, waut daut nich goot hauden. Ekj brukt aul miene Krauft toom dise Organisazionen unjastetten.

Soo bie sacht wort ekj en: Ekj kunn de Welt bloos nich endren. Wan dise Organisazionen uk eenje kjliene Sachen fiksen kunnen, worden de groote Trubbels oba bloos jrata. Daut späad sikj soo, aus wan daut schlajchte de Welt en äare Macht haud, un doa jeef kjeena waut om rom. Ekj feeld mie eefach machtloos.

Wäajen ekj mie soo schlajcht doaräwa feeld, daut ekj doa nuscht met doonen kunn, docht ekj äwa de Bibel un äwa Gott no. Ekj haud ea mol met Jehova siene Zeijen de Bibel studieet, un räakjend daut sea väl, daut dee mie soo leeftolich behaundelden un sikj fa mie intressieeden. Don wia ekj noch nich reed mien Läwen to endren, oba dit Mol wia daut aundasch.

Ekj funk wada aun de Bibel to läsen un daut wia een groota Troost fa mie. Ekj funk een deel Varzhen, waut lieren, daut eena Tieren goot behaundlen mott. Biejlikj Spricha 12:10 sajcht: “Een jerajchta erboarmt sikj uk äwa sien Vee”. Ekj lieed uk, daut Gott nich Schult wia aun onse Trubbels, oba daut onse Trubbels doavon komen, daut de mieeschte Menschen nich no Gott horchen. Mie jinkj daut sea to Hoaten, woo jeduldich un leeftolich Jehova es (Psalm 103:8-14).

Ojjefäa en dee Tiet feld ekj eenen Zadel ut toom mie daut Buak Waut lieet de Schreft werkjlich? bestalen. Boolt wia een Ehepoa von Jehova siene Zeijen aun miene Däa un fruach, aus ekj de Bibel studieren wull, un ekj säd Jo. Ekj funk uk aun, no de Toopkomes to wanken en dee äa Vesaumlungshus. Derch aul dit räakjend ekj daut emma mea, waut ekj ut de Schreft lieed.

Derch de Bibel hab ekj veschiednet en mien Läwen jeendat. Ekj hieed opp met schmieekjen un drinkjen un endat daut, woo mie leet un woo ekj räd. Ekj funk uk aun, aundasch äwa de Rejierungen to denkjen (Reema 13:1). Ekj leet uk mien orreinet Läwen toch, wua ekj ea gaunz sondasorj äwa wia.

Daut schwanste foll mie daut, rajcht äwa soone Organisazionen to denkjen, wua ekj metmuak; daut endad sikj nich soo haustich. Mie späad sikj soo, ekj wudd dise Organisazionen veroden, wan ekj doa wudd rutgonen. Oba ekj wort en, daut bloos Gott sien Kjennichrikj de eensje Leesunk es fa onse Trubbels, waut werkjlich waut enhelt. Doawäajen bruck ekj nu aul miene Krauft, om dit Kjennichrikj to unjastetten un noch mea Menschen to halpen, daut kjanen to lieren (Matäus 6:33).

Aus eena, dee sea fa daut rajchte enstunt, docht ekj, daut jeef bloos twee Sorten Menschen: goode un schlajchte; un ekj wia reed jäajen de schlajchte to gonen. Oba wäajen de Bibel hieed ekj doamet opp, eenen Hauss to haben äwa aundre Menschen. Nu bemieej ekj mie, aule Menschen to leewen, soo aus eenen Christ daut tookjemt (Matäus 5:44). Eent, woo ekj dise Leew wies, es, daut ekj aundre de goode Norecht von daut Kjennichrikj brinj. Ekj frei mie, daut ekj bie een frieweljet Woakj metmoaken kaun, waut aundre Freid un Hopninj jeft, un schaftich moakt.

Ekj velot mie doaropp, daut Jehova sikj om aules kjemren woat, un daut jeft mie Fräd. Wiels hee de Schepfa es, woat hee daut nich tooloten, daut Menschen un Tieren fa emma woaren lieden motten. Hee woat daut uk nich tooloten, daut de Menschen de Ieed gaunz vedoawen kjennen. Derch sien Kjennichrikj woat Gott wada aul dän Schoden gootmoaken, waut Menschen aunjerecht haben (Jesaja 11:1-9). Mie jeft daut groote Freid, daut ekj daut nu vestonen kaun un daut ekj aundre halpen kaun, uk doaraun to jleewen. Ekj denkj nich mea, daut et aun mie es, de Trubbels oppe Welt to fiksen.