Michelle: Hei Sofia. Ekj frei mie, daut ekj die tus traft.

Sofia: Mie freit daut uk.

Michelle: Daut latste Mol, aus ekj hia wia, räd wie doaräwa, woo Gott doaräwa denkjt, daut wie lieden motten. Un du sätst, daut du aul foaken äwa daut jewundat hautst, besonda nodäm aus diene Mame met een Foatich veojjlekjt wia. Woo deit et nu äwajens met diene Mame?

Sofia: Eenje Doag feelt see sikj bäta un eenje Doag schlajchta. Vondoag es daut to brucken.

Michelle: Daut freit mie, daut see sikj vondoag bäta feelt. Daut es secha nich emma leicht fa die, mootich to bliewen met aul dit.

Sofia: Nä, daut es nich leicht. Eenjemol wunda ekj, woo lang see noch woat lieden motten.

Michelle: Daut es mie gaunz dietlich. Veleicht denkjt die daut noch, daut ekj die daut latste Mol de Froag stald: Wuarom haft Gott daut Lieden soo lang toojeloten, wan hee doch de Krauft haft, doamet een Enj to moaken?

Sofia: Jo, daut weet ekj noch.

Michelle: Ea wie seenen, waut de Schreft doatoo sajcht, well wie noch eemol een bät waut doavon seenen, wua wie daut väaje Mol von räden.

Sofia: Ok.

Michelle: Eent, waut wie sagen, wia, daut doa mau rajcht een trua Maun en de Bibeltiet Twiewel haud, wuarom Gott daut Lieden tooleet. Oba Gott wia doawäajen nich vestalt äwa dän Maun, daut hee no daut fruach un Gott säd uk nich to dän, daut am bloos mea Gloowen fäld.

Sofia: Daut wia waut gaunz nieet fa mie.

Michelle: Wie lieeden uk, daut Jehova Gott daut nich scheen jeit, wan wie lieden motten. De Schreft sajcht biejlikj, daut aus sien Volkj daut schwoa haud, haud hee daut uk schwoa. * Treest ons daut nich, daut Gott soo väl Metleet haft, wan wie lieden motten?

Sofia: Jo, daut deit.

Michelle: Tolatst lieed wie uk noch, daut Gott soo väl Krauft haft, daut hee wudd kjennen met daut Lieden een Enj moaken, wanemma hee wudd wellen.

Sofia: Krakjt doa blift mie daut stonen. Wuarom lat Gott daut too, daut doa soo väl schlemmet passieet, wan hee doa goot kaun een Enj met moaken?

Michelle: Toom dee Froag beauntwuaten, well wie mol no daut ieeschte Buak von de Bibel gonen. Daut es 1. Mose. Kjanst du de Jeschicht von Adam un Eva un de Frucht, waut veboden wia?

Sofia: Jo, ekj lieed dee Jeschicht en de Sindachschool. Gott säd, dee sullen von eenen jewessen Boom nich Frucht äten, oba dee deeden daut doawäajen.

Michelle: Daut es rajcht. Well wie mol seenen, waut daut bat doa brocht, daut Adam un Eva sindjen deeden. Daut haft krakjt doamet to doonen, wuarom wie lieden motten. West du mol 1. Mose Kapitel 3, Varzhen 1 bat 5 väaläsen (PB)?

Sofia: Jo. “De Schlang wia lestja aus irjent een aundret willet Tia, waut Gott de HAR jemoakt haud. Un dee säd to de Fru: Haft Gott werkjlich jesajcht, daut jie von irjent een Boom nich äten sellen? Un de Fru säd to de Schlang: Wie derwen von de Frucht von de Beem em Goaden äten, oba Gott säd: Jie sellen nich Frucht von däm Boom äten, dee medden em Goaden steit. Jie sellen doa nich von äten un dän nich emol aunschieren, soo daut jie nich stoawen. Oba de Schlang säd to de Fru: Jie woaren goanich stoawen. Gott weet, daut soo boolt aus jie doavon äten, woaren june Uagen op sennen, un jie woaren soo aus Gott sennen, un weeten, waut goot un waut schlajcht es.”

Michelle: Dankscheen fa daut läsen. Well wie ons dise Bibelvarzhen mol unjastonen. Daut ieeschte kjenn wie seenen, daut de Schlang to Eva räd. Aundre Städen von de Bibel wiesen, daut dit rajcht jesajcht de Soton, de beesa Fient, wia, waut derch eene Schlang to Eva räd. * De Soton forscht Eva ut äwa daut Jeboot, daut see nich sullen von de Frucht äten von dän eenen Boom. Hast du daut jemoakjt, waut Gott säd, waut Adam un Eva äare Strof wudd sennen, wan dee doavon eeten?

Sofia: Dee wudden stoawen.

Michelle: Gaunz krakjt. Fuaz no daut säd de Soton waut sea schlajchtet äwa Gott. Kjikj mol, waut hee säd: “Jie woaren goanich stoawen.” Soo, de Soton nand Gott eenen Läajna!

Sofia: Daut Poat von dise Jeschicht hab ekj noch nich ea jehieet.

Michelle: Un aus de Soton Gott eenen Läajna nand, brocht hee eene Sach opp, un toom daut oppem kloaren brinjen, must doa Tiet vegonen. Kaust du seenen, wuarom?

Sofia: Na, ekj sie mie nich secha.

Michelle: Veleicht kunn wie daut mol met waut vejlikjen. Saj wie mol, ekj wudd eenen Dach no junt komen un sajen, daut ekj väl stoakja wia aus du. Woo wurscht du mie bewiesen, daut et nich soo wia?

Sofia: Doch woll daut met irjentwaut proowen.

Michelle: Jo, krakjt. Veleicht wudd wie ons waut schwoaret nämen un seenen, wäa daut opphäwen kunn. Daut utfinjen, wäa stoakja es, daut es gaunz eefach.

Sofia: Jäa, daut es mie dietlich.

Michelle: Oba waut, wan ekj nich säd, daut ekj stoakja wia aus du, oba wan ekj säd, ekj wia väl opprechtja aus du. Daut es dan eene gaunz aundre Sach, nich soo?

Sofia: Na, daut wudd ekj jleewen.

Michelle: Toom seenen, wäa opprechtja es, daut kaun eena nich bloos soo leicht met waut utfinjen.

Sofia: Nä.

Michelle: Daut eena daut utfinjen kaun, wudd eena ieescht motten jenuach Tiet loten vegonen, daut sikj daut utwiesen wudd, un aundre wudden eenem motten beoobachten, aus daut werkjlich soo wia, daut eena opprechtja wia.

Sofia: Daut wudd ekj uk sajen.

Michelle: Nu kjikj noch eemol, waut daut doa en 1. Mose sajcht. Säd de Soton, daut hee stoakja wia aus Gott?

Sofia: Nä.

Michelle: Daut wudd Gott dän Soton sea haustich haben kunt wiesen. Oba enne Städ daut wull de Soton sajen, daut hee opprechtja wia aus Gott. Hee säd soo to sajen to Eva: “Gott licht die väa, oba ekj saj die de Woarheit.”

Sofia: Daut es intressaunt.

Michelle: Gott es weis, un doawäajen wist hee, daut et daut baste wia, daut doa Tiet vejinkj, daut sikj daut kunn utwiesen. Met de Tiet wudd et gaunz kloa woaren, wäa de Woarheit jerät haud un wäa de Läajna wia.

Sofia: Oba aus Eva ieescht jestorwen wia, haud sikj daut dan nich aul kloa utjewäsen, daut Gott de Woarheit räd?

Michelle: En wesse Stekjen jo. Oba en dän Soton siene Beschuldjunk wia noch mea met en. Kjikj wie noch eemol no Varsch 5. See mol, waut de Soton noch to Eva säd.

Sofia: Hee säd, daut wan see wudd von de Frucht äten, dan wudden äare Uagen op sennen.

Michelle: Jo. Un hee säd noch: “Jie woaren soo aus Gott sennen, un weeten, waut goot un waut schlajcht es.” De Soton deed Gott aulsoo beschuljen, daut dee waut goodet trigjhilt von de Menschen.

Sofia: Ekj kaun vestonen.

Michelle: Dit wia eene groote Beschuldjunk.

Sofia: Waut meenst du doamet?

Michelle: Met daut, waut de Fient säd, wull hee sajen, daut Eva, un rajcht jesajcht uk aule Menschen, daut wudd bäta gonen, wan Gott nich äwa de Menschen rejieren deed. Un bie dit wia daut wada krakjt soo: Jehova wist, daut et daut baste wia, wan hee dän Soton daut leet bewiesen, aus hee em rajchten wia ooda nich. Doawäajen haft Gott daut toojeloten, daut de Soton fa eene jewesse Tiet äwa dise Welt rejieren kunn. Daut moakt daut kloa, woosoo daut enne Welt soo väl schlajchtet jeft. Daut es wäajens de Soton aules oppe Welt rejieet un nich Gott. * Oba doa es uk noch goode Norecht.

Sofia: Waut dan?

Michelle: De Schreft lieet ons twee sea wieetvolle Sachen äwa Gott. Daut ieeschte es, daut Jehova ons halpt, wan wie lieden motten. Soo wia daut bie dän Kjennich David. Kjikj mol, waut hee oppschreef em Psalm 31:8 (PB). David haud sea väl schwoaret beläft, oba kjikj mol, waut hee en een Jebäd to Gott säd. West du dän Varsch läsen?

Sofia: Jo, ekj woa. Daut sajcht: “Ekj woa froo sennen un mie to diene truhoatje Leew freien, daut du mien Älent aunsitst un opp miene Seel äare Noot achten deist”.

Michelle: Soo aus wie seenen kjennen, wan David uk sea väl schwoaret beläwen must, treest am daut oba to weeten, daut Jehova daut sach, waut hee aules derchjinkj. De Menschen kjennen daut nich emma feelen, woo ons daut jeit. Oba Jehova kaun metfeelen, wan ons daut schlajcht jeit. Treest die daut, daut Jehova soo metfeelent es?

Sofia: Jo, daut deit.

Michelle: Daut tweede es, daut Gott daut nich woat tooloten, daut ons daut woat fa emma schlajcht gonen. Soo aus de Bibel lieet, woat Gott boolt met dän Soton siene Harschoft een Enj moaken. Un aulet schlajchte, waut doa passieet es, woat hee wada gootmoaken. Doa es uk soont met en, wua diene Mame aun lieden mott. Kaun ekj de näakjste Wäakj trigjkomen un die wiesen, wuarom wie ons kjennen soo secha sennen, daut Gott met aulet Lieden woat een Enj moaken? *

Sofia: Daut hieet sikj mie moakhauftich.