•  Mbimbi jia Gisendeselo 2

•  Umonyi Udi mu Mbimbi ya Nzambi 3-5

  •  Diskur 3

  •  Ndaga jia Ndando jia mu Nyuma 4

  •   Lutango lua Biblia 5

•  Yikadikile mu Mudimo wa Gulongesa 6-14

  •  Gusendesa Guta Maga nu Athu 7

  •  Guvutugila Athu 8

  •  Gubuisa Athu Alandudi 9

  •  Kotelesela Muthu Malongo Etu 10

  •  Diskur 11

  •  Luholo lua Gutshita Badevuare 12

  •  Kadre 13

  •  Video nu Mikanda 14

•  Makalegelo a Uklisto 15-16

  •  Gulonguga gua Biblia mu Hungu 16

•  Mbimbi jia Gisugishilo 17

•  Malongo Gudi ana a Khalasa 18

•  Tangua 19

•  Vizite ya Mutadi Muwendji 20

•  Phoso ya Asamble 21

•  Phoso ya Guwunguluga Gufua gua Yesu 22

•  Mutuameji wa Gudibungisa gua Lujingu nu Mudimo wa Uklisto 23

•  Mutuameji wa Gudibungisa gua Mukatshi dia Phoso 24

•  Muhanyi wa Malongo 25

•  Khalasa dia Mbadi nga dia Thathu 26

•  Video 27

1. Malongo awa adi mukunda nu gukuatesa athu adi nu badevuare mu Gudibungisa gua Lujingu nu Mudimo wa Uklisto. Athu adi nu badevuare adi naye gutanga muabonga malongo ahanewa mukunda nu devuare diawo gifua luholo mukanda Lujingu nu Mudimo wa Uklisto udi guyimonesa, gutuama dia gulondega devuare. Tudi mutoga alongeshi agasue ha gukhala hehi ha gutshita badevuare. Athu anyi anaza mu gudibungisa gua mu hungu phoso nu phoso, ajiya nji gutshita badevuare gula ana tumagela malongo a Biblia nu adi nu makalegelo gifua Aklisto. Gula muthu mumoshi gashigo mulongeshi uvi watshigina gusendesa gukalaga badevuare, udi naye guta maga nu mutuameji wa Gudibungisa gua Lujingu nu Mudimo wa Uklisto ha gutala gula watagenesa gale ndaga jiana togewa ha gutshita badevuare, gungima mutuameji udi naye gumuwambela gula wajiya gutshita nga ndo. Tangua adi muta n’enji maga, muthu wana gumulongesa Biblia udi naye gukhala hene (nga mvuaji jienji gula adi Matemue a Yehowa). Ndaga jiana togewa jidi luholo lumoshi nu jinyi ana toga muthu udi mutshigina gubua mulongeshi khenji gabatijiwa ndo.—od-F Mukh. 8 par. 8.

2. Munuta umoshi. Gungima dia lungimbo lua gisendeselo nu gisambu, mutuameji wa gudibungisa udi naye guhana athu nzala ya gutegelela ndaga tuza mulonguga. Udi naye nji guzuelela ndaga jia ndando jiza mukuatesa aphangi mu hungu.

 3. Diskur: Minuta 10. Mukanda wa Gukalegela mu Gudibungisa gua Lujingu nu Mudimo wa Uklisto wana monesa muto wa lumene wa diskur edi, nu matangi a ndando mbadi nga thathu a diskur diene. Diskur edi didi naye gukalegewa gudi mukulu nga gudi mukuateshi wa mudimo wana longesa kiawaha. Gula programe ya phoso idi musendesa nu mukanda uhe-uhe wa Biblia, mudi naye thomo gutala video ya mukanda wene. Muzuedi udi naye gumonesa gudivua gudi mukatshi dia ndaga jidi mu video nu muto wa lumene wa diskur dienji. Uvi, udi naye guzuelela matangi agasue a ndaga jiamutogewa mu mukanda wa gukalegela mu gudibungisa. Gula tangua didi guene, muzuedi udi naye nji guzuelela ifuanesa nu matangi a verse jidi muzuelela diskur dienji. Wajiya guzuelela ba referanse ako ha gukotelesela athu muabonga devuare dienji.

 4. Ndaga jia Ndando jia mu Nyuma: Minuta 10. Gitshinyi egi gidi phamba nu mihu nu mvutu; gushigo nu funu ya guzuela mbimbi jia gisendeselo nga jia gisugishilo. Gidi naye gutuamezewa gudi mukulu nga ndo gudi mukuateshi wa mudimo wana longesa kiawaha. Mutuameji udi naye guhula athu mihu yagasue mbadi. Mutuameji wajiya gutomba gula verse jiagasue jiahagewa hene jidi naye gutangewa nga ndo. Athu adi mutombewa ha guhana mvutu nga komantere, adi naye guzuela mu ba seconde 30 nga goshi.

 5. Lutango lua Biblia: Minuta nguana. Devuare edi didi naye gukalegewa gudi phangi wa yala. Phangi watombewa ha gutshita devuare edi, gashigo naye guzuelela mbimbi jia gisendeselo nga jia gisugishilo. Mutuameji wa gudibungisa gua mukatshi dia phoso udi naye gukuatesa ana a khalasa ha gutanga muabonga, mu luholo lualeba ha gukotelesa, ha gushidimina mbimbi kiawaha, ha gusombegesa dijui, ha gumagana mu mafundo atagana, nu ha gutanga gifua luholo ana zuela masugu agasue. Itshinyi iko ya utangi wa Biblia yakhala yaleha, uvi iko yahihia. Hene, mutuameji wa Gudibungisa gua Lujingu nu Mudimo wa Uklisto udi naye gujiya ana khalasa muabonga hadi muene guaahana badevuare.

6. Minuta 15. Gitshinyi egi gia gudibungisa gialondewe ha guhana alongeshi agasue formasio ya mudimo wa gulongesa nu ha guaakuatesa ha gukudisa luholo luawo lua gulongesa mbimbi ya Nzambi. Gula luholo ludi guene, akulu ajiya nji guhanewa devuare mu gitshinyi egi. Mona wa khalasa wagasue udi naye gulandula muabonga longo didi mu gamukanda Gulongesa nga Zumba Athu dinyi diasonegewa mu paranteze mu devuare didi mu Mukanda wa Gukalegela mu Gudibungisa. Matangua ako, mbaahaga badevuare a lumene nu hungu. Gitshinyi giene gidi naye gukalegewa gudi mukulu nga gudi mukuateshi wa mudimo munu wana longesa muabonga.—Tala  paragrafe 15 idi muzuelela luholo lua gutuameza gitshinyi egi.

 7. Gusendesa Guta Maga nu Athu: Devuare edi didi naye gukalelgewa gudi phangi wa yala nga wa mukhetu. Gula diahanewa gudi phangi wa yala, udi naye gudikalagala nu phangi muko wa yala. Gula diahanewa gudi phangi wa mukhetu, udi naye guditshita nu phangi muko wa mukhetu. Uvi, diajiya guhanewa gudi phangi wa yala nu wa mukhetu gula adi enya fami imoshi. Aphangi adi mutshita devuare ajiya gukhala hashi nga ndo.—Ha gujiya ndaga jiavula jiatadila luholo lua gutshita devuare edi nu kadre, tala  paragrafe 12 nu  13.

 8. Guvutugila Athu: Devuare edi didi naye gukalelgewa gudi phangi wa yala nga wa mukhetu. Gula diahanewa gudi phangi wa yala, udi naye gudikalagala nu phangi muko wa yala. Gula diahanewa gudi phangi wa mukhetu, udi naye guditshita nu phangi muko wa mukhetu. Uvi, diajiya guhanewa gudi phangi wa yala nu wa mukhetu gula adi enya fami imoshi. (km-F 5/97 diyiji 2) Aphangi adi mutshita devuare ajiya gukhala hashi nga gumagana mu molu. Mona khalasa udi naye gumonesa ndaga tudi naye guzuela gula tuavutugila muthu wasuangulugile nu giamatshidia mu gudimona gua thomo.—Ha gujiya ndaga jiavula jiatadila luholo lua gutshita devuare edi nu kadre, tala  paragrafe 12 nu  13.

 9. Gubuisa Athu Alandudi: Devuare edi didi naye gukalelgewa gudi phangi wa yala nga wa mukhetu. Gula diahanewa gudi phangi wa yala, udi naye gudikalagala nu phangi muko wa yala. Gula diahanewa gudi phangi wa mukhetu, udi naye guditshita nu phangi muko wa mukhetu. (km-F 5/97 diyiji 2) Aphangi adi mutshita devuare ajiya gukhala hashi nga gumagana mu molu. Devuare edi didi naye gumonesa ulongogi wa Biblia unu wasendesa gale. Mona wa khalasa gashigo naye guzuela mbimbi jia gisendeselo nga jia gisugishilo, uvi wajiya guyitshita gula longo diamuhanewa didi mutoga ngenyi. Aphangi adi mutshita devuare ajiya gutanga paragrafe adi mutadila, uvi ishigo nu ndando ha gujitanga jiagasue mu dijui diakoma.

 10. Kotelesela Muthu Malongo Etu: Gula gitshinyi egi gidi diskur, phangi wa yala udi naye guditshita. Uvi gula gidi gifezegeselo, giajiya gukalegewa gudi phangi wa yala nga wa mukhetu. Gula giahanewa gudi phangi wa yala, udi naye gugikalagala nu phangi muko wa yala; gula giahanewa gudi phangi wa mukhetu, udi naye gugitshita nu phangi muko wa mukhetu; uvi, gula giahanewa gudi phangi wa yala nu wa mukhetu, adi enya gukhala enya fami imoshi. Mona wa khalasa udi naye gutanga muabonga ndaga jidi mu ba referanse ahanewa ha guhana mvutu yabonga nu gutema guagasue gu muhu wahudiwa gu muto wa lumene wa devuare dienji. Mona wa khalasa wajiya guwambela athu referanse yazudi muene malongo enji nga ndo.

 11. Diskur: Devuare edi didi naye gukalegewa gifua diskur mu hungu, gudi phangi wa yala. Gula diskur dienji diazudiwa mu appendice A a gamukanda Zumba Athu, mona wa khalasa udi naye gumonesa luholo tuajiya gukalegela ba verse adi hene mu mudimo wa gulongesa. Ha gufezegesa, wajiya gukotelesa tangua ditshi tuajiya gutanga verse yene, gukotelesa verse nu luholo tuajiya gutangigiza verse yene nu muthu tudi mulongesa. Uvi gula diskur diazudiwa mu longo dimoshi dia gamukanda Zumba Athu, mona wa khalasa udi naye gumonesa luholo tudi naye gukalegela longo diene mu mudimo wa gulongesa. Wajiya guzuelela gifezegeselo gidi mu gitshinyi gia 1 gia longo diene, nga guzuelela verse jiko jidi mu longo diene, gula wamonyi egi jiajiya gukuatesa athu.

   12. Luholo lua Gutshita Badevuare: Malongo adi mu paragrafe eyi nu yinyi yalandula, adi mutadila devuare dia “Gusendesa Guta Maga nu Athu” nu “Guvutugila Athu”. Gula atogele ndaga iko, mona wa khalasa udi naye gutshgita ngolo ha gulongesa malongo a Biblia anyi adi musuanguluisa muthu adi muta n’enji maga, nu gubemba muhu wajiya gumuhana nzala ya guza muta n’enji maga mu masugu adi muza. Mona wa khalasa udi naye gutomba ndaga athu adi muzuelela mu terituare yawo yinyi yajiya gumukuatesa ha gukuata mitshima ya athu. Wajiya guhana mukanda nga gutalesa video idi mu Ikadigilo ya Gulongesela Biblia nga ndo. Mona wa khalasa gashigo naye gukuata ima ya guzuela mu muto, uvi udi naye guzuela mu luholo ludi mumonesa egi udi gudisha ha fundo dia athu ako; udi naye nji guzuela gifua luholo luana zuela muene masugu agasue.

   13. Kadre: Mona wa khalasa udi naye gulandula muabonga ndaga amutogi mu kadre mu gudivua nu ndaga jia mu dimbo diawo. Ha gufezegesa:

1.  (1) Inzo nu Inzo: Kadre eyi idi mumonesa gulongesa inzo nu inzo—ikhale tuaya gu mifulo ya athu, tuaalongesa gu telefone, nga gula tuaasonegela mikanda. Idi nji mumonesa guvutugila athu anyi tuatele nawo maga tangua tualongesele inzo nu inzo.

2.  (2) Longesa Gula Waheta Okazio: Kadre eyi idi mumonesa luholo wajiya gulongesa gula waheta okazio tangua mudi muta maga nu muthu watagana n’enji. Wajiya guzuelela matangi a Biblia gudi mafuta aye a mudimo, mafuta aye a khalasa, gudi athu muana khala nawo hehi nga tangua mudi mu gamiyo nga ha moto nga fundo diagasue udi mutshita mudimo.

3.  (3) Gulongesa ha Fundo dia Athu Avula: Kadre eyi idi mumonesa gulongesa lukuma luabonga gu présentoir mobile, mu mazando (gisalo), mu mabala-bala akoma, mu ba parking nu mu mafundo agasue tuajiya gusanga athu avula.

 14. Video nu Mikanda: Mona wa khalasa wajiya gutalesa video nga guhana mukanda mu gudivua nu ndaga yatagana naye muene. Gula devuare dienji didi nu video, nga ndo gula mona wa khalasa watshigina gutalesa video, udi naye gutshita gifua udi guyitalesa gungima ayizuelela, uvi gashigo naye guyitalesa tangua adi mutshita devuare.

15. Minuta 15. Gungima dia lungimbo, gitshinyi egi giana khala nu devuare dimoshi nga mbadi alondewe ha gutumonesa luholo lua gutumagela malongo a Biblia. Gitshinyi egi giajiya gutuamezewa gudi mukulu nga gudi mukuateshi wa mudimo wajiya gulongesa kiawaha; uvi gula gidi muzuelela milonga ya gulondega mu hungu, gidi naye gukalegewa phamba gudi mukulu. Gula gitshinyi giene gidi nu devuare dia lumene nu hungu, muthu udi mutuameza wajiya nji guhula mihu iko hadi muene mutuameza gutuama dia guhula mihu yinyi yasonegewa guene. Mbimbi jienji jia gisendeselo jidi naye gukhala jia hihia ha gubemba tangua mukunda nu ndaga jia dando jia devuare dienji nu hagula athu ahete tangua dia guhana mvutu. Gula gitshinyi giene gidi nu interview, muthu udi naye guhudiwa mihu gashigo naye gukhala hashi, uvi udi naye guya gu estrade ha guhana mvutu.

  16. Gulonguga gua Biblia mu Hungu: Minuta 30. Gitshinyi egi gidi naye gutuamezewa gudi mukulu wana longesa muabonga. (Mu mahungu anyi ashigo nu akulu avula, gula luholo ludi guene gitshinyi egi giajiya gutuamezewa gudi mukuateshi wa mudimo wana longesa muabonga.) Hunji dia akulu didi naye gutomba akulu adi atagana ha gutuameza Gulonguga gua Biblia mu Hungu. Akulu anyi atombewa, adi naye gutuameza mu luholo luabonga ha gunemesa tangua diahanewa, adi naye nji guzuelela verse jidi nu matangi a ndando, nu gukuatesa athu ha gukotelesa luholo lua gukalegela ndaga adi mulonguga. Ajiya guheta ukuateshi mu malongo ana hanewa athu ana tuameza ba devuare a mihu nu mvutu. (w23.04 Galuanda ha diyiji 24) Gula muamanesela gutadila ndaga jiagasue jia gitshinyi gialondewe mukunda nu phoso yene, mushigo naye gulunda ndaga jiko ha gutagenesa minuta. Gula luholo ludi guene, phoso nu phoso, muajiya gusombegesa mutuameji nu muthu udi naye gutanga ba paragrafe. Gula mutuameji wa Gudibungisa gua mukatshi dia phoso watoga mutuameji wa Gulonguga gua Biblia mu Hungu ha guhihisa gitshinyi gienji, muene wajiya gutomba luholo lua guyikalagala. Wajiya gutomba paragrafe jia gutanga, uvi jiko gahudi phamba mihu.

17. Minuta thathu. Mutuameji wa Gudibungisa gua Mukatshi dia Phoso udi naye guvutugila itshinyi ya ndando ya gudibungisa. Udi naye nji guzuelela mu guhihia ndaga jia gulonguga mu phoso idi muza. Gula tangua didi guene, wajiya gutanga majina a ana khalasa mbaatshita badevuare mu phoso idi muza. Gula luholo ludi guene, kominike nu mikanda iko ya ndando yajiya nji gutangewa gudi mutuameji wa gudibungisa tangua didi muene muzuela mbimbi jia gisugishilo. Uvi kominike jiko gifua ndaga jia mudimo wa gulongesa, programe ya gulonda nu guweva Inzo ya Ufumu, jishigo naye gutangewa gu estrade. Jidi naye guhagewa gu tablo dia kominike. Gula tangua dia guzuelela mbimbi jia gisugishilo didi diazonda ha guhana kominike nga gutanga mikanda, mutuameji wa gudibungisa wajiya gutoga aphangi adi nu badevuare mu gitshinyi Makalegelo a Uklisto ha guhihisa badevuare awo gula luholo ludi guene. (Tala  paragrafe 16 nu  19.) Gudibungisa gudi naye gusugishiwa nu lungimbo nu gisambu.

18. Gungima dia gulandula devuare dia mona khalasa wagasue, mutuameji wa Gudibungisa gua Mukatshi dia Phoso udi naye guzula munuta umoshi ha gumushimana nu gumuhana malongo adi mu longo diamutogewa. Gula mutuameji watamega mona khalasa ha guza mutshita devuare dienji, gashigo naye guzuelela gutuama longo diamutogewa. Gula mona khalasa wamanesela gutshita devuare dienji, mutuameji udi naye gumushimana. Gungima, wajiya giwa guzuelela longo diamutogewa. Udi naye gumonesa luholo lutshi mona khalasa gakalegela longo diene muabonga, nga ndo gumuwambela nu gisemo giagasue gishina gadi naye gutshita ngolo ha gudikalagala kiawaha. Mutuameji wajiya nji guzuelela ndaga jiko jia devuare gula wamona egi ndaga jiene jiajiya gukuatesa mona khalasa nga aphangi ako mu hungu. Gungima dia gudibungisa nga mu tangua diko ngenyi, mutuameji wajiya nji guhana ana khalasa malongo ako mu gisuegi adi mu gamukanda Zumba Athu, Gulongesa nga mu mukanda École du ministère. Malongo ene ajiya gutadila longo diakalagala mona wa khalasa nga longo diko ngenyi.—Ha gujiya ndaga jiavula jiatadila mudimo wa mutuameji wa Gudibungisa gua Lujingu nu Mudimo wa Uklisto nu ginemo gia muhanyi wa malongo, tala  paragrafe 19,  24, nu  25.

19. Badevuare agasue adi naye gukalegewa mu tangua diatogewa, mutuameji wa Gudibungisa gua Mukatshi dia Phoso gashigo naye gudia tangua. Mukanda wa Gukalegela mu Gudibungisa gua Lujingu nu Mudimo wa Uklisto wana hana minuta ya badevuare agasue, gula badevuare ene akalegewa muabonga, ishigo nu ndando egi ana a khalasa alezele ndaga jiko ha gutagenesa tangua dinyi diasadi. Gula aphangi ako adia kumbi, mutuameji wa Gudibungisa gua Mukatshi dia Phoso nga muhanyi wa malongo udi naye guaahana lubelo mu gisuegi. (Tala  paragrafe 24 nu  25.) Gudibungisa guagasue, nu ngimbo nu isambu, gudi naye gutshita tangua dimoshi nu minuta 45.

20. Gula mutadi muwendji weza mutala hungu dienu, programe ya gudibungisa gua mu hungu idi naye gukalegewa gifua luholo idi ya gusonega mu Mukanda wa Gukalegela mu Gudibungisa gua Lujingu nu Mudimo wa Uklisto. Uvi Gulonguga gua Biblia mu Hungu gushigo naye gukalegewa. Ha fundo dienji, mutadi muwendji mbawutshita diskur dienji dia mudimo dia minuta 30. Gutuama dia diskur diene, mutuameji wa gudibungisa udi naye guzuelela mu mbimbi jiazonda matangi a ndando tualonguga mu gudibungisa nu ndaga mbatulonguga mu phoso idi muza. Udi naye nji guhana kominike jidi mutoga egi jihanewe, nu gutanga mikanda idi mutoga egi itangewe. Gungima, udi naye gutamega mutadi muwendji ha guza mutshita diskur dienji. Gungima dia diskur dienji, mutadi muwendji udi naye gutoga athu ha guyimba lungimbo luatombi muene. Wajiya gutamega phangi muko ha guza mukalagala gisambu gia gisugishilo. Mu tangua dia vizite ya mutadi muwendji, badevuare agasue adi naye gukalegewa phamba mu khalasa dia thomo. Gushigo naye gukhala nu khalasa diko dia mbadi. Gula hungu didi nu groupe iko yana gudibungisa mu zuelelo diko, groupe yene idi naye gutshita programe yawo ya gudibungisa. Uvi mbayidibungisa nu hungu ha gulandula diskur dia mudimo dia mutadi muwendji.

21. Mu phoso ya asamble a lusugu lumoshi nga a masugu thathu, tushigo naye guya mu gudibungisa gua mu hungu. Aphangi adi naye gutadila ndaga jia gulonguga mu phoso yene mu gukombelela guawo gua mu fami nga mu gulonguga guawo hakhawo.

22. Gula lusugu lua Guwunguluga Gufua gua Yesu luabua mu lusugu lua mukatshi dia phoso, Gudibungisa gua Lujingu nu Mudimo gua phoso yene gushigo naye gukalegewa.

23. Hunji dia akulu didi naye gutomba mukulu mbawukhala Mutuameji wa Gudibungisa gua Lujingu nu Mudimo wa Uklisto. Ginemo gienji gidi gia gukuatesa hagula gudibungisa gukalegewe muabonga mu gudivua nu malongo awa. Udi naye guta maga muabonga nu muhanyi wa malongo. Gula Mukanda wa Gukalegela mu Gudibungisa gua Lujingu nu Mudimo wa Uklisto waheta, mutuameji wa Gudibungisa gua Lujingu nu Mudimo wa Uklisto udi naye gukhapha badevuare agasue mukunda nu mbeji jiene mbadi. Udi naye gutomba athu mbaatshita badevuare a mukatshi dia phoso, nu mutuameji wa mukatshi dia phoso munu udi mukatshi dia akulu anyi atombewe gudi hunji dia akulu; udi naye nji guhana badevuare a ana a khalasa. (Tala  paragrafe 3-16 nu  24.) Hadi muene mukhapha badevuare, udi naye gutadila mvula jia mona wa khalasa wagasue, nu eksperianse yenji nu gutala gula mona wa khalasa muene udi diago watagana ha guzuela muabonga devuare diahanewa. Udi naye nji gutshita ngenyi hadi muhana muene badevuare ako a mukatshi dia phoso. Mona wa khalasa udi naye guhanewa devuare phoso jitatu gutuama egi lusugu lua gudikalagala lutagane. Adi naye gumuhana nadio ha diyiji dia Devuare dia mu Gudibungisa gua Lujingu nu Mudimo wa Uklisto (S-89). Mutuameji wa Gudibungisa gua Lujingu nu Mudimo Wa Uklisto udi naye guhaga kopi ya programe ya gudibungisa gu tablo. Hunji dia akulu diajiya gutomba mukulu muko nga mukuateshi wa mudimo ha gumukuatesa. Uvi, phamba akulu adi naye guhana badevuare anyi ashigo a ana a khalasa.

24. Phoso yagasue, mukulu mumoshi mbawutuameza Gudibungisa gua mukatshi dia phoso. (Mu mahungu anyi akulu ashigo avula, gula luholo ludi guene gitshinyi egi giajiya gutuamezewa gudi mukuateshi wa mudimo wana longesa kiawaha.) Mutuameji muene udi nu ginemo gia gulondega mbimbi jia gisendeselo nu jia gisugishilo jia gudibungisa. Muene udi naye gutamega muthu wagasue ha guza mutshita gitshinyi giko gia gudibungisa, uvi gula akulu ashigo avula, muene nji wajiya gutshita badevuare ako, muavula gubalega itshinyi idi nu video inyi yana toga ndo egi athu azuele. Gungima dia devuare diagasue mutuameji udi naye gutshita komantere jiahihia. Hunji dia akulu didi naye gutomba akulu adi atagana ha gutuameza gudibungisa gua mukatshi dia phoso. Akulu ene mbaatuameza gudibungisa guene mahugo avula. Ha gutadila ndaga jia mu hungu dienu, Mutuameji wa Gudibungisa gua Lujingu nu Mudimo wa Uklisto wajiya gutuameza gudibungisa gua mukatshi dia phoso muavula gubalega akulu ako. Gula hunji dia akulu diamona egi mukulu mumoshi udi watagana ha gutuameza Gulonguga gua Biblia mu Hungu, idi mumonesa egi mukulu muene wajiya nji gutuameza gudibungisa gua mukatshi dia phoso. Uvi jiyenu egi, mukulu yonu watombewa ha gutuameza gudibungisa, udi naye gukhala muthu wana shimana athu ako, nu wana hana malongo nu guzumba guagasue gudi ana a khalasa ahanewa badevuare. Mutuameji wa gudibungisa gua mukatshi dia phoso udi nu ginemo gia gutshita yagasue hagula gudibungisa guhue mu tangua diatagana. (Tala  paragrafe 17 nu  19.) Gula mutuameji wa gudibungisa watshigina, nu gula gu estrade yenu gudi nu fundo, muajiya guhaga micro iko hagula wajiya gutamegela aphangi ako ha guza mutshita badevuare awo. Wajiya nji gutshigina gukhala ha nguasa gu estrade tangua mona khalasa adi mutshita lutango lua Biblia, nu mu tangua dia gitshinyi Yikadikile mu Mudimo wa Gulongesa. Gutshita ngenyi guajiya gumikuatesa ha gutuna gudia tangua.

25. Gula luholo ludi guene, hanenu ginemo egi gudi mukulu wana longesa kiawaha. Ginemo gienji gidi gia guhana malongo gudi akulu nu akuateshi a mudimo mukunda nu badevuare awo a mu Gudibungisa gua Lujingu nu Mudimo wa Uklisto, nu badiskur a athu agasue, nu aphangi ana tuameza nu ana tanga paragrafe jia Inzo Yaleha ya Mutaledi nu Gulonguga gua Biblia mu Hungu. (Tala  paragrafe 19.) Gula hungu didi nu akulu avula adi mujiya gulongesa kiawaha, givo nu givo, hunji dia akulu diajiya gusombegesa muhanyi wa malongo. Ishigo nu ndando egi gungima dia devuare diagasue diakalagala phangi, muhanyi wa malongo amuhane lubelo.

26. Gula hungu didi nu ana a khalasa avula, ana a khalasa ako ajiya gukalagala badevuare awo mu khalasa dia mbadi nga dia thathu. Khalasa dia mbadi nga dia thathu, didi naye gutuamezewa gudi mukulu. Uvi gula luholo ludi guene, diajiya nji gutuamezewa gudi mukuateshi wa mudimo wajiya gulongesa kiawaha. Hunji dia akulu didi naye gutomba nanyi wajiya gutuameza khalasa diene, nu gula aphangi ene adi naye gusombegesewa phoso nu phoso. Mutuameji udi naye gulandula ndaga jidi mu  paragrafe 18. Gula khalasa dia ngiadi nga dia thathu didi guene, mutuameji wa gudibungisa mbawutoga ana khalasa ha guya mu khalasa diene gungima dia gitshinyi Ndaga jia Ndando jia mu Nyuma. Gungima dia gulandula gitshinyi Yikadikile mu Mudimo wa Gulongesa, ana a khalasa adi naye guvutuga ha gudibungisa luko nu hungu. Gula mudi mutshigina gutala video, athu adi mu khalasa dia mbadi nga dia thathu, adi naye guyitalela nu guyizuelela ha fundo didi ene gula luholo ludi guene. Uvi gula luholo lushigo guene, mutuameji wa khalasa dia mbadi nga dia thathu, wajiya guyitalesa mu telefone nga mu tablete, gungima ayizuelela nu aphangi.

27. Gudi nu video jialondewe mukunda nu gudibungisa gua Lujingu nu Mudimo wa Uklisto. Tuajiya gukalegela apareye, tablete nga ordinatere ha guzula video jiene mu JW Library^® nu gudigungisa gua mukatshi dia phoso.

© 2023 Watch Tower Bible and Tract Society of Pennsylvania

S-38-KIP 11/23