Ha mavu agasue mafumu aleta ambile mikhuala egi athu ashigo naye gukhala hehi-hehi nu athu avula ashigo naye gudibungisa fundo dimoshi. Matemue a Yehowa ana gutumagela mikhuala yene, uvi ana landula nji gukalagala gudibungisa gua mu hungu ngatshima ashigo fundo dimoshi. Ha gukalagala gudibungisa gua mu hungu mu njila ya vidéoconférence, aphangi ana kalegela ba applications agudisha gifua Zoom.

Ha gula gudibungisa guetu gukhale mukalegewa phoso nu phoso nu ha gutuna ingoza, Hunji dia Akulu Atuameji azudile desizio dia gukalegela misomonyi yana hanewa ha gusumba compte Zoom mukunda nu ma hungu. Gutshita ngenyi guakuatesele diago ma hungu ashigo nu mbongo jia gusumba compte yene ha gukalagala gudibungisa mu njila ya vidéoconférence. Compte yene yana sumbishiwa mu 15 dolar, 20 dolar nga gubalega. Mahungu ene akhalele thomo mukalegela ba application anyi anago gusumbishiwa. Uvi, ba application ene akhalelego mukuatesa athu avula ha gukalegela vidéoconférence, ba application ene nji ana khala nu ingoza yavula. Mahungu agasue anyi ana kalegela compte Zoom yasumbile organisation, ajiya gubamba compte yawo muluholo luabonga nu yajiya nji gukuatesa athu avula ha gulandula gudibungisa guene. Mangino, mahungu gubalega 65000 a muyifutshi gubalega 170 adi mukalegela compte Zoom.

Hungu dia Kairagi, gu Manado, gu Sulawesi Nord, mu gifutshi gia Indonésie, abembele gukalegela application anago gusumbishiwa ha gukalegela compte Zoom yasumbile organisation mukunda nu vidéoconférence. Phangi Hadi Santoso udi muzuela egi: “Ikhale aphangi a mala nu aakhetu anyi anago gujiya muabonga luholo lua gukalegela ordinateur, tablette nga telephone. Mangino ajiya gulandula gudibungisa muabonga, handaga connexion yana gusangesa luko ndo tangua gudibungisa gua muhungu guana kalegewa.”

Phangi Lester Jijón, udi mukulu mu hungu dia Guayacanes Est mu dimbo dia Guayaquil, gu Équateur, udi muzuela gamba: “Luholo aphangi a mala nu aakhetu avula ashigo nu mbongo jiavula, mahungu avula akhalelego nu luholo lua gusumba compte Zoom, hagula aphangi ajiya gulandula gudibungisa gua mu hungu. Mangino, tudi muhana organisation mvudi yavula mukunda nu compte Zoom, yana gutukuatesa ha gutamega athu avula ha gulandula gudibungisa gua mu hungu muabonga, handaga connexion yanago gusagesa.”

Johnson Mwanza, udi mukulu mu hungu dia Ngwerere Nord mudimbo dia Lusaka, gu Zambie, udi muzuela egi: “Aphangi a mala nu aakhetu avula ana guzuela iphungu yavula egi, ‘compte Zoom organisation ya sumbile yanago gutukuatesa phamba ha gukhala nu ufuta wakola nu aphangi etu, uvi yana gututuma ha gujiya egi Yehowa wana gutuzumba nu wana gudisagesa mukunda nu esue.’”

Ha gusumba comptes jiene organisation wa kalegele mbongo jiana hanewa mukunda nu gukuatesa aphangi’etu ana buila lamba. Mbongo jiene jiana katuga gu misomonyi aphangi a ha mavu agasue ana hana. Misomonyi yene yavula yana hanewa mu njila ya site Internet yetu ha fundo dia sonegewa egi donate.pr418.com Mvudi yavula aphangi mukunda nu misomonyi muana hana, misomonyi yene yana gukuatesa nji ha guhana mango gudi aphangi a ha mavu agasue anyi ana buila lamba.—2 Kolinto 8:14.