¿Däje jähuä? Ttö̧ja̧ pi̧jä̧nä̧ kä̧nö̧ juiyo jättecu ötö’cö jähuä. Ujutu’inä jä’ecuä’ijätöjä a̧’cua̧ra̧’a̧ pi̧yȩmä̧:

• ¿Dios ujuturu amöcuäda’a ja̧’a̧di̧?

• Curä’inä, ubara ttuhuähuä’inä ¿beipächäcua’a ja̧’a̧di̧?

• ¿Däje ’cuäopa’attö ’corujuotächö o’ca’amä?

• Tahuaruhuä ’corujuo’ächinätörömä ¿pä’äji ta’anö totö’a̧nö̧ ja̧’a̧di̧?

• ¿Tta̧’a̧nö̧ jö̧nä̧ tucuocu’a̧nö̧ ja̧’a̧ttö̧ Dios ä̧ju̧cua̧tö̧ pä’ömä?

• ¿Tta̧’a̧nö̧ tö̧’o̧cui̧’ö̧’a̧nö̧ ja̧’a̧ttö̧ eseäcuähuämä?

¿Torö tusu’a̧nö̧ ja̧’a̧ttö̧ pi̧yȩ jäecuä tö̧’o̧cui̧’a̧ pä’ömä? Korotö ttö̧ja̧rö̧ jätepomenä o’ca toi’önä i̧mi̧cu̧nä̧ ttädätäcuotö. Ja̧’hua̧ta̧nö̧, iglesia ’chu̧ä̧rä̧cuä̧huä̧ ttö̧ja̧rö̧’i̧nä̧, iglesiara̧’a̧ ’chä̧tö̧rö̧’i̧nä̧ jätepöttömä, pitömä o’ca toi’önä i̧mi̧cu̧nä̧ ttädätäcuotö pi̧yȩ jätepömä. Pitö jittäumä adihua’a a̧’cuä̧rö̧nä̧ ji’ähuätö, ja̧’hua̧nö̧ ja̧’a̧nä̧ recuo mo̧ro̧mä̧ ppädoca’a, täcö ppädoca’a pä’ö pärou icuätö.

Ja̧’hua̧nö̧ ja̧’a̧nä̧ ji’täte cuyäru’tä ka̧’a̧ yoröiso yapareu jiähuoco’tä, pi’tä jiäumä ’cuäopönä teseta pä’ö ja̧’a̧. Jesucristo Diosrö ucuocu pä’inödo: “Ucutä cui̧huȩnȩ iso päi’önä huȩnȩ ja̧’a̧” (Juan 17:17). Jitä mo̧ro̧mä̧ pi̧yȩnä̧ huo̧juä̧tö̧jä̧ Dios I̧huȩnȩ Isä’tä pä’ö. Pi̧yȩ o’comenä ichönä beönä̧tä̧ tädätäcuotöjä jäecuä huäme räopö, huäjunä cu̧huo̧juä̧chi̧’ö̧nä̧.

¿TTA̧’A̧NÖ̧ PÄ’Ö JÄTECUA’ATTÖ PI̧YȨMÄ̧?: Jitä mo̧ro̧ recuätö korotörö suronä jȩtta̧’a̧ttö̧, rö̧ȩnä̧ surojö ka̧’a̧, ja̧’hua̧nö̧ ja̧’a̧ttö̧ recuätö ttö̧ja̧mä̧ ubara ttu’ätö. Recuätö iglesia ’chu̧ä̧rä̧cuä̧huä̧ ttö̧ja̧mä̧ huo̧juȩtä̧tö̧ surojö ’cuäopa’a Diosrö pä̧huä̧ rö̧ja̧’a̧ttö̧.

DIOS I̧HUȨNȨ ISÄ’TÄ HUO̧JUȨTÖ̧MÄ̧: Diosmä yoröiso surojö ’cuäopa pä’ömä jȩpo̧cö̧. Santiago 1:13nä päa’a: “Diosmä suronä jȩa̧ päʼömä amöcuädocö. Ja̧ʼhua̧ta̧nö̧ Diosmä hueʼocö korotörö, suronä jȩtta̧ päʼömä”. Dios ujuturu repea’attö, pä̧huä̧ rö̧jä̧cu̧ o’ca toi’önä ttö̧ja̧ eseu surojö juiyönä ttö̧ja̧cua̧ pä’ö. Ja̧’hua̧nö̧ ja̧’a̧ttö̧, Jesúsmä huo̧juȩti̧nö̧ Diosrö ucuocu jätepa pä’ö: “Täʼo Dios, mo̧ro̧jä̧ra̧ʼa̧ kö̧jä̧ [. . .] [“Jȩpi̧ ucu curuhuo ichäcua’a̧nö̧”, TNM]. Pi̧jä̧nä̧ ucurutä pä̧huä̧ rö̧jö̧mä̧ jȩtta̧ja̧, mo̧ro̧jä̧nä̧ jȩttö̧ʼa̧nö̧” (Mateo 6:9, 10). Iso päi’önä Dios ujuturu juiyo a̧mö̧cuä̧ra̧’a̧ttö̧, rö̧ȩnä̧ micuäu u̧ju̧nä̧rö̧ iyinö churutä pä̧huä̧ rö̧jö̧ ’cuäopa pä’ö (Juan 3:16).

Ja̧’hua̧ta̧nö̧ tocu’a̧nö̧ ja̧’a̧ Génesis 1:26-28; 1 Pedro 5:6, 7nä’inä.

¿TTA̧’A̧NÖ̧ PÄ’Ö JÄTECUA’ATTÖ PI̧YȨMÄ̧?: Rö̧ȩnä̧ curä ka̧’a̧ttö̧, recuätö ttö̧ja̧ ’corujuo’ächätö. Iso päi’önämä, o’ca toi’önä ujutumä ubara ttu’ätöjä.

DIOS I̧HUȨNȨ ISÄ’TÄ HUO̧JUȨTÖ̧MÄ̧: Diosmä pä’inö curä juiyönä tö̧ja̧cuä̧cuo̧tö̧jä̧ pi̧jä̧ rȩjȩnä̧. Dios uruhuo mo̧ro̧jä̧ra̧’a̧ttö̧ pi̧jä̧ rȩjȩra̧’a̧ hueomenämä, ttö̧ja̧mä̧ “täcö curä jȩtta̧ pä’ö ttu̧huo̧jui̧’i̧yä̧cuo̧tö̧”, ttöcurodiyä’inä rȩjȩ adicuä juottepäcuotö (Isaías 2:4). Ja̧’hua̧ta̧nö̧, ubara ttuhuähuä’inä, korotö korotörö suronä jȩttö̧’i̧nä̧ Diosmä si’epö i̧cuä̧cua̧. Dios I̧huȩnȩ Isä’tänä päa’a ’cuäopä̧cuȩ: “Ttajuähuomenä, Dios ttöʼäre ʼca̧huä̧cua̧. Täcö ʼcorupäiʼäcuähuäʼinä, ajuäcuähuäʼinä, tta̧ʼcua̧ tta̧huȩcuä̧cuä̧huä̧ʼi̧nä̧, ubara ttuhuähuäʼinä juiyäcuaʼa. Oʼca juiyönä päʼäji ka̧cui̧nö̧mä̧ [pi̧yȩ ö̧’quȩtȩnä̧ surojö jitä ’cuäopö’inä] ʼcuäopinaʼa” (Apocalipsis 21:3, 4).

Ja̧’hua̧ta̧nö̧ tocu’a̧nö̧ ja̧’a̧ Salmo 37:10, 11; 46:9; Miqueas 4:1-4nä’inä.

¿TTA̧’A̧NÖ̧ PÄ’Ö JÄTECUA’ATTÖ PI̧YȨMÄ̧?: Recuätö iglesia ’chu̧ä̧rä̧cuä̧huä̧ ttö̧ja̧mä̧ huo̧juȩtä̧tö̧ ta̧’cuä̧ru̧hua̧ rä’opö ö̧ja̧ pä’ö ’corujuotächomenä. Pä’ätö ’corujuo’ächinätömä suronä jȩpä̧tö̧ pi̧jä̧nä̧ ka̧cuä̧tö̧rö̧, ja̧’hua̧ta̧nö̧ Diosmä esetocotörö ro̧’ȩpö̧ ocurära̧’a̧ hue’ö ubara ttutta pä’ö ’cuäopönä, pä’ätö.

DIOS I̧HUȨNȨ ISÄ’TÄ HUO̧JUȨTÖ̧MÄ̧: ’Corujuotächomenämä mo̧ro̧jä̧ra̧’a̧’i̧nä̧, kara’a’inä ’cho̧co̧tö̧jä̧, to’epächätöjä. Eclesiastés 9:5nä päa’a “ ’corujuo’ächinätömä ji̧’qui̧chä̧nö̧’i̧nä̧ yoröiso ttö̧’ȩpä̧ro̧co̧tö̧”. Pitömä yoröiso huo̧juo̧co̧tö̧, barahuächi’oco̧u̧, koro juäinä jȩpo̧co̧tö̧. Ja̧’hua̧nö̧ ja̧’a̧ttö̧, pi̧jä̧nä̧ ka̧cuä̧tö̧rö̧’i̧nä̧ suronä jȩpo̧co̧tö̧, ppä’ädö’inä ppä’ädocotö (Salmo 146:3, 4).

Ja̧’hua̧ta̧nö̧ tocu’a̧nö̧ ja̧’a̧ Génesis 3:19; Eclesiastés 9:6, 10nä’inä.

¿TTA̧’A̧NÖ̧ PÄ’Ö JÄTECUA’ATTÖ PI̧YȨMÄ̧?: O’ca toi’önä eseu tö̧ja̧cua̧ pä’ätöjä tahuaruhuä juiyo repetä̧u̧cu̧. Ja̧’hua̧nö̧ ja̧’a̧ttö̧, tahuaruhuä ’corujuo’ächinätörö’inä pä’äji ta’anö tota pä’ätöjä.

DIOS I̧HUȨNȨ ISÄ’TÄ HUO̧JUȨTÖ̧MÄ̧: Recuätö ’corujuo’ächinätömä pä’äji ta’anö ttö̧ja̧cuä̧cuo̧tö̧. Jesúsmä pä’inödo chutä jȩä̧cuȩ: “Yodoji mo̧ro̧ oʼca toiʼönä ʼcorupäʼiʼinätö i̧huȩnȩ ttä̧ju̧cu̧ mo̧ro̧ päiʼäcuaʼa. I̧huȩnȩ ttä̧ju̧cuo̧mȩnä̧, ʼcorupättiʼinomettö rättopächäcuotö” (Juan 5:28, 29). Dios ä’coji päinö ta’anö, pi̧jä̧ rȩjȩ adihuächäcua’a. Ttö̧ja̧ pi̧jä̧ rȩjȩnä̧ tto’ächätömä pi̧yȩ ’cuäopa’a tottäcuotö. Ja̧u̧nu̧ pä̧nä̧mä̧, Dios päö ta’anö jȩpä̧tö̧mä̧ ’cuäopönä eseu ttö̧ja̧cuä̧cuo̧tö̧, na̧huä̧chä̧cuä̧huä̧ juiyönä. I̧huȩnȩ Isä’tä päa’a: “Diosmä, chutä hueö ta’anö jȩpä̧tö̧rö̧tä̧ pi̧jä̧ rȩjȩ i̧yä̧cua̧, pitömä pi̧jä̧ rȩjȩnä̧ ’cuäopönä ttö̧ja̧cuä̧cuo̧tö̧” (Salmo 37:29).

Ja̧’hua̧ta̧nö̧ tocu’a̧nö̧ ja̧’a̧ Job 14:14, 15; Lucas 7:11-17; Hechos 24:15nä’inä.

¿TTA̧’A̧NÖ̧ PÄ’Ö JÄTECUA’ATTÖ PI̧YȨMÄ̧?: Recuätö ttö̧ja̧mä̧ Diosrö ucuocuätö. Ja̧’hua̧nö̧ ja̧’a̧nä̧, Diosrö ttucuocua’anä ä̧ju̧cuo̧cö̧ pä’ö amöcuädätö.

DIOS I̧HUȨNȨ ISÄ’TÄ HUO̧JUȨTÖ̧MÄ̧: Diosrö tucuocu ötö’cö jähuä Jesús u̧huo̧juȩto̧mȩnä̧mä̧, pä’inödo tamöcuädoca’a ja̧’a̧tä̧ amönämä tucuocua pä’ömä jo̧ca̧’a̧, Diosrö jerupätö ttucuocuʼa̧nö̧mä̧. Jesúsmä pä’inödo pitö amöcuädätö: “Rö̧ȩnä̧ tucuocuomenä, Dios ujuturu ä̧ju̧cuä̧cua̧ päʼö” (Mateo 6:7). Dios ujuturu ä̧ju̧cua̧tö̧ pätöttömä, churutä pä̧huä̧ rö̧jo̧mȩnä̧ tucuocua pä’ö ja̧’a̧. Ja̧’hua̧nö̧ ja̧’a̧ttö̧ tu̧huo̧jui̧’a̧ pä’ö ja̧’a̧ churutä pä̧huä̧ rö̧jö̧tä̧. 1 Juan 3:22nä päa’a: “Diosrö pä̧huä̧ rö̧jö̧ jȩto̧mȩnä̧, hueinö taʼanö jȩta̧ʼa̧ttö̧ ja̧u̧ ujuturu iyö oʼca juiyönä jätepömä”.

Ja̧’hua̧ta̧nö̧ tocu’a̧nö̧ ja̧’a̧ Salmo 65:2; Juan 14:6, 14; 1 Juan 5:14nä’inä.

¿TTA̧’A̧NÖ̧ PÄ’Ö JÄTECUA’ATTÖ PI̧YȨMÄ̧?: Recuätö ttö̧ja̧mä̧ rö̧ȩnä̧ aditätö pärätä ttu̧ju̧nä̧ra̧ pä’ö, korotö políticanä do’ächätö, korotö universidad huo̧jui̧pä̧tö̧, pi̧yȩ jȩto̧mȩnä̧ eseu tö̧ja̧cuä̧cuo̧tö̧jä̧ pä’ö, amöcuädö jȩpä̧tö̧. Pi̧yȩ jȩtta̧’a̧nä̧ eseunu ka̧cuo̧co̧tö̧.

DIOS I̧HUȨNȨ ISÄ’TÄ HUO̧JUȨTÖ̧MÄ̧: Jesúsmä ji’ähuinödo, jȩta̧ pä’ö jö̧ eseu tö̧ja̧cua̧ pä’ö: “Abonänö eseunu ttö̧ja̧cuä̧cuo̧tö̧ Dios i̧huȩnȩ ä̧ju̧cu̧ päö taʼanö jȩpä̧tö̧mä̧” (Lucas 11:28). Ujutu ta̧’cua̧ru̧hua̧ jähuättö recuä rö̧jö̧ jȩtö̧ttö̧tä̧, iso päi’önä eseunu tö̧ja̧cuä̧cuo̧tö̧jä̧: recuä rö̧jä̧u̧jä̧ iso päi’önä huȩnȩ Dios ötö’cö jähuä’inä, Dios ujuturu jȩä̧cuȩ ötö’cö jähuä’inä tu̧huo̧jui̧’a̧ pä’ö. Pi̧yȩ iso päi’önä huȩnȩmä̧ Dios I̧huȩnȩ Isä’tänä ka̧’a̧, ppä’ädä̧u̧jä̧ adiu jȩta̧ pä’ö, surojö jȩti̧ya̧ pä’ö. Tamöcuädönä’inä, mo̧ro̧ jö̧ ta’anö jȩtö̧nä̧’i̧nä̧ Dios I̧huȩnȩ Isä’tä oipö ta’anö jȩto̧mȩnä̧mä̧, adiu eseu ka̧cuä̧tö̧jä̧ (Mateo 5:3).

Ja̧’hua̧ta̧nö̧ tocu’a̧nö̧ ja̧’a̧ Proverbios 3:5, 6, 13-18; 1 Timoteo 6:9, 10nä’inä.

 Pi̧yȩ jäecuä ötö’cö jähuä täcö huo̧jui̧pä̧jä̧tö̧jä̧ beönä̧tä̧ Dios I̧huȩnȩ Isä’tänä. ¿Juhua’a yabocö cu̧huo̧jua̧ päcuhua’a? “Dios i̧huȩnȩ Isä’tänä päö ta’anö” jȩpä̧tö̧ jȩttö̧ ta’anö ucu’inä jȩcu̧’a̧ päcuttumä, ucu cu̧huo̧jua̧ pä’öjä a̧’cua̧ra̧’a̧. Ja̧’hua̧nö̧ ja̧’a̧ttö̧ jäecujä ’qui̧’i̧ ka̧’a̧ Dios ujuturu repea’attömä ¿tta̧’a̧nö̧ pä’ö Diosmä jaroa’attö surojö’inä, ubara ttuhuähuä’inä ’cuäopönämä? Ja̧’hua̧ta̧nö̧ jäecujä a̧’cua̧ra̧’a̧ ¿tta̧’a̧nö̧ eseu chö̧jö̧’a̧nö̧ ja̧’a̧ttö̧ chahuaruhuäcumä? I̧huȩnȩ Isä’tämä jiähua’a huäjunätä pi̧yȩ jätecu.

Ja̧’hua̧nö̧ ja̧’a̧nä̧, recuätö ttö̧ja̧mä̧ Dios I̧huȩnȩ Isä’tä ttucuocua pä’ö kö’cocotö. Jeruhuä ttu̧huo̧juä̧chi̧’a̧ pä’ömä, pä’ätö. Jäcuhuecu Dios I̧huȩnȩ Isä’tänä cu̧’o̧cui̧’a̧ pä’ömä ¿usu ppätädacu päcuhua’a? Pi̧yȩ jȩcu̧’a̧ pä’ömä, Testigo Jeohuamä tiyö’a̧nö̧ ja̧’a̧ todäre jähuätä.

Äcuomenäjimä, iyätöjä yi’täte cuyäru’tä̧ micua’tä̧ Diosrö Ä̧ju̧cui̧ ’cuäopönä cu̧ja̧ pä’ö. Pi’tä cuyäru’tämä jȩpö̧ ku̧nä̧huä̧’tä ttö̧ja̧rö̧ ppätäda pä’ö, jahuätö pi̧jä̧nä̧ kä̧nö̧ juiyo jättecu Dios I̧huȩnȩ Isä’tänä huäjunätä ädätö, ttu̧huo̧jua̧ pä’ö. Todärenämä, micuä juiyönä ucuru tu̧huo̧juȩtö̧’a̧nö̧ ja̧’a̧. Ya̧tȩ Testigo Jeohua u̧huo̧juȩta̧ pä’ö jȩpö̧ ku̧nä̧hua̧mä̧ i̧’chä̧cua̧ cuojusodera̧’a̧, ja̧’hua̧nö̧ jo̧ca̧’a̧ jö̧ttö̧mä̧ ucu päcuhuome, u̧huo̧juȩta̧cu̧ pä’ö semana jö̧ ta’anö. Recuätö ttö̧ja̧rö̧ pi̧yȩ tu̧huo̧juȩtö̧mä̧ ppäda’a, pitömä tta̧’cua̧ eseu pä’ätö iso päi’önä huȩnȩ po̧cui̧pä̧jä̧tö̧jä̧.

Ucu’inä cueseu’a̧nö̧ ja̧’a̧, I̧huȩnȩ Isä’tänä iso päi’önä huȩnȩ ka̧cu̧ po̧cui̧pö̧. Märipä jähuättö’inä, yapareu Diosrö esetätöjä pä’ätö jittäuttu’inä, koro yetecuttu’inä ejädö icuä̧u̧jä̧, pi̧yȩ iso päi’önä huȩnȩmä̧. Ja̧’hua̧nö̧ ja̧’a̧ttö̧, ta̧’cua̧ eseu ka̧cuä̧tö̧jä̧, tä’ca ja̧’a̧cu̧ jähuä’inä eseunu tta̧’ä̧rä̧tö̧jä̧. Jesús päinö ta’anö: “Iso päiʼönä huȩnȩ cu̧huo̧jui̧ʼä̧cuo̧tö̧jä̧. Ja̧ʼhua̧ta̧nö̧ ja̧u̧ huȩnȩ ucuturu ppädäcuaʼa surojöttö cuejächiʼätucua päʼö” (Juan 8:32).