Nä̧tö̧ yettecuocaʼa ttö̧jö̧nä̧—Dios I̧huȩnȩ Isäʼtä ppädö huȩnȩ
Pi̧jä̧ pa̧ja̧cu̧nä̧ recuätö nä̧tö̧ ppo̧ʼä̧tö̧rö̧, nä̧tö̧ möäyotörö, nä̧tö̧ ttamönä ʼquiʼächätöröʼinä suronä jȩpä̧ʼi̧jä̧tö̧. ¿Ucuruʼinä ʼcuäopäʼijaʼa? Diosrömä, ¿tocu päʼö rö̧ȩnä̧ micuähuaʼattö adiunä cu̧ja̧ päʼö? Nä̧tö̧rö̧ suronä jȩä̧cuä̧huä̧ siʼepö icua päʼö, ¿däje jȩä̧cua̧ʼa̧ttö̧? Pi̧yȩ huo̧jui̧cuä̧nä̧ tocuʼäcuajujä.
“Cha̧ʼu̧cuä̧i̧ttö̧ päiʼönä chuböomä ttörö suronä jȩpö̧ cuäcuäpö, baraunäʼinä päʼäʼinö. Täcö böa chö̧jo̧mȩnä̧ chirecuorö chȩmi̧nö̧ oʼcaʼaʼinä chö̧sä̧da̧ ttörö suronä jȩpä̧ʼi̧nä̧ju̧. Chirecuo ja̧ju̧ʼi̧nä̧, jäʼoʼinä ttörö abora̧ʼa̧ huettö aditäʼinäjusä. Cuäʼäu chicuähua pädäunä ji̧na̧ʼa̧” (Madhu, a Indiara̧ʼa̧ttö̧).
La Organización Mundial de la Salud päaʼa “pi̧jä̧ pa̧ja̧cu̧nä̧ nä̧tö̧mä̧ ra̧huä̧rö̧ surojö jö̧nä̧ jȩttä̧u̧”. Ja̧ʼhua̧ta̧nö̧ jiähuaʼa tresnö nä̧tö̧ttö̧ yajuterö cuäcuäpöʼinä, ubo isajucu jȩttö̧ taʼanö köjöʼcocaʼanä jȩpä̧ʼchä̧tö̧ päʼö.
Ucuru pi̧yȩ ʼcuäopaʼa jä̧ʼi̧ja̧ʼa̧ jö̧ttö̧mä̧ cuäcuäpöʼinä, baraunä pättäʼchönäʼinä, ubo isajucu jȩttö̧ taʼanö jȩttä̧ʼcha̧ʼa̧ jö̧nä̧ʼi̧nä̧ ʼcuäopöʼa̧nö̧ jö̧mä̧ yecuhuecunä jä̧cua̧jä̧ a̧ʼcua̧ra̧ʼa̧. Pi̧yȩ ʼcuäopaʼa tocuʼomenä ujutu nä̧tö̧mä̧ micuä huocotöjä päcuhuäunä jä̧cua̧jä̧ a̧ʼcua̧ra̧ʼa̧. Ja̧ʼhua̧nö̧ ja̧ʼa̧nä̧ nä̧tö̧mä̧, ¿Diosrö micuä huotö ja̧ʼa̧di̧?
Dios I̧huȩnȩ Isäʼtänä i̧jȩpa̧ʼa̧ Diosmä pä̧huä̧ rö̧jä̧cu̧ nä̧tö̧ ra̧huȩpi̧jö̧ juiyönä ttö̧ja̧ päʼö
Diosmä nä̧tö̧ ttötöʼcö, ¿tocu toaʼattö?
Dios I̧huȩnȩ Isäʼtä jiähuaʼa: “Uboröʼinä, isajuruʼinä aditinödo” (Génesis 1:27, Traducción del Nuevo Mundo).
Tu̧huo̧juä̧chi̧ʼa̧ päʼö: Diosmä uboröʼinä, isajuruʼinä uhuäbeʼinaʼattö ta̧ju̧cuäyotörö ttucuota päʼö ja̧ʼa̧. Ja̧ʼhua̧ta̧nö̧ pä̧huä̧ rö̧jä̧cu̧ ya̧tȩ irecua ku̧nä̧rö̧mä̧ amönä repeäcuäu taʼanö irecuaröʼinä repea päʼö. Irecuarö cuäcuäpö huȩʼä̧rö̧ʼi̧nä̧, baraunä päʼäʼchöʼinä jȩa̧ päʼö jo̧ca̧ʼa̧ (Efesios 5:33, Tä̧do̧ Ä̧cua̧ I̧huȩnȩ; Colosenses 3:19). Huäjunä i̧jȩcuä̧cha̧ʼa̧ Diosmä pä̧huä̧ rö̧jä̧cu̧ nä̧tö̧ yettecuocaʼa ttö̧ja̧ päʼö.
“Cha̧ʼu̧cuä̧i̧ chahuaruhuättö yotöcunä ubo isajucu jȩö̧ taʼanö jȩtti̧nä̧cua̧sä̧. 17 a̧ʼȩ chu̧ju̧nä̧ro̧mȩnä̧ chaditomettö chu̧ru̧hua̧ päʼinö: ‘ubo isajucu jȩö̧ taʼanö ttöcu jȩcu̧ʼo̧ca̧ʼa̧ jö̧ttö̧mä̧ doʼopö chicuäcuajujä’. Jitä chamönä ʼquiʼächaju chö̧jo̧mȩnä̧ chirecuoʼinä, chä̧ʼo̧tö̧ʼi̧nä̧, chojusode ppeyä kä̧tö̧ʼi̧nä̧ micuä huocoju jö̧nä̧tä̧ jȩttä̧cua̧sä̧. Ja̧ʼhua̧nö̧ ja̧ʼa̧nä̧ Jeohua, b pi̧jä̧ oʼca juiyö uhuäbeʼinörö huo̧juä̧chä̧ʼi̧jä̧ju̧sä̧. Nä̧tö̧rö̧ ucuotö päʼö chu̧huo̧juä̧cho̧mȩnä̧ repeäcuasä päʼöʼinä, äʼca jo̧mȩttö̧ micuä huajusä päʼöʼinä huäjunä huo̧juä̧chi̧ʼi̧nä̧ju̧sä̧” (María, Argentinara̧ʼa̧ttö̧).
Cua̧ʼcua̧ adihuächiʼönä, ¿däje ppädöʼa̧nö̧ ja̧ʼa̧ttö̧?
Dios I̧huȩnȩ Isäʼtä jiähuaʼa: “Ya̧tȩ amönä ö̧jä̧hua̧ yaocuttuʼinä iso päiʼönä a̧hua̧ru̧hua̧ repeʼö ja̧u̧ttu̧ ʼquȩʼi̧cho̧cö̧” (Proverbios 18:24, TNM).
Tu̧huo̧juä̧chi̧ʼa̧ päʼö: Iso päiʼönä tahuaruhuä päiʼönä kä̧tö̧mä̧ ʼcuäopönä ppättädäcuotö. Cua̧ʼcua̧ tta̧cu̧huȩcu̧ ya̧tȩ cua̧ʼcua̧ cu̧huȩnä̧rä̧cu̧ru̧ jiʼähui, ja̧ʼhua̧nö̧ jȩcu̧ʼo̧mȩnä̧ cua̧ʼcua̧ tta̧nö̧ jö̧ ʼcuäoiʼönä päiʼöʼa̧nö̧ ja̧ʼa̧.
“20 a̧ʼȩ ʼcuäopinö oʼcaʼatä jiʼähuinäjusä ttörö ubo isajucu jȩttö̧ taʼanö chöjöʼcocaʼanä jȩtti̧nö̧ jähuämä. Abora̧ʼa̧ cha̧ʼcua̧ roʼecu, cha̧ʼcua̧ tta̧ʼȩcu̧ʼi̧nä̧ chö̧jo̧mȩnä̧ cheseu juiyönä ji̧na̧ʼa̧. Ttörö ʼcuäopinö jidäu ä̧ju̧cua̧ päʼörö jidähuomenä juiyo cha̧ʼcua̧ chȩmö̧nä̧ päiʼinaʼa” (Elif, Turquíara̧ʼa̧ttö̧).
Dios I̧huȩnȩ Isäʼtä jiähuaʼa: “Oʼca juiyönä cuamöcuädätucumä, Diosrö jiʼähuätucui. Ja̧u̧tä̧ a̧mö̧cuä̧rö̧ ucuturu” (1 Pedro 5:7, TÄ̧I̧).
Tu̧huo̧juä̧chi̧ʼa̧ päʼö: Diosrö cucuocuomenä Ja̧u̧mä̧ ʼcuäopönä ä̧ju̧cu̧ (1 Pedro 3:12, TÄ̧I̧; 1 Juan 5:14). Diosmä rö̧ȩnä̧ repeäcuajä. Ja̧ʼhua̧nö̧ ja̧ʼa̧ttö̧, “rö̧ȩnä̧ micuä huajusä” päʼö tocuʼäcuäunä ppädäcuajä.
“Korotö jacuänä baraunä jȩtti̧na̧ʼa̧nä̧ Jeohuarö chu̧huo̧juä̧cho̧mȩnä̧ yoyoja̧ʼa̧ cha̧ʼcua̧ chȩmö̧nä̧ ppädinaʼa. Jitämä jacuänä ʼcuädopö yedocaʼa Diosrö ucuocuäjusä, Diosmä cha̧hua̧ru̧hua̧ jö̧nä̧ hua̧ ʼcuädopö u̧huo̧juä̧chi̧ʼa̧ʼa̧ttö̧” (Ana, Belicera̧ʼa̧ttö̧).
Nä̧tö̧rö̧ suronä jȩä̧cuä̧huä̧, ¿Diosmä siʼepö i̧cuä̧cua̧ ja̧ʼa̧di̧?
Dios I̧huȩnȩ Isäʼtä jiähuaʼa: “Reyotöröʼinä, tta̧ʼcua̧ tta̧ʼȩcuä̧tö̧rö̧ʼi̧nä̧ jueönä jȩcu̧ʼä̧cua̧jä̧, ttö̧ja̧ i̧sa̧ ʼco̧ru̧juo̧ä̧chä̧cua̧mä̧ yettecunä jȩi̧yä̧cua̧ʼa̧nö̧” (Salmo 10:18, TNM).
Tu̧huo̧juä̧chi̧ʼa̧ päʼö: Jeohuamä jueönä jȩä̧cuä̧huo̧cö̧ʼi̧nä̧, nä̧tö̧rö̧ suronä jȩä̧cuä̧huä̧ʼi̧nä̧ yodojinänö siʼepö i̧cuä̧cua̧.
“Jeohua yodojinänö nä̧tö̧ ppo̧ʼä̧tö̧rö̧, nä̧tö̧ möäyotörö, nä̧tö̧ ttamönä ʼquiʼächätöröʼinä suronä jȩä̧cuä̧huä̧ siʼepö i̧cuä̧cua̧ päʼö chu̧huo̧juä̧cho̧mȩnä̧ abora̧ʼa̧ cha̧ʼcua̧ chȩmö̧nä̧ ppädinaʼa. Pi̧yȩmä̧ cha̧ʼcua̧ rodecu juiyönä jȩä̧ʼi̧ja̧ʼa̧” (Roberta, Méxicora̧ʼa̧ttö̧).
Dios I̧huȩnȩ Isäʼtänä yodoji ʼcuäopä̧cuȩ jiäuʼinä, piʼtänä jiäunä tocu päʼö ta̧ʼcua̧ tu̧huȩnä̧rö̧ʼa̧nö̧ ja̧ʼa̧ttö̧ päʼöʼinä, Jeohua ötöʼcö jähuä jiʼähuätö Dios I̧huȩnȩ Isäʼtänä tocu jö̧nä̧ ppättädaʼattö päʼöʼinä cu̧huo̧jua̧ päcuttumä, ttu̧huo̧juȩta̧cu̧ päʼö jäʼepi.
a Ttamönä tti̧mi̧ jo̧cö̧.
b Jeohua päʼömä, Dios i̧mi̧ ja̧ʼa̧ (Salmo 83:18) Huo̧jui̧cuä̧ “¿Quién es Jehová?” päome topi
Puede que también le interese
UJUTU TÖTÖʼCÖ
Dios I̧huȩnȩ Isä’tä cu̧huo̧jui̧’a̧ pä’ö jä’epitö
Micuä juiyönä Dios I̧huȩnȩ Isä’tättö iso päi’önä huȩnȩ huo̧jui̧pi̧. ¿Torö cu̧huo̧jui̧’a̧ päcuhua’attö? ¿Däje horanä cu̧huo̧jui̧’a̧ päcuhua’attö? Isojänä ji’ähuitö.
