Kingdom Nius No.  37

WANFALA MESSAGE FOR FULL WORLD

Klosap Nao False Religion Bae Finis!

▪ Wanem nao false religion?

▪ Hao nao bae hem finis?

▪ Hao nao diswan bae affectim iu?

 Wanem nao false religion?

Waswe, hem mekem iu feel sorre for lukim wei wea religion nao bihaenem olketa nogud samting wea pipol duim againstim olketa narawan? Waswe, wei wea pipol wea sei olketa servem God duim olketa samting wea nating followim justice olsem war, terrorism, and raverave fasin, hem mekem iu feel nogud? Why nao hem luk olsem religion nao main samting wea kosim staka problem?

Problem hia, hem no evri religion, bat hem false religion. Wanfala man bilong religion wea staka pipol respectim, Jesus Christ, showimaot hao false religion kosim pipol for duim olketa wicked samting, olsem wei wea ‘wanfala tree wea rotten bae garem frut wea nogud.’ (Matthew 7:15-17) Wanem kaen frut nao kamaot from false religion?

False Religion . . .

◼ JOIN INSAED WAR AND POLITIK: Datfala magasin Asiaweek, hem sei: “Long Asia and long olketa nara ples, olketa leader wea barava aftarem big paoa, duim olketa samting wea no followim justice for barava kontrolem tingting and feeling bilong pipol saed long religion for mekem olketa savve kasem wanem olketa laekem.” Disfala magasin talem hao samting wea kamaot from diswan nao hem hao “luk olsem full world hem klosap tumas for barava nogud nao.” Wanfala bigman bilong religion long United States hem sei: “Only wei for stopem olketa terrorist for killim pipol dae hem for killim dae olketa terrorist.” Wanem nao idea bilong hem? “Killim dae olketa terrorist, from diswan hem will bilong God nao.” Bat Bible hem talem: “Sapos eniwan hem sei: ‘Mi lovem God,’ bat hem heitim brata bilong hem, hem laea nao.” (1 John 4:20) Jesus hem sei tu: “Gohed for lovem olketa enemy bilong iufala.” (Matthew 5:44) Tru nao, klosap evri religion join insaed war!

◼ SPREDIM OLKETA FALSE TEACHING: Klosap evri religion teachim hao soul or spirit hem wanfala part bilong man wea gohed for laef bihaen hem dae. Plande religion iusim disfala teaching for ravem olketa church member. Olketa askem selen for prea for soul bilong olketa wea dae finis. Bat Bible teachim difren samting. “Soul wea hem sin bae dae.” (Ezekiel 18:4) “Olketa wea laef savve olketa bae dae; bat olketa wea dae finis nating savve long eni samting.” (Ecclesiastes 9:5) Jesus teachim hao olketa wea dae finis bae resurrect. Sapos man garem soul wea no savve dae, wea hem nao wanem olketa religion hia teachim, bae hem no need for resurrect. (John 11:11-25) Waswe, religion bilong iu teachim hao soul no savve dae?

◼ ACCEPTIM DIRTY FASIN: Long samfala kantri, olketa church acceptim olketa homosexual man and woman for kamap olketa priest, and tu, olketa putim hevi long olketa gavman for mekem law wea letem man maritim man and woman maritim woman. Nomata olketa church wea tok againstim dirty fasin tu no aotem olketa bigman bilong olketa wea spoelem olketa pikinini saed long sex. Bat wanem nao Bible teach abaotem diswan? Hem talem klia: “No letem eni samting giamanim iu. Olketa wea duim fornication, or worshipim idol, or duim adultery, or duim homosexual fasin, or man wea leidaon witim man . . . bae no kasem kingdom  bilong God.” (1 Corinthians 6:9, 10) Waswe, iu savve long samfala religion wea acceptim nomoa dirty fasin?

Wanem nao bae happen long olketa religion wea samting olketa duim hem olsem rotten frut? Jesus givim warning olsem: “Evri tree wea no garem gudfala frut bae olketa katem and torowem insaed long fire.” (Matthew 7:19) For sure, God bae katem olketa false religion and distroem olketa! Bat hao and long wanem taem nao diswan bae happen? Wanfala profesi vision long chapter 17 and 18 long buk bilong Revelation insaed Bible, hem givim ansa.

Hao nao false religion bae finis?

Tingim diswan long mind bilong iu. Wanfala jury woman hem sidaon antap long wanfala animal wea barava mekem man fraet. Datfala animal garem sevenfala hed and tenfala horn. (Revelation 17:1-4) Hu nao jury woman hia piksarem? Hem garem paoa “ovarem olketa king bilong earth.” Hem werem purple kaleko, iusim incense, and hem barava rich. And tu, bikos long wei wea hem duim spiritism, ‘hem giamanim evri nation.’ (Revelation 17:18; 18:12, 13, 23) Bible helpem iumi for luksavve hao disfala jury woman hem piksarem no just wanfala religion nomoa, bat evri religion wea samting olketa duim hem olsem rotten frut.

Disfala wild animal wea jury woman raed antap long hem, piksarem olketa gavman long world. * (Revelation 17:10-13) Wei wea false religion raed antap long disfala animal piksarem wei wea hem trae for kontrolem olketa disison and goal bilong olketa gavman hia.

Nomata olsem, wanfala samting wea bae mekem pipol sapraes fogud hem klosap for happen. “Tenfala horn wea iu lukim, and datfala wild animal, . . . bae heitim datfala jury woman and bae spoelem hem and mekem hem naked, and bae kaikaim meat bilong hem and bae bonem hem evribit long fire.” (Revelation 17:16) Pipol bae seke fogud taem seknomoa olketa gavman long world attakim olketa false religion and barava finisim olketa nao! Wanem nao bae muvim olketa for duim diswan? Buk bilong Revelation hem sei: “God putim datwan insaed heart bilong olketa mekem olketa duim samting wea hem nao tingim.” (Revelation 17:17) Tru nao, olketa false religion mas ansa long God for wei wea olketa duim olketa barava nogud samting and long semtaem sei olketa worshipim God. God bae barava showimaot justice taem hem iusim olketa gavman hia wea false religion fren witim for finisim olketa.

Sapos iu no laek for finis witim false religion, wanem nao iu mas duim? Angel bilong God hem talem stret: “Go aot from hem, pipol bilong mi.” (Revelation 18:4) Tru nao, man mas ranawe from false religion distaem, and no delay! Bat waswe, diswan minim for no bilivim eni samting? Nomoa, datwan bae no givim man laef. (2 Thessalonians 1:6-9) Only sef ples nao hem tru religion. Hao nao iu savve luksavve long tru religion?

 Hao for luksavve long tru religion

Wanem gudfala frut nao tru religion shud garem?—Matthew 7:17.

Tru Religion . . .

◼ SHOWIMAOT LOVE: Olketa tru worshiper “no part bilong world.” Olketa “lovem each other,” and kala skin and olketa kastom no spoelem wei wea olketa garem wan mind. (John 13:35; 17:16; Acts 10:34, 35) Winim wei for killim each other dae, olketa barava lovem and willing for dae for each other.—1 John 3:16.

◼ TRUSTIM WORD BILONG GOD: Tru religion no teachim ‘olketa komandment and teaching bilong man,’ bat teaching bilong hem kam from Word bilong God, Bible. (Matthew 15:6-9) Why nao olsem? Bikos “full Bible hem kam from God and hem gud for teachim man, for givim kaonsel, [and] for stretem evri samting.”—2 Timothy 3:16.

◼ STRONGIM OLKETA FAMILI AND ENCOURAGEM PIPOL FOR GAREM HAE STANDARD SAED LONG FASIN: Tru religion trainim olketa hasband for ‘lovem waef bilong olketa olsem wei wea olketa lovem body bilong olketa seleva.’ Hem teachim olketa waef for mekem grow ‘bigfala respect for hasband bilong olketa,’ and hem teachim olketa pikinini for ‘obeyim parents bilong olketa.’ (Ephesians 5:28, 33; 6:1) And tu, olketa wea garem responsibility for lead mas showimaot gudfala example saed long fasin.—1 Timothy 3:1-10.

Waswe, eni religion hem followim olketa standard hia? Datfala buk Holocaust Politics, wea olketa pablisim long 2001, hem sei: “Sapos staka moa pipol duim olketa samting wea Olketa Jehovah’s Witness duim and followim teaching bilong olketa, maet wei wea olketa Nazi killim dae plande million pipol bifor hem nating kamap and wei for killkill olsem bae nating spoelem world moa.”

Tru nao, long 235 kantri, Olketa Jehovah’s Witness preach abaotem olketa hae standard bilong Bible saed long fasin, bat olketa duim moa samting winim wei for preach abaotem datwan nomoa, olketa live followim olketa standard hia tu. Mifala barava encouragem iu for askem Olketa Jehovah’s Witness for helpem iu lanem wanem nao God laekem iu for duim mekem iu savve worshipim hem long wei wea fitim. Iu mas duim samting distaem. No delay. Klosap nao false religion bae finis!—Zephaniah 2:2, 3.

Sapos iu laekem moa information abaotem Bible message wea Olketa Jehovah’s Witness preachim, feel free for raetem leta long address long daon.

□ Mi laekem wanfala copy bilong datfala brochure Gohed for Luk Aot!

Talem wanem languis iu laekem.

□ Plis raet kam long mi abaotem arrangement for garem wanfala free Bible study.

[Footnotes]

[Blurb long page 3]

False religion garem paoa “ovarem olketa king bilong earth”

[Blurb long page 3]

“Go aot from hem, pipol bilong mi”