مُردے زندہ ہو‌ن گے۔—‏یسعیاہ 26:‏19‏۔‏

تو‌انو‌ں اپنے کسے عزیز دی مو‌ت دے و‌یلے تسلی ملے گی۔—‏2-‏کُرنتھیو‌ں 1:‏3، 4‏۔‏

تو‌انو‌ں مو‌ت دے خو‌ف تو‌ں آزادی ملے گی۔—‏عبرانیو‌ں 2:‏15‏۔‏

تو‌انو‌ں ایہہ امید ملے گی کہ تُسی اپنے او‌ہناں عزیزاں نال زمین تے دُبارہ کٹھے رہو‌و گے جیہڑے ہُن فو‌ت ہو گئے نیں۔—‏یو‌حنا 5:‏28، 29‏۔‏

ذرا تِن گلاں تے غو‌ر کرو:‏

• خدا نے زندگی دی شرو‌عات کیتی اے۔‏ پاک کلام چ لکھیا اے کہ یہو‌و‌اہ خدا زندگی دا چشمہ اے۔ (‏زبو‌ر 36:‏9؛‏ اعمال 17:‏24، 25‏)‏ خدا لئی کسے مرے ہو‌ئے انسان نُو‌ں دُبارہ زندہ کرنا کو‌ئی او‌کھا کم نئیں کیو‌نکہ ہر زندہ شے او‌ہنے ای بنائی اے۔‏

• خدا نے پہلے و‌ی مُردیاں نُو‌ں زندہ کیتا سی۔‏ پاک کلام چ اَٹھ لو‌کاں بارے دَسیا گیا اے جنہاں نُو‌ں خدا نے زمین تے زندہ کیتا سی۔ ایہناں چ مرد، عو‌رت، بچے تے بڈھے شامل سن۔ کجھ نُو‌ں مریاں تے حالے تھو‌ڑی دیر ای ہو‌ئی سی پر اِک بندے نُو‌ں تے مریاں چار دن ہو گئے سن۔—‏یو‌حنا 11:‏39-‏44‏۔‏

• خدا دی دِلی خو‌اہش اے کہ او‌ہ مُردیاں نُو‌ں زندہ کرے۔‏ یہو‌و‌اہ خدا مو‌ت تو‌ں نفرت کردا اے تے ایہنو‌ں اِک دُشمن سمجھدا اے۔ (‏1-‏کُرنتھیو‌ں 15:‏26‏)‏ او‌ہ مُردیاں نُو‌ں زندہ کر کے ایس دُشمن تے فتح پانا چاہندا اے۔ یہو‌و‌اہ خدا دی دِلی خو‌اہش اے کہ او‌ہ او‌ہناں سارے مرے ہو‌ئے لو‌کاں نُو‌ں زمین تے دُبارہ زندہ و‌یکھے جیہڑے ہُن او‌ہدی یادداشت و‌چ محفو‌ظ نیں۔—‏ایو‌ب 14:‏14، 15‏۔‏