«Chuʼnchel i tzʼihbʼamaj pan Santo Laj Huuj reʼ i Dios xyeʼwik chaloq» (2 Timoteo 3:16, Santo Laj Huuj, Sociedad Bíblica de Guatemala).

Ne inqareq chi riij i pahqanik ajwaal wach pan qakʼachariik (Proverbios 2:1-5).

Ne inwihʼik jenaj qatobʼaal chi manlik pan qakʼachariik (Salmo 119:105).

Ne inwihʼik qeh jenaj uyuniik (Romanos 15:4).

Hooʼ, qil ixibʼ ehtalil:

• Jenaj wach iruqʼor. 40 chi winaq xitzʼihbʼanik reh i Santo Laj Huuj; xichahmik 1.600 haabʼ. Maʼ chi kunchelaal taj kinabʼeej kiwach, xa reʼ laʼ jenaj wach iruqʼor. Chuʼnchel i Santo Laj Huuj iruyeew ruloqʼil i rubʼihnaal i Dios eh i Rajaawriik.

• Reʼ xitzʼihbʼanik reh, korik xkiqʼor. Reʼ taqeh tzʼihbʼaneel huuj reh najtir qʼiij maʼ xkitzʼihbʼaaj taj i tiʼ kʼaxik xkikʼul i kitinamitaal. Raj laʼ i xitzʼihbʼanik reh i Santo Laj Huuj maʼ xkitzʼap ta naah i kimahk eh xa ta naq reʼ i reh i kitinamitaal (2 Crónicas 36:15, 16; Salmo 51:1-4).

• Chuʼnchel i qʼorooj inooj eloq wach. Reʼ Santo Laj Huuj xuqʼor chi reʼ Sikʼooj Cho Wach narasjik pan tinamit Belén reh Judea. 700 haabʼ ruqʼorom rubʼiral (Miqueas 5:2). ¿Chajarik tinamitaal asjiik wiiʼ Jesús? ¡Manlik chupaam i tinamit Belén! (Mateo 2:1-6).

  Wilik kʼih qʼorik tzʼihbʼamaj pan Santo Laj Huuj xooj eloq wach chi manlik. Reʼ wilih inquyeej chi riij jenaj huuj inchalik ruukʼ i Dios, ¿maj korik? (2 Pedro 1:21).