«Reʼ Dios wilik cho pan taxaaj naa rupabʼaam jinaj naa ruwihiik rajaawriik. [...] maʼ jaruuj naa rusachariik wach» (Daniel 2:44, Santo Laj Huuj, Sociedad Bíblica de Guatemala).

«Jinaj i kʼisa kʼun x-aasjik chi qeh, reʼ i Qajaaw Dios xyeʼwik cho qeh, reʼ chik i reh naa rubʼaniik i taqʼanik» (Isaías 9:6).

• Jenaj ajabʼees manlik ajqʼatal qʼorik eh ne qojrutobʼeej qajuʼjunal (Isaías 48:17, 18).

• Maʼ naj ta chik cho, narubʼanam chi naqakʼachariik pan jenaj akʼ akʼal pan suqkiil kʼuxliis eh maʼxta chik yabʼilaal (Apocalipsis [Revelación] 21:3, 4).

Hooʼ, qil kiʼibʼ ehtalil:

• Reʼ Jesús xukʼuhtaaj chajarik narubʼanam i Rajaawriik i Dios. Reʼ reh xukʼuhtaaj keh i rajtahqaneel chi ne inkipahqaaj pan kitiij chi chaloq i runimaal Rajaawriik i Dios eh ne inbʼanjik ayuʼ wach akʼal jeʼ rukabʼ iraaj i reh (Mateo 6:9, 10). Reʼ Jesús xukʼuhtaaj keh taqeh rajtahqaneel nikʼwach noq narojik eloq wach i tiij reʼreʼ.

  Noq wihʼik wach akʼal, reʼ Jesús xuket taqeh i inkaaj kiwaʼ, xroqʼomaj taqeh yowaabʼ eh xuksaj taqeh kamnaq (Mateo 15:29-38; Juan 11:38-44). Ruum chi reʼ reh i Ajabʼees, xukʼuhtaaj chaloq i narubʼanam i Rajaawriik chi kiij taqeh i kʼachareel kinimanik (Apocalipsis 11:15).

• Reʼ kʼahchiʼ rukʼulariik yuʼnaak irukʼuhtaaj chi maʼ naj ta chik cho wilik i Rajaawriik i Dios. Reʼ Jesús ruqʼorom chaloq chi peet narukʼulariik i puhbʼanik, na ruwihʼik kʼachareel maʼxta kiwaʼ eh yihk (o hihk) xa ahaʼ yuuqʼ. Koreʼ ajreʼ narukʼuliik i runimaal Rajaawriik i Dios eh narukʼamam chaloq suqkilaal wach akʼal (Mateo 24:3, 7).

  Chuwach taqeh i qʼiij wilih kʼahchiʼ chik qilom taqeh kʼaxkilaal wilih, ruum ajreʼ qehtʼal chi maʼ naj ta chik wilik cho i runimaal Rajaawriik i Dios eh narusacham wach taqeh i kʼaxkilal.