Tiqʼoroq kʼisinoq chi riij ahaʼ tichalik eh chajariik taqeh inanimaj

Xinasjik pan haabʼ 1979, ar Estados Unidos. Noq wilik naq weh ixibʼ haabʼ reʼ taqeh i wajaaw xkichʼaq kiibʼ. Reʼ nutuut xirukʼihsaj jeʼ rukabʼ taqeh judío eh kinooj woʼ naq pan tijinbʼal judía irubʼihnaleej naq yeshivás. Noq wilik naq weh wuquubʼ haabʼ xojʼooj ar Israel. Reʼ naq i tijinbʼal kinponik wiiʼ wilik naq pan jenaj kibutz oon yeʼaabʼ reh tik. Noq xikʼik jenaj haabʼ xojʼooj ar México.

Atoobʼ ta maʼ jenoʼ naq i paat loqʼombʼal reh i Dios maʼ najt ta ruukʼ i nupaat, maʼ xnuqʼebʼ ta taqeh i nunimaj. Inuqop woʼ naq taqeh candela pan qʼiij sábado eh inwil woʼ naq wach i Torá, reʼ taqeh loqʼlaj huuj judío. Inubʼan woʼ naq nutiij ruukʼ jenaj huuj reh tiij sidur i rubʼihnaal. Imponik woʼ naq chi nuwach ruqʼorariik keh taqeh i wuchʼihil pan tijinbʼal chi reʼ i nunimanik reʼ naq i reʼ i manlik wach. Reʼ hin maʼ jankʼal ta woʼ naq wilom wach i Akʼ Kʼuhbʼaal, reʼ inqʼorik chi riij i rukʼachariik i Jesús eh i rukamaj chi qʼorooj kʼuhbaal. Reʼ nutuut xuqʼor weh chi maʼ ne ta naq inwil wach ruum chi inyoʼjik naq chi ne inunihej wiibʼ ruukʼ taqeh naʼojbʼal reʼreʼ.

¿Chaaj woʼ reet xakoj akʼux reh rilarik wach i Akʼ Kʼuhbʼaal?

Noq wilik weh wuqlaj haabʼ, xinooj woʼ chik Estados Unidos reh chi xnukohlaaj wach i nutijiniik. Jenaj wamigo ajnimaneel naq xuqʼor weh chi mi maʼ wehtʼal wach i Jesús, reʼ i nukʼachariik maʼ manlik ta naq wach.

—Eh reʼ hin xnuqʼor reh, «Reʼ taqeh kʼachareel inkikoj wach i Jesús xa kijotʼarik».

—Eh reʼ reh xuqʼor weh, «¿Awilom na jenoʼ pech i Akʼ Kʼuhbʼaal?»

—«Maʼchih ta», xnuqʼor reh.

—Jeʼ reʼ noq, reʼ reh xuqʼor: «Mi maʼ awilom wach ¿nikʼwach ne inaqʼor chi xa kijotʼarik? Maʼ holohik ta chi ne tiqʼorik mi maʼxta awehtʼal chi riij. Reʼreʼ xa memil.»

Reʼ taqeh xuqʼor xponik pan wanima, ruum chi jeʼ woʼ naq reʼ inukapaaj i hin. Atoobʼ ta xinkʼixik, xnukʼul reh i ruSanto Laj Huuj, xnukʼam jeʼ pan paat reh rilariik wach i Akʼ Kʼuhbʼaal.

¿Chajariik xakʼax wach ruukʼ i xawil?

Xusach nukʼux runabʼjiik chi reʼ Akʼ Kʼuhbʼaal reʼ taqeh judío xitzʼihbʼanik reh. Jeʼ reʼ noq, noq inwil naq wach chi qʼun qʼun chi riij i ruk’achariik i Jesús inwil naq chi reʼ reh jenaj winaq ajkʼaxool, maʼ runimbʼisaj ta naq riibʼ eh chi iraaj naq rutobʼeem taqeh kʼachareel. Xinooj woʼ pan jenaj biblioteca eh xwehsaj cho juʼjun taqeh huuj reʼ kiqʼorik naq chi riij. Xa reʼ laʼ, maʼ jenoʼ reh taqeh i huuj reʼreʼ xubʼan chi xnukoj wach chi reʼ reh, reʼ naq i chihooj wach. Juʼjun inkiqʼor naq chi reʼ reh i Dios, xa reʼ laʼ reʼ i wilih maʼxta naq rukorkiil. Ruum chi inukapaaj naq: ¿Ajwach uukʼ naq inqʼorik i Jesús noq irubʼan naq rutiij? ¿Xa rutkeel na iruqʼorej riibʼ?. Eh reʼ Jesús xkimik woʼ, xa reʼ la’ reʼ Santo Laj Huuj iruqʼor chi riij i Dios: «maʼ naa ta kimiik». a

¿Eh chajariik xabʼan?

Reʼ korik maʼ ne ta iruchuk qʼorik eh reʼ hin inwaaj naq nureqem chi riij i korik. Jeʼ reʼ noq xnubʼan nutiij ruukʼ chuʼnchel i wanima eh ruukʼ woqʼim eh chi maʼxta wuukʼ i nuhuuj reh tiij, reʼ sidur i rubʼihnaal. Manlik xnukohlaaj i tiij, kiʼibʼ chi testigo reh Jehová xkitzʼaaʼj cho wach i nupuerta. Xojqʼorik eh xkikanaaʼ jenaj nuhuuj maʼ nim ta paam. Reʼ huuj reʼreʼ eh taqeh i qʼorik xqabʼan xuchʼikaaʼ nukʼux chi reʼ taqeh inkinimaj ehsamaj cho pan Santo Laj Huuj. Jenaj ehtalil, reʼ taqeh testigo reh Jehová, maʼ inkinimaj ta chi reʼ Jesús jenaj wach ruukʼ i Dios, inkinimaj laʼ chi reʼ Jesús «Rakʼuun i Dios» b eh chi «raaʼ risiil chunʼchel i rutzʼuhkrisam chaloq i Dios». c

Chi riij i reʼ xinooj woʼ chik México eh ar xnutijej chi riij taqeh qʼorooj cho rubʼiral chi riij i chihooj wach kuukʼ taqeh Testigo. ¡Yohbʼaal kiwach taqeh qʼorooj cho rubʼiral! Eh atoobʼ ta jeʼ reʼ, inupahqaaj naq weh: «¿Mi xa ruukʼ i Jesús xooj eloq wach chunʼchel taqeh i qʼorooj cho rubʼiral? oon ¿Wiiʼ xa xubʼan riibʼ chi reʼ reh i chihooj wach xa jotʼbʼal keh i kʼachareel?».

¿Chajariik xubʼan chi xakoj akʼux ruukʼ taqeh xatijej?

Reʼ taqeh Testigo xkikʼuhtaaj weh taqeh qʼorooj cho rubʼiral chi riij i chihooj wach, reʼ i maʼ ne ta naq inooj eloq wach ruukʼ jenoʼ chik. Jeʼ rukabʼ noq wuquubʼ ciento haabʼ naq chik iraaj, reʼ Miqueas xuqʼor chi reʼ chihooj wach narasjiik naq ar Belén. d ¿Ajwach ne iruchih i yeʼaabʼ ahaʼ wiiʼ narasjiik? Reʼ Isaias xutzʼihbʼaaj chi reʼ chihooj wach narukansjiik naq jeʼ rukabʼ jenaj ajileqʼ eh chi na naq kimuqʼaam chi xilak taqeh bʼehoom. e Chuʼnchel taqeh i qʼorooj cho rubʼiral wilih xooj eloq wach ruukʼ.

Chi wehin, reʼ xti xukowej nukʼux reʼ iruqʼor chi riij taqeh i rumaam ratiʼt i Jesús. Reʼ Santo Laj Huuj iruqʼor chi reʼ chihooj wach na naq ruchaliik ruukʼ i reey David. f Reʼ taqeh judio inkitzʼihbʼaaj naq ajwach i kimaam katiʼt, ruum aj reʼ wilaʼ reʼ Jesús maʼ xchalik ta naq pan rufamilia i David, reʼ taqeh i kiʼixowanik wach xkehsaj naq rubʼiral. Xa reʼ la’, maʼ xkibʼan ta rubʼanariik ruum chi reʼ Jesús riih rumaam i David. Eh reʼ taqeh i rukʼihaal xkiqʼor chi reʼ reh i «riih rumaam i David». g

Chupaam i haabʼ 70, noq 37 haabʼ naq chik rukimiik i Jesús, reʼ taqeh i soldado romano xkisach wach i Jerusalén eh reʼ taqeh i tzʼihbʼamaj naq chik xsacharik kiwach. Ruum aj reʼ, reh chi ne naq inkojarik rehtaal ajwach i rumaam ratiʼt, na naq rukʼutiniik i chihooj wach noq ko majaaʼ imponik i haabʼ reʼreʼ.

¿Chajariik xabʼan noq xanabʼeej chuʼnchel i wilih?

Pan Deuteronomio 18:18, 19, reʼ Dios ruqʼorom naq chik chi narupahbʼaam naq pan tinamit Isarel jenaj profeta jeʼ rukabʼ i Moisés eh xuqʼor: «Eh chuʼnchel i maʼ naa ta kinimaniik reh ahaʼ wilik taqe i naa ruqʼorom i jalal nuqʼoral reʼ reʼ, reʼ hin naa taqe nuyeʼem chi tojariik i kimahk». Noq xnutzʼir riij chuʼnchel i Santo Laj Huuj xnukoj rehtaal chi reʼ Jesús aj Nazaret reʼ naq i reh i profeta qʼorooj cho rubʼiral.