«Reʼ ruqʼijiil i Jehová maʼ najt ta chik wilik: qabʼan chuʼnchel i wilik pan qaqʼabʼ reh chi hoj kow pan uxlabʼal»

«Taq laʼ chi qawach chureqariik chi riij i korik» (HEB. 6:1).

1, 2. ¿Chajariik naq nakibʼanam taqeh ajnimaneel aj Jerusalén eh aj Judea reh rukoʼljiik kiibʼ?

 JENAJ PECH reʼ taqeh rajtahqaneel i Jesús xkijil i koq kiibʼ ruukʼ, eh xkipahqaaj reh: «¿Jaruuj narukʼulariik taqeh reʼ eh i ehtalil naruwihʼik chi wilkaat chik ayuʼ eh i rusachariik wach i wach akʼal wilih?». Reʼ reh xuqʼor jenaj i qʼorooj cho rubʼiral reʼ xooj eloq wach, peet pan peet siglo. Xqʼorik chi riij jenaj ehtalil i naq rukʼuhtaam chi maʼ najt ta naq chik wilik i rusachariik wach i nah akʼal. Reʼ Jesús xuqʼor chi noq ne naq inkʼularik taqeh ehtalil wilih, «reʼ taqe i wilkeebʼ Judea inchol chi nee kiooj chi elik pantaq rax cheeʼ» (Mat. 24:​1-3 TNM, 15-22 SBG). ¿Mi na naq kikojom rehtaal eh na naq kinimam i wilih taqeh rajtahqaneel i Jesús?

² Kʼisiin maʼ treinta haabʼ xikʼikʼ, manlik pan haabʼ 61, reʼ apóstol Pablo xutzʼihbʼaaj jenaj huuj keh taqeh ajnimaneel aj hebreo reʼ wilkeebʼ naq ar Jerusalén eh chi rucheel i tinamit wilih. ¿Chaj kamaj? Reh chi ne naq inkikoj rehtaal i kʼahchiʼ rukʼulariik eh ne naq inkikapaaj i kʼahchiʼ kibʼanam ruukʼ i kikʼachariik. Ni xata reʼ keh ni xata reʼ Pablo xkikapaaj chi ach hoʼoobʼ naq chik haabʼ iraaj chi ne naq inkʼutinik i ehtalil xuyew i Jesús eh chi ne naq irutik’aa’ «i runimaal tiʼ kʼaxik» (Mat. 24:21). Chupaam i haabʼ 66, reʼ Cestio Galo, reʼ ajkʼamal kibʼeeh taqeh ajpuhbʼ reh Roma xusutej riij i tinamit Jerusalén. Xa reʼ laʼ, noq reʼ tinamit kʼisiin maʼ insacharik naq wach, reʼ Cestio Galo xuqʼor keh taqeh ajpuhbʼ chi ne kiʼooj rejeh, eh reʼreʼ xuyew qʼabʼ keh i wilkeebʼ ar chi ne naq kiʼelik.

3. ¿Ahaʼ wilik i naʼojbʼal xuyeew i Pablo keh taqeh ajnimaneel aj hebreo eh chaaj woʼ reet noq xuyeew keh?

³ Reʼ taqeh ajnimaneel ko ruman naq chi ne inwihʼik kinaʼojbʼal eh chi kow taqeh pan uxlabʼal reh chi ne naq inkikoj rehtaal i kʼahchiʼ rukʼulariik eh chi ne kiʼelik. Xa reʼ laʼ, juʼjun qʼeʼ naq «qʼuun inkireq chi riij» i kʼahchiʼ rukʼulariik. Pan uxlabʼal, reʼ keh xa jeʼ rukabʼ naq taqeh kokʼ halakʼun reʼ ko aajwaal naq wach chi keh i «riis chʼuuchʼ» (Chawil Hebreos 5:​11-13, RLLH). Wilik naq i kʼih haabʼ inkikʼam chi keht’al naq wach i korik, xa reʼ laʼ kitikʼaam naq chik kikanaam i «kʼachlik Dios» (Heb. 3:12). Atoobʼ ta maʼ najt ta naq chik wilik i loqʼlaj qʼiij, wilik naq taqeh i maʼ kiponik ta naq chik pan taqeh moloj iibʼ (Heb.10:​24, 25, RLLH). Ruum ajreʼ, reʼ Pablo xuqʼor keh: «Maʼ ta naq xa reʼ i kʼuhtamaj qeh chi riij i Jesucristo neenqatijej riij. Taq laʼ chi qawach chureqariik chi riij i korik» (Heb. 6:1).

4. ¿Chaaj woʼ reet qʼeʼ ko ruman chi naʼlik oq qawach eh chajariik i maʼ na ta rusahchiik pan qakʼux?

⁴ Reʼ hoj, k’acharik inqabʼan chupaam taqeh qʼiij ahaʼ wiiʼ narojiik eloq wach chi manlik i xuqʼor i Jesús. Reʼ runimaal i ruqʼijiil i Qajaaw Jehová, ahaʼ wiiʼ narusachariik wach i rutinamit i Ajyahm, re’ maʼ najt ta chik wilik (Sof. 1:14). Yuʼnaak qʼeʼ aajwaal wach chi naʼlik oq qawach eh chi ne inqakowej i qanimaniik (1 Ped. 5:8). Xa reʼ laʼ, ¿mi pan korik kʼahchiʼ qabʼanam i wilih? Mi hoj kow pan uxlabʼal, reʼ wilih neʼ intoobʼinik qeh reh chi maʼ jaruuj ne insahchik pan qakʼux chajariik qʼijil wilkooj wiiʼ.

¿Chajariik iraaj ruqʼorom chi hoj kow pan uxlabʼal?

5, 6. a) ¿Chajariik iraaj ruqʼorom chi hoj kow pan uxlabʼal? b) ¿Ahaʼ wilik i kiʼibʼ chi naʼojbʼal naqakʼamam naah reh chi ne qojkʼihik pan uxlabʼal?

⁵ Reʼ Pablo xukowej kikʼux taqeh ajnimaneel reh chi kow kikʼux chi nimanik eh xuqʼor woʼ keh chajarik iraaj ruqʼorom i wilih (chawil Hebreos 5:14). Reʼ i kow taqeh pan kinimanik maʼ suq ta kikʼux xa ruukʼ rukʼuxariik i lecha, aajwaal laʼ wach chi keh chi wiʼk chik i ne inyeʼarik keh chi kʼuxumbʼal. Ruum aj reʼ, kehtʼal iruqʼor i Santo Laj Huuj eh kehtʼal «woʼ hoq i ruchamiil paam i runaʼojbʼal i Dios» (1 Cor. 2:10). Inkikoj pan kikʼachariik i kitijem chik, ruum ajreʼ kehtʼal chik wach i korik eh okrinaq chik taqeh chureqariik chi riij ahaʼ wilik i holohik eh ahaʼ wilik i maʼ holohik ta. Jeʼreʼ noq, noq inkichih wach i nakibʼanam, inkitzʼir riij iruqʼor i Santo Laj Huuj eh inkikoj pan kikʼachariik.

⁶ Reʼ Pablo xutzʼihbʼaaj: «Inchol qayeʼem qakʼux chunimjiik i kʼuhbʼaal qibʼiram chaloq, reh chi maʼ nee ta nqakanaaʼ i rubʼeeh i Dios» (Heb. 2:1). Mareh chi qʼun qʼun ne inqakanaaʼ i rubʼeeh i Dios, chi ma’ ne ta inqakoj rehtaal. Reh chi maʼ neʼ ta inqakʼul i wilih, ko ruman chi ne inqayeew qakʼux «chunimjiik i kʼuhbʼaal qibʼiram chaloq» noq inqatzʼir riij i korik inkan pan Santo Laj Huuj. Qakapaaj riij i wilih: «¿Mi inureq chi riij i ruchamiil i runaʼojbʼal i Dios reʼ inkan pan Santo Laj Huuj? ¿Mi kʼahchiʼ nukamaniik chuwach i Dios xa ruum chi hin okrinaq chi rubʼanariik? ¿Chajariik ko ruman chi ne inubʼan reh chi ne imponik i korik pan wánima eh ne kinkʼihik pan uxlabʼal?». Reh chi ne inqakowej qiibʼ pan uxlabʼal, aajwaal wach chi ne inqabʼan i kiʼibʼ chi naʼojbʼal wilih: ko ruman chi ne inqanabʼeej i ruchamiil i runaʼojbʼal i Dios inkan pan ruqʼorbʼal eh ko ruman woʼ chi ne qojnimanik.

Qareq chi riij i ruchamiil i ruqʼorbʼal i Dios

7. ¿Nikʼwach qojrutoobʼeej runabʼjiik wach i ruchamiil i ruqʼorbʼal i Dios?

⁷ Reʼ Pablo xutzʼihbʼaaj: «Chuʼnchel taqeh ku kichʼuuchʼinik, maʼ kehtʼal ta i rinimaal tijinik chiriij i korik wach kʼuxliis, ruʼuum chi ku haʼlakʼun taqeh» (Heb. 5:13; RLLH). Reh chi ne qojkʼihik pan uxlabʼal, ko ruman chi ne inqanabʼeej i ruchamiil i runaʼojbʼal i Dios. Eh ruum chi reʼ naʼojbʼal reʼreʼ inkan pan Santo Laj Huuj, ko ruman chi ne inqatzʼir riij ruukʼ taqeh i huuj ruyeʼem qeh i «móso korik wach rukʼux, wilik runaʼojbʼal» (Mat. 24:​45-47). Chi jeʼreʼ ne kojkapebʼinik jeʼ rukabʼ i Dios eh maʼ kʼaxik ta chik chi qeh ruchihariik wach i naqabʼanam, Qilow i rehtalil i Rosa. a Reʼ ajnimaneel wilih iruqʼor: «Reʼ naʼojbʼal xti qʼeʼ kirutoobʼeej pan nuk’achariik, reʼ chi ne inwil paam i Santo Laj Huuj iqal iqal. Kiʼibʼ haabʼ xukʼam weh rilariik wach chuʼnchel, xa reʼ laʼ, xwikʼraaj chi xnunabʼeej wach chi korik i Wajtzʼuhkrisaneel. Xnunabʼeej nikʼwach i runaʼojbʼal, reʼ imponik chuwach eh re’ maʼ imponik ta chuwach, reʼ i runimaal rajaawriik eh re’ ruchamiil i runaʼojbʼal. Rilariik paam i Santo Laj Huuj iqal iqal intoobʼinik weh chupaam taqeh i tiʼ kʼaxik inukʼul pan nukʼachariik».

8. ¿Nikʼwach ne inkamanik pan qakʼachariik i ruqʼorbʼal i Dios?

⁸ Mi inqil paam i Santo Laj Huuj chuʼnchel taqeh i qʼiij, ne inqil chi wilik ransil pan qakʼcharik (chawil Hebreos 4:12). Ne qojrutoobʼeej reh chi holohik chik i qanaʼojbʼal eh ne irubʼan chi hoj holohik chuwach i Jehová. ¿Inakapaaj na chi ko ruman chi ne inawisaj aqʼiij reh rilariik paam i Santo Laj Huuj eh rukapebʼjiik riij?

9, 10. ¿Chajariik iraaj ruqʼorom chi qehtʼal wach chi korik i ruqʼorbʼal i Dios? Chayeew jenoʼ ehtalil.

⁹ Maʼ manlik ta xa ruukʼ rilariik wach i Santo Laj Huuj, aajwaal laʼ wach chi ne inqanabʼeej i ruchamiil i runaʼojbʼal i Dios. Reʼ taqeh «ku halakʼun taqeh» reʼ xutzʼihbʼaaj keh i Pablo, mareh kehtʼal naq kʼisiin chi riij iruqʼor i Santo Laj Huuj, xa reʼ laʼ maʼ looqʼ ta naq chi keh, ruum chi maʼ inkikoj ta naq pan kikʼachariik inkitijej. Maʼxta ta naq kinaʼojbʼal ruum chi maʼ inkikoj ta i Santo Laj Huuj noq wilik naq i nakichihiim chi b’anariik.

¹⁰ Jeʼ rukabʼ xqilow, maʼ ne ta irub’an chi jeno’ ne iruq’or chi rehtʼal wach chi manlik iruqʼor i ruqʼorbʼal i Dios wilaʼ maʼ irukoj pan rukʼachariik irutijej. Jeʼreʼ irukʼuhtaaj i rehtalil jenaj ajnimaneel, kyle i rubʼihnaal. Reʼ hermana wilih xwihʼik rukʼaxkilal ruukʼ jenaj ruch ajkamanoom eh iraaj naq rukorsam wach i kʼaxkilal reʼreʼ. ¿Chajariik xubʼan? Reʼ reh iruqʼor: «Reʼ peet texto xnukapaaj riij, reʼ Romanos 12:18, ahaʼ wiiʼ iruqʼor: Wi iriyeew riibʼ ribʼanariik, tiwihʼoq taq pan otobʼil kuukʼ chuʼnchel nikʼ nimaal kʼsinal iriyeew riibʼ chawach taq». Jeʼreʼ noq, xnuqʼor reh i wuchʼihil chi kamanik chi inwaaj naq qʼorik ruukʼ noq ne inqakohlaaj kamanik». Reʼ qʼorik xkibʼan holohik xelik, reʼ ruchʼihil xsahchik rukʼux ruukʼ i xubʼan i Kyle. Reʼ hermana iruqʼor: «Xnutijej chi, mi jenoʼ irukoj pan rukʼachariik iruqʼor i Santo Laj Huuj, chuʼnchel ne inelik chi holohik».

Qatijej runimjiik inqʼorarik qeh

11. ¿Ahaʼ wilik i ehtalil irukʼuhtaaj chi kʼaxik runimjiik i Dios noq wilkooj pan tiʼ kʼaxik?

¹¹ Rukojariik pan qakʼachariik iruqʼor i Santo Laj Huuj kʼaxik kʼisiin noq kʼahchiʼ kooj chi ikʼik chupaam jenoʼ kʼaxkilal. Qakapaaj chi riij i xkikʼul taqeh israelita. Noq xiʼehtesjik rejeh ruum i Jehová pan kowlaj kamanik ar Egipto, «reʼ taqe i aj Israel tohqʼik kiwechʼum i Moisés» eh xkipaj i Qajaaw Jehová. ¿Chaaj woʼ reet xkibʼan i wilih? Ruum chi maʼxta naq kihaaʼ (Éxo. 17:​1-4). Chi riij i reʼ maʼ xkinimaj ta i kʼuhbʼaal eh xkitikʼaaʼ kiloqʼem wach taqeh tyoox, atoobʼ ta xa kiʼibʼ poh naq ikʼinaq chi kiyeʼem i kiqʼorbʼal chuwach i Jehová eh xkiqʼor chi na naq kinimam chuʼnchel i ruqʼorbʼal (Éxo. 24:3, 12-18; 32:​1, 2, 7-9). ¿Chaaj woʼ reet maʼ xinimanik ta? ¿Mi ruum chi reʼ Moisés kʼahchiʼ naq ruchahmiik chupaam i yuuqʼ Horeb noq kʼahchiʼ naq rukʼuluum i rukʼuhbʼaal i Dios oon ruum chi xiyoʼjik chi jenoʼ tinamit ne inchalik chi peletohinik kuukʼ? Jenaj pech, reʼ taqeh amalequita xkitoqʼaaʼ peletohinik kuukʼ eh reʼ Moisés xutoobʼeej taqeh reh chi ne kiʼelik korik noq xujohsaj johtoq taqeh i rutelebʼ. Xa reʼ laʼ, yuʼnaak reʼ Moisés maʼxta naq kuukʼ. ¿Chajariik naq ne inkibʼan mi jenoʼ tinamit xchalik chi qʼaqʼinik kuukʼ? (Éxo. 17:​8-16). Mareh ruum i reʼ xiyoʼjik, xa reʼ laʼ reʼ taqeh israelita «maʼ xkaaj ta cho kinimam i ruqʼoral i Dios» (Hech. 7:​39-41). Chi riij i reʼ, maʼ xkinimaj ta i Jehová noq ruum i kiyoʼjiik maʼ inkaaj ta naq okik chupaam i yeʼaabʼ qʼorooj cho rubʼiral keh. Ruum aj reʼ, reʼ Pablo xuqʼor keh taqeh ajnimaneel chi maʼ ajwach ta qeh ne irubʼan reh jeʼ rukabʼ xkibʼan taqeh israelita reʼ maʼ xinimanik ta cho reh i Dios (Heb. 4:​3, 11).

12. ¿Nikʼwach xutijej i Jesús i nimanik, eh nikʼwach xtoobʼjik ruum i wilih?

¹² Reh chi ne qojkʼihik pan uxlabʼal, ko ruman chi ne inqanimaj i Jehová. Wilik pech inqatijej i nimanik ruum chi inqakʼul i tiʼ kʼaxik, jeʼ rukabʼ xukʼul i Jesús (chawil Hebreos 5:​8, 9). Noq reʼ Jesús wilik naq pan taxaaj, irunimaj naq chuʼnchel i iruqʼor i Rajaaw. Xa reʼ laʼ, noq xkʼulik ayuʼ wach akʼal, kʼaxik naq chi reh rubʼanariik iraaj i Rajaaw; xukʼul i tiʼ kʼaxik pan rutiʼjolaal eh xtiʼbʼik woʼ rukʼux . Reʼ Jesús xunimaj i Dios atoobʼ ta kʼahchiʼ naq rukʼuluum i tiʼ kʼaxik. Reʼ wilih xtoobʼinik reh, reh chi ne Reey eh chi Rajaaw kʼamal kibʼeeh ajtiij.

13. ¿Nikʼwach ne iqakʼuhtaaj chi qatijem chik i nimanik?

¹³ ¿Raaj i hoj ? ¿Mi ne inqanimaj i Jehová atoobʼ ta kʼahchiʼ kooj chi ikʼik pan tiʼ kʼaxik? (Chawil 1 Pedro 1:​6, 7). Re’ taqeh naʼojbʼal iruyeew i Jehová chi riij i kʼoyomal, i chukuj qʼorik, chi riij i rilariik paam eh rutijaljiik i Santo Laj Huuj, chi riij i moloj iibʼ eh chi riij i qʼoroj kʼuhbʼaal, tʼanlik kiwach (Jos. 1:8; Mat. 28:​19, 20; Efe. 4:​25, 28, 29; 5:​3-5; Heb. 10:24, 25). ¿Mi naqanimam chuʼnchel taqeh i naʼojbʼal iruyeew qeh i Dios atoobʼ ta kʼahchiʼ kooj chi ikʼik pan tiʼ kʼaxik? Mi jeʼ reʼ inqabʼan, kʼahchiʼ qakʼuhtaam chi kʼahchiʼ kooj chi kʼihik pan uxlabʼal.

¿Nikʼwach qojrutoobʼeej mi hoj kow pan uxlabʼal?

14. ¿Nikʼwach xuko’leej riibʼ jenaj hermano ruum chi kow naq pan uxlabʼal?

¹⁴ Jenoʼ ajnimaneel ne irukoʼleej riibʼ mi rehtʼal chik wach i korik, ruum chi reʼ i wilih irubʼan chi ne irureq chi riij ahaʼ wilik i holohik eh ahaʼ wilik i maʼ holohik ta chupaam i akʼal wilih, ahaʼ wiiʼ kʼih inkibʼan chuʼnchel i «chʼuwaʼ wach naʼojbʼal» (Efe. 4:19). Jenaj ehtalil, reʼ Jorge, jenaj ajnimaneel reʼ okrinaq chi rilariik taqeh qahuuj isimaj pan Santo Laj Huuj eh iruyeew ruloqʼil iril chupaam, xukʼulaaʼ jenaj rukamaj ahaʼ wiiʼ kʼih naq taqeh ixoq kikamanik. Re’ reh iruqʼor: «Kʼih reh taqeh i wuchʼihil pan kamanik imponik naq chi kiwach i kʼoyomal eh maʼxta naq inkaaj reh qʼorik chi riij i wilih. Xa reʼ laʼ, jenaj keh i wuch’ihil holohik naq i runaʼojbʼal eh irukʼuhtaaj naq chi imponik chuwach iruqʼor i Santo Laj Huuj. Xa reʼ laʼ, jenaj pech noq wilkooj naq chi qutkeel pan jenaj yeʼaabʼ reh kamanik, xutikʼaaʼ rukʼuhtaam weh chi irukʼax naq nuwach. Pan nukʼux i hin kʼoʼnik naq irubʼan, xa reʼ laʼ kʼahchiʼ naq rujilim i koq riibʼ wuukʼ eh reʼ hin maʼ wehtʼal ta naq chajariik nanuqʼorom reh. Chupaam i junkʼaam reʼreʼ xkʼulik pan nukʼux jenaj ehtalil xelik chupaam i huuj La Atalaya chi riij jenaj hermano xukʼul woʼ i wilih. Reʼ huuj inqʼorik naq chi riij i José eh i rehkʼeen i Potifar. b Jeʼreʼ noq, xwehsaj jeh wuukʼ eh xooj» (Gén. 39:​7-12). Reʼ Jorge suq xrikʼraj riibʼ ruum chi reʼ kʼaxkilal maʼ xnimbʼik ta wach eh reʼ rukapebʼaal saq wach xkahnik (1 Tim. 1:5).

15. ¿Nikʼwach irukowej qakʼux i kʼihik pan uxlabʼal?

¹⁵ Jenaj chik i holohik inqareq noq hoj chik kow pan uxlabʼal, reʼ chi inkowjik i qánima, eh reʼ wilih qojrutoobʼeej reh chi maʼ neʼ ta inqayew qiibʼ «chi jotʼarik ruukʼ i xa chibʼih chik jariik chi nimanik» ne qojkitijej wiiʼ (chawil Hebreos 13:9). Mi inqayeew qakʼux chi kʼihik pan uxlabʼal, reʼ qakapebʼaal lahtzʼ wach ruukʼ taqeh i «maxta reet chi bʼanarik» (Fili. 1:​9, 10). Eh reʼ wilih irubʼan chi ne inqaloqʼej wach i Jehová eh ne inqatyoxeej chuʼnchel i ruyeʼem qeh (Rom. 3:24). Reʼ taqeh ajnimaneel kow kikʼux chi rukapebʼjiik riij i holohik, inkityooxej i wilih eh wilkeebʼ pan amigohiil ruukʼ i Jehová (1 Cor. 14:20).

16. ¿Chajariik xtoobʼinik reh jenaj hermana reh chi maʼ xyoj ta rukʼux?

¹⁶ Jenaj ajnimaneel, Luisa i rubʼihnaal, iruqʼor chi inkamanik naq chuwach i Jehová xa reh chi reʼ taqeh hermano holohik ne kiqʼorik chi riij, reʼ reh iruqʼor: «Maʼ mahk ta naq i kʼahchiʼ nubʼanam, xa reʼ laʼ maʼ kʼahchiʼ ta naq nuloqʼem wach i Jehová ruukʼ chuʼnchel nukʼux. Xnukoj rehtaal chi, mi inwaaj naq nuloqʼem wach i Jehová chi korik, wilik naq i nanujalam pan nukʼachariik. Reʼ peet xnubʼan, reʼ chi xnuqʼahsaj wiibʼ chi kamanik chuwach i Jehová ruukʼ chuʼnchel nukʼux». Intyoox reh i wilih, reʼ Luisa xukowej rukʼux eh reʼreʼ xtoobʼinik reh noq xikʼikʼ pan jenaj kowlaj yabʼilaal (Sant. 5:⁠8). Reʼ reh iruqʼor: «Qʼeʼ tiʼ xnukʼul, xa reʼ laʼ xwikʼraaj chi maʼ najt ta naq wilkiin ruukʼ i Jehová».

Qojnimanoq ruukʼ chuʼnchel qakʼux

17. ¿Chaaj woʼ reet qʼeʼ naq ko ruman chi reʼ taqeh ajnimaneel reh i peet siglo ne naq kinimanik?

¹⁷ Reʼ xuqʼor i Pablo chi riij i kʼihik pan uxlabʼal xukoʼleej i kikʼachariik taqeh ajnimaneel wilkeebʼ naq ar Jerusalén eh Judea. Reʼ xkinimaj i xuqʼor i Pablo, xkikoj rehtaal i na naq rukʼulariik eh xkilow i ehtalil kʼahchiʼ naq kuyʼeem reh chi ne naq kiooj «wach taq yuuqʼ». Noq ixkilow «i rinimaal yibʼel wach noʼjbʼal [...] johsamaj chipaam i Looqʼ laj Yeʼaabʼ», iraaj ruqʼorom chi, noq xkil wach taqeh soldado aj Roma, reʼ xkisutej riij eh kʼahchiʼ naq kokiik chupaam i tinamit Jerusalén, xkikoj rehtaal chi xponik i qʼiij qʼoroj cho rubʼiral (Mat. 24:​15, 16, RLLH). Xkʼulik pan kikʼux i qʼoroj naq chik rubʼiral ruum i Jesús, xiʼelik rejeh ar Jerusalén noq ko majaaʼ naq insacharik wach, eh jeʼ rukabʼ xuqʼor jenaj winaq irutzʼir riij i xkʼularik, Eusebio i rubʼihnaal, xikahnik chi patinik ar Pela (oon Pella), pan yuuqʼ reh i Galaad. Chi jeʼ reʼ, reʼ taqeh aj nimaneel maʼ xkikʼul ta i runimaal tiʼ kʼaxik xchalik chi naah i tinamit Jerusalén.

18, 19. a) ¿Chaaj woʼ reet xtiʼ ko ruman i nimanik chupaam taqeh qʼiij wilih? b) ¿Chi riij chajarik naruqʼoriik i jenaj chik tijinik?

¹⁸ Reʼ taqeh i kow taqeh pan uxlabʼal inkinimaj inqʼorarik keh, eh reʼ wilih ne iruko’leej i kikʼachariik noq ne inooj eloq wach pan qaqʼijil i ruqʼorom cho i Jesucristo, chi jenaj «i runimaal tiʼ kʼaxik naa rilariik maʼ jankʼal ta nilarik chaloq i rutzʼuhkriik chee wach akʼal» (Mat. 24:21). ¿Mi xareʼyuʼ naqaniman taqeh naʼojbʼal ne iruyeew qeh i móso korik wach rukʼux eh wilik runaʼojbʼal? (Luc. 12:42). ¡Xti qʼeʼ ko ruman chi xa eliik oq ne qojnimaik ruukʼ chuʼnchel qakʼux! (Rom. 6:17).

¹⁹ Reh chi hoj kow pan uxlabʼal, ko ruman chi ne inqareq chi riij ahaʼ wilik i holohik eh i ahaʼ wilik i maʼ holohik ta. Eh reʼ wilih ne inqareq, mi inqatzʼir riij i ruqʼorbʼal i Dios eh mi inqanimaj chuʼnchel inqʼorarik qeh. Reʼ taqeh kʼijool wilik pech kʼaxik chi keh kʼihik pan uxlabʼal. Reʼ jenaj chik naʼojbʼal naruqʼoriik chi riij nikʼwach neʼ inkireq i wilih.

[Ruman]

¿Chajariik xatijej?

• ¿Chajariik iraaj ruqʼorom chi hoj kow pan qanimanik, eh nikʼwach ne inqareq i wilih?

• Mi inqaaj kʼihik pan uxlabʼal, ¿chaaj woʼ reet ko ruman chi ne inqehtʼaliij i ruchamiil i runaʼojbʼal i Dios inkan pan Santo Laj Huuj?

• ¿Nikʼwach ne inqatijej i nimanik?

• ¿Nikʼwach qojrutoobʼeej chi hoj kow pan uxlabʼal?

[Preguntas del estudio]

[Ehtalil]

Rukojariik pan qakʼcharik taqeh i naʼojbʼal iruyeew i Santo Laj Huuj qojrutoobʼeej reh rikʼsjiik taqeh kʼaxkilal

[Ehtalil]

Reʼ taqeh xkibʼiraj i xuqʼor rubʼiral i Jesús xkikoʼleej riij i kikʼachariik