KOMPOAKEPAH mwahu kan kin kesempwal, oh nanpwungmwahu ehu me kin werei sohte kin pein miehla. Ma nanpwungmwahu ehu kin lelohng apwal, dahme kak sewese kamwahwihala? Kitail kak sukuhlki soahng tohto sang ekei nan Paipel me wia kompoakepah mwahu kei ahpw mwuhr arail nanpwungmwahu mihla nan keper.

Depit, me wia sounsilepen sihpw oh nanmwarki men, ahneki kompoakepah mwahu kan. Ele kitail tamanda Sonadan me wia emen kompoakepah. (1 Sam. 18:1) Ahpw pil mie kompoakepahn Depit teikan, duwehte soukohp Nadan. Paipel sohte kasalehda ni sansal iahd me ira kompoakepahnkihla emenemen. Ahpw ahnsou ehu, Depit padahkihong Nadan dahme mi nan eh mohngiong, duwehte kompoakepah kan kin wia. Depit men kauwada tehnpas ehu ong Siohwa. Nanmwarkio uhdahn kesempwalki ahn Nadan madamadau nin duwen kompoakepah men oh pil emen me ahneki sapwellimen Siohwa manaman.​—2 Sam. 7:2, 3.

Ahpw mehkot wiawi me kahrehda nanpwungara en mihla nan keper. Nanmwarki  Depit wiahda dipen kamwahl rehn Padsipa oh mwuhr koasoanehdi me ahn Padsipa pwoudo, Uraia, en kamakamla. (2 Sam. 11:2-21) Erein sounpar tohto, Depit kin loalopwoatohng Siohwa oh kin wia soahng kan ni pwung pahrek. Ahpw ih eri wiahda dihp laud wet! Dahme wiawihong nanmwarki mwahu menet? Ia duwe, e sohte kak kilang uwen laud en sapwung me e wiahdao? E medewe me e kak ekihsang sapwung wet mwohn silangin Koht?

Dahme Nadan pahn wia? E pahn mweidohng emen tohrohr en tuhkihong nanmwarkio ire wet? Ekei ese duwen Depit eh koasoanehdi kamakamlahn Uraia. Eri ia kahrepen Nadan en iang pidada oh kauwehla nanpwungen ih oh Depit? E pil kakete keper ong ahn Nadan mour ma e kedipahda. Depit sou kahredahr kamakamlahn Uraia me sohte dipe?

Ahpw Nadan wia sapwellimen Koht sounkair. Soukohpo ese me ma e nennenlahte, nanpwungen ih oh Depit pahn wekila oh kadeikpen loale sohte pahn nsenamwahu. Kompoakepah Depit wiahdahr pilipil sapwung ehu me kansensuwedihala kupwuren Siohwa. Nanmwarkio uhdahn anahne sawas pwehn kamwahwihala eh nanpwungmwahu rehn Siohwa. Ei, Depit uhdahn anahne kompoakepah mwahu men. Nadan wia soangen kompoakepah mwahwo. Ni eh koasoiong Depit duwen ireo, e pilada en doadoahngki karasaras ehu me kak sair mohngiong en Depit, me wia sounsilepen sihpw men mwoweo. Nadan padahkihong Depit mahsen en Koht ahpw ni ahl ehu me sewese Depit en wehwehki uwen laud en eh sapwung ko oh kamwakid ih en wiahda wekidekla kan.​—2 Sam. 12:1-14.

Dahme ke pahn wia ma kompoakepahmw men wiahda sapwung de dihp laud ehu? Ele e pahn wia kasongosong ehu en medewe me omw pahn tuhkihong ih eh sapwungo pahn kauwehla amwa nanpwungmwahu. De ke kakete medewe me omw padahkihong elder ko, me kak sewese ih, duwen dipeo pahn kauwehla amwa nanpwungmwahu. Dahme ke pahn wia?

Gianni me kitail koasoiapene mwoweo, nda: “I esehda me mehkot wekila. Maurizio sohla kin nohn koasoiong ie duwehte mahso. I medewehda en tuhwong oh koasoiong ih mendahki met uhdahn apwal ong ie. I medewe: ‘Dahme I kak ndaiong me e saikinte ese? Mwein e kakete mwehlkihda!’ Ahpw ni ei tamanda soahng koaros me se onopki, met sewese ie en koasoiong ih. Maurizio wiahiong ie soahngohte ni ahnsou me I anahne sawas. I sohte men nanpwungat en ohla, ahpw I men sewese ih pwehki I nsenohki ih.”

Maurizio pil nda: “Gianni kin mehmehlel, oh e pil pwung. I ese me imwilahn ei pilipil sapwung ko kaidehn eh sapwung oh pil kaidehn sapwellimen Siohwa. Eri I ale kaweid, oh mwuhr I kamwahwihala ei nanpwungmwahu rehn Siohwa.”

Mie kompoakepahn Depit kan me kin kolokol arail loalopwoatohng ih ni ahnsou apwal. Emen irail ko iei Usai, me Paipel kahdaneki “kompoakepahn Depit.” (2 Sam. 16:16; 1 Kron. 27:33) Ele e wia emen kaun lapalap nan tehnpesen nanmwarkio oh pil wia kompoakepah men. Mie ahnsou me e kapwaiada soangen pwukoa kan me nanmwarkio likihong ih.

Ahnsou me nein Depit pwutako Apsalom uhwongada eh kaunda, mehn Israel tohto iangala Apsalom, ahpw Usai sohte iang. Ni Depit eh tangasang wasao, Usai kohla reh. Depit inenen nsensuwedkihla ni nah pwutako oh ekei me e uhdahn likih arail pangala ih. Ahpw, Usai kolokolete eh loalopwoat nin duwen emen me mendahkihla moure eh mihla nan keper oh kapwaiada pwukoa ehu me pahn kauwehla koasoandi en uhwong wet. Usai sohte wia met ihte pwehki e wia eh pwukoa nin duwen lapalap emen. E kadehdehda me e wia kompoakepah loalopwoat men.​—2 Sam. 15:13-17, 32-37; 16:15–17:16.

E kaperen en kilang me riatail Kristian kan rahnwet kin miniminkihpene irair ehu me  laudsang arail kesempwalki arail pwukoa nan mwomwohdiso. Sang ni arail wiewia, re kin mwomwen ndinda, “Ngehi kompoakepahmw, kaidehn pwehki I anahne wia met, ahpw pwehki I kesempwalkin uhk.”

Ih met me wiawihong emen brother me adaneki Federico. Pwehki sawas sang kompoakepaho Antonio, e powehdi ahnsou apwal ehu nan eh mour. Federico nda: “Ahnsou me Antonio keseudo nan at mwomwohdiso, se wiahla kompoakepah keren kei. Se wia sounsawas kei, oh se kin perenki doadoahkpene. Sohte pwand mwurin mwo, e idihdida nin duwen elder men. E sohte wiahte kompoakepahi, ahpw e pil wia mehn kahlemeng mwahu ong ie.” Mwuhr Federico wiahda pilipil sapwung ehu. E mwadangete rapahki sawas rehn elder ko, ahpw e solahr kak wia emen pioneer de sounsawas men. Ia ahn Antonio pepehm?

Federico nda: “I kak kilang me Antonio kehn ei nsensuwedo. E song uwen eh kak en sewese ie ong ei pepehm ko. E uhdahn nsenohki duwen ei pahn kamwahwihala ei nanpwungmwahu rehn Siohwa oh e sohte keseiehla. E kangoange ie en kakehlakahda nanpwungmwahu wet oh dehr uhdi.” Antonio nda: “I kin kalapw koasoiong Federico. I men en saledek en koasoiaiong ie soahng koaros, pil duwen dahme e nsensuwedki.” E kaperen en ese me mwuhr Federico kehlailda nan eh papah Siohwa oh pwurehng idihdida nin duwen pioneer oh pil sounsawas men. Antonio nda: “Mendahki at sohte papah nan mwomwohdiso ehute, se uhdahn kin kerenpene laudsang mahs.”

Ia pahn omw pepehm ma kompoakepahmw keren men sohte men seweseiuk nan omw uhdahn anahne eh sawas? Met kak uhdahn kamedek. Ke pahn kak mahkohng? Amwa nanpwungmwahu pahn kehlailte duwehte mahso?

Medewehla dahme wiawihong Sises erein kaimwiseklahn eh ketiket sampah. Ahnsou laud e kin ketiket rehn sapwellime wahnpoaron lelepek ko, oh re kin miniminkihpene arail ahneki nanpwungmwahu tohrohr ehu. Ni pwung, Sises ketin kahdanekin irail kompoakepah. (Sohn 15:15) Ahpw, dahme wiawi ahnsou me sounpei ko salihdi ih? Wahnpoaron ko tangdoaui. Piter pil ndahla mwohrail me e sohte pahn  kesehla eh Soumaso, ahpw nipwongohte, Piter kahmahmkihla Sises!​—Mad. 26:31-33, 56, 69-75.

Sises mwahngih me e pahn ketin kelehpwki kaimwiseklahn kasongosong me lelohng ih. Ahpw, e sapwellimankihte kahrepe kan en nsensuwedla pahrail. Ahpw ni eh mahsanihong sapwellime tohnpadahk ko rahn kei mwurin eh ketin iasada, eh mahsen ko sohte kasalehda me e ketin kupwurtoutoula de engiengda pahrail. Sises sohte ketin medewe me e anahne wadekada sapwung kan en sapwellime tohnpadahk ko pil iangahki dahme irail wiahiong ih nipwongo me e ketin selidi.

Weksang met, Sises ketin kansenamwahwihala Piter oh wahnpoaron teiko. E ketin kamehlelehiong irail duwen eh likih irail sang ni eh ketikihong irail kaweid kan me pid doadoahk en kasukuhl me keieu kesempwal nan poadopoad en aramas. Ong Sises, wahnpoaron ko wiahte kompoakepah. Sapwellime limpoak wia mehkot me re sohte pahn kak manokehla. Re pahn song uwen arail kak en dehr pwurehng kansensuwedihala arail Soumaso. Re uhdahn pweida ni arail kapwaiada pwukoa me e ketin koasoanehdi ong sapwellime tohnpadahk kan.​—Wiewia 1:8; Kol. 1:23.

Sister men me adaneki Elvira tamanda ahnsou me mie iren sawehwe ehu nanpwungen ih oh kompoakepaho Giuliana. E nda: “Ahnsou me e ndaiong ie me e medengkihla dahme I wiahdao, I uhdahn nsensuwedla. E uhdahn ahneki pwuhng en lingeringer pahi. Ahpw I pwuriamweikihla eh kin uhdahn nsenohkin ie oh pil ia imwilahn ei madamadau oh wiewia. I pahn ahnsou koaros kalahnganki eh sohte medemedewehte sapwung me I wiahiong, ahpw duwen kahpwal me I pein wiewiahiong ie. I kalahngankihong Siohwa me mie kompoakepahi men me kin nsenohki kamwahupei laudsang pein eh pepehm kan.”

Eri, dahme kompoakepah mwahu men pahn wia ma eh nanpwungmwahu rehn emen mihla nan keper? E pahn men lokaiaiong kompoakepaho ni kadek oh pil ni saledek ahnsou me anahn. E pahn duwehte Nadan oh Usai me kolokolte ara loalopwoat pil ni ahnsou apwal, oh pil duwehte Sises me kupwurki kasalehda mahk. Ia duwe, ke wia soangen kompoakepah menet?