Siohwa Koht kin ketin kupwurki kitail en kaukaule kapakapkihong ih atail iren kapwunod kan ni saledek. (Luk 18:1-7) E kin ketin karonge kitail pwehki e ketin nsenohki kitail. Pwehki Samatailo nanleng ketin lukei kitail en kapakap ong ih, e pahn wia elen soaloalokong ma kitail pohnsehsehla luhk wet.​—Wadek Pilipai 4:6.

Kapakap sohte kin ongete pek sawas. Ahpw kapakap kin sewese kitail en karanihala Koht. (Melkahka 8:3, 4) Ni atail kin kaukaule kasalehiong Koht atail pepehm kan, kitail kin kakairada nanpwungmwahu reh.​—Wadek Seims 4:8.

Ni atail kin kapakap, Koht sohte ketin kupwurki kitail en doadoahngki lokaia me mwomwen suweiki atail kadek kapakap de pwurepwurehng nda soangen kapakap kan me kitail wadlikihlahr. Kitail sohte pil anahne doadoahngki soangen mwohmw tohrohr ehu ni atail kapakap. Siohwa ketin lukei kitail en kapakap sang nan mohngiongitail. (Madiu 6:7) Karasepe, ni mwehin mehn Israel ko mahs, Ana kapakapkiong Koht duwen kapwunod laud ehu me e ahneki nan eh peneineio. Mwuhr, ahnsou me e perenkihda kapwunodo eh mwahula, e kalahngankihong Koht sang nan eh mohngiong.​—Wadek 1 Samuel 1:10, 12, 13, 26, 27; 2:1.

Kapakap iei pai uhdahn kaselel ehu me kitail ahneki. Kitail kak kapakapkihong Sounkapikpatailo atail kapwunod kan. Kitail pil kak kapinga ih oh kalahngankihong ih soahng kan me e ketin wia. Kitail uhdahn men kesempwalki pai kaselel wet.​—Wadek Melkahka 145:14-16.