Paipel mahsanihong kitail ni sansal dahme Siohwa oh sapwellime Ohlo Sises Krais pahn ketin wiahiong lokolok me Sehdan me Tepil kahrehda. Paipel mahsanih: “Sapwellimen Koht Iehroso [Sises] ketido pwehki kahrepe wet: pwe en kauwehla doadoahk en Tepilo.” (1 Sohn 3:8) Sampah ahnsouwet, me direkihla noahrok, kailok, oh wiewia suwed kan, pahn sohrala. A duwen “kaunen sampah wet,” Sehdan me Tepil, Sises ketin inoukihda me e “pahn lekdekla.” (Sohn 12:31) Ahnsou me solahr manaman en Sehdan, sampah kapw pwung ehu pahn miehla oh e pahn wiahla wasa meleilei ehu.​—2 Piter 3:13.

Ia duwen irail kan me keptakaila oh sohte wekidala arail wiewia kan ahpw ngihtehtehki wiewia me suwed? Medewehla inou mehlel wet: “Aramas pwung—aramas lelepek—pahn kousoan nan sahpw wet.” (Lepin Padahk 2:21, 22) Solahr pahn mie manaman en aramas suwed kan. Nan soangen koasoandi meleilei wet, aramas peik kan pahn ekisekis saledekla sang irair en soh unsek me re sohsohki.​—Rom 6:17, 18; 8:21.

Ia duwen Koht eh pahn ketikihsang me suwed kan nan sampah kapw? E sohte pahn ketikihsang ahn aramas arail kisakis en wiahda pilipil ni saledek oh ketin wiairailda duwehla robot kei. Ahpw e pahn ketin padahkihong me peik kan sapwellime ahl akan oh ketin sewese irail ren sohpeisang lamalam oh wiewia suwed kan.

Dahme Koht pahn ketin wiahiong kahpwal kan me sohte kasikpe? E ketin inoukihda me sapwellime Wehi pahn kereniong kaunda sampah. Nanmwarki me e ketin idihada ong Wehi wet iei Sises Krais, me ahneki manaman en kamwahwihala soumwahu kan. (Madiu 14:14) Sises pil sapwellimaniki manaman en kaunda mwekimwekid en pahnlahng oh nansed. (Mark 4:35-41) Eri, solahr pahn mie lokolok me “paisuwed” kin kahrehda. (Eklesiasdes 9:11) Pahn kaundahn Krais, sohte kahpwal ehu pahn lelohng tohn sampah.​—Lepin Padahk 1:33.

A ia duwen aramas mwahu tohtohie me mehla? Mwohnte Sises ketin kaiasada kompoakepah Lasarus, e mahsanih: “Ngehi me mour sapahl oh Sounkomour.” (Sohn 11:25) Ei, Sises sapwellimanki manaman en ketin kaiasada aramas, de kasapahldo arail mour.

Ma ke mwahuki mihmi nan sampah ehu me soahng suwed kan sohte pahn wiawiong aramas mwahu kan, dahme ke sou wiahkihla omw mehn akadei en kalaudehla omw onop Paipel oh sukuhlki duwen Koht mehlelo oh dahme e ketin kupwurki? Sounkadehdehn Siohwa kan nan omw wasa pahn perenki seweseiuk en esehla met. Menlau koasoiong Sounkadehdehn Siohwa kan de ntinglahng wasa me wiahda kisin pwuhk wet.