Riat akan:

Nan pahr wenepwiki samwa mwohn Krais, Soukohp Esekiel alehdi kasansal kapwuriamwei ehu. E kilangada lapalahn kuruma en nanleng ehu, me mi pahn manaman en Kaunepen lahng oh sampah. Dahme keieu kapwuriamwei en kuruma wet iei mwomwen eh kin mwekidseli. E kin mwekidwei oh pwurodo rasehng mwekid en lioal oh ni eh kin wia met e sohte kin wawaila mendahki e kin wetseli!​—Esek. 1:4, 9, 12, 14, 16-27.

Kasansal wet kin katamankihong kitail duwen sapwellimen Siohwa pwihnen en nanleng me kin ahnsou koaros mwekimwekid. Ia duwen sapwellimen Siohwa pwihn en sampah? Dahme wiawi nahn pahr en kalohk nekiero kasalehiong kitail ni sansal me Siohwa kin ketin kahrehiong sapwellime aramas akan en mwekid ni ahl me inenen pitipit!

Wasaht nan sapwen Amerika, tohn Pedel kin doadoahk laud ni arail kin mwekidsang Brooklyn oh kohlahng poasen kaun kapw ni Warwick, New York, oh pil ekei wasahn Pedel teikan oh pil pwuralahng nan doadoahk en Kalohk. Tohn Pedel kan nan ohpis teikan nan sampah pwon pil kin doadoahk laud ni arail kin kauwada, kamwahwihala ihmw kan, de kosoula wasa kapw kan. Ia duwen komwi? Mendahki ma ke sohte kosouseli wasa teikan, ke kin pil iang mwekidseli ni ahl teikan.

Pwihn me Kin Apwalih Mwomwohdiso nan Sampah Pwon kin perenki kilang sapwellimen Koht aramas akan ar kin doadoahk laud sang mahs ni arail kin peipeian sapwellimen Siohwa pwihn. Me tohto kin kosoula nan sahpw kan me mie anahn laud. Ekei tepida kalohk ni ehu lokaia tohrohr. Me tohto kin tepida iang wiepen kalohk me kapw ong irail. Pil me tohto kin kalaudehla arail kalohk ni ahl teikan. Oh koaros Kristian lelepek kan, iangahki irail me mah kan oh me soumwahu kan, kin ni lelepek iang weiren tang ong mour. Re kin pousehlahte mwekimwekid ong sapwellimen Siohwa doadoahk oh sewese kasalehda me Sehdan likamw!​—1 Kor. 9:24.

Ken tamataman me Siohwa mwahngih omw irair me ke kin kasalehda. (Ipru 6:10) Omw irair en nanti kin kahrehiong kiht en medewe duwen Eipram oh Sara. Ni ahnsou me e sounpar isihsek samwa, Eipram kosousang kahnimw en Ur oh kahrehla eh peneinei nan Kenan, wasa ehu me dohsang Ur, wasa me e pahn kousoan nan ihmw likou erein sounpar epwiki. Ira kasalehda irair en nanti laud!​—Sen. 11:31; Wiewia 7:2, 3.

Ke kin kasalehda soangen irair wet? Kumwail koaros me kin dadaurete ni lelepek pahn kahpwal kan rahnwet kin kapwaiada dahme Sises mahseniong kitail en wia. E mahsanih: “Kumwail eri kohwei wasa koaros oh padahkihong tohn wehi kan  koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh [“sapwellimen Koht manaman,” NW].”​—Mad. 28:19.

Sises kin pil ketin doadoahngki lepin lokaia “kohwei” me wehwehki me kitail anahne ahnsou koaros mwekimwekid. Ia uwen kaperen en kilang doadoahk laud me kin pweida sang sapwellimen Krais tohnpadahk ngoang kan en pahr nekiero. E sansal ong kitail me Siohwa kin ketin kapaia doadoahk en lohki rongamwahu en Wehio nan sampah pwohn.​—Mark 13:10.

Me tohto kin mwekidki rohng wet. Uwen tohtohn sounkalohk en pahr nekiero lel meh 8,340,847, oh nempehn onop en Paipel lel meh 10,115,264 sounpwong koaros. Sansal me kuruma en nanleng kin wie mwekimwekid, oh pil kowe! Nantihong omw doadoahk laud nan ahnsou mwotomwot me luhwe mwohn Siohwa eh pahn ketin ritingedi wenihmw en komour.

Ia uwen met eh pwungiong atail iren pahr ong 2017 me iei ‘Likih Siohwa, oh wiahda tiahk mwahu’! (Mel. 37:3) Ni omw kin idawehn mahsen pwukat oh ni omw kin wia dahme mwahu sang ni omw kin papah Siohwa, ke kin kasalehda me ke likih ih. Ken ahnsou koaros taman me ke sohte kelehpw. Sapwellimen Sises mahsen pahn ahnsou koaros mehlel: “Eri, kumwail en ese pwe I pahn ieiang kumwail ahnsou koaros lel ni imwin kawa.”​—Mad. 28:20.

Ken kamehlele me Siohwa pahn ketin kaukaule kapaiahda omw kin papah ih ni lelepek. Mehnda ma omw doadoahk me tikitik de laud, dahme Siohwa ketin kesempwalki iei omw kin wia uwen omw kak sang kahrepe me pwung. Soangen kisakis pwukat koaros kin kaperenda ih. (2 Kor. 9:6, 7) Eri pousehlahte karanihala Semomw me limpoak sang omw kaukaule kapakap, onopki mahsen en Koht, iang towehda mihting kan oh iang doadoahk en kalohk.

Lao lel ‘ahnsou mwotomwot’ me mweimweiong Sehdan eh pahn nekla, e pahn doadoahngki soahng koaros pwe en kauwehla atail lelepek ong Siohwa. (Kaud. 12:12) Ken karanihte Siohwa, oh Tepilo sohte pahn pweida. (Mel. 16:8) Menlau tamataman me se uhdahn poakohng kumwail oh kalahnganki amwail sawas ong apwalih doadoahk kan en Wehin atail Kaun nan imwin rahn akan.

Riamwail kan,

Pwihn me Kin Apwalih Mwomwohdiso en Sounkadehdehn Siohwa kan nan Sampah Pwon