Josué 5:1-15
5 Amorreospa+ reyesninkoqa Jordán mayoj inti yaykuynin ladopi tiyakusharqanku, cananeospa+ reyesninkutaj mar qocha qayllapi tiyakusharqanku. Paykunataj uyarerqanku Jehová Diosqa Jordán mayu yakusta chʼakichisqanta, chaynintataj chʼaki jallpʼanta israelitasta chimpachimusqanta. Chayta uyarispa mayta kharkatiterqanku,+ niñataj kallpanku karqachu israelitaswan maqanakunankupaj.+
2 Chaypacha Jehová Diosqa Josueta nerqa: “Rumimanta cuchillosta ruwakuy, israelitasta watejmanta circuncidanaykipaj”,*+ nispa.
3 Josuetaj rumimanta cuchillosta ruwakorqa. Chaywantaj israelita qharista circuncidarqa Guibeat-Haaralotpi.*+
4 Josueqa israelitasta circuncidarqa, imaraykuchus maqanakuman rina edadpi Egiptomanta llojsimoj tukuy qharisqa chʼin jallpʼaspi wañurasqankuña.+
5 Egiptomanta llojsimojkunaqa tukuyninku circuncidasqas karqanku. Egiptomanta llojsimusqankumantaña nacekojkunatajrí, mana circuncidasqaschu karqanku, imaraykuchus chʼin jallpʼaspiña nacekorqanku.
6 Israelitasqa 40 watasta chʼin jallpʼaspi purisqanku.+ Chay wataspitaj maqanakuman rina edadpi Egiptomanta llojsimoj qharisqa tukuyninku wañurasqanku. Paykunaqa mana Jehová Diosta kasukusqankuchu.+ Chayrayku Jehovaqa juraspa nisqa paykunaqa mana kay sumaj jallpʼata rikunankuta,+ maypichus lechewan miskʼiwan jinantin tiyan chayta.+ Jehovaqa ñaupa tatasninkuman nisqa kay jallpʼataqa israelita wawasninman qonanta.*+
7 Chayrayku Josueqa wañorqanku chay runaspa wawasninkuta circuncidarqa, pikunatachus Diosqa tatasninkoj cuentanmanta kay sumaj jallpʼaman pusamorqa chaykunata.+ Paykunaqa chʼin jallpʼasta purisqankupi mana circuncidasqaschu kasqanku.
8 Tukuynin qharis circuncidasqa kasqankutawan, campamentollapi* karqanku sanoyapunankukama.
9 Chantá Jehová Diosqa Josueta nerqa: “Egipcios asipayasusqaykichejta kunan tukuchini”,* nispa. Chayrayku chay lugarqa kunankama sutikun Guilgal.*+
10 Israelitasqa Guilgalpi qhepakorqanku. Chaypitaj Pascuata ruwarqanku chay killaj 14 pʼunchayninpi,+ ña chʼisiyaykushajtinña, Jericó chʼin pampaspi.
11 Chay Pascuaj qʼayantintaj, chay jallpʼaspi poqojmantaña mikhorqanku, mana levadurayoj tʼantata,+ jankʼatawan.
12 Chay mikhusqanku diallataj maná nisqa mikhunaqa chinkaporqa. Chayrayku israelitasqa chay watamantapacha Canaán jallpʼapi poqosqallantaña mikhorqanku,+ imaraykuchus maná nisqa mikhunaqa manaña karqachu.+
13 Uj pʼunchay Josueqa Jericó qayllapi kashaspa, ñaupaqenpi uj runata rikorqa+ makinpi espada japʼirisqata.+ Payman qayllaykuspataj taporqa: “¿Noqayku partechu kanki chayri enemigosniyku partechu?”, nispa.
14 Paytaj kuticherqa: “Mana ni mayqen partechu kani. Noqaqa Jehová Diospa ejercitonpa kuraj kamachejnin jina jamuni”,+ nispa. Chayta uyarispa Josueqa qonqoriykukuspa pampakama kʼumuykukorqa, nerqataj: “Wiraqochíy, ¿imatataj kay kamachiykiman willanawayki kashanri?”, nispa.
15 Jehová Diospa ejercitonpa kuraj kamachejnintaj Josueta nerqa: “Jukʼutasniykita* orqhokuy. Maypichus sayashanki chay lugarqa santomin”, nispa. Josuetaj chay ratopacha jukʼutasninta orqhokorqa.+
Sutʼinchaykunasnin
^ Circunciday niyta munan qharejpa jispʼananpa puntanmanta qaritanta khuchurpariy. Glosariopi circuncisión nisqata leeriy.
^ Guibeat-Haaralot suteqa niyta munan qharispa jispʼanankoj puntasninpa qaritasninta khuchukusqan loma.
^ Hebreo parlaypeqa nin, “noqanchejman qonawanchejta”.
^ Campamentoqa ashkha toldo wasis.
^ Hebreo parlaypeqa nin, “bolalachini”.
^ Guilgal suteqa niyta munan bolalachiy, bolalachispa chinkachiy.
^ Chayri “Abarcasniykita”.
