Números 10:1-36
10 Chantá Jehová Diosqa Moisesta nerqa:
2 “Iskay cornetasta+ qolqe metalmanta ruwakuy, martillowan takaspa. Chaykunaqa kanqa israelitasta tantachimunapaj, jinallataj campamentosninkuta* oqharinankupajpis.
3 Sichus chay iskaynin cornetas waqanqa chayqa, tukuynin israelitas ñaupaqeykiman tantakamonqanku, tinkukuna toldo punkuman.+
4 Sichus uj cornetalla waqanqa chaytaj, kamachejkunalla ñaupaqeykiman tantakamonqanku, Israelpi waranqa runasta kamachejkunalla.+
5 ”Cornetas ñañumantataj rakhumantataj waqamojtinku, inti llojsimuy ladopi kashanku chay kinsa ayllus*+ purirenqanku.
6 Cornetas watejmanta ñañumantataj rakhumantataj waqamojtinku, sur ladopi* kashanku chay kinsa ayllusñataj+ purirenqanku. Ajinata cornetasta waqachenqanku sapa tʼaqa puririnanpaj.
7 ”Israelitasta tantachimunaykichejpajqa cornetasta+ waj jinatañataj waqachinkichej.
8 Chay cornetastaqa waqachenqanku+ Aaronpa wawasnin sacerdotes. Cornetasta imaynatachus waqachinamanta leyqa qankunapaj, mirayniykichejpajpis unay wataspaj kanqa.
9 ”Sichus jallpʼaykichejpi kashajtiykichej enemigosniykichej qankunawan maqanakoj jamonqanku chayqa, cornetasta waqachinkichej maqanakoj rinaykichejpaj.+ Jehová Diosniykichejtaj qankunamanta yuyarikusonqachej, enemigosniykichejmantataj salvasonqachej.
10 ”Maypachachus kusikunaykichej kajtinpis,+ fiestasta ruwashaspa+ chayri killa qallarikuytapis, cornetasta waqachinkichej qʼolachina* ofrendasta+ jaywashaspa, khuska mikhurikuy ofrendasta+ jaywashaspa ima. Ajinamanta Diosniykichej qankunamanta yuyarikusonqachej. Noqamin Jehová Diosniykichej kani”.+
11 Iskay kaj watamanta iskay kaj killaj 20 pʼunchayninpi,+ phuyu oqharikorqa Diosta yupaychana toldo patamanta,+ maypichus Diospa trato ruwasqan arca nisqa caja kasharqa chaymanta.
12 Israelitastaj Sinaí chʼin jallpʼamanta purirerqanku, ima ordenpichus puririnanku karqa chay ordenpi.+ Phuyutaj sayarqa Parán chʼin jallpʼapi.+
13 Chay kuti israelitasqa ñaupaj kutirayku purirerqanku Jehová Dios Moisesman kamachisqanman jina.+
14 Ñaupajtaqa purirerqa Judá aylloj campamentonmanta kinsa ayllusniyoj grupo, tʼaqa tʼaqaspi.* Aminadabpa wawan Nahsontaj+ tʼaqanta kamachisharqa.
15 Isacar ayllumanta tʼaqata kamachejqa karqa Zuarpa wawan Netanel.+
16 Zabulón ayllumanta tʼaqata kamachejqa karqa Helonpa wawan Eliab.+
17 Diosta yupaychana toldo phaskarasqa kajtin,+ guersonitaswan+ meraritaswan+ purirerqanku. Paykunaqa Diosta yupaychana toldota apanankupaj cuentayoj karqanku.
18 Paykunaj qhepankutataj Rubenpa campamentonmanta kinsa ayllusniyoj grupoñataj purirerqa tʼaqa tʼaqaspi.* Sedeurpa wawan Elizurtaj+ tʼaqanta kamachisharqa.
19 Simeón ayllumanta tʼaqata kamachejqa karqa Zurisadaijpa wawan Selumiel.+
20 Gad ayllumanta tʼaqata kamachejqa karqa Deuelpa wawan Eliasaf.+
21 Paykunaj qhepankutataj cohatitas purirerqanku, santo lugarpa imasninta apaspa.+ Paykuna chayanankupajqa, ñapis Diosta yupaychana toldoqa armasqaña kanan karqa.
22 Paykunaj qhepankutataj Efraín aylloj campamentonmanta kinsa ayllusniyoj grupoñataj purirerqa tʼaqa tʼaqaspi.* Amihudpa wawan Elisamataj+ tʼaqanta kamachisharqa.
23 Manasés ayllumanta tʼaqata kamachejqa karqa Pedahzurpa wawan Gamaliel.+
24 Benjamín ayllumanta tʼaqata kamachejqa karqa Guideonijpa wawan Abidán.+
25 Paykunaj qhepankutataj Dan aylloj campamentonmanta kinsa ayllusniyoj grupoñataj purirerqa tʼaqa tʼaqaspi.* Paykunaqa tukuymanta qhepata rerqanku chay ujnin campamentosta jarkʼanankupaj. Amisadaijpa wawan Ahiezertaj+ tʼaqanta kamachisharqa.
26 Aser ayllumanta tʼaqata kamachejqa karqa Ocranpa wawan Paguiel.+
27 Neftalí ayllumanta tʼaqata kamachejqa karqa Enanpa wawan Ahirá.+
28 Israelitasqa chay ordenpi sapa kuti purirej kanku, tʼaqa tʼaqaspi.*+
29 Chantá Moisesqa Hobabwan parlarqa. Hobabqa madianita Reuelpa*+ wawan karqa, Reueltaj Moisespa suegron karqa. Hobabmantaj nerqa: “Jehová Dios ‘qosqaykichej’ niwayku chay jallpʼaman rishayku.+ Qanpis noqaykuwan riy ari,+ qanwan kʼachas kasqayku. Jehová Diosqa israelitasman sumaj imasta qonanta nin”,+ nispa.
30 Hobabtajrí Moisesman nerqa: “Mana, noqaqa kutipunay tiyan llajtayman, familiay kashan chayman”, nispa.
31 Moisestaj nerqa: “Ama jina kaspa ama saqerpariwaykuchu ari. Qan sumajta rejsinki kay chʼin jallpʼaspi maynejpichus jarakunaykuta. Chayrayku qan pusawayku ari.
32 Sichus noqaykuwan rinki chayqa,+ allin imasta Jehová Dios qowasqayku chayta qanpis japʼillankitaj”, nispa.
33 Ajinamanta israelitasqa Jehová Diospa orqonmanta+ purirerqanku, rerqankutaj kinsa día puriyta. Jehová Diospa trato ruwasqan arca nisqa cajaqa,+ chay kinsa diasta ñaupaqenkuta rerqa, maypichus samarikunankuta maskʼaspa.+
34 Jarakorqanku chaymanta purirejtinku, Jehová Diospa phuyonqa+ pʼunchay paykunaj patankupi kasharqa.
35 Arca nisqa cajata sapa puririchejtinku Moisesqa nej: “Jehová Diosníy, sayarikuspa+ enemigosniykita chʼeqerachiy,* chejnisojkunata ñaupaqeykimanta ayqerachiy”, nispa.
36 Chay arca sayajtintaj Moisesqa nej: “Jehová Diosníy, kutimuy mana yupay atina waranqa waranqa israelitasman”,+ nispa.
Sutʼinchaykunasnin
^ Campamentoqa ashkha toldo wasis.
^ Uj aylloqa uj familiamanta miraj ashkha familias kanku.
^ Chayri “ura ladopi”.
^ Chayri “ruphachina”.
^ Hebreo parlaypeqa nin, “ejercitosninkuman jina”.
^ Hebreo parlaypeqa nin, “ejercitosninkuman jina”.
^ Hebreo parlaypeqa nin, “ejercitosninkuman jina”.
^ Hebreo parlaypeqa nin, “ejercitosninkuman jina”.
^ Hebreo parlaypeqa nin, “ejercitosninkuman jina”.
^ Chayri “Jetrojpa”.
^ Chʼeqerachiy: waj lugarespi ninku tʼaqarachiy.