Números 14:1-45
14 Chay imasta uyariytawan tukuy israelitasqa mayta chʼajwarqanku, tukuy chay tutantintaj jatunmanta waqarqanku.+
2 Chantá tukuy israelitas Moisespa contranta, Aaronpa contrantawan thutuyta qallarerqanku,+ tukuyninku paykunapaj rimarqanku: “Allin kanman karqa Egiptopi wañunanchej chayri chʼin jallpʼapipis wañunanchej.
3 ¿Imapajtaj Jehová Dios kay jallpʼasman pusamuwanchejri? ¿Espadawan wañuchisqas kananchejpajchu pusamuwanchej?+ Warmisninchejta, wawasninchejtapis presosta apakaponqanku.+ ¿Manachu aswan allin kanman Egiptoman kutipunanchej?”,+ nispa.
4 Paykunapurataj ninakusharqanku: “Uj kamachejta ajllakunachej, Egiptomantaj kutipunachej”,+ nispa.
5 Chayta uyarispa Moiseswan Aaronwanqa, chaypi tantasqa kasharqanku chay israelitaspa ñaupaqenpi pampakama kʼumuykukorqanku.
6 Nunpa wawan Josuewan,+ Jefunejpa wawan Calebwantaj,+ pikunachus jallpʼasta qhawaj rerqanku chaykuna, ropasninkuta llikʼirakorqanku.
7 Tukuy israelitasmantaj nerqanku: “Qhawamorqayku chay jallpʼasqa may sumajpuni.+
8 Sichus Jehová Dios allin ñawiwan qhawawanchej chayqa, chay jallpʼasman pusaykuwasunchej, chay jallpʼastataj qowasunchej. Chay jallpʼaspeqa lechewan miskʼiwan jinantin tiyan.+
9 Chayrayku ama Jehová Diospa contranta oqharikuychejchu, amataj manchachikuychejchu chay jallpʼaspi tiyakoj runasta.+ Paykunataqa imata jina atipasunchej.* Paykunaman kutikojqa manaña pipis kanchu, noqanchejwanrí Jehová Dios kashan.+ Chayrayku ama paykunata manchachikuychejchu”, nispa.
10 Chayta uyarispa tukuy israelitasqa paykunata rumiswan chʼanqaykuyta munarqanku.+ Jinallapitaj Jehová Diospa jatun kayninpa kʼanchaynin rikhurerqa Dioswan tinkukuna toldo patapi, tukuy israelitas rikunankuta.+
11 Chantá Jehová Diosqa Moisesta nerqa: “¿Maykʼajkamataj kay runasqa pisipaj qhawawanqankuri?+ ¿Paykunaj chaupinkupi milagrosta ruwashajtiypis maykʼajkamataj mana creewanqankuchuri?+
12 Paykunataqa wañuchej onqoywan castigasaj, chinkarparichisajtaj. Qanmantataj uj jatun nacionta ruwasaj paykunamanta aswan atiyniyojta”,+ nispa.
13 Moisestajrí Jehová Diosman nerqa: “Qanqa kay israelitasta atiyniykiwan Egiptomanta orqhomorqanki. Sichus chayta ruwawaj chayqa egipciosqa chayta yachanqanku,+
14 Canaán jallpʼaspi tiyakojkunamantaj willanqanku. Paykunapis yachanku qan Jehová Dios, israelitaspa chaupinkupi kasqaykita,+ paykunawantaj uyapura rikuchikusqaykita.+ Qanmin Jehová Diosqa kanki, phuyuykipis paykunaj patankupi kashan. Pʼunchayqa ñaupaqenkuta uj chhoqo phuyupi rinki, tutantaj uj chhoqo ninapi.+
15 Sichus ujllapi* kay tukuy israelitasta wañurachinki chayqa, may rejsisqa kasqaykita uyarej nacionesqa nenqankuchá ari:
16 ‘Jehová Diosqa israelitasta mana chayachiyta atinchu juraspa qonanta nerqa chay jallpʼasman. Chayrayku chʼin jallpʼaspi paykunata wañurachin’,+ nispa.
17 Chayrayku kunanqa Jehová Diosníy, ama jina kaspa atiyniyki may jatun kasqanta rikuchiy ari, nisqaykiman jina. Qan nerqanki:
18 ‘Jehová Diosqa pacienciayoj,* may jina munakuyniyoj,*+ perdonantaj runaspa pantasqasninkuta, mana kasukuspa ruwasqankutapis. Payqa mana qhawakullanchu juchayoj runataqa, manachayqa tataspa juchasninkumantaqa wawasninkuta castigan, jinallataj allchhisninkuta, allchhisninkoj wawasninkutapis’,+ nispa.
19 Ama jina kaspa, may jatun munakuyniyoj kasqaykirayku kay runaspa juchasninkuta perdonay ari, imaynatachus Egiptomantapacha kunankama perdonarqanki ajinata”,+ nispa.
20 Chantá Jehová Diosqa nerqa: “Paykunata perdonani chay niwasqaykiman jina.+
21 Chay tukuywanpis kausayniyrayku jurani, Jehová Diospa jatun kayninpa kʼanchaynenqa jallpʼantinman juntʼaykonqa.+
22 Paykunaqa jatun kayniyta rikushaspapis, Egiptopi chantá chʼin jallpʼapi milagrosta ruwasqayta rikushaspapis,+ chunkasta* pruebaman churawanku,+ nitaj nisqayta uyariwankuchu.+ Paykunamantaqa ni ujpis
23 ni jaykʼaj rikonqachu tatasninkuman juraspa qonayta nerqani chay jallpʼastaqa. Pisipaj qhawawajkunaqa manapuni rikonqankuchu chay jallpʼastaqa.+
24 Kamachiy Calebtajrí+ mana paykuna jinachu karqa, tukuy sonqowan kasukullawarqapuni. Chayrayku qhawamoj rerqa chay jallpʼasman payta pusaykusaj, mirayninpis chay jallpʼasta japʼikaponqa.+
25 Ura pampaspeqa amalequitaswan cananeoswan+ tiyakushanku. Chayrayku qankunaqa qʼayapacha kutiriychej chʼin jallpʼaman, Puka mar ñanninta”,+ nispa.
26 Chantá Jehová Diosqa Moisestawan Aarontawan nerqa:
27 “¿Maykʼajkamataj kay sajra israelitas contrayta thutonqankuri?+ Uyarini paykuna contrayta thutusqankuta.+
28 Paykunaman niychej: ‘Jehová Diosqa nin: “Kausayniyrayku jurani: Chay nisqaykichejman jina ruwasqaykichej.+
29 Tukuy pikunachus contrayta thutojkuna, 20 watasniyojmanta pataman yupasqa kajkuna, kay chʼin jallpʼapi wañunkichej,+ ayasniykichejtaj* chaypi wijchʼurayanqanku.+
30 Tiyakunaykichejpaj juraspa* qonayta nerqani chay jallpʼasmanqa,+ ni mayqenniykichej yaykunkichejchu. Chaymanqa yaykonqanku Jefunejpa wawan Calebwan, Nunpa wawan Josuellawan.+
31 ”’”Presos apasqa kanankuta nerqankichej chay wawasniykichejta+ chay jallpʼasman pusaykusaj. Mana munasqaykichej jallpʼastaqa paykuna rikonqanku.+
32 Qankunaj ayasniykichejtaj* kay chʼin jallpʼapi wijchʼurayanqanku.
33 Wawasniykichejqa 40 watasta+ uywasniykichejta kay chʼin jallpʼaspi michenqanku. Wawasniykichej paganqanku contraypi juchallikusqaykichejmanta,* kay chʼin jallpʼaspi wañuspa tukukunaykichejkama.+
34 Qankunaqa jallpʼasta qhawamorqankichej 40 pʼunchaykunapi,+ ajinallatataj 40 watasta+ juchasniykichejmanta pagankichej, sapa pʼunchaymanta uj watata. Ajinamanta qankunaqa yachankichej imaynachus contrayta oqharikuy kasqanta.*
35 ”’”Noqa Jehová Dios chayta nini. Ajinata ruwasaj kay sajra israelitasta, contraypi oqharikunankupaj tantakunku chaykunata. Paykunaqa kay chʼin jallpʼapi tukukonqanku, chaypitaj wañonqanku.+
36 Pikunatachus Moisés kacharqa jallpʼasta qhawamunankupaj chaykunaqa, chay jallpʼasmanta mana allin imasta willaspa israelitasta contranpi thutucherqanku.+
37 Chay jallpʼasmanta mana allin imasta willajkunaqa castigasqas kanqanku, Jehová Diospa ñaupaqenpitaj wañonqanku.+
38 Chay jallpʼasta qhawamojkunamanta Nunpa wawan Josuewan, Jefunejpa wawan Calebllawan kausashaj qhepakonqanku”’”.+
39 Moisés chayta tukuy israelitasman willajtin, paykunaqa maytapuni llakikorqanku.
40 Qʼayantintaj israelitasqa tutamanta jatarispa, orqos pataman wicharinayarqanku. Ninakorqankutaj: “Kunanqa Jehová Dios qonawanchejta nerqa chay jallpʼasman risunchej. Noqanchejqa Diospa contranta juchallerqanchej”,+ nispa.
41 Moisestajrí paykunata nerqa: “¿Imaraykutaj Jehová Diospa kamachisqanta pʼakishankichejri? Imatachus ruwayta yuyashankichej chaypeqa mana allinchu risonqachej.
42 Ama wichariychejchu. Jehová Diosqa mana qankunawanchu kashan, enemigosniykichejtaj atipasonqachej.+
43 Amalequitaswan cananeoswanqa chaypi suyashasunkichej qankunawan maqanakunankupaj.+ Qankunataqa espadawan atipasonqachej. Jehová Diosta mana kasusqaykichejrayku Jehová Diosqa manaña qankunawanchu kashan”,+ nispa.
44 Chay jinata Moisés nishajtinpis, israelitasqa mana kasuspa chay orqos pataman wicharerqankupuni.+ Jehová Diospa trato ruwasqan arca nisqa cajataj mana campamentomanta* kuyurerqachu, nitaj Moisespis paykunawan rerqachu.+
45 Chantá chay orqospi tiyakoj amalequitas, cananeospis israelitaswan maqanakoj uraykamorqanku. Israelitasta atipaykuspataj, Hormakama qhatiykorqanku.+
Sutʼinchaykunasnin
^ Chayri “Paykunaqa noqanchejpaj tʼanta jinalla kanku”.
^ Hebreo parlaypeqa nin, “uj runata jinalla”.
^ Hebreo parlaypeqa niyta munan mana tukukoj munakuy, mana tukukoj kʼacha kay. Glosariopi mana tukukoj munakuy nisqata leeriy.
^ Chayri “mana usqhayllata phiñarparikunchu”.
^ Hebreo parlaypeqa nin, “kay chunka kutista”.
^ Chayri “cuerposniykichejtaj”.
^ Hebreo parlaypeqa nin, “makiyta oqharispa”.
^ Chayri “cuerposniykichejtaj”.
^ Chayri “khuchi warmi jina purisqaykichejmanta”.
^ Chayri “imaynachus enemigoykichej kajtiy kasqanta”.
^ Campamentoqa ashkha toldo wasis.