Números 9:1-23
9 Israelitas Egiptomanta llojsimusqankumanta iskay kaj wataj ñaupaj killanpi,+ Jehová Diosqa Sinaí chʼin jallpʼapi Moisesman kay jinata nerqa:
2 “Israelitasqa Pascua Fiestata+ ruwachunku maychus fechanpi.+
3 Pascuataqa ruwankichej maychus fechanpi, kay killaj 14 pʼunchayninpi ña chʼisiyaykushajtinña.* Chaytaqa ruwankichej ima kamachiykunachus Pascuata ruwanapaj tiyan chayman jina, imaynatachus ruwakunan tiyan ajinata”,+ nispa.
4 Chantá Moisesqa israelitasman nerqa Pascua Fiestata ruwanankuta.
5 Israelitastaj Pascua Fiestata ruwarqanku ñaupaj kaj killaj 14 pʼunchayninpi ña chʼisiyaykushajtinña,* Sinaí chʼin jallpʼapi. Paykunaqa ruwarqanku Jehová Dios Moisesman kamachisqanman jina.
6 Wakin qharisqa chʼichipaj qhawasqa kasharqanku wañusqata llankhasqankurayku.+ Chayrayku paykunaqa chay pʼunchay Pascuata mana ruwayta aterqankuchu. Jinapi paykunaqa chay diapacha rerqanku Moiseswan Aaronwan parlamoj.+
7 Chayaspataj Moisesman nerqanku: “Wañusqata llankhasqaykurayku chʼichipaj qhawasqa kashayku. ¿Kunanqa manachu atiykuman maychus fechanpi ofrendata Jehová Diosman jaywayta israelitaswan khuska?”,+ nispa.
8 Moisestaj paykunata nerqa: “Kaypi suyariwaychej, Jehová Diosta tapurimusaj, imatachus qankunamanta niwanqa”,+ nispa.
9 Chantá Jehová Diosqa Moisesman nerqa:
10 “Israelitasman kay jinata niy: ‘Sichus qankunamanta mayqellanpis, chayri mirayniykichejpis wañusqata llankhasqanrayku chʼichipaj qhawasqa kanman,+ chayri karuman rinman chayqa, chay runaqa Jehová Diospaj Pascuata ruwananpuni tiyan.
11 Ruwachuntaj iskay kaj killaj+ 14 pʼunchayninpi, ña chʼisiyaykushajtinña.* Chay pʼunchay cordero* aychata mikhuchun mana levadurayoj tʼantatawan, jaya qhorastawan.+
12 Qʼayantinpajqa ama puchuchichunchu,+ nitaj chay corderoj tullusnintapis pʼakichunchu.+ Pascuataqa ruwachun ima kamachiykunachus tiyan chayman jina.
13 Sichus uj runa llimphupaj qhawasqa kashaspa chayri wasillanpi kashaspa Pascuata mana ruwanchu chayqa, chay runaqa wañuchisqa kanqa,+ maychus fechanpi ofrendata Jehová Diosman mana jaywasqanrayku. Chay runaqa juchanmanta paganqa.
14 ”’Sichus uj forastero qankunawan tiyakun chayqa, paypis Jehová Diospaj Pascuata ruwanallantaj tiyan.+ Paypis ruwanan tiyan ima kamachiykunachus Pascuapaj tiyan chayman jina, imaynatachus ruwakunan tiyan ajinata.+ Kikin kamachiyllataj kanqa qankunapaj, forasterospajpis’”.+
15 Ima pʼunchaychus Diosta yupaychana toldo armasqa karqa chay pʼunchayqa,+ phuyoqa chay toldo pataman tiyaykorqa, maypichus Diospa trato ruwasqan arca nisqa kasharqa chay toldoman. Chʼisiyaykuymantapachataj uj nina lauray jina kʼancharqa Diosta yupaychana toldo patapi sutʼiyamunankama.+
16 Ajinallapuni karqa chay toldopi: Pʼunchayqa chay toldo patapi phuyu kaj, tutantaj uj nina lauray jina kʼanchaj.+
17 Chay toldo patamanta phuyu oqharikojtintaj israelitasqa chay ratopacha purirej kanku.+ Maypichus phuyu sayaj chaypitaj jarakoj kanku.+
18 Jehová Dios puririnankuta kamachejtin israelitasqa purirej kanku, Jehová Dios jarakunankuta kamachejtintaj jarakoj kanku.+ Diosta yupaychana toldo patapi phuyu qhepakojtenqa paykunapis pachanpi qhepakoj kanku.
19 Sichus chay phuyu Diosta yupaychana toldo patapi ashkha pʼunchaykunata kaj chayqa, israelitasqa Jehová Diosta kasukuspa mana purirejchu kanku.+
20 Wakin kutispi chay phuyoqa pisi pʼunchaykunallata Diosta yupaychana toldo patapi kaj. Israelitasqa Jehová Dios jarakunankuta kamachejtin jarakoj kanku, Jehová Dios puririnankuta kamachejtintaj purirej kanku.
21 Wakin kutispeqa chʼisiyaykuymanta sutʼiyamunankamalla chay phuyu toldo patapi qhepakoj, qʼayantintaj tutamanta oqharikoj. Jina kajtin, israelitasqa puririllajtaj kanku. Pʼunchaypis kachun tutapis kachun, phuyu oqharikojtenqa paykunapis puririllajtaj kanku.+
22 Sichus iskay pʼunchayta, uj killata chayri aswan unayta Diosta yupaychana toldo patapi phuyu qhepakoj chayqa, israelitaspis chaypi qhepakoj kanku, paykunaqa mana purirejchu kanku. Maypachachus chay phuyu oqharikoj chaypacha, paykunapis puririllajtaj kanku.
23 Israelitasqa Jehová Dios jarakunankuta kamachejtin jarakoj kanku, Jehová Dios puririnankuta kamachejtintaj purirej kanku. Paykunaqa Jehová Diosta kasukoj kanku imatachus Jehová Dios Moisesman kamacherqa tukuy chayta.
Sutʼinchaykunasnin
^ Chayqa kanman karqa inti yaykupusqantawan, niraj laqhayaykushajtin.
^ Chayqa kanman karqa inti yaykupusqantawan, niraj laqhayaykushajtin.
^ Cordero nispaqa parlashan uj watayojmanta chayri aswan uñitamanta.
^ Chayqa kanman karqa inti yaykupusqantawan, niraj laqhayaykushajtin.
