1, 2. 1) ¿Imajtintaj Jehová Dios familianmanta kananchejpaj yanapawanchej? 2) ¿Imatataj Dios ruwarqa familianmanta kananchejpaj?

JEHOVÁ DIOSQA familianmanta kananchejpaj wajyariwarqanchej. Chaytaj may sumajpuni. Diospa familianmanta kajkunaqa, kausayninkuta payman qopunku, Jesús tukuy runasrayku wañusqanpitaj creenku. Diospa familianmanta kaspaqa, may kusisqa kanchej. Imaraykuchus mana qhasipajchu kausashasqanchejta yachanchej. Familianchejmanta wakenqa, cielopi wiñay kausayta suyakushanku. Wakintajrí kay jallpʼapi uj paraisopi wiñaypaj kausakuyta suyakushanchej.

² Jehová Diosqa, mayta munakuwasqanchejrayku familianmanta kananchejpaj yanapawanchej. Chaypajtaj Wawan Jesusta juchasninchejrayku wañunanpaj kachamorqa (Juan 3:16). Chayrayku Biblia nin: “Payqa preciowan rantisorqachej”, nispa (1 Cor. 6:20). Jehová Dios Wawanta kachamusqanrayku, payman qayllaykuyta atinchej. Aswan patapi kaj Dios kajtinpis, paytaqa “Tatáy” ninchej. Ñaupaj yachaqanapi yachakorqanchej jina, payqa manchay sumaj Tata.

3. ¿Imatataj ichá nisunman? (“ ¿Sumajtachu Jehová Dios rejsiwanchej?” nisqa recuadrota leeriy).

³ Uj salmista nerqa: “Imawantaj Tata Diosman juntʼasaj tukuy allin imasta ruwapuwasqanmantari?”, nispa. Ichá noqanchejpis ajinallatataj ninchej (Sal. 116:12). Noqanchejqa ni imawan Tatanchej Jehovaman juntʼayta atisunmanchu. Jinapis munakuwasqanchejrayku, noqanchejpis payta munakullanchejtaj. Apóstol Juan nerqa: “Noqanchejqa munakunchej, Dios ñaupajta munakuwasqanchejrayku”, nispa (1 Juan 4:19). Qhepan parrafospi qhawarisun, imaynatachus Jehová Diosta munakusqanchejta rikuchinanchejta.

4. Santiago 4:8 nisqanman jina, ¿imajtintaj Jehová Diosman qayllaykunanchej kanman?

⁴ Jehová Diosqa munan payman qayllaykunanchejta, paywan sumajta parlarikunanchejta ima (Santiago 4:8 leey). Payqa niwanchej, mana saykʼuspa paymanta mañakunanchejta, uyarinawanchejtataj (Rom. 12:12). Jehová Diosqa may chhika ruwanasniyoj kaspapis, mañakusqanchejta uyarinpuni, manataj saykʼupunchu. Noqanchejrí, ¿imaynatá payta uyarisunman? Bibliata, publicacionestawan leerispa. Publicacionesqa Bibliaj nisqanta entiendenapaj yanapawanchej. Chantá payta uyarillanchejtaj, tantakuykunapi imatachus nikusqanta sumajta uyarispa. Wawasqa papasunkuwan parlarispa, aswan ujchasqas kanku. Ajinallatataj noqanchejpis, Jehová Dioswan sapa kuti parlarispa, payman astawan qayllaykusun.

5. ¿Imaynatataj Jehová Dioswan parlarinanchej kasqa?

⁵ Imaynatachus Jehová Dioswan parlarisqanchejpi piensarina. Jehová Diosqa munan sonqonchejpi kaj chhikata payman willakunanchejta (Sal. 62:8). Chayrayku allin kanman, kay tapuykunapi piensarinanchej: ¿Jehová Dioswan uj sumaj amigowan jinachu tukuy imamanta parlarinchej? Chayrí, ¿uj grabadora jinachu kikin imasllata ninchej? Jehová Diosninchejta mayta munakusqanchejrayku, paypa qayllallanpipuni kayta munanchej. Chaypajtaj paywan sapa kuti parlarinanchej tiyan. Jehová Diosman sonqonchejpi kaj chhikata willakuna, imaschus kusichiwasqanchejta, imastajchus llakichiwasqanchejtapis. Payqa yanapata mañakojtinchej yanapawasunpuni.

6. ¿Imatá ruwasunman Jehová Diospa qayllallanpipuni kanapaj?

⁶ Tatanchej Jehovaj qayllallanpipuni kanapajqa, agradecekuyta yachana tiyan. Noqanchejpis kay salmista jina ninchej: “Señor Tata Diosníy, ashkha tʼukuna imasta noqaykupaj ruwarqanki, maytataj noqaykumanta yuyarikuwayku. Ni imapis qanwanqa ninakunchu. Sichus chaykunamanta willayman, parlaymantaj chayqa, mana tukuchiyta atiymanchu”, nispa (Sal. 40:5). Jehová Diosmanqa mana sonqollanchejpichu agradecekunchej. Astawanpis parlasqanchejwan, ruwasqanchejwantaj chayta rikuchinchej. Chaytaj sutʼita rikuchin, mana kay mundomanta runas jinachu kasqanchejta. Paykunaqa Jehová Diosman mana agradecekuyta yachankuchu. Chaytaj sutʼita rikuchin, ‘qhepa pʼunchaykunapi’ kausashasqanchejta (2 Tim. 3:1, 2). Noqanchejqa amapuni paykuna jina kanachu.

7. ¿Imatataj Jehová Dios munan, chanta imaraykutaj?

⁷ Tatasqa mana munankuchu wawasninku maqanakunankuta, astawanpis purajmanta munanakunankuta munanku. Jehová Diospis, ajinallatataj wawasnin kausakunankuta munan. Hermanosninchejwan munanakuspaqa, cheqa cristianos kasqanchejta rikuchinchej (Juan 13:35). Uj salmista nerqa: “May jina sumajpuni wawqepura uj sonqolla kʼachata kawsanankoqa”, nispa (Sal. 133:1). Noqanchejpis pay jinallataj ninchej. Hermanosninchejta munakuspaqa, Jehová Diosninchejtapis munakushallanchejtaj (1 Juan 4:20). Diospa familianpeqa “ujkuna ujkunawan kʼachas, may khuyakuyniyojtaj” kanchej. Chay jina familiamanta kayqa, may sumajpuni (Efe. 4:32).

8. Kay 1 Juan 5:3 nisqanman jina, ¿imaraykutaj Jehová Diosta kasukuyta munanchej?

⁸ Jehová Diosqa wawasman nin, tatankutawan mamankutawan kasukunankuta. Payqa munan noqanchejpis payta kasukunanchejta (Efe. 6:1). Kasukunapunitaj tiyan, imaraykuchus Jehová Diosqa kausayta qowanchej, imastachus necesitasqanchejtapis. Chantapis  payqa, tukuy tatasmanta nisqaqa aswan yachayniyoj. Jinapis astawanqa, payta munakusqanchejrayku kasukunanchej tiyan (1 Juan 5:3 leey). Jehová Diosta ashkha imasrayku kasukunanchej kajtinpis, payqa mana obligawanchejchu. Payqa imatachus ruwananchejta ajllayta atinapaj ruwawarqanchej. Chayrayku mayta kusikun munakusqanchejrayku kasukojtinchej.

9, 10. ¿Imajtintaj Jehová Diospa kamachiykunasninta yachananchej, kasukunanchejtaj tiyan?

⁹ Tatasqa munanku wawasninku kusisqa kausakunankuta. Chayrayku imastachus ruwanankuta chayri mana ruwanankuta kamachinku. Wawasqa tatasninkuta kasukuspa, paykunata respetasqankuta rikuchinku. Chantapis paykunaman nishanku: “Allinniyta munasqaykichejta yachani”, nispa. Noqanchejpis Tatanchej Jehovaj kamachiykunasninta yachananchej tiyan, chayman jinataj kausakunanchej tiyan. Ajinamanta rikuchinchej payta munakusqanchejta, respetasqanchejtataj. Chayta ruwajtinchejqa kausayninchejpi allin riwasun (Isa. 48:17, 18). Jehová Diosta mana kasukojkunarí, llakiykunallapi rikukunku (Gál. 6:7, 8).

¹⁰ Jehová Diospa munayninman jina kausakuspaqa, onqoykunamanta, llakiykunamantapis jarkʼakunchej. Chantapis mana paymanta karunchakunchejchu. Jehová Diosqa imachus allinninchejpaj kasqanta yachan. Estados Unidosmanta hermananchej Aurora nin: “Jehová Diosta kasukuspaqa, sumajtapuni kausakunchej”, nispa. Chay nisqanqa cheqapuni. Chayrayku sapa uj piensarina, imaynatachus  Jehová Diosta kasukuy yanapawasqanchejpi. 

11. ¿Imaynatá Jehová Diosmanta mañakuy yanapawanchej?

¹¹ Wakin kutisqa mana Jehová Diosta kasukuyta atillanchejchu. Chay kutispi paymanta yanapata mañakusunman. Juchasapas kasqanchejrayku, Jehová Diosta kasukunapaj mayta kallpachakunanchej tiyan. Uj salmista Jehová Diosmanta ajinata mañakorqa: “Kamachisqasniykita kasunaypaj yuyayta qoway, noqataj tukuy sonqoywan chay kamachisqasta juntʼasaj”, nispa (Sal. 119:34). Hermananchej Denisemanta parlarina. Payqa precursora regular, nintaj: “Jehová Diospa kamachiykunasninta mana kasukuyta atispaqa, paymanta yanapata mañakuni”, nispa. Jehová Diosninchejqa chay jina mañakuykunata uyarinpuni (Luc. 11:9-13).

12. ¿Imatataj Efesios 5:1 niwanchej?

¹² (Efesios 5:1 leey). Jehová Diospa “munasqa wawasnin” kasqanchejrayku, pay jina kanapaj kallpachakunanchej tiyan. Chayrayku pay jina kʼachas, munakuyniyojtaj kananchej tiyan. Wajkunatapis perdonayta yachananchej tiyan. Ajina kʼachas kajtinchejqa, Jehová Diosta mana rejsej runaspis, ichá paymanta yachakuyta munanqanku (1 Ped. 2:12). Cristiano tatasqa, imaynatachus Jehová Dios cuidawanchej, ajinallatataj wawasninkuta cuidananku tiyan. Chayta ruwanqanku chayqa,  wawasninkupis ichá Tatanchej Jehovaman qayllaykuyta munanqanku.

13. Jehová Diosmanta parlayta manchachikunchej chay, ¿imatataj yuyarikunanchej kanman?

¹³ Wakin wawasqa tatankumanta ninku: “Papasuy jinaqa ni pi kanchu”, nispa. Paymantataj may kusiywan parlarinku. Noqanchejpis Tatanchej Jehovamanta kikillantataj ninchej, munanchejtaj wajkunapis payta rejsinankuta. Chantapis tukuy sonqowan rey David jina ninchej: “Tukuy Atiyniyoj Señor Tata Diosníy, willarasaj qan jatuchaj imasta ruwasqaykimanta”, nispa (Sal. 71:16). Jinapis ichá manchachikusqanchejrayku, Jehová Diosmanta mana wajkunawan parlariyta atillanchejchu. Jina kajtin, kayta yuyarikuna: Jehová Diosmanta runasman willarispaqa payta kusichinchej, chay runastataj yanapanchej ashkha bendicionesta japʼinankupaj. Jehová Diosqa ñaupa tiempomanta cristianosta yanaparqa, mana manchachikuspa willanankupaj. Noqanchejtapis ajinallatataj yanapawasun (1 Tes. 2:2).

14. Runa masinchejman sumaj willaykunata willarisqanchej, ¿paykunata yanapanmanchu?

¹⁴ Jehová Diosqa tukuy runasta uj rejllata qhawan. Maytataj kusikun tukuy clase runasta munakojtinchej (Hech. 10:34, 35). Runa masinchejta munakuspaqa, paykunaman sumaj willaykunata willarisun (Mat. 28:19, 20). Chay willasqanchej, ¿paykunata yanapanchu? Arí. Imaraykuchus willasqanchejta kasukojkunaqa, kay tiempopiña sumajta kausakonqanku, jamoj tiempopitaj wiñay kausayta japʼenqanku (1 Tim. 4:16).

15, 16. ¿Imaraykutaj kusikusunman?

¹⁵ Tatanchej Jehová Diosqa mayta munakuwanchej. Chayrayku kusisqa kausakunanchejta munan (Isa. 65:14). Llakiykunasniyoj kaspapis, ashkha imasrayku kusikusunman. Ñaupajtaqa Tatanchej Jehová mayta munakuwasqanchejta yachanchej. Bibliamantapis cheqa kajta yachanchej (Jer. 15:16). Chantapis Jehová Diospa familianmanta kanchej. Familianmanta kasqanchejraykutaj, payta munakunchej, kamachiykunasninta kasukunchej, hermanosninchejtapis munakunchej (Sal. 106:4, 5).

¹⁶ Chantapis kusikullanchejtaj, aswan qhepaman sumaj kausay kananta yachasqanchejrayku. Jehová Diosninchejqa sajra runasta tumpamantawan chinkachenqa, Gobiernonnejtataj kay jallpʼata uj paraisoman tukuchenqa. Chantá wañusqas kausarimunankuta yachasqanchejrayku, wañupoj familiaresninchejwan tinkukapuyta suyashanchej (Juan 5:28, 29). Chayqa may sumajpuni kanqa. Chantapis tumpamantawanqa, cielopi kajkuna, jinallataj kay jallpʼapi kajkunapis munakuyniyoj Tatanchej Jehovata jatunchanqanku, yupaychanqanku, payllatataj sirvenqanku. Chaytaj manchay sumajpuni kanqa.