1. Centralninchejpi sumaj tantakuypi, ¿imastataj sutʼinchakorqa, chanta imastataj willakorqa?

 CENTRALNINCHEJPI sumaj tantakoyqa kay 2023 watapi may sumajpuni karqa. a Chay tantakuypeqa imapichus creesqanchejmanta wakin imasta sutʼinchakorqa. Chantapis predicacionmanta wakin imasta willakorqa. Chaypi sutʼinchawarqanchej Jatun Babilonia chinkachisqa kasqanmantaña, wakin runas ichapis Jehovata yupaychayta ajllayta atinankutaraj. Chantapis nillawarqanchejtaj noviembre de 2023 watamantapacha, predicasqanchejmanta manaña tukuy imatachu willananchej kasqanta. Chay imas cambiakusqan, ¿ninayanchu manaña usqhaytachu willana kasqanta? Mana.

2. ¿Imaraykutaj sapa día pasasqanman jina aswan usqhayta willamuna tiyan? (Marcos 13:10).

² Días pasasqanman jina aswan usqhayllata willamuna tiyan. ¿Imaraykú chayta ninchej? Imaraykuchus tiempoqa sapa kuti aswan pisillaña. Qhepa pʼunchaykunapi willakunanmanta imatachus Jesús nisqanpi piensarina (Marcos 13:10 leey). Mateopis Jesús chayta nisqanmanta qhelqallarqataj. Mateo qhelqasqanman jina Jesús nerqa sumaj willaykunaqa niraj ‘tukukuy’ chayamushajtin jallpʼantinpi willakunanta (Mat. 24:14). ‘Tukukuy’ nispaqa Satanaspa sajra mundon wiñaypaj tukuchisqa kananmanta parlasharqa. Jehovaqa yachanña ima diachus, ima  horachus paypa nisqan juntʼakunanta (Mat. 24:36; 25:13; Hech. 1:7). Sapa día pasasqanman jina, tukukoyqa aswan qayllitapiña kashan (Rom. 13:11). Tukukuy chayamunankamataj predicanallapuni tiyan.

3. ¿Imaraykutaj runasman willanchej?

³ Tukuy kayta tapurikunanchej tiyan: ¿Imaraykutaj sumaj willaykunata willanchej? Munakuyniyoj kasqanchejrayku. Runasman willamuspaqa sumaj willaykunata, runastapis munakusqanchejta rikuchinchej. Chantapis astawanqa Jehovata, sutintawan munakusqanchejta rikuchinchej. Chay kinsa imasmanta ujmanta uj parlarina.

SUMAJ WILLAYKUNATA MUNAKUSQANCHEJRAYKU WILLANCHEJ

4. Uj sumaj willayta uyarispa, ¿imatá ruwayta munanchej?

⁴ ¿Pillapis kunallanraj uj sumaj willayta willasusqanta yuyarikunkichu? Ichapis willarisorqanku ujnin familiarniyki wawitayoj kasqanta chayri ichapis nisorqanku maskʼasharqanki chay trabajota qosunankuta. Chay willaykunata uyarispa, ¿imaynataj kasharqanki? May kusisqachá kasharqanki. Chayrayku familiaresniykimanpis amigosniykimanpis chayta willariytachá munarqanki. Diospa Gobiernonmanta sumaj willaykunata uyarispapis, ¿ajina kusisqallatajcharí kasharqanki?

5. Bibliata estudiashaspa, ¿imaynataj kasharqanki? (Fotostawan qhawariy).

⁵ Bibliata estudiashaspa imayna kusisqachus kashasqaykipi piensariy. Chaypeqa yachakorqanki Jehová munakususqanta, llajtanwan khuska payta yupaychanaykita munasqanta, nanaytapis llakiykunatapis chinkachisaj nisqanta, mosoj jallpʼapitaj munasqa familiaresniykita, amigosniykitapis kausarichimunanta (Mar. 10:29, 30; Juan 5:28, 29; Rom. 8:38, 39; Apo. 21:3, 4). Tukuy chay yachakusqaykitaj sonqoykiman chayarqa (Luc. 24:32). Ajinamanta chay sumaj imasta yachakusqaykitaqa munakuyta qallarerqanki, tukuy runasmantaj chayta willariyta munarqanki (Jeremías 20:9, kikinchay).

6. ¿Imatá yachakuwaj Ernestmanta, Rosemantawan?

 ⁶ Ernest b sutiyoj hermanomanta parlarina. Papasonqa chunka watitayoj kashajtin wañupusqa. Pay nin: “Tapukoj kani: ‘¿Papasuy cielomanchu ripun? Chayri, ¿chinkasqatachu chinkapun?’, nispa. Chayrayku papasusniyoj kaj wawasmanta envidiakoj kani”, nispa. Payqa casi sapa diapuni cementerioman riyta yachaj. Papasun pʼampasqa kasharqa chaypi qonqoriykukuspataj orakoj: “Diosníy, yachayta munani maypichus papasuy kashasqanta”, nispa. 27 watasniyoj jina kashajtintaj, “Bibliamanta yachakuyta munawajchu” nisqanku, paytaj chay rato “ya” nisqa. Payqa mayta kusikorqa wañusqas ni imata yachasqankuta, sinchʼi puñusqas jinallataj kashasqankuta yachaspa. Chantapis kusikullarqataj wañusqas kausarimunankuta Bibliapi yachakuspa (Ecl. 9:5, 10; Hech. 24:15). Payqa chay imasta unaymantaña yachayta munarqa. Bibliapi cheqa kajmanta yachakushasqanmantataj maytapuni kusikorqa. Señoran Rosepis paywan khuska Bibliata estudiayta qallarillarqataj. Paypis may kusisqa kasharqa Bibliapi imastachus yachakushasqanwan. Tiemponmantaj 1978 watapi iskayninku bautizakorqanku. Paykunaqa may kusiywanpuni imapichus creesqankumanta familiaresninkuman, tukuy allin sonqoyoj runasmanpis willarerqanku. Ajinapi Ernestwan Rosewanqa, 70 runasmanta astawan yanaparqanku Jehovata rejsinankupaj, bautizakunankupaj ima.

7. ¿Imatataj ruwayta munasun Bibliaj yachachiykunasninta mayta munakojtinchej? (Lucas 6:45).

⁷ Sichus sonqonchejpi Bibliaj yachachiykunasninta mayta munakusun chayqa, siminchejqa chaymanta parlanqa (Lucas 6:45 leey). Noqanchejpis ñaupa tiempomanta discípulos jinallataj ninchej: “Mana chʼinlla kayta atiykumanchu, willanaykupuni tiyan imastachus rikusqaykuta, uyarisqaykutapis”, nispa (Hech. 4:20). Noqanchejqa maytapuni cheqa kajta munakunchej. Chayraykutaj tukuy runasman chayta willariyta munanchej.

RUNASTA MUNAKUSQANCHEJRAYKU WILLANCHEJ

8. ¿Imaraykutaj sumaj willaykunata runasman willanchej? (“ Munakuywan yachachiy” nisqa recuadrota qhawariy; fototawan qhawariy).

⁸ Noqanchejpis Jehová jina, Jesús jinallataj runasta munakunchej (Pro. 8:31; Juan 3:16). Mana suyakuyniyoj, “mana Diosniyojtaj” kajkunamanta khuyakunchej (Efe. 2:12). Paykunaqa ashkha llakiykunasniyoj kanku, noqanchejtaj necesitasqanku yanapata qoyta atinchej Diospa Gobiernonmanta sumaj willaykunata willarispa. Runasta munakusqanchej,  khuyakusqanchejpis, tanqawanchej paykunaman sumaj willaykunata willarinapaj. Sumaj willaykunaqa paykunaman uj sumaj suyakuyta qon, kunanña kusisqa kausakunankupaj yanapan, chantapis “cheqa kaj kausayta” japʼiyta atenqanku, nisunman paraisopi wiñay kausayta (1 Tim. 6:19).

9. ¿Imatataj runasman willanchej, chanta imaraykutaj? (Ezequiel 33:7, 8).

⁹ Runasta munakusqanchejrayku paykunaman willarinchej kay sajra mundoj tukukuynin qayllitapiña kasqanta (Ezequiel 33:7, 8 leey). Mayta llakikunchej predicanchej chay lugarmanta runas, mana testigo familiaresninchejpis imachus pasananta mana reparaspalla kausakusqankurayku. Mateo 24:21 nin: “Manchay ñakʼariy kanqa. Chay jina ñakʼareyqa manaraj karqachu kay mundoj qallariyninmantapacha kunankama, nitaj ujtawanpis kanqañachu”, nispa. Tukuy runas yachanankuta munanchej imaschus chay tiempopi pasananta. Chay tiempopeqa ñaupajta tukuy llulla religiones chinkachisqa kanqanku. Chantá Armagedón maqanakuypi kay sajra mundo chinkachisqa kanqa (Apo. 16:14, 16; 17:16, 17; 19:11, 19, 20). Jehovamanta mañakunchej astawan runas willasqanchejta uyarinankupaj, noqanchejwan khuska payta sirviytataj kunan ajllakunankupaj. Jinapis, ¿imataj kanqa mana uyarikoj familiaresninchejwan, mana uyarikoj runaswanpis?

10. ¿Imaraykutaj runasman usqhayllata willanallanchejpuni tiyan?

¹⁰ Ñaupaj yachaqanapi yachakorqanchej jina, ichapis Jehovaqa salvayta ajllanqa pikunachus Jatun Babilonia chinkachisqa kasqanta rikusparaj Jehovata yupaychayta ajllakonqanku chaykunata. Chayta yachayqa yanapawanchej runasman aswan usqhayllata willamunapaj. Runasqa ichapis aswan qhepaman yuyarikonqanku imastachus kunan paykunaman willasunchej chay imasta (Ezequiel 33:33, kikinchay). Runasqa ichapis willasqanchejta yuyarikonqanku. Chayraykutaj ichá tiempo kashajtillanraj noqanchejwan khuska Jehovata sirviyta ajllanqanku. Paykunaqa ichapis Filiposmanta carcelero jina ruwanqanku. Payqa uj sinchʼi terremoto kajtinraj cheqa kajmanta yachakorqa. Aswan qhepamanpis wakin runasqa, ichapis Jatun Babilonia chinkachisqa kajtinraj cheqa kajmanta yachakuyta munanqanku. Chaytaj paykunapajqa uj terremoto jina kanqa (Hech. 16:25-34).

JEHOVATA, SUTINTAPIS MUNAKUSQANCHEJRAYKU WILLANCHEJ

11. ¿Imaynatataj Jehovata jatunchanchej, yupaychanchej, ‘atiytapis’ payman qonchej? (Apocalipsis 4:11; fotostawan qhawariy).

¹¹ Astawanqa Jehovata, santo sutintapis munakusqanchejrayku sumaj willaykunata willanchej. Runasman predicayqa munakusqanchej Diosta alabay jina. Noqanchejpis Jehovaman  ninchej: “Qanllamin jatunchanapaj jina kanki, yupaychanapaj jina, atiyta japʼinaykipaj jinataj”, nispa (Apocalipsis 4:11 leey). ¿Imaynatataj Diosta jatunchanchej, yupaychanchejtaj? Jehovapuni tukuy imata ruwasqanta, kausaytapis qowasqanchejta sumajta sutʼinchaspa. Chanta ¿imaynatataj Diosman “atiyta” qonchej? Tiemponchejta, kallpanchejta, kapuwasqanchejtapis atisqanchejman jina runasman willamunapaj churaspa (Mat. 6:33; Luc. 13:24; Col. 3:23). Arí, noqanchejmanqa munasqa Diosninchejmanta parlay mayta gustawanchej. Chantapis Diospa sutinmanta, sutin imachus niyta munasqanmantapis, runasman willayta munanchej. ¿Imarayku?

12. ¿Imaynatá Diospa sutinta jatunchanchej?

¹² Jehovata munakusqanchejrayku sutinta jatunchayta chayri llimphuchayta munanchej (Mat. 6:9). Satanasqa Diosmanta imaymana llullasta parlaspa sutinta chʼichichan. Noqanchejtaj Diospa sutin chay tukuy llulla imasmanta llimphuchasqa kananpaj yanapakuyta munanchej (Gén. 3:1-5; Job 2:4; Juan 8:44). Chayrayku runasman mayta willariyta munanchej pichus Jehová kasqanta, imayna Diostajchus kasqanta. Noqanchejqa munanchej tukuy runas yachanankuta Diosninchej may munakuyniyoj, cheqan kamachejtaj kasqanta. Chantapis munallanchejtaj yachanankuta Gobiernonqa tukuy llakiykunata tukuchinanta, allin kausayta, kusiy kausaytapis apamunanta (Sal. 37:10, 11, 29; 1 Juan 4:8). Tukuy chay imasta ruwaspaqa, Jehová Diospa sutinta jatunchashanchej. Chantapis sonqo juntʼasqa kanchej testigosnin jina imatachus ruwananchejta juntʼaspa. ¿Imaraykú chayta ninchej?

13. ¿Imaraykutaj Jehovaj testigosnin kasqanchejmanta kusisqas kashanchej? (Isaías 43:10-12).

¹³ Jehovaqa testigosnin kananchejpaj ajllawarqanchej (Isaías 43:10-12 leey). Pasaj wataspi Diospa Llajtanta Kamachejkunaqa uj cartapi nerqanku: “Jehovaj testigosnin jina rejsisqa  kasqanchejqa ni imawan kikinchakunchu”, nispa. c Kaypi piensarina: Pillapis sajra imasta ruwasqanchejta nispa tumpawasunman, juzgadopi favorninchejpi declarananpajtaj uj testigota necesitasunman. Jina kajtin, ¿imayna runatataj testigonchej kananpaj ajllasunman? Sumajta rejsisqanchej runatachá ajllasunman, pichus de confianza, jatunpaj qhawasqataj chayta. Ajinamanta paypa nisqan valechisqa kananpaj. Ajinallatataj Jehová Diospis noqanchejta ajllawanchej paylla cheqa Dios kasqanta sutʼinchanapaj. Payqa sumajta rejsiwanchej, noqanchejpitaj atienekun. Noqanchejpajqa may sumajpuni, maytataj kusichiwanchej Jehovaj testigosnin kayqa. Chayrayku maypi kashaspapis Diospa sutinta rejsichinchejpuni, paymanta llulla imasta nisqankutaj mana cheqachu kasqanta ninchej. Ajinamanta Jehovaj testigosnin jina imatachus ruwananchej tiyan, chayta juntʼanchej (Sal. 83:18; Rom. 10:13-15).

TUKUKUYKAMA WILLALLASUNPUNI

14. ¿Imastataj suyakushanchej?

¹⁴ Maytapuni suyakushanchej jamoj imasta. Mayta suyakushanchej manaraj manchay ñakʼariy tiempo qallarishajtin, Jehovaj bendicionninwan ashkha runasraj cheqa kajmanta yachakunankuta. Chantapis mayta kusikunchej manchay ñakʼariy tiempopi wakin runas Satanaspa mundonmanta llojsipuspa, ichapis noqanchejwan khuska Jehovata yupaychayta atinankutaraj yachaspa. Chay manchay ñakʼariy tiempo jinataj niraj jaykʼajpis karqarajchu (Hech. 13:48).

15, 16. ¿Imatataj ruwallasunpuni, chanta maykʼajkamataj?

¹⁵ Manchay ñakʼariy tiempo chayamunankamataj, Diospa Gobiernonmanta sumaj willaykunata jallpʼantinpi willamunallapuni. Chay llankʼayqa may sumajpuni, niñataj ujtawan ruwakonqachu. Chantapis runasman willanallanchejpuni tiyan kay sajra mundoj tukukuynin may usqhayllata qayllamushasqanta. Juzgana tiempo chayamojtin, runasqa reparanqanku predicasqanchejqa Jehovamantapuni jamusqanta (Eze. 38:23).

¹⁶ Chayrayku, ¿imatataj ruwallaytapuni munanchej? Sumaj willaykunata, runasta, Jehovata, sutintapis munakusqanchejrayku mana saykʼuspa, may kusiywantaj willallaytapuni munanchej. Chaytataj ruwayta munanchej Jehová amaña willanata ninawanchejkama.