1. ¿Imaraykutaj mana kasukuyta atillasunmanchu?

 WAKIN kutis, ¿nichu kasukuyta atillanchej? David ajinapi rikukorqa. Chayrayku Diosmanta mañakorqa: “Sonqoyta aysay tukuy sonqo kasukusunaypaj”, nispa (Sal. 51:12). Davidqa Jehovata munakorqa, jinapis wakin kutisqa mana kasukuyta atillarqachu. Noqanchejwanpis kikillantaj kanman. ¿Imajtin? Kay kinsa imasrayku: Ñaupaj kaj, mana kasukuyta herenciata jina japʼinchej. Iskay kaj, Satanasqa tukuy imata ruwashan pay jina Diospa contranta oqharikunanchejpaj (2 Cor. 11:3). Kinsa kaj, mana kasukuyta munaj runas chaupipi kausakunchej. “Chay yuyayqa wayra jina tukuynejpi kashan, mana kasukoj runaspitaj trabajashan” (Efe. 2:2). Chayrayku chay kinsa imaswan maqanakunapaj tukuy atisqanchejta kallpachakunanchej tiyan, ajinamanta Jehovata kasukunapaj, pikunamanchus atiyta qon chaykunatapis kasukunapaj.

2. ¿Ima niytá munan “kasukunapaj wakichisqa” kay? (Santiago 3:17).

² (Santiago 3:17 leey). Bibliata qhelqaj Santiago nerqa, yachayniyoj runaqa “kasukunanpaj wakichisqa” kasqanta. ¿Ima niytá munan chay? Pikunamanchus Jehová atiyta qon chaykunata kasukunapaj wakichisqa kana kasqanta, tukuy sonqotaj chayta ruwayta munana kasqanta. Chaywanqa Jehovaqa mana nishawanchejchu paypa contranpi imatapis ruwachiyta munawanchej chaykunata kasukunanchejta (Hech. 4:18-20).

3. ¿Imajtintaj Jehová munan atiyniyoj kajkunata kasukunanchejta?

³ Jehovaj kamachiykunasnenqa mana pantayniyoj kanku. Chayrayku ichá yuyasunman runata kasukunamantaqa, payta kasukuy aswan fácil kasqanta (Sal. 19:7). Atiyniyoj kanku chay runasqa pantaj runas kanku. Jinapis Tatanchej Jehovaqa tatasman, autoridadesman, ancianosman ima atiyta qon (Pro. 6:20; 1 Tes. 5:12; 1 Ped. 2:13, 14). Paykunata kasukuspataj  Jehovata kasukushanchej. Wakin kutisqa Jehová atiyta qon chaykunaj kamachisqanku mana allinchu rijchʼawasunman, nitaj kasukuyta atillasunmanchu. Qhawarina paykunata kasukunapaj imatachus ruwanata.

4. ¿Imaraykutaj ashkha jóvenes tatasninkuta mana kasukunkuchu?

⁴ Jovenesqa ‘tatasninkuta mana kasukoj’ compañerosninkuwan muyurisqa kashanku (2 Tim. 3:1, 2). ¿Imajtintaj ashkha jóvenes tatasninkuta mana kasukunkuchu? Wakenqa yuyanku, tatasninkoqa ujta nisqankuta, wajtataj ruwasqankuta. Chayrayku ninku: “Ima uyawantaj kamachishawanri”, nispa. Wakintaj yuyanku tatasninkoj yuyaychaykunasninkoqa ñaupa tiempo runaspaj jinalla kasqanta, mana kasukuy atina kasqanta, nitaj paykunata yanapananpaj jinachu kasqanta. Joven, ¿qanpis ajinatachu maykʼajllapis yuyarqanki? Wakenqa ichapis yuyankuman Jehovaj kay kamachisqan mana kasukuyta atinapaj jinallachu kasqanta: “Tataykichejta, mamaykichejtawan kasuychej, Señor munasqanman jina. Imaraykuchus chayta ruwayqa allin” (Efe. 6:1). ¿Imataj yanapasunkiman chayman jina ruwanaykipaj?

5. Lucas 2:46-52 nisqanman jina, ¿imaraykutaj Jesusmanta mayta yachakuyta atinchej?

⁵ Jesusmanta kasukoj kayta mayta yachakuwaj (1 Ped. 2:21-24). Payqa mana pantaj runachu karqa, tatasnintaj pantaj runas karqanku. Jinapis tatasninku pantajtinkupis chayri mana entiendejtinkupis, Jesusqa paykunata kasukullarqapuni (Éxo. 20:12). 12 watasniyoj kashajtin imapichus rikukusqanpi piensarina (Lucas 2:46-52 leey). Jesusqa familianwan khuska Jerusalenman rerqa, watapi uj kutita ruwakoj chay fiestasmanta ujninman. Josewan Mariawanqa Jerusalenmanta kutinpushaspa, mana repararqankuchu Jesusqa mana paykunawanchu kashasqanta. Tukuynin wawasninkuta paykuna tatas jina sumajta qhawananku karqa. Jesusta tariytawantaj Mariaqa paytaraj kʼamerqa. Jesusqa niyta atinman karqa payta kʼamispaqa mana allintachu ruwashasqanta, jinapis mana chaytachu nerqa. Astawanpis respetowan uj imitallata nerqa. Josewan Mariawantaj “mana entienderqankuchu chay nisqanta”. Jinapis Jesusqa paykunata “kasukullarqapuni”.

6, 7. ¿Imataj jovenesta yanapanman tatasninkuta kasukunankupaj?

⁶ Joven, tatasniyki pantajtinku chayri mana entiendesojtinku, ¿kasukuyta atillankichu? ¿Imataj yanapasunkiman kasukuyta atinallaykipaj? Ñaupajtaqa yuyarikuy kasukojtiyki imaynachus Jehová kashasqanta. Bibliaqa nin wawas tatasninkuta kasukusqanku ‘Señorta mayta kusichisqanta’ (Col. 3:20). Jehovaqa yachan wakin kutis tatasniyki mana entiendesusqankuta, chayri mana kasukuyta atinaykipaj jina kamachiykunata qosusqankuta. Ajina kajtinpis paykunata kasukunkipuni chayqa, Jehovata mayta kusichinki.

⁷ Iskay kaj, tatasniykipi piensariy. Kasukuspaqa paykunata kusichinki, qanpitaj atienekonqanku (Pro. 23:22-25). Chantapis kasukuspaqa paykunawan aswan ujchasqa kanki. Belgicamanta Alexandre nin: “Tatasniyta astawan kasukuspaqa paykunawan aswan allinta apanakorqani. Astawan ujchasqas karqayku, aswan kusisqastaj”, nispa. b Kinsa kaj, kunan kasukuyta yachakusqaykeqa aswan qhepaman yanapasonqa. Brasilmanta Paulo nin: “Tatasniyta kasukuyta yachakusqayqa Jehovata, atiyniyoj kajkunatapis kasukunaypaj yanapawan”, nispa. Diospa Palabrantaj kasukojtiyki imachus kananta nin: “Allin risonqa, kay jallpʼapitaj unayta kausakunki”, nispa (Efe. 6:2, 3).

8. ¿Imaraykutaj ashkha jóvenes tatasninkuta kasukunku?

 ⁸ Ashkha jovenesqa reparanku tatasninkuta kasojtinku aswan allin risqanta. Luizamanta parlarina, payqa Brasilmanta. Edadninmanta jovenesqa casi tukuyninku celularesniyoj karqanku. Chayrayku payqa mana entiendeyta atillajchu imaraykuchus tatasnin celularniyoj kananta mana saqesqankuta. Chaymantaraj repararqa tatasnenqa payta cuidashasqankuta. Pay nin: “Kunan reparani tatasneyqa necesitashajtiypuni sumajta yuyaychawasqankuta. Chayrayku paykunata kasukoyqa allinnillaypaj”, nispa. Estados Unidosmanta Elizabeth sutiyoj sipasqa wakin kutis mana kasukuyta atillanchu. Pay nin: “Tatasniy imatapis kamachiwajtinku, imaraykutajchus chayta kamachiwasqankuta mana entiendejtiy piensarini imaynatachus ñaupaj kutispi kamachiwasqanku jarkʼawasqantapuni”, nispa. Armeniamanta Monica nin tatasninta kasukojtenqa allinpuni risqanta, mana kasukojtintaj mana allinchu risqanta.

9. ¿Imatá ashkha runas yuyanku gobiernoj leyesninta kasukunamanta?

⁹ Ashkha runasqa yachanku gobiernos necesitakusqantapuni. Yachallankutaj chay ‘autoridadespa’ leyesninkuta wakillantapis kasukunapuni kasqanta (Rom. 13:1). Chaywanpis uj ley mana allinchu rijchʼajtin, chayri mana kasukuy atina kasqanta yuyajtinku, mana kasukuyta munallankuchu. Impuestosta paganamanta parlarina. Europamanta ujnin suyupi runasta taporqanku impuestosta paganamanta. Sapa tawa runasmanta uj nerqa: “Sichus yuyanchej impuestota anchatañataj cobrashasqankuta chayqa, mana pagananchejpunichu tiyan”, nispa. Chayrayku chay suyumanta runasqa mana gobiernoj tukuynin mañasqantapunichu impuestosta paganku, manaqa khuskanmanta tumpa kurajllata.

10. ¿Imaraykutaj leyesta kasukunchej mana allinchu rijchʼawajtinchejpis?

¹⁰ Biblia nisqanman jina gobiernosqa runasta sufrichinku, Satanaspa makinpi kashanku, tumpamantawantaj chinkachisqa kanqanku (Sal. 110:5, 6; Ecl. 8:9; Luc. 4:5, 6). Jinapis Bibliaqa nillantaj: “Autoridadesta mana kasukojqa, Diospa contranpi kashan”, nispa. Jehovaqa kay tiempopi gobiernos kananta saqen tukuy imata maychus kananpi japʼinankupaj, munantaj paykunata kasukunanchejta. Chayrayku Biblia niwanchej: “Tukuyman imatachus qonaykichej kasqanta qoychej”, nispa. Chaytaj kashan impuestosta pagay, respetay, kasukuy ima (Rom. 13:1-7). Ichapis yuyasunman uj leyta kasukoyqa mana allinninchejpajchu kasqanta, ashkha qolqepaj kasqanta, chayri chay ley mana allinchu rijchʼawasunman. Jinapis noqanchejqa Jehovata kasukunchej, paytaj munan gobiernostapis kasukunanchejta. Jinapis gobiernoj kamachiykunasnin, Jehovaj kamachiykunasninman churanakojtin mana kasukunchejchu (Hech. 5:29).

11, 12. 1) Lucas 2:1-6 nisqanman jina, ¿imatá Josewan Mariawan ruwarqanku uj kamachiyta juntʼanankupaj? 2) Kasukusqankurayku, ¿imataj karqa? (Dibujostawan qhawariy).

 ¹¹ Josemantawan Mariamantawan mayta yachakusunman. Paykunaqa mana atikullajtinpis autoridadesta kasukunankupaj wakichisqa kasharqanku (Lucas 2:1-6 leey). María jisqʼon killasña onqoj kashajtin, Romamanta César Augustoqa kamacherqa tukuy runas qhelqachikamunankuta. Chay kamachisqanta juntʼanankupaj Josewan Mariawanqa Belenman rinanku karqa. Chaypajtaj 150 kilometrosta jina chakipi lomasninta rinanku karqa. Chay chhika karuta puriytaj nichá atinapaj jinallachu karqa, astawanrajchá Mariapaj. Ichapis paykunaqa llakikorqanku María ñanpi nanaywan japʼichikojtin imachus pasananmanta. Chay wawitaqa mana mayqen wawallachu karqa, Mesías kanan karqa. Chayrayku nichá munarqankuchu imapis pasananta. Chay imasrayku atinkuman karqa chay leyta mana kasukuyta.

¹² Chaywanpis Josewan Mariawanqa chay leyta kasukorqankupuni. Jehovataj kasukusqankurayku bendicerqa: Mariaqa Belenman allillanta chayarqa, wawan sanito nacekorqa, uj profecía juntʼakunanpajtaj yanapakorqa (Miq. 5:2).

13. Kasukusqanchej, ¿imaynatá hermanosta yanapanman?

¹³ Autoridadesta kasukoyqa mana noqallanchejtachu yanapawanchej, manaqa wajkunatapis. Kasukojtinchejqa mana autoridadeswan castigachikusunchu leyesta pʼakejkuna jinaqa (Rom. 13:4). Chantapis uj leyta kasukuspaqa yanapakunchej autoridades Jehovaj testigosninmanta allinta parlanankupaj. Pasaj wataspi chay pasarqa Nigeriapi. Hermanos reunionpi kashajtinku, soldados chay salonman yaykuykorqanku. Chay soldadosqa, impuestosta mana pagayta munaspa chʼajwasta rikhurichej runasta maskʼashasqanku. Chay soldadosmanta cargoyoj kajtaj, soldadosninta nerqa chaymanta ripunallankuta. Pay nerqa: “Jehovaj testigosnenqa impuestosninkuta pagankupuni”, nispa. Leyesta kasukuspaqa yanapakunchej Diospa llajtan aswan sumaj qhawasqa kananpaj.  Chaytaj aswan qhepaman hermanosninchejta yanapanman (Mat. 5:16).

14. ¿Imatá uj hermana ruwarqa autoridadesta kasukunanpaj?

¹⁴ Wakin kutisqa mana atillasunmanchu autoridadesta kasukuyta. Estados Unidosmanta hermananchej Joanna sutʼita kayta nin: “Familiaytaqa autoridades qhasimanta sufrichisqanku, chayrayku manapuni autoridadesta kasukuyta atillarqanichu”, nispa. Jinapis Joannaqa kallpachakorqa yuyayninta cambiananpaj. ¿Imatá chaypaj ruwarqa? Ñaupajtaqa manaña redes socialespi leejchu autoridadespa contrankupi parlasqankuta (Pro. 20:3). Iskay kaj, gobiernos cambianankuta suyananmantaqa, Jehovamanta mañakorqa paypi confiananpaj yanapananta (Sal. 9:9, 10). Kinsa kaj, publicacionesninchejpi politicaman mana chhapukunamanta parlaj yachaqanasta leerqa (Juan 17:16). Joannaqa nin autoridadesta respetasqanrayku, paykunatataj kasukusqanrayku may sonqo tiyasqa, kusisqataj kasqanta.

15. ¿Imajtintaj wakin kutis Diospa llajtanpa kamachiykunasninta mana kasukuyta atillasunmanchu?

¹⁵ Jehovaqa niwanchej congregacionpi ‘ñaupajman pusawanchej’ chaykunata kasukunata (Heb. 13:17). Kamachejninchej Jesús ni imapi pantajtinpis, kay jallpʼapi ñaupajman pusanawanchejpaj churan chaykunaqa pantaj runas kanku. Chayrayku wakin kutisqa imastachus kamachiwasqanchejta mana kasukuyta atillasunmanchu, astawanraj mana munasqanchej imasta ruwanata kamachiwajtinchej. Uj pacha apóstol Pedro ajinapi rikukorqa. Paymanqa uj ángel nerqa Moisespa Leyninman jina chʼichipaj qhawasqa animalespa aychankuta mikhunanta. Pedrotaj kinsa kutitapuni nerqa mana mikhunanta (Hech. 10:9-16). Paymanqa chay mosoj kamachiykuna mana allinchu rijchʼarqa. Payqa uj jinamanta ruwayman yachasqa karqa. Pedroqa uj mana pantaj angelta mana kasukuyta atillarqachu. Noqanchejtaj astawanraj mana kasukuyta atillasunmanchu pantaj runaspa kamachiykunasninkuta.

16. ¿Imatá Pablo ruwarqa wakin kamachiykuna mana allinchu rijchʼajtinpis? (Hechos 21:23, 24, 26).

¹⁶ Apóstol Pabloqa kasukunanpaj wakichisqapuni karqa. Wakin kamachiykunaqa ichapis mana allinchu rijchʼarqa, jinapis kasukorqapuni. Uj pacha judío cristianosqa Pablomanta mana allinta parlajta uyarisqanku. Runasqa nisharqanku Pabloqa “Moisespa contranpi oqharikunankuta” yachachishasqanta, nitaj Moisespa Leyninta kasukushasqanta (Hech. 21:21, sutʼinchaynin). Jerusalenmanta ancianostaj, Pablota nerqanku Leyta kasukushasqanta sutʼita rikuchinanta. Chaypajtaj Pabloqa tawa runaswan temploman rinan karqa chaypi llimphuchakamunanpaj. Pabloqa yacharqa cristianosqa manaña Moisespa Leyninman jinachu kausakunanku kasqanta, nitaj ima juchatapis ruwasqanta. Jinapis chay rato kasukorqa. Biblia nin: “Qʼayantintaj Pabloqa chay tawa qharista pusaspa, paykunawan khuska Leyman jina llimphuchakamorqa”, nispa (Hechos 21:23, 24, 26 leey). Pabloqa kasukusqanwan yanapakorqa hermanos ujchasqasllapuni kanankupaj (Rom. 14:19, 21).

17. ¿Imatá Stephaniemanta yachakunchej?

¹⁷ Hermananchej Stephanieqa mana kasukuyta atillarqachu imatachus sucursal kamachisqanta. Paywan qosanwanqa waj parlaypi grupota yanapakuspa kusisqa sirvisharqanku. Jinapis sucursalqa kamacherqa chay grupo wisqʼakapunanta, paykunataj parlayninkupi kaj congregacionman kutipunankuta. Chayta nejtinku, ¿imayná Stephanie kasharqa? Pay nin: “May llakisqa kasharqani, yuyarqanitaj parlayniymanta kaj congregacionqa mana yanapata necesitashasqanta”, nispa. Jinapis payqa kasukorqa.  Pay nillantaj: “Tiemponman repararqani chay hermanospa kamachisqankoqa allillan kasqanta. Mosoj congregacionniykumanta ashkha hermanosqa sapallanku testigos kanku. Chayrayku noqaykoqa paykunaj tatasninku jina kayku. Chantapis uj chiriyapoj hermanaman Bibliamanta yachachishani. Sapallaypi Bibliata estudianaypajpis astawan tiempoy tiyapuwan”, nispa. Pay nillanpuni: “Tukuy atisqayta kallpachakorqani kasukunaypaj, chayraykutaj sonqoyqa mana juchachawanchu”, nispa.

18. ¿Imaynatá kasukoj kay yanapawanchej?

¹⁸ Tukuypis kasukuyta yachakusunman. Jesusqa “ñakʼarisqanrayku kasukoj kayta yachakorqa”, manataj tukuy imapis allillan kasqanraykuchu (Heb. 5:8). Ashkha kutispi, noqanchejpis llakiykunapi rikukuspa kasukoj kayta yachakunchej. Coronavirus onqoy qallarishajtin imachus kasqanpi piensarina. Chay onqoy kasqanrayku kamachiwarqanchej manaña Tantakuna Wasispi tantakunanchejta, niñataj wasimanta wasi predicananchejta. ¿Chayta kasukuyta atillarqanchejchu? Mana kasukunapaj jinallachu kajtinpis, kasukusqanchejqa jarkʼawarqanchej, hermanosninchejwan ujchasqasllapuni kananchejpaj yanapawarqanchej, Jehovatapis kusicherqanchej. Kunanqa aswan wakichisqa kashanchej manchay ñakʼariy tiempo chayamojtin ima kamachiytapis kasukunapaj. Salvakunanchejqa ichapis kasukunanchejmanta kanqa (Job 36:11).

19. ¿Imaraykutaj kasukoj runa kayta munanki?

¹⁹ Yachakunchej jina kasukuspaqa ashkha bendicionesta japʼinchej. Jinapis astawanqa Jehovata kasukunchej payta munakusqanchejrayku, kusichiytataj munasqanchejrayku (1 Juan 5:3). Jehovamanqa ni jaykʼaj kutichipuyta atisunmanchu tukuy imata noqanchejrayku ruwasqanmanta (Sal. 116:12). Jinapis kayta ruwayta atisunman: Jehovata kasukuyta, pikunamanchus atiyta qon chaykunatapis. Kasukuyta yachasqanchejwanqa yachayniyoj runas kasqanchejta rikuchishanchej. Yachayniyoj runas kaspataj Jehovata kusichinchej (Pro. 27:11).