1, 2. 1) ¿Imaraykutaj wakin kuti imatapis mana reparanchejchu? 2) ¿Imatataj Diospa Reinonmanta yachanchej?

 RUNASQA imatapis rikusqankumanta mana tukuychu kikinta yuyarikunku. Jinallataj uj runapis doctorman rispa, imatachus onqoyninmanta doctor nisqanta mana tukuynintachu yuyarikunman. Wakin runastaj, ichapis lentesninkuta chayri llavenkuta ñawinkupi kashajtinpis mana tariyta atillankuchu. ¿Imaraykú ajinapi rikukunku? Yachayniyoj runas nisqankuman jinaqa ashkha imasta ujllapi ruwayta munasqankurayku. Ñojtunchejqa uj imallapi yuyanapaj yanapawanchej, mana ashkha imaspeqa.

² Ashkha runasqa ima tiempopichus kausashasqanchejta nillataj reparayta atinkuchu. Ichapis 1914 watamantapacha Jallpʼantinpi kausay tijrakusqanta reparanku, chaywanpis mana reparankuchu imaraykupunichus chaykuna kashasqantaqa. Noqanchejtajrí, Bibliata ukhunchasqanchejrayku Diospa Reinon 1914 watapi jamusqanta yachanchej. Chay watapeqa Jesús janaj pachapi Rey churasqa karqa. Chaywanpis “Reinoyki jamuchun, munayniykitaj ruwasqa kachun, imaynachus janaj pachapi, ajinallatataj kay pachapipis” nisqa mañakuyta, mana tukuynintarajchu Jehová kutichiwanchej (Mat. 6:10). Arí, Diospa munaynin imaynachus janaj pachapi ruwakun, ajinallatataj kay  pachapipis ruwakunanpajqa kay sajra pacharaj chinkachisqa kanan tiyan.

3. ¿Imatá reparanchej Diospa Palabranta ukhunchasqanchejrayku?

³ Diospa Palabranta ukhunchasqanchejrayku, profeciasnin kay tiempopi juntʼakushasqanta reparanchej, waj runastaj ma­na chayta reparayta atinkuchu. Runasqa munayninkuta, ruwanasninkuta imalla ñaupajman churanku. Chayraykutaj, Cristo 1914 watamantapacha kamachishasqanta mana reparankuchu, nitaj tumpamantawan kay sajra pachata chinkachinantapis. Qan unaytaña Jehovata sirvishanki chayqa tapurikuy: “¿Ñaupaj wataspi jinallapunichu tukukuy pʼunchay qayllitapiña kasqanta yuyani? ¿Creenichu kay tiempopi imaschus kasqan chayta sutʼita rikuchishasqanta?”, nispa. Kunallanraj Testigo kanki chaypis, kayta tapurikuy: “¿Imatá kausayniypi aswan ñaupajman churani?”, nispa. Kunanqa imaraykuchus Jesucristo tumpamantawan Diospa munayninta kay Jallpʼapi juntʼananta, kinsanejmanta qhawarina.

4, 5. 1) ¿Imatá Jesús 1914 watamantapacha ruwashan? (27 paginapi dibujota qhawariy.) 2) ¿Imawantaj ninakun kinsa caballospi lloqʼasqa kajkuna, imaynatataj chay profecía juntʼakushan?

⁴ Jesucristoqa 1914 watapi Diospa Reinonpi kamachinanpaj churasqa karqa. Apocalipsis librotaj, “yuraj caballopi” lloqʼasqa runa jina kasqanta nin. Rey churasqa kasqantawantaj, Satanaspa pachanta chinkachinanpaj llojsimorqa (Apocalipsis 6:1, 2 leey). Apocalipsis libropi nisqanman jinaqa Diospa Reinon sayarichisqa kasqantawan, Jallpʼantinpi kausay mana allinman tukunan karqa. Arí, guerras, yarqhaykuna, onqoykuna, waj imaspiwan rikhurinan karqa. Chaykunataj, Jesús Rey jina churasqa kasqantawan kinsa caballospi lloqʼasqa kajkuna qhepan qhepanta llojsimusqankuwan ninakun (Apo. 6:3-8).

⁵ Bibliaqa guerras “allin kawsayta kay pachamanta” qhechunanta nerqa. Chaytaj ajinapuni karqa. Naciones allin kausay kananpaj tukuy imata ruwajtinkupis, guerrasqa kashallanpuni. Kay 1914 watapi Ñaupaj kaj Guerra Mundial kasqanqa, ni mayqen guerra jina Jallpʼamanta allin kausayta qhechorqa. Chay watamantapacha qolqe astawan kajtinpis, runa yachayninwan ashkha imasta ruwajtinpis yarqhayqa Jallpʼantinpi kashallanpuni. Chantapis tukuy laya onqoykuna, jatun ñakʼariykuna, waj imaspiwan kasqanrayku, may chhika runas sapa wata wañunku. Chaykunataj tukuynejpi, sapa kuti rikukushan, ni jaykʼaj jinataj. ¿Reparankichu imaraykuchus chaykuna kashasqanta?

6. 1) ¿Pikunataj sutʼita repararqanku Bibliaj profeciasnin juntʼakushasqanta? 2) ¿Imatataj chayrayku ruwarqanku?

⁶ Runasqa Ñaupaj kaj Guerra Mundial kashajtin, chayllapi astawanpis yuyasharqanku, jinallataj gripe española nisqa rikhurisqanpipis. Chaywanpis, ajllasqa cristianosqa 1914 watapi “mana judío [kajkunaj] pʼunchayninku” juntʼakunanta nerqanku (Luc. 21:24). Imapunichus chay watapi kananta mana yachajtinkupis, Diospa Reinonpi imapis kanantapuni yuyarqanku. Bibliaj profeciasnin juntʼakushasqanta reparaspataj, Diospa Reinon kamachiyta qallarisqanta mana manchikuspa willarqanku. Chay jawa qhatiykachasqa karqanku, chaytaj Bibliaj profeciasnin juntʼakushasqanta sutʼita rikuchillarqataj. Aswan qhepamantaj, enemigosninkoqa contrankupi leyesta orqhorqanku, chantapis paykunata ñakʼaricherqanku, wakinta carcelman wisqʼacherqanku, sipicherqanku, wakintataj baleachispa wañucherqanku chayri umasninkuta qholucherqanku (Sal. 94:20; Apo. 12:15).

7. ¿Imaraykú may chhika runas mana reparankuchu Bibliaj profeciasnin juntʼakushasqanta?

⁷  Diospa Reinon janaj pachapi kamachishasqan sutʼi kajtinpis, ¿imaraykutaj may chhika runas mana chayta reparankuchu? ¿Imaraykupunitaj mana reparankuchu Bibliaj profeciasnin juntʼakushasqanta Jehovaj llajtan unaytaña willajtinpis? ¿Imastachus rikusqallankupi creesqankuraykuchu? (2 Cor. 5:6, 7.) ¿Paykunallapi yuyasqankuraykuchu mana reparayta atinku imatachus Dios ruwashasqanta? (Mat. 24:37-39.) Chayrí, ¿Satanaspa pachanpa imasninwan apachikusqankuraykuchu? (2 Cor. 4:3, 4.) Diospa Reinon imastachus ruwashasqanta reparanapajqa creeyniyoj kana, nitaj rikusqallanchejpichu atienekuna. Mayta kusikunchej imaraykuchus imapis kashasqanta reparasqanchejmanta.

8-10. 1) ¿Imaynatataj 2 Timoteo 3:1-5 juntʼakushan? 2) ¿Imataj rikuchin sajra ruwaykuna astawan yapakushasqanta?

⁸ ¿Imaraykutaj nillasunmantaj Diospa Reinon tumpitamantawan Jallpʼata kamachimunanta? Sajra ruwaykuna mayta yapakushasqanrayku. Arí, 2 Timoteo 3:1-5 versiculospi nikusqanqa 100 watasta jinaña juntʼakushan, Jallpʼantinpitaj chaykunaqa rikukushan. ¿Qanpis chayta reparankichu? Chaykunamanta wakinta ukhuncharina (2 Timoteo 3:1, 13 leey).

⁹ Imastachus runas kay 1940 chayri 1950 wataspi millaypaj qhawaj kanku chaykunataqa kunan tiempo llankʼaypi chayrí kusikunapaj imaspi, atipanaku pujllaykunapi, pʼachaspi ima allillanpis kanman jinata rikuchikun. Jinallataj sajra ruwaykuna, khuchichakuykuna ima tukuynejpi rikukushan. Wakin runasqa aswan sajras chayri aswan khuchi runas kasqankuta rikuchinankupaj atipanakunku. Kay 1950 wataspi telepi wakin imasta rikuchikusqantaqa mana allinpajchu qhawakoj, kunantaj allillanpis kanman jina rikuchikun. Chantapis, ashkha runas sutʼita reparanku telepi, cinespi, Internetpi, waj imaspiwan qharipura jinanakojkuna rikhurisqankuta. Chaywantaj kausayninkuta sumajpaj ­qhawachiyta munanku. Chaykunamanta  imatachus Jehová Dios yuyasqanta yachaspataj mayta agradecekunchej (Judas 14, 15 leey).

¹⁰ Chantapis, imatachus 1950 wataspi machu machu wawas ruwaj kanku chaykunataqa kunan allillanpajña qhawakun. Chay tiempo tatasqa wawasninku pitanankuta, machachej ujyanasta ujyanankuta chayrí aychaj munayninta rijchʼarichinapaj jina tusunankuta mana allinpajchu qhawaj kanku. Kunantaj, mancharinapaj jina ruwaykuna tukuynejpi uyarikun. Sutʼincharinapaj, uj joven 15 watayoj, yachaywasimanta compañerosninta balearpaspa iskayta wañucherqa, 13 compañerosnintataj parti wañusqata saqerparqa. Machasqa jovenestaj, jisqʼon watitayoj imillitata sonqo nanayta wañucherqanku, tatantawan primontawantaj mayta maqaykorqanku. Chantapis, yachakusqanman jinaqa Asiaj ujnin suyunpi, sajra ruwaykuna kasqanmanta khuskanta jóvenes ruwanku. ¿Pitaj ninman mana kay pacha astawan sajrayashasqanta?

11. ¿Imaraykutaj ashkha runas kausay mana allinman tukushasqanta mana reparankuchu?

¹¹ Apóstol Pedroqa kayta nerqa: “Qhepa pʼunchaykunapi asipayajkuna jamonqanku, aychankoj sajra munayninman jina kawsaspa. Nenqankutaj: Maytaj Cristoj jamusaj nisqanri? Ñawpa tatasniyku wañusqankumantapacha kunankamaqa tukuy ima, qallariypi jina imaynachus karqa, pachallampuni kakushan”, nispa (2 Ped. 3:3, 4). ¿Imaraykutaj runas ajinata yuyanku? Sajra ruwaykuna astawan kajtin chayman yachaykakapusqankurayku. Uj rejsisqanchej kaymanta jinalla sajra runaman tukojtin, tʼukushajchá qhepakusunman. Chaywanpis runaspa yuyasqanku, kausayninku ima pisimanta pisi mana allinman tukojtenqa mana tʼukunapajchu kanman. Jinapis, mana chayraykuchu imapis allillan kasqanta nisunman.

12, 13. 1) ¿Imaraykutaj kay pachapi tukuy ima tijrakushajtinpis mana qʼasa sonqochu qhepakunchej? 2) ¿Imata yachaytaj yanapawasun sajra pʼunchaykunata muchunapaj?

¹² Apóstol Pablopis “qhepaman manchay sajra pʼunchaykuna” jamunanta nerqa (2 Tim. 3:1). Chaywanpis mana nerqachu mana muchuy atina kanantaqa, chayrayku mana manchachikunachu. Jehová yanapawasun espíritu santonnejta, qotuchakuynejta ima mana imatapis manchachikunapaj, nitaj qʼasa sonqo qhepakunapaj. Arí, Jehovaman cheqa sonqo kayta atinchej. Imajtinchus “may sumaj ateyqa Diosmanta” jamun, manataj noqanchejmantachu (2 Cor. 4:7-10).

¹³ Apóstol Pabloqa kay qhepa pʼunchaykunamanta parlayta qallarishaspa, “yachanallaykitaj tiyan kayta”, nispa nerqa. Chaytaj imatachus nisqan ­juntʼakunantapuni rikuchin. Chayrayku kay pachaqa Jehová tukuchinankama astawan sajrayaponqa. Yachayniyoj runasqa wakin llajtas niraj chinkachisqa kashajtinku, runaspa kausayninku millayman tukusqanta ninku. Kunanpis ni jaykʼaj jina runaspa kausaynenqa aswan millayman tukupushan. Ashkha runastaj, imaraykuchus chay jina kashasqanta mana reparankuchu. Chaywanpis, 1914 watamantapacha tukuy ima tijrakusqanqa Diospa Reinon tumpamantawan chaykunata chinkachinanta rikuchin.

14-16. ¿Imaraykú nillasunmantaj Diospa Reinon tumpitamantawan jamunanta?

¹⁴ Watas pasasqanman jina imaschus Diospa llajtanpi kasqanqa, tukukuy pʼunchay aswan qayllitapiña kasqanta rikuchillantaj. Niraj Diospa Reinon janaj pachapi kamachiyta qallarishajtenqa, uj juchʼuy qotu ajllasqa cristianos Diosta tukuy sonqo yupaychasharqanku. ¿Imatá ruwarqanku  1914 watapi imastachus suyakusqankumanta wakin imas mana juntʼakojtin? Yaqha tukuyninku Jehovata sirvillarqankupuni, qhatiykachasqa chayri pruebaman churasqa kajtinkupis. Chayrayku watas pasasqanman jina, chay ajllasqa cristianosqa wañupunankukama cheqa sonqosllapuni karqanku.

¹⁵ Jesusqa kay pachaj tukukuyninmanta parlashaspa nerqa: “[Kay mita runasqa, NM] manaraj wañonqankuchu, chay tukuy ima juntʼakunankama” nispa (Mat. 24:33-35). Jesús “kay mita runasqa” nispa, iskay qotu ajllasqa cristianosmanta parlasqanta entiendenchej. Ñaupaj kaj qotumanta ajllasqa cristianosqa, Jesucristo 1914 watapi Rey jina churasqa kasqanta entienderqanku. Paykunataj mana 1914 watapi kausajkunallachu, nitaj Jesús kamachiyta qallarishasqanta reparajkunallachu karqanku, manaqa 1914 watapi chayri aswan ñaupajta, espíritu santowan Diospa wawasnin kanankupaj ajllasqa karqanku (Rom. 8:14-17).

¹⁶ Chay “mita” runasmanta iskay kaj qotoqa, mana ñaupaj kaj qotumanta kajkunawan kikin tiempopi kausajkunallachu kanku, manaqa ñaupaj kaj qotumanta kajkuna kausashajtinkuraj espíritu santowan ajllasqa karqanku. Chayrayku, mana kay tiempo tukuy ajllasqa cristianoschu Jesuspa parlasqan “mita” runasmanta kanku. Kunankamaqa iskay kaj qotumanta kajkuna machitusña kashanku. Jesús Mateo 24:34 versiculopi nisqanman jinataj, niraj manchay ñakʼariy qallarishajtin chay “[mita runasqa, NM] manaraj wañonqankuchu”. Chayrayku, chay mita runasmanta wakenqa manchay ñakʼariy chayamojtin, Jallpʼapiraj kashanqanku. Chaytaj rikuchiwanchej Diospa Reinon tumpitamantawan sajra runasta chinkachinanta, mosoj pachataj qallarinanta, maypichus cheqan kausaylla kanqa (2 Ped. 3:13).

17. ¿Imatá nisunman chay kinsa imasta ukhunchasqanchejmanta?

¹⁷ ¿Imatataj nisunman chay kinsa imasta ukhunchasqanchejmanta? Jesús nerqa jina maykʼajchus, ima pʼunchaychus, ima horachus tukukuy kananta mana yachanchejchu (Mat. 24:36; 25:13). Chaywanpis Pablo nerqa jina, “tiempota allinta” reparanchej (Romanos 13:11 leey). Kunantaj chay tiempopi, nisunman qhepa pʼunchaykunapi kausashanchej. Bibliaj profeciasninta, jinallataj Jehovawan Jesuswan imatachus ­ruwashasqankutapis allinta ukhunchaspaqa, sutʼita reparanchej kay sajra pachaj tukukuynin qayllitapiña kashasqanta.

18. ¿Imataj kanqa Diospa Reinonpa kamachiyninpi mana kayta munajkunawan?

¹⁸ Yuraj caballopi lloqʼasqa atipaj Rey Jesucristoj kamachiyninta qhesachajkunaqa, tumpitamantawan pantasqa kasqankuta reparakonqanku. Nitaj maymanpis ayqeyta atenqankuchu. Chay pʼunchay chayamojtenqa ashkha runas mancharikuspa nenqanku: “Pitaj atenqa awantaytari?”, nispa (Apo. 6:15-17). Apocalipsis 7 capituloqa pikunachus aguantayta atinankumanta parlan. Ajllasqa cristianosta, jinallataj kay Jallpʼapi wiñaypaj kausakuyta suyakojkunatapis, Jehová allinpaj qhawanqa. “May chhika” runasmanta kajkunataj, manchay ñakʼariy tiempomanta kausashaj llojsenqanku (Apo. 7:9, 13-15).

19. ¿Imatataj mayta suyakushanchej?

¹⁹ Bibliaj profeciasnin kay tiempopi juntʼakushasqanpi yuyayninchejta ­churasun chayqa, Satanaspa sajra pachanwan ni chʼaukiyachikusunchu. Chantapis, imaraykuchus Jallpʼantinpi tukuy ima kashasqanta sutʼita reparasun. Cristoqa tumpamantawan, Armagedón maqanakuypi atipaspa llojsenqa (Apo. 19:11, 19-21). Chaymantataj, ¡sumaj kausay kanqa! (Apo. 20:1-3, 6; 21:3, 4.)