Juk jatun imprentata riqsina

ICHÁ mana kunan kutillaraqchu kay Torremanta Qhawaq revistata qhawachkanki, imaraykuchus ichá wakin Jehovamanta sutʼinchaqkunaqa, kay revistata wasiykipi saqisurqankuña. Chayri wak lugarpi kachkaptiyki kay revistata, ¡Despertad! revistatawan saqisurqankuña. Kay iskay revistasqa, runasta astawan Bibliamanta yachakunankupaq yanapan. Astawanpis, Torremanta Qhawaq revistaqa, sapa killa, 35 millonesmanta astawan urqhukun, chayrayku ima revistamantapis astawan riqsisqa.

¿Maykʼaqllapis tapurikurqankichu maypichus, chantá imaynatachus kay publicaciones ruwakusqanta? Chayta yachanaykipaqqa, allin kanman Jehovamanta sutʼinchaqkunapta mayqin imprentasninkutapis riqsiq rinayki. Chaywanpis chayta mana ruwayta atiqkunapaqqa, kay revistapi Wallkill llaqtapi (Nueva Yorkpi) kachkaq juknin imprentaykumanta sumaq fotosta wakichiyku chantá imaynatachus chaypi revistasta ruwakusqantapis sutʼinchallaykutaq.

Qallarinapaq, Brooklynpi kachkaq Departamento de Redacción nisqapi llamkʼaqkunaqa, publicacionespi qillqasqata lluqsinanpaq Bibliamanta yachachiykunata wakichinku. Chay wakichisqankutataq computadoraniqta Wallkillpi kachkaq Departamento de Artes Gráficas nisqaman apachinku, chaypitaq 5 jatuchaq maquinasniqta chay yachachiykunata impriminku. Kay maquinasmantaq jatuchaq maytʼusqa papeles yaykun, sapa maytʼusqa papeltaq 1.300 kilos pesan (3.000 libras). Sapa killataq kay maquinasmanqa 1.400 jatuchaq maytʼusqa papeles yaykun. Chay papelespi Bibliamanta yachachiykuna imprimisqaña kaptin, chay maquinasllataq juk jatun hojata kʼutunku achkha kutitataq doblaykunku 32 paginasniyuq juk revista lluqsinanpaq. Chaywanpis librosta ruwakunanpaq chay maquinasqa achkha jatuchaq hojasta kʼutunku, doblaykunkutaq, chantá taller de encuadernación nisqapi maquinaswan chay doblasqa hojasta juk ladonmanta machʼanawan kʼasqaykuchinku chayri siraykunku. Kay tallerpi wakin maquinasqa, juk maquinajinalla llamkʼaspa, sapa pʼunchay doblakullaq tapasniyuq 75.000 librosta chayri mana doblakuq tapasniyuq 50.000 librosta urqhunku, wakin maquinastaq doblakullaq tapasniyuq 100.000 librosta urqhunku.

Qayna watallapi 243.317.564 revistas, 28 millonesmanta astawan libros ima urqhukurqa, chaykunamantataq 2.600.000 Biblias karqa. Kay publicacionesqa, 380 simispi urqhukun, chay imprentapitaq pisi tiempollata jallchʼakun.

Chantá Departamento de Envíos nisqapi llamkʼaqkunaqa, Wallkillmanta, Estados Unidospi 12.754 qutuchakuykunaman, Hawai llaqtapi, Caribe llaqtapi ima, 1.369 qutuchakuykunaman mañasqankumanjina publicacionesta apachinku. Sapa killa, Estados Unidosmanta qutuchakuykunaman 14.000.000 kilos (30.000.000 libras) publicacionesmanta apachinku.

Chaywanpis chay imprentapi kimsa pachakmanta astawan llamkʼaqkunaqa (19 watayuq kaqkunamanta 92 watayuqkama) astawan valorniyuq kanku jatuchaq maquinasmanta nisqaqa. Paykunaqa, artes gráficas, programación de producción, taller de impresión, encuadernación, envíos ima nisqapi llamkʼanku.

Chantá paykunaqa, Biblia yuyaychasqanmanjina wakichisqa publicacionesta tukuy runas ñawirinankuta, yachakusqankumanjinataq kawsakunankuta ima munanku. Suyariyku qampis kay publicacionesta ñawirispa, Jehová Diosta, Churin Jesucristotapis astawan riqsinaykita, ajinamanta wiñay kawsayta tarinaykipaq—Juan 17:3.

 [16 paginapi dibujos/fotos]

 [17 paginapi hojantinpi dibujo/foto]