KIMSA waranqa watas ñawpaqta, Jericó llaqtapi juk sipas Rahab sutiyuq tiyakurqa. Payqa, Jehová israelitasta Egiptomanta kacharichisqanmantaraq nacekurqa. ¿Chay tiempopi imatachus Jehová israelitasrayku ruwasqanta yuyarikunkichu? Arí, Jehovaqa, Puka Quchata iskayman qhallaspa chay chiqata chʼakichirqa chayninta israelitas pasanankupaq. Chay Puka Qucha Rahabpa llaqtanmanta karupi kaptinpis payqa, Jehová imatachus ruwasqanta sumaqta yacharqa. Chay tiempopi mana radio, tele, Internet ima kaptin, ¿imaynatá Rahab chaymanta yacharqarí? *...

Ichá tukuyniqmanta Jericoman jamuqkuna chayllamantapuni parlasqankurayku, Rahabqa, Jehová imatachus israelitasrayku ruwasqanta uyarispa wiñakurqa. Sipasña kachkaspataq israelitasmanta watiqmanta uyarirqa, 40 watasta chʼin pampata puriytawan Canaanman yaykusqankuta, achkha maqanakuspi Diospa yanapayninwan atipasqankuta, Jericop qayllanpitaq jarasqas kachkasqankuta.

Juk chʼisi Rahabpa wasinman iskay runas chayakurqanku, chay wasinman wak llaqtamanta chayakuq kasqankuta yachasqankurayku. Chaywanpis chay chʼisillataq Jericomanta reyqa wakin soldadosninta kachaspa Rahabman nichimurqa: “Qanman jamusoj runasta orqhomuy”, nispa, imaraykuchus reyman pichus willasqa iskay israelitas Jericó llaqtata watiqaq jamusqankuta, Rahabpa wasinpitaq kachkasqankuta. ¿Imatá Rahab ruwanman karqarí?...

Rahabqa, chay iskay runas, israelitas kasqankuta reparaspaña, paykunata pakaykurqa. Jericomanta reypa soldadosninmantaq jinata nirqa: ‘Arí, iskay runas chayakamuwarqanku; laqhayaykuchkaptinña ripunku, sichus paykunata qhatiykuwaqchik chayqa, japʼirqamuwaqchik’, nispa.

¿Yachankichu imaraykuchus Rahab chay iskay israelitasta jarkʼasqanta?... Reypa soldadosnin ripusqankutawan, Rahab chay iskay israelitasman nirqa: “Noqa yachani Tata Diosqa qankunaman kay jallpʼata qosqasuykichejta [...]. Noqayku uyariyku, Egiptomanta llojsimushajtiykichej, Diosqa Puka Qocha nisqata iskayman khallaspa, chay cheqata chʼakichisqanta chayninta  qankuna pasamunaykichejpaj”, nispa. Chantá wak maqanakuspipis Diospa yanapayninwan atipasqankuta yachasqanta nillarqataq.

Hebreos 11:31 pʼitiqa, Rahab chay israelitasta jarkʼasqanta Dios allinpaq qhawasqanta rikuchin. Chayrayku imatachus paykunamanta mañakusqanta Dios may allinpaq qhawarqa, Rahabtaq paykunaman nirqa: ‘Qamkunawan kʼacha karqani, chayrayku mañaykichik juranawaykichikta, familiayta salvanaykichikpaq kay Jericó llaqtata thuñichkaptiykichik’, nispa. Watiqaqkunataq, salvakunankupaq imatachus ruwananta nirqanku. ¿Imatachus Rahabman nisqankuta yachayta munankichu?...

Israelitasqa nirqanku: ‘Kay puka waskhata ventanaykiman warkhuykunki, wasiykimantaq tatasniykita, hermanosniykita ima tantaykamunki, salvakunaykichikpaq’, nispa. Rahabtaq nisqankumanjina ruwarqa. Chantá, ¿imatataq israelitas ruwarqanku?...

Israelita soldados, Jericop pirqasninman qayllaykuytawan, juk kutita sapa pʼunchay chay llaqtata muyurirqanku. Suqta pʼunchaytataq chʼinllamanta chayta ruwarqanku; 7 kaq pʼunchaypitaq, 7 kutita muyurirqanku, muyuriytawankamataq tukuy kallpankuwan qhaparirqanku. Jinallapi llaqtap pirqasninqa, jukllata thuñikurqanku. Rahabpa wasintaqrí mana thuñikurqachu ventanapi puka waskha warkhusqa kasqanrayku, jinamanta Rahab, familian ima salvakurqanku (Josué 2:1-24; 6:1-5, 14, 15, 20-25).

Rahab ruwasqanmanta, ¿imatá yachakusunman?... Payqa, Jehovamanta imatachus uyarisqanta sunqunpi waqaycharqa. Paypa kamachisnintapis yanaparqa, astawanpis Diosta yupaychayta akllarqa. ¿Qampis Rahabjinachu Diosta yupaychayta akllanki?...