Boliviamanta carta

Wakcha kaspapis kusisqa kawsakun

MANA ancha wakcha suyupi achkha watasña kawsakuspapis, mana ni ima suyakuyniyuq wakcha runasta rikuspa mayta llakikuni. Paykunata rikuspa chay ratopacha tukuy ñakʼariykuna chinkananta munaspapis, Diospa Reinollan chinkachinanta yachani. Chaywanpis Diospa Palabran nisqanmanjina kawsakuqkuna, wakchas kaspapis kusiyta tarisqankuta achkha kutita rikurqani. Paykunamanta jukninqa Sabina sutikun.

Paypa qusanqa, unayña wak suyuman juk llamkʼayta maskʼaq ripusqa, Sabinataq warmi wawitasninwan, Milena sutiyuq, Ghelian sutiyuq imawan, qhipakusqa. Chaywanpis qusanqa, ripusqanmantapacha mana kutimusqachu. Chaymantapachataq Sabinaqa, iskaynin wawitasninta sapallan uywananpaq astawan llamkʼanan karqa.

Sabinataqa, hermananpa tiendanpi riqsirqani, chaypitaq payqa kʼachamanta rantikuq jamuqkunaman venden. Uyanpitaq diantinta sinchita llamkʼasqanmanta saykʼusqa kachkasqanta repararqani. Bibliamanta yachachiyta munasqayta niptiytaq payqa: “Munayman chaywanpis mana tiempoy kapuwanchu. Astawanqa ichá wawasniyman yachachiwaq”, nispa niwarqa. Chantá wawasninman yachachichkaspa Sabinata astawan riqsirqani, jinamanta wawasninwan ñawpaqman lluqsinanpaq sapa pʼunchay mayta llamkʼanan kasqanta yacharqani.

Payqa, wawasnin puñuchkallaptinkuraq tawa horasta jatarikun. Cocinata japʼichiytanwankamataq aluminiomanta juk jatun thanta mankapi aychamanta ahogadota chayachin, ñawpaq chʼisi wakichisqan masaman churaykunanpaq. Jinamanta vendenanpaq empanadasta wakichin.

Tukuytawankamataq, mañakusqan carritoman llanthuchata, garrafata, juchʼuy cocinata, juk mesata, banquitosta, mankasta, aceiteta, chayachinanpaq empanadasta, frutamanta refrescota ima churaykun.

Suqta hora paqarinpaqtaq, Sabinawan wawasninwan vendemuq rinankupaq wakichisqaña kachkanku. Juk cuartollapi tiyakunku chay cuartota candadowan chʼataykuytawankama, ni imata parlarispa vendeq ripunku. Chay pʼunchaypi mayta llamkʼanqanku. Maypichus tiyakuyku chaymantaqa, ajinata kawsakuqkunata achkha kutita rikuyku. Kay suyupiqa, Sabinajina achkha warmis mikhunatawan refrescotawan vendeq rinankupaq, niraq sutʼiyamuchkaptin wasinkumanta lluqsinku.

 Inti lluqsimunanpaqqa, suqta hora khuskanniyuqña, Sabina, wawitasnin imataq, maypichá vendenku chayman chayankuña. Mana ni imata parlarispa, imatachus apamusqankuta carritomanta uraqachinku. Chantá Sabinaqa, rupha aceitepi empanadasta chayachin. Chayninta purichkaq runastaq chay rato qayllaykunku rantikunankupaq.

“¿Machkhata qusqayki?”, nispa Sabina rantikuqta tapurin. Chay rantikuqtaq puñusqajinallaraq iskay dedosninta rikuchispa iskay empanadasta mañakun. Sabinataq iskay empanadasta pisi qullqillapi venden. Paqarintinta empanadasta vendeytawankama imatachus apamusqankuta uqharikapunku, wasinkumantaq kutipunku. Sutʼiyayta jatarikusqanrayku, paqarintinta llamkʼasqanrayku ima saykʼusqa kachkaspapis, Sabinaqa hermananpa tiendanman llamkʼaq ripun.

Chay tiendaman iskaynin warmi wawitasninman yachachinaypaq ñawpaq kuti risqaypiqa, Sabinaqa juk kʼuchitupi iskay banquitostaña churasqa. Chaypacha Milenaqa jisqʼun watayuq karqa, Ghelianataq qanchis watayuq karqa. Paykunaqa estudiayta qallarisqankumantapacha, allinta wakichikuq kanku, rinaytataq mayta suyaq kanku. Qallariypiqa manchaskiri karqanku, chaywanpis pisimanta pisi, astawan parlayta qallariwarqanku, jinamanta sumaq amigasta ruwakurqayku. Kayta rikuspataq Sabinaqa mayta kusikurqa, chayraykutaq achkha ruwanasniyuq kaspapis, ñuqawan Bibliata estudiayta qallarirqa.

Bibliamanta astawan yachakusqanmanjina, Sabinaqa astawan Jehová Diosta munakuyta qallarirqa. Pisi tiemponmantaq, mana jaykʼajina may kusisqa kachkarqa. Manañataq ñawpaqtajinachu llakisqallapuni callespi puriq. Hermananpis manaña unayjinachu kasqanta repararqa, nirqataq: “Sabinaqa, kusisqapuni purin, manaña unayjinachu”. Payta riqsiqkunapis kikillantataq nisqanku. Arí, Sabinaqa, Jehová Diosmanta, munayninmanta ima yachakuspa chiqa kusiyta tarirqa.

Bibliamanta yachakuspa kusiyta tarispapis, achkha ruwanasniyuq kasqanrayku Sabinaqa, manaraq tantakuykunaman riqchu. Chaywanpis tiempo pasasqanmanjina tantakuykunaman mana saqispa riyta qallarirqa, imaraykuchus qutuchakuypiqa chiqa amigasta tarirqa, chantapis Jehová Dios payta munakuqkunata, payrayku tukuy imata ruwaqkunata ima yanapasqanta repararqa (Lucas 12:22-24; 1 Timoteo 6:8).

Sabinaqa, Jehová Diosmanta, Reinonmanta ima yachakuchkasqanta may allinpaq qhawasqanrayku, imatachus yachakuchkasqanmanta wak runasman willayta munarqa. Chaywanpis mana riqsisqa runaswan parlanan kasqanpi tʼukuriyllaraq manchachiq. Pay nin: “Manchaskiri kani, manataq yachaywasipi yachakuyta tukurqanichu. ¿Imatá ñuqa runasman yachachiyta atiymanri?”, nispa. Chaywanpis chiqa kusiyta tarisqanmanta Diosman may agradecesqa kasqanrayku, wawasninpis willaq lluqsinankuta munasqanrayku, Diospa Reinonmanta willaq lluqsiyta qallarirqa. Jinallatataq wawasninpis ruwayta qallarirqanku.

Kunantaq Sabinaqa, juk sumaq suyakuyniyuq kasqanrayku, bautizasqa cristianajina Diospa Reinon pisi tiempomantawan wakcha kawsayta chinkachinanmanta wakkunaman willaspa, kusisqa kawsakun (Mateo 6:10).

Phichqa hora sutʼiyayta Sabinaqa, wasinmanta lluqsinanpaq wakichisqaña kachkan. Mana empanadasta vendeq rinanpaqchu, manaqa juk qutu Jehovamanta sutʼinchaqkunawan callespi willaq rinanpaq. Wakkunaman Bibliamanta yachachispa kusiyta tarisqanta repararqa. Chayrayku chiqchirispa, publicacionesniyuq carteranta uqhariykukuspa wasi punkunta wisqʼaykuytawankama willaq ripun. May kusiywantaq nin: “Bibliamanta runasman yachachiyta ni jaykʼaq atinayta yuyarqani, chaywanpis kunanqa willaq riy mayta gustawan”.