Wañusqasqa puñusqa jina kashanku, chayrayku mana imatapis yachankuchu, nitaj imatapis ruwayta atinkuñachu. Chaywanpis kausayta Qojqa, wañuymanta rijchʼarichiyta atin. Chaytataj Jesusman wañusqasta kausarichinanpaj atiyta qospa rikucherqa. (Eclesiastés 9:5; Juan 11:11, 43, 44 leey.)

Hora chayamojtin, Diospa yuyayninpi tukuy kajkuna, mosoj pachapi kausarimonqanku. Payqa maychus tʼaqasqan tiemponpi wañusqasta jatarichimunanta nin. Arí, tukuy atiyniyoj Diosninchejqa, wañusqasta atiyninwan rijchʼarichiyta munashan. (Isaías 26:19 leey.)

Kausarimojkunaqa pichus kasqankuta yachanqanku, familiasninkuta, amigosninkutapis rejsikaponqanku. Aycha cuerponku ismusqaña kajtinpis, Diosqa, ñaupajpi imaynachus kasqankuman jina uj mosoj cuerpota qonqa. (1 Corintios 15:35, 38 leey.)

Pisi runaslla cielopi kausanankupaj jatarimonqanku (Apocalipsis 20:6). May chhika runastaj, paraíso Jallpʼapi wiñaypaj kausanankupaj wañuymanta kutirimonqanku. Watejmanta kausayta qallarenqanku, munaspataj ni jaykʼaj wañonqankuchu. (Salmo 37:29; Hechos 24:15 leey.)