Diosqa chay suyasqa “miray”, kamachin Abrahampa familianmanta kananta nerqa. Tukuy nacionestaj paynejta bendecisqa kananku karqa (Génesis 22:18). Qhepaman, Abrahampa allchhin Jacob, Egiptoman riporqa. Chaypitaj familian mayta wiñarqa, Israel nacionmantaj tukorqa.

Unayninman, uj sajra faraón israelitasta kamachisninman tukucherqa. Diostaj llajtanta Egiptomanta orqhonanpaj, Moisesta kacharqa, pichus Jehovaj yanapayninwan Puka Qochata iskayman khallarparerqa. Chantá Diosqa paykunata yachachinanpaj, jarkʼananpajtaj leyesta qorqa. Chay leyes ukhupitaj, Chunka Kamachiykuna, jucharayku uywata qʼolachiy ima karqa. Chantá Moisesqa, Diospa yuyaychasqanman jina waj profeta israelitasman jamunanta nerqa. Chay profetataj, suyasqa “miray” kanan karqa.

Chaymanta 400 kuraj watasninman, Diosqa chay “miray” wiñaypaj kamachinanta Davidman nerqa. Chay “miraytaj” Mesías, Kacharichejtaj kanan karqa, pitachus Diosqa runasta salvananpaj, Jallpʼata uj paraisoman tukuchinanpaj ima ajllarqa.

Davidnejta, waj profetasnejta ima, Diosqa imaynachus Mesías kananta sutʼincharqa. Paykunataj Mesías llampʼu sonqo, khuyakuyniyojtaj kananta nerqanku. Nisqankuman jinataj, pay kamachishajtin yarqhay, mana cheqan ruwaykuna, guerras ima chinkanqa. Tukuy runastaj paykunapura, animaleswanpis allinta kausakonqanku. Diosqa ni jaykʼajpis onqoy, ñakʼariy, wañuy ima kananta munarqachu, chayraykutaj tukukaponqa. Wañusqaspis Jallpʼapi kausanankupaj kutirimonqanku.

Diosqa profeta Miqueasnejta Mesías Belenpi nacekunanta nerqa, profeta Danielnejtataj, wañuchinankuta willarqa. Chaywanpis Mesiasta kausarichispa, cielopi kamachejta jina churananta nerqa. Profeta Danielqa, Mesías Jallpʼapi tukuy gobiernospa cuentanmanta kamachinanta willarqa. Chay profecías, ¿juntʼakorqachu?

(Kaykunamanta orqhokun: Génesis 22-50, Éxodo, Deuteronomio, 2 Samuel, Salmos, Isaías, Daniel, Miqueas, Zacarías 9:9.)