1 Samuel 1:1-28
1 Efraín jalqakunacho kaq Ramá markapitami juk runa karqan Zuf aylupita Elcana jutiyuq. Elcanaqa Jerohampa tsurin y Eliúpa wilkanmi karqan. Eliúmi karqan Tohupa tsurin. Tohunami karqan Zufpa tsurin. Elcanaqa efrateo runami karqan.
2 Payqa ishkay warmiyuqmi karqan. Jukaq warminpa jutinmi karqan Ana y jukaqpanami karqan Penina. Peninapa wawankuna kaptinpis Anapaqa wawan manami karqantsu.
3 Wata watami Silo markaman Elcana aywaq lapanta mandaq TAYTA DIOSTA adorar sacrificiuta rupatsinanpaq. Tsaychömi cüra Elípa ishkay tsurinkuna Ofni y Finees kaykarqan. Paykunapis cürami karqan.
4 Sacrificiupaq uywata pishtarmi warmin Penina y wawankuna mikupäkunanpaq Elcana rakipaq.
5 Anatami itsanqa qoluq kaykaptinpis pasaypa kuyashpan mas alinnin kaqta rakipaq.
6 Tsayno qoluq kaptinmi Peninaqa Anata asipar rabyanätsiq.
7 Cada wata TAYTA DIOSPA wayinman aywapäkuptinmi Anata tsaynöla rabyanätsiq. Tsaymi Ana lakikur waqashpan mikuytapis mana munaqtsu.
8 Tsayno kaptinmi Elcanaqa kayno nirqan: “Ana, ¿imanirtaq waqaykanki? ¿Imanirtaq mana mikunkitsu? ¿Imanirtaq pasaypa lakishqa kaykanki? Noqaqa ¿manaku chunka olqu wawayuq kashqaykipitapis mas ali kaykä?”
Tayta Diosta Ana manakushqan
9 Juk kutimi Silucho mikuyta upuyta usharkur Ana aywarqan TAYTA DIOSTA manakunanpaq. Cüra Elínami Tinkuna Toldu punku nawpancho jamaraykarqan.
10 Anaqa pasaypa lakikurmi TAYTA DIOSTA waqapar
11 kayno nirqan: “Lapanta mandaq TAYTA DIOS, wawä mana kaptinmi pasaypa lakishqa kaykä. Olqu wawata tarinäpaq yanapamaptikiqa makikimanmi churaykamushaq wanunanyaq sirvishunaykipaq. Tsaymi makikicho kashqan musyakänanpaq imaypis aqtsanta mana rututsikunqatsu”.*
12 TAYTA DIOSTA may höra Ana manakuptinmi Elí rikarqan shimilan kuyuykashqanta.
13 Shonqulancho manakuptin imatapis parlashqanta mana mayarmi Elí yarparqan Ana shinkashqa kaykashqanta.
14 Tsaymi kayno nirqan: “¿Imay hörayaqtaq shinkashqa tsaycho kakunki? ¡Shinkashqaykiyaqqa vïnuta ama upunkimantsu!”
15 Tsayno niptinmi Ana kayno nirqan: “Manami shinkashqatsu kaykä, tayta. Manami vïnuta ni ima shinkatsikuqtapis upushqätsu, sinöqa pasaypa lakishqa kaykashqätami TAYTA DIOSTA wilapaykä.
16 Upyakuq warmi kashqäta ama yarpaytsu. Noqaqa pasaypa lakishqa karmi Tayta Diosta kay hörayaq manakushqä”.
17 Tsawraqa Elí kayno nirqan: “Manakushqaykino kuyapäkuq Tayta Dios yanapaykuläshunki. Kananqa kushishqana kutikuy”.
18 Tsayno niptin Anaqa kayno nirqan: “Yusulpäki, tayta”. Nirkurmi patsarashqanman kutiykur kushishqana mikurqan. Tsay junaqpitaqa mananami lakikurqannatsu.
Samuel yurishqan
19 Waraynin* tutanami TAYTA DIOSTA yapay adorarkur Ramácho kaykaq wayinpa kutikärirqan. Tsaypitanami runan Elcanawan punur TAYTA DIOS bendicionninta churaptin Ana qeshyaq rikakurqan.
20 Killan aypämuptinnami olqu wawanta wachakurqan. TAYTA DIOSTA manakushqanpita olqu wawan yuriptinmi jutinta churaparqan Samuel* jutin kananpaq.
21 Elcanaqa TAYTA DIOSTA promitishqa karqan cada wata Siluman aywaykur adorananpaqmi. Tsaymi tsurinkunawan y warmin Peninawan Silo markaman yapay aywarqan.
22 Anami itsanqa aywayta mana munar runanta kayno nirqan: “Wawä wasqirkuptinraqmi payta pushakurkur aywashun. Tsaychömi cüra Elípa makinman kachaykamushun TAYTA DIOSTA waran waran sirvinanpaq”.
23 Tsayno niptinmi Elcana kayno nirqan: “Tsayno kaptinqa wamrantsi wasqinanyaq ama aywaytsu. TAYTA DIOS yanapaykuläshunki nishqaykita cumplinaykipaq”.
Runanwan tsayno parlakurkurmi wawanta ashmar wasqishqanyaq Anaqa wayilancho täkurqan.
Tinkuna Tolduman Samuelta Ana apashqan
24 Samuel wasqirkuptinnami Silupa aywar TAYTA DIOSPA wayinman aparqan. Tsaynöpis aparqan kimsa watayuq juk turituta, ishkay arröba harinata y vïnu puritsikuna qarawan vïnutapis.
25 Tsay apashqan turituta sacrificiupaq *altarcho ruparkatsirmi Elíman Samuelta pusharqan makinman kachaykunanpaq.
26 Elí kaqman chayaykurnami Ana kayno nirqan: “Nawpatami TAYTA DIOSTA kaycho manakurqä, tayta.
27 Tsay hörami TAYTA DIOSTA manakurqä wawata tarinäpaq. Manakushqäta mayamaptinmi kananqa wawayuqna kaykä.
28 Tsaymi wawäta apamushqä TAYTA DIOSPA makinman kachaykunäpaq. Paymi wanunanyaq TAYTA DIOSTA sirvinqapaq”.
Tsayno niptinmi Elíqa urkunpis pampaman töpashqanyaq qonqurpakuykur TAYTA DIOSTA adorarqan.
Ichic wilacuycuna
^ 1.19 Wakin runakunaqa warantin nipäkun.
^ 1.20 Samuel ninanqa Tayta Diosmi mayashqa ninanmi.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
