2 Tesalonicenses 1:1-12
1 Tesalónica markacho* kaykaq yärakuq mayikuna:
Noqa Pablo, wawqintsi Silvano* y Timoteumi kay cartata aparkaykätsimü. Qamkunaqa Papänintsi Tayta Diospa y Señor Jesucristupa makinchömi karkaykanki.
2 Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki.
Tayta Diosta agradëcikur manakushqan
3 Wawqi panikuna, Jesucristuman waran waran mas yärakärishqaykita y runa mayikita kuyapäkushqaykita musyarmi Tayta Diosta imaypis agradëcikurkaykä.
4 Tsaymi juk lädu markakunamanpis chayaykur wawqi panikunata wilapäkü runakuna chikir nakatsishuptikipis Jesucristuman yärakurkaykashqaykita.
5 Mana ajayaypa Jesucristuman tsayno yärakäriptikimi tantiyapäkü ali juzgaq Tayta Dios *mandaykashqanman yaykunaykipaq kashqanta.
Jutsa ruraqkunata Tayta Dios juzgananpaq kashqan
6 Tayta Dios ali juzgaq karmi contrayki sharkuqkunata castiganqa.
7 Qamkunatami itsanqa noqakunatawan manana nakanantsipaq shuntakamäshun. Tsayno kanqa Señor Jesucristo munayniyuq *angilninkunawan jana patsapita kutimuptinmi.
8 Tayta Diosta mana cäsukushpan Señornintsi Jesucristupa ali wilakuyninta mana chaskikuqkunatami bunyaypa bunyar rupaykaq nina chawpincho shamur castiganqapaq.
9 Paykunaqa munayniyuq Tayta Diospa nawpanman chayananpa trukanqa infiernuchömi imayyaqpis nakapäkunqa.
10 Tsayno kanqa Señor Jesucristo kay patsaman kutimuptinmi. Tsay junaqmi payman yärakuqkuna pasaypa kushikur alabapäkunqapaq. Tsaychömi qamkunapis kushishqa alabapäkunki Jesucristupa ali wilakuyninta wilakushqäta cäsukushqaykipita.
11 Tsaymi Tayta Diosnintsita imaypis manakurkaykä pay munashqanno kawapäkunaykipaq. Tsayno kawapäkunaykipaqmi qayashushqanki. Munayninwan yanapaykuläshunki payman yärakur alikunata imaypis rurapäkunaykipaq.
12 Tsayno kawapäkuptikimi Señornintsi Jesucristupa jutinta joqarir alabapäkunqa y qamkunapis Jesucristo kashqanno kapäkunkipaq. Tsayno kanqa Tayta Diosnintsi y Señor Jesucristupis kuyashushpayki yanapashuptikimi.
Ichic wilacuycuna
^ 1.1 Hech. 17.1; 1Tes. 1.1.
^ 1.1 Silvanupa jukaq jutinmi Silas karqan (Hech. 15.22, 40).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
