Eclesiastés 4:1-16
4 Tsaypita rikarqä kay patsacho munayniyuq runakuna humildi runakunata nakatsishqanta. Pipis mana shoqaptin y pipis mana yanapaptin waqaykaqtami rikashqä.
2 Tsaymi tantiyakushqä kawaq runakunapitapis wanukuq runakuna mas ali kaykashqanta.
3 Wanuqkunapitapis y kawaqkunapitapis mas alimi kaykan manaraq yuriqkuna. Paykunaqa manami rikanraqtsu kay patsacho mana ali ruraykunata.
4 Tsaynöpis rikashqä ali arukuqta chikishqanta. Tsayno karqa wayrata tsariyta munaqnömi kaykantsi.
5 Runakunaqa kaynömi nin: “Mana tantiyakuq upa runaqa makin oqlashqala kakurmi pasaypa muchunqa”.
6 Noqami itsanqa kayno nï: Atskata gänar mana jamaypa arunantsipa trukanqa walkalata gänarpis jamashqantsimi mas ali kaykan. Mana jamaypa arurqa wayrata tsariyta munaqnömi kaykantsi.
Runa japalan kaptin mana ali kashqan
7 Tsaypitanami mas juktapis rikashqä. Tsay rikashqäpis manakaqlapaqmi kaykan.
8 Noqa rikashqä wakin runa japala kaykarpis tsuriynaq y wawqiynaq kaykarpis mana jamaypa arushqanta. Aykata gänarpis masta mastami munan. Imaypis manami yarpachakuntsu tsayjina arushqankuna pipaq kananpaq kashqanta y imanir aläpa nakar arushqanta. Tsayno aläpa nakar arushqanpis manakaqlapaqmi kaykan.
9 Japalan arunanpa trukanqa ishkaq arushqanmi mas ali kaykan.
10 Ishkaq karqa juknin tuniptinpis juknin sharkatsinmi.Kikilan kaykar tuniptinqa manami pïninpis kantsu sharkatsinanpaq.Kikilan runa tunirqa lakipaypaqmi kaykan.
11 Tsaynöpis juk cämalacho ishkaq punurqa qoñütsinakunmi.Japalan punurqa ¿imanöparaq qoñurinqa?
12 Juklaylataqa pelyachöpis vincinmi.Ishkaq kaptinmi itsanqa pipis mana vincinqatsu.Waskata piltashqapis manami asïlaqa rachikantsu.
Rey kashqanpis ushakaqla kashqan
13 Mana tantiyakuq y yätsishqanta mana chaskikuq awkin reypitaqa tantiyakuq mözumi waktsala karpis mas ali kaykan.
14 Tsay mözuqa awkin reypa trukan yaykuptin carcilpita yarqushqa kaptinpis y waktsala yurishqa kaptinpis
15 lapan runakunami favornin kaykan.
16 Rey kananpaq yaykushqan witsan tsaytsika runakuna favornin karkurpis tiempu pasarkuptinqa paypapis contranmi rikakun. Lapan tsaykunapis wayrata tsariyta munaqnömi kaykan.
