Malaquías 2:1-17
2 “Cürakuna, qamkunata kaynömi nï:
2 Qamkunaqa manami cäsukamankitsu ni respitamankitsu. Tsayno kapäkuptikimi castigashayki. Qamkunaman bendicionnïta churamushqätapis maldicionmanmi tikratsishaq. Lapan shonquykiwan mana cäsukamashqaykipita maynami maldicionman tikratsishqä. Lapanta mandaq TAYTA DIOS karmi tsayno nï.
3 “Tsaymi qamkunapita miraqkunata walkayaykätsilar ushakätsishaq. Noqapaq apamushqayki uywakunapa ashashnintapis qaqlaykimanmi laqapäshaykipaq. Nirkurmi tsay uywakunapa ashashnintinta jitarishaykipaq.
4 Tsaynöpami tantiyakärinkipaq nishqäta cäsukamänaykipaq kashqanta. Qamkuna cäsukamaptikiqa unay ayluyki Leví trïbu runakunawan* *pactuta rurashqänömi imaypis kanqa. Noqa lapanta mandaq TAYTA DIOSMI tsayno nï.
5 “Leví trïbu runakunawan* pactuta rurarmi* promitirqä yanapaptï ali kawapäkunanpaq. Paykunami promitimarqan imaypis mantsakamänanpaq. Tsaymi promitishqänöla yanaparqä y paykunapis mantsakamar respitapäkamarqan.
6 Leynïkuna nishqannölami yachatsipäkurqan. Manami manakaqkunata rimapäkurqantsu. Munashqäno ali kawarmi atskaqta tantiyatsipäkurqan jutsa rurashqankunata kacharinanpaq.*
7 “Cüra karmi qamkunapis wilakuynïta yachatsinaykipaq karkaykanki.* Lapanta mandaq TAYTA DIOSPA wilakuqnin kaptikimi runakuna qamkunaman shapäkamun yachakuyta munar.
8 Tsayno kaptinpis qamkunaqa mana alikunata rurar lutanta yachatsiptikimi jutsa rurayman atskaq tunipäkushqa. Tsayno karmi Leví trïbuwan pactu rurashqätapis manakaqman churarkaykanki. Noqa lapanta mandaq TAYTA DIOSMI tsayno nï.
9 Leynïkunata mana cäsukurmi wakin runakunata ali rikarkaykanki y wakintana mana ali rikarkaykanki. Tsaymi runakuna mana respitashunaykipaq y manakaqman churashunaykipaq qamkunata kacharishqä”.
Mana lulapänakunanpaq yätsishqan
10 ¿Manaku Tayta Dios lapantsipapis Taytantsi kaykan?* ¿Manaku lapantsitapis juk Diosla kamamashqantsi? Tsayno kaykarqa ¿imanirtaq juknintsi juknintsipis lulapänakuntsi? Tsayno kawarqa unay ayluntsikunawan Tayta Dios *pactu rurashqanta manakaqmanmi churaykantsi.
Ïduluta adoraq warmiwan mana tänanpaq nishqan
11 Tayta Dios nishqankunata cumplinanpaq promitirpis Judá runakunaqa manami cumplipäkuntsu. Tsaymi Jerusaléncho y intëru Israelcho ïduluta adoraq warmikunawan penqaypaq tarkaykan. Tsayno rurarmi TAYTA DIOS kuyashqan templunta manakaqman churarkaykan.
12 Ïduluta adoraq warmiwan taq runataqa Tayta Dios mana kuyapaypami Israel runakunapita qarqunqa. Tsayno qarqunqa pï kaptinpis y lapanta mandaq TAYTA DIOSPAQ ofrendata apamuptinpis.
Warminwan rakikashqanpita olqüpashqan
13 TAYTA DIOSPA *altarninman uywakunata y tsaki mikuykunata apaptikipis manami chaskishunkitsu. Tsaymi altarnin nawpancho iktsuypa iktsur waqar
14 kayno nirkaykanki: “¿Imanirtaq mana chaskimantsu?”
Payqa mana chaskishunkitsu mözu kashqaykipita patsa tashqayki warmikita kacharishqaykipitami. Tsayno kacharishqanki paylawan tänaykipaq TAYTA DIOSPA nawpancho *pactuta rurashqa kaykarmi.
15 ¿Manaku juklaylano kananpaq ishkantapis Tayta Dios kamarqan? Cuerpunpis y espïritunpis paypami kaykan. ¿Manaku tantiyapäkunki imanir juklaylano kananpaq kamashqanta? Tsayno kamarqan tsay runapa tsurinkuna Tayta Dios munashqanno kawananta munarmi. Tsayno kaykaptinqa shumaq tantiyakäriy. Mözu kay warmikipita ama rakikaytsu.
16 Israel runakuna adorapäkushqan TAYTA DIOS kaynömi nin: “Noqa pasaypami rabyakü majanpita rakikaptin. Tsayno rurarqa pasaypa penqaypaqmi kaykan. Noqa lapanta mandaq TAYTA DIOSMI tsayno nï. Tsayno kaykaptinqa majaykiwan mana rakikaypa tänaykipaq shumaq yarpachakäriy”.*
Runakunata juzgananpaq nishqan
17 Qamkunaqa lutanta rimarmi TAYTA DIOSTA pasaypa rabyanätsinki. Tsayno kaykarmi kayno nir tapukurkaykanki: “¿Imanötaq Diosta rabyanätsishqä?”
Payta rabyanätsinki kayno rimarmi: “Imano kawaptintsipis Tayta Dios manami juzgamäshuntsu. TAYTA DIOSPAQQA alimi kaykan jutsata rurar kawaptintsipis. Imano kawaptintsipis payqa kushikunmi”.*
Ichic wilacuycuna
^ 2.4 Núm. 3.11-13.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 2.5 Cürakunaqa Leví trïbu runakunami karqan.
^ 2.5 Núm. 25.12-13.
^ 2.6 Deut. 33.8-10.
^ 2.7 Lev. 10.11; Deut. 21.5.
^ 2.10 Isa. 63.16; 64.8; Efe. 4.6.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 2.14-16 Gén. 2.24; Prov. 5.18; Mar. 10.2-9; Efe. 5.21-33.
^ 2.17 Mal. 3.14-15.
