Nehemías 8:1-18
8 Tsaypita juk junaqchönami lapan Israel runakuna Yaku jutiyuq punkucho kaq pläzaman juntakarqan. Tsaychömi yachatsikuq Esdrasta manakärirqan *Moisés qelqashqan leykunata apamunanpaq. Tsay leykunatami Israel runakunata TAYTA DIOS unay entregashqa karqan.
2 Tsayno manakuptinmi cüra Esdrasqa leykuna qelqaraykashqan rölluta aparqan runakuna, warmikuna y tantiyakuq wamrakunapis juntaraykashqanman. Tsay junaq karqan qanchis kaq killa punta kaq junaqmi.*
3 Yaku jutiyuq punkucho kaykaq pläzachömi tsay runakunata tutapita pulan junaqyaq röllupita liyiparqan. Liyipaptinmi lapan runakuna shumaq mayapäkurqan.
4 Parlamunanpaq rurapäkushqan tabladïlluchömi yachatsikuq Esdrasqa runakunata yachatsinanpaq ichiraykarqan. Tsay tabladïlluqa tsay junaqpaq rurashqami karqan. Alawqa kaq nawpanchömi ichiraykarqan Matatías, Sema, Anías, Urías, Hilcías y Maasías. Itsuq kaq nawpanchönami ichiraykarqan Pedaías, Misael, Malquías, Hasum, Hasbadana, Zacarías y Mesulam.
5 Runakuna rikaykaptinmi Esdrasqa rölluta kicharqan. Kichaptinmi runakuna ichikärirqan.
6 Tsaymi Esdrasqa munayniyuq TAYTA DIOSTA alabarqan. Runakunapis makinta joqarkurmi kayno nipäkurqan: “¡Amén! ¡Tsayno kaykulätsun!” Nirkurmi TAYTA DIOSTA adorar urkunpis pampaman töpashqanyaq qonqurpakaykärirqan.
7 *Levitakunami Esdras imata liyishqantapis runakunata shumaq tantiyatsirqan. Tantiyatsiptinmi runakuna mana kuyukuypana mayapäkurqan. Tsay levitakunami karqan Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán y Pelaía.
8 Tayta Diospa leyninkunata röllupita liyiparkurmi shumaq tantiyatsipäkurqan.
9 Liyipashqanta mayaykurmi lakikushpan lapan runakuna waqapäkurqan. Tsaymi gobernador Nehemías, yachatsikuq cüra Esdras y leykunata tantiyatsiq levitakunapis kayno nipäkurqan: “Kanan junaqqa TAYTA DIOSNINTSITA adorana *sagrädu junaqmi kaykan. Ama lakikäriytsu ni waqapäkuytsu”.
10 Mastami Esdras kayno nirqan: “Ali alilata yanukurir mikupäkuy. Mishkiq vïnutapis lapayki upupäkuy. Mikuynin mana kaqkunatapis qarapäkuy. Kanan junaq Tayta Diosnintsita adorana sagrädu junaqmi kaykan. Ama lakikäriytsu. TAYTA DIOS kushikuyta qomaptintsiqa lakikuypis aywakunmi”.
11 Tsaynölami levitakunapis runakunata shoqar kayno nipäkurqan: “Sagrädu junaq kaykaptinqa ama waqapäkuytsu”.
12 Tsayno nipäkuptinmi lapan runakuna aywapäkurqan mikuq y upuq. Liyipashqanta tantiyapäkushpanmi kushikuypita juknin jukninpis mikuyta qaranakur jatun fiestata rurapäkurqan.
Ramäda fiestata rurapäkushqan
13 Waraynin* junaqnami mayor runakuna, cürakuna y *levitakuna yachatsikuq Esdraswan yapay juntakarqan leykuna imata niykashqantapis shumaq musyapäkunanpaq.
14 Liyishpanmi tantiyapäkurqan qanchis kaq killacho fiestata rurar Israel runakuna ramädalacho tänanpaq TAYTA DIOS Moiséswan wilakatsir mandashqanta.*
15 Tsawraqa jinan höra wilakatsirqan Jerusaléncho y lapan markakunacho taq runakuna jirkapa aywaykur olïvupa, arrayanpa, palma yörapa y wakin yörakunapa rämankunata shuntaykamur leykuna nishqanno ramädata qatapäkunanpaq.
16 Tsawraqa jirkapa aywaykur rämakunata apapäkamurqan. Tsaykunawanmi ramädata rurapäkurqan wayin janankunacho,* patiunkunacho, Tayta Diospa templun patiucho, Yaku jutiyuq punku pläzacho y Efraín jutiyuq punku pläzacho.
17 Juk lädu nacioncho taykashqanpita chayamuq lapan Israel runakuna ramädata ruraykur tsaycho patsakärirqan. Nunpa tsurin Josué kawashqan witsanpita patsa manami fiestata rurar ramädacho punupäkushqatsu kashqa. Tayta Dios nishqanno fiestata rurarmi runakuna pasaypa kushikärirqan.
18 Tsay fiestata rurapäkurqan qanchis junaqmi. Qalaykunan junaqpita hasta ushanan junaqyaq Tayta Diospa leyninkunata waran waran Esdras liyiparqan. Pusaq kaq junaqchönami leycho nishqanno Tayta Diosta adorapäkunanpaq lapan juntakarqan.
Ichic wilacuycuna
^ Moisés qelqashqan leykuna Moisés qelqashqan leykunaqa kaykan Sinaí jirkacho Tayta Dios tantiyatsishqan mandamientukuna y leykunami. Tsay leykunatami Moisés qelqarqan Éxodo, Levítico, Números y Deuteronomio librukunacho.
^ 8.2 Calendariuntsichöqa tsay junaq karqan 8 de octubri wata 445 a. C.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ sagrädu Liyinki santupita tantiyatsikuyta.
^ 8.13 Wakin runakunaqa warantin nipäkun.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 8.14 Lev. 23.33-43.
^ 8.16 Israel nacionchöqa wayita qatananpa trukanqa terrädu jananman tsaqlarkurmi mituwan lashtapäkuq. Tsay jananchönami awakäriq, aqakäriq y trïgutapis akrapäkuq.
