Esdras 10:1-44
10 Tayta Diospa templun punkucho Esdras lätakuykur waqar perdonta manakuptinmi atska runakuna, warmikuna y wamrakuna nawpanman juntakaykur pasaypa lakikur waqapäkurqan.
2 Tsayno karkaykaptinmi Elampita miraq Jehielpa tsurin Secanías Esdrasta kayno nirqan: “Mana Israel warmikunawan tarmi Tayta Diosnintsita mana cäsukärishqätsu. Tsayno kaptinpis Tayta Dios kuyapämashpantsimi mana castigamantsiraqtsu.
3 “Noqakunaqa Tayta Diosnintsiwanmi *pactuta rurapäkushaq jäpa warmïkunawan rakikar wawantinta qarqurinäpaq. Nishqaykinömi Tayta Diosnintsipa leyninkunata cäsukärishaq. Tsaynölami Diosnintsita cäsukuqkunaqa lapan nirkaykan.
4 Sharkurkur lapanïta anyapaykalämay. Noqakunaqa nishqaykita rurapäkunäpaq listumi karkaykä. Imata rurapäkunäpaqpis jukla niykalämay”.
5 Tsayno niptinmi Esdras ichirkur mandaq cürakunata, *levitakunapa mandaqninkunata y lapan Israel mayinkunata juratsirqan Secanías nishqanta cumplipäkunanpaq. Tsayno niptinmi lapan jurapäkurqan.
6 Nirkurnami Tayta Diospa templunpita Esdras aywakurqan Eliasibpa tsurin Johanánpa wayinman. Tsaychömi lakikushpan imatapis mana mikuypa mana upuypa wararqan. Tsayno lakikurqan Babiloniapita Jerusalénman punta shamuqkuna Tayta Diosta mana cäsukärishqanpitami.
7 Nirkurmi intëru Jerusaléncho y Judácho wilakatsirqan Babiloniapita lapan shamuqkuna Jerusalénman juntakänanpaq.
8 Tsaynöpis wilakatsirqan kimsa junaqta mana chayamuq runakunapata imaykantapis qechunanpaq y Israel mayinkuna tashqan markakunapita qarqunanpaq. Tsayno rurananpaqmi Israel mayor runakuna y yätsiqninkuna parlakurqan.
9 Kimsa junaqchönami Judá trïbu runakuna y Benjamín trïbu runakuna Jerusalénman juntakarqan. Tsayqa karqan isqun kaq killa ishkay chunka (20) junaqchömi.* Templupa patiunman chayaykurmi jamaykärirqan. Tsayman qayatsishqanpita y pasaypa tamyaptinmi lapan mantsakur siksikyarqan.
10 Tsaymi cüra Esdras ichirkur kayno nirqan: “Qamkunaqa jäpa warmiwan tashpayki jutsatami rurarkaykanki. Tsaynöpami lapantsi jutsayuq kaykantsi.
11 Tsawraqa unay ayluntsikuna yärakushqan TAYTA DIOSPA nawpancho jutsata rurashqaykipita perdonta manakäriy. Tsaynöpis Tayta Diosta cäsukärishpayki jäpa warmikipita rakikay”.
12 Tsayno niptinmi lapan runakuna fuertipa kayno nipäkurqan: “Nimashqaykitaqa lapantami rurapäkushaq, tayta.
13 Itsanqa jäpa warmiwan taykaqkuna atskaqmi karkaykä. Kay parlaykashqantsiqa manami juk junaq ni ishkay junaqla arreglaypaqtsu kaykan. Tamya witsan kaykaptinqa manami cällicho ichiräkümantsu.
14 Lapanï kaycho kanäpa trukanqa mandamaqnïkunala quëdatsun. Paykuna jitapämashqan junaq jäpa warmiwan taqkuna mayor runakunawan y juezkunawan Jerusalénman kutipäkamushaq. Arreglapäkuptinmi Tayta Diosnintsi manana rabyakunqanatsu”.
15 Asaelpa tsurin Jonatán y Ticvapa tsurin Jahazíaslami tsay nishqanta mana chaskikurqantsu. Tsaynölami levita Mesulam y levita Sabetai paykunapa favornin sharkapäkurqan.
16 Tsay chuskun mana chaskiptinpis Babiloniapita wakin shamuq runakunaqa lapanmi chaskikärirqan. Tsaymi cüra Esdras cada aylupita juk mayor runata churarqan arreglananpaq. Chunka kaq killa punta kaq junaqchönami tsay runakuna juntakar wilanakärirqan cada runata imano juzgananpaqpis.
17 Wata qalaykunan punta kaq junaqmi jäpa warmiwan tarkaykaq runakuna imano kananpaqpis autoridäkuna wilanakuyta usharqan.
18 Kaychömi qelqaraykan jäpa warmiwan taykashqanpita rakikaq cürakunapa jutinkuna:Maasías, Eliezer, Jarib, Gedalías (paykunami Josadacpa tsurin Jesúapita y wawqinkunapita miraqkuna karqan.
19 Makinta joqarkurmi promitipäkurqan warminpita rakikänanpaq. Jäpa warmiwan tashqanpita perdonashqa kananpaqmi juk carnita apapäkamurqan),
20 Hanani, Zebadías (paykunami Imerpita miraqkuna karqan),
21 Maasías, Elías, Semaías, Jehiel, Uzías (paykunami Harimpita miraqkuna karqan),
22 Elioenai, Maasías, Ismael, Natanael, Jozabad y Elasa (paykunami Pasurpita miraqkuna karqan.)
23 Kaychömi qelqaraykan jäpa warmiwan taykashqanpita rakikaq levitakunapa jutinkuna: Jozabad, Simei, Kelita nishqan Kelaía, Petaías, Judá y Eliezer.
24 Kaychömi qelqaraykan jäpa warmiwan taykashqanpita rakikaq cantaqpa jutin: Eliasib.
Kaychömi qelqaraykan jäpa warmiwan taykashqanpita rakikaq punku täpaq runakunapa jutinkuna: Salum, Telem y Uri.
25 Kaychömi qelqaraykan jäpa warmiwan taykashqanpita rakikaq wakin Israel runakunapa jutinkuna:Ramía, Jezías, Malquías, Mijamín, Eleazar, Malquías, Benaía (paykunami Paruspita miraqkuna karqan),
26 Matanías, Zacarías, Jehiel, Abdi, Jeremot, Elías (paykunami Elampita miraqkuna karqan),
27 Elioenai, Eliasib, Matanías, Jeremot, Zabad, Aziza (paykunami Zatupita miraqkuna karqan),
28 Johanán, Hananías, Zabai, Atlai (paykunami Bebaipita miraqkuna karqan),
29 Mesulam, Maluc, Adaía, Jasub, Seal, Ramot (paykunami Banipita miraqkuna karqan),
30 Adna, Quelal, Benaía, Maasías, Matanías, Bezaleel, Binúi, Manasés (paykunami Pahat-moabpita miraqkuna karqan),
31 Eliezer, Isías, Malquías, Semaías, Simeón,
32 Benjamín, Maluc, Semarías (paykunami Harimpita miraqkuna karqan),
33 Matenai, Matata, Zabad, Elifelet, Jeremai, Manasés, Simei (paykunami Hasumpita miraqkuna karqan),
34 Madai, Amram, Uel,
35 Benaía, Bedías, Quelúhi,
36 Vanías, Meremot, Eliasib,
37 Matanías, Matenai, Jaasai (paykunami Banipita miraqkuna karqan),
38 Simei,
39 Selemías, Natán, Adaía,
40 Macnadebai, Sasai, Sarai,
41 Azareel, Selemías, Semarías,
42 Salum, Amarías, José (paykunami Binúipita miraqkuna karqan),
43 Jeiel, Matatías, Zabad, Zebina, Jadau, Joel y Benaía (paykunami Nebupita miraqkuna karqan).
44 Tsay runakunaqa lapanmi jäpa warmikunawan tarkaykarqan. Rakikarkurmi tsay warmikunataqa wawantinta qarqupäkurqan.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 10.9 Calendariuntsichöqa tsay junaq karqan ushanan diciembri killachömi.
