Esdras 4:1-24
4 Judá trïbupa y Benjamín trïbupa contrankunami mayapäkurqan juk läducho tashqanpita kutiykamur TAYTA DIOSPA templunta yapay sharkaykätsishqanta.
2 Tsawraqa Zorobabel kaqman y mayor runakuna kaqman aywaykur kayno nipäkurqan: “Noqakunapis templuta arüshishayki. Qamkunanömi noqakunapis Diosnikiman yärakärï. Unay aylükuna kaycho tänanpaq Asiria runakunapa mandaqnin rey Esar-hadón churashqanpita patsami sacrificiukunata Tayta Diospaq rupatsipäkushqä”.*
3 Tsayno niptin Zorobabel, Jesúa y mayor runakuna kayno nipäkurqan: “Tayta Diosnïpa templunta sharkatsiptï qamkuna yanapamänaykita manami nistapäkütsu. Persia nacionpa mandaqnin rey Ciro ordenamashqannölami kikïkunala TAYTA DIOSNÏPA templuntaqa sharkatsipäkushaq”.
4 Tsayno niptinmi tsay runakuna rabyakushpan Judá runakuna aruyta mana sïguinanpaq desanimatsiyta munapäkurqan.
5 Autoridäkunatapis wakintaqa pakaylapa sobornuta jatiparqan templu sharkatsiqkunata michänanpaq. Tsayta rurapäkurqan Persia nacionpa mandaqnin rey Ciro mandashqan witsanpita patsa hasta rey Darío mandashqanyaq.*
Jerusalén markata altsaptin contrankuna michashqan
6 Persia nacioncho rey Asuero* mandayta qalaykushqan witsanpis* Judácho taq runakunata y Jerusaléncho taq runakunata desanimatsinanpaq manakaqkunata jitapar reyman cartata apatsipäkurqan.
7 Tsaynölami Persia nacionpa mandaqnin rey Artajerjes* kaykashqan witsanpis* Bislam, Mitrídates, Tabeel y mandaq mayinkuna manakaqkunata jitapar cartata apatsipäkurqan. Tsay cartata qelqapäkurqan arameo idiömachömi. Rey kaqman chayaptinmi Persia runakuna parlashqan idiömaman traducipäkurqan.
8 Tsaypitanami Jerusaléncho taq runakunata manakaqkunata jitapashpan gobernador Rehum y secretariu Simsai rey Artajerjesman juk cartata apatsirqan.
9 Gobernador Rehum y secretariun Simsaimi tsay cartata qelqapäkurqan juezkunawan, gobernadorkunawan y autoridäkunawan parlakurir. Tsay autoridäkuna karqan Persiapita, Erecpita, Babiloniapita y Elamcho kaykaq Susapita.
10 Cartacho nishqankunata awnirqan Samaria markakunacho taq runakuna y wakin provinciakunacho taq runakuna. Tsay provinciakunaqa karqan Éufrates mayupita hasta lamaryaqmi. Tsaycho taq runakunapa unay aylunkunataqa rey Asnapar wakin nacionkunapita prësu apaykurmi tsaycho tänanpaq churarqan.
11 Gobernador Rehum y secretariu Simsai apatsishqan cartachömi kayno nirqan:
Tayta rey Artajerjes, Éufrates mayupita kay tsimpa provinciacho taq sirvishuqnikikuna karmi kay cartata apatsipäkamü.
12 Qam kaqpita kayman shamuq Israel runakunami Jerusalén markata altsarkaykan. Tsay markachöqa mana cäsukuq fiyu runakunalami imaypis tarqan. Tsay markatami intëru marka kuchunpa tumariq cimientunkunata altsarkur perqa murällata sharkaykätsin.
13 Tsay markata altsar murällata jiruruq sharkatsiyta usharqa manami impuestukunatapis päganqanatsu.
14 Qampa sirviqniki kaykarqa noqakuna manami kachapäshaqtsu tsay runakuna contrayki sharkunanta. Tsaymi kay cartata musyanaykipaq apaykätsimü.
15 Nishqäkuna rasunpa kashqanta shumaq musyanaykipaq unay acta librukunata rikaykulay, tayta. Tsaykunata liyirmi musyankipaq Jerusaléncho taq runakuna mana cäsukuq kashqanta. Paykunaqa reypa y nawpan provinciacho taq runakunapa contran sharkuptinmi tsay markata ushakätsirqan.
16 Jerusalén markata altsar murällanta sharkatsiyta ushaptinqa Éufrates mayu kay tsimpacho taq lapan runakunapis manami qampa munaynikichönatsu kanqa. Tsayta musyanaykipaqmi noqakuna kay cartata apatsimü, tayta rey.
17 Tsaypitanami rey Artajerjes cartata apatsirqan kayno nir:
Gobernador Rehum, secretariu Simsai, Samariacho taq runakuna y Éufrates mayu tsimpan provinciacho taq runakuna, qamkunata winchikü.
18 Qamkuna apatsimushqayki cartata parlashqä idiömaman traducirkurmi liyipämashqa.
19 Cartacho nimashqaykinölami Jerusaléncho taq runakuna imano kashqantapis musyanäpaq churaraykaq acta librukunata liyitsishqä. Qamkuna nishqaykinömi qelqaraykan tsay runakuna reykunapa contran imaypis sharkushqanta.
20 Tsaynöpis musyashqä Jerusaléncho munayniyuq reykuna nawpata kashqanta, intëru Éufrates tsimpa provinciata munaynincho tsararashqanta y tsay provinciacho taq runakunata impuestuta pägatsipäkushqanta.
21 Kananqa tsay aruqkunata nipäkuy manana arupäkunanpaq. Jerusalén markata amana sharkatsitsuntsu hasta noqa nishqäyaq.
22 Noqa nishqäta jukla paykunata nipäkuy. Mana niptikiqa mandashqä provinciakunacho conträmi sharkapäkunqapaq.
23 Rey Artajerjes apatsishqan cartata chaskirmi liyiparqan Rehumta, secretariu Simsaita y mandaq mayinkunata. Tsay cartacho nishqanta mayaykurmi Jerusalénman aywashpan Israel runakunata rabyashqa michäpäkurqan Jerusalén markata manana sharkatsipäkunanpaq.
Templuta sharkatsiyta yapay qalaykushqan
24 Jerusaléncho templuta sharkarkaykätsiqta michaptinmi* kacharirqan hasta Persia nacionpa mandaqnin rey Darío ishkay wata rey kashqan witsanyaq.
Ichic wilacuycuna
^ 4.2 Esar-hadónqa Asiria nacionpa mandaqnin rey karqan pachak pitsqa chunka (150) watano templuta Zorobabel manaraq yapay sharkatsiyta qalaykuptinmi. Esar-hadón churashqan runakunaqa juk lädu nacionpitami karqan. Paykunaqa Judáman chayaykur Tayta Diosta adorarpis nacionnincho adorashqan kaqkunatapis adorarqanmi (2Rey. 17.24-41).
^ 4.5 Tsayqa karqan chunka chusku watanömi.
^ 4.6 Rey Asuero mandarqan templu atska wata sharkatsishqana kaykaptinmi.
^ 4.7 Rey Artajerjes mandarqan rey Asuerupitaraqmi.
^ 4.24 Esd. 4.4-5.
