Esdras 6:1-22
6 Apatsishqan cartata liyirkurmi rey Darío actata ashitsirqan Babilonia nacionpa väliq documentunkuna churaräkunancho.
2 Media provinciacho Acmeta markacho kaykaq palaciuchömi ashiykashqan actata tarirqan. Tsay actachömi qelqaraykarqan kayno nir:
3 Persia nacionpa mandaqnin rey Ciro mandayta qalaykur punta kaq watachömi kayno nirqan:
Tayta Diospaq sacrificiukunata rupatsipäkunaykipaq cimientuta shumaq ruraykur Jerusaléncho Tayta Diospa templunta yapay sharkatsipäkuy. Tsay templupa altunpis y anchunpis ishkay chunka qanchis (27) metru katsun.
4 Cada kimsa fïla jatusaq laqlashqa rumikunawan perqarkur juk fïlaqa alinnin mushuq tablakunawan entablatsinki. Lapan gastukunapaqqa tesorërümi qellayta tsararanqa.
5 Qoripita y qellaypita rurashqa manëjukunata Tayta Diospa templunpita Nabucodonosor Babiloniaman apamushqantapis Jerusalénman kutirkatsir Tayta Diospa templunman churapäkutsun.
6 Tsayno liyirkurmi rey Darío Éufrates mayu tsimpan provinciapa gobernadornin Tatnaita, Setar-boznaita y mandäshiqninkunata kayno nirqan:
Jerusalénpita witikäriy.
7 Tayta Diospa templun puntata kashqancho yapay sharkatsiptin Israel runakunapa gobernadorninta y mayor runakunatapis ama michankitsu.*
8 Israel mayor runakuna Tayta Diospa templunta yapay sharkatsinanpaq kaynömi nï: Éufrates mayu tsimpan provinciacho noqapaq shuntashqayki impuestukunapita lapan gastunkunapaq qellayta kamaripanki. Tsaynöpami ushananyaq arutsipäkunqa.
9 Tsaynöpis Jerusaléncho kaykaq cürakunata waran waran kamaripanki lapan nistashqankunata. Tayta Diospaq sacrificiukunata rupatsinanpaqpis turitukunata, carnikunata y carnishkunata kamaripanki. Tsaynöpis trïguta, kachita, vïnuta y aceitita kamaripanki.
10 Tsaynöpami jana patsacho kaykaq Tayta Diospaq sacrificiukunata rupatsir noqapaqpis y tsurïkunapaqpis Tayta Diosta manakärinqa.
11 Noqa nishqäta pipis mana cäsukuptinqa wayinpa terrädunta jorqurkur ayanta tsayman tuyripäkunki. Nirkurna wayintapis chipyaq juchutsipäkunki.
12 Tayta Diosmi Jerusalénta akrashqa tsaycho tänanpaq. Tsawraqa mayqan nacionpa mandaqnin reytapis tsapata churapaq kaqtaqa Tayta Dios ushakätsitsun. Noqa Daríumi rey kar tsayno kananpaq nï. Nishqänöla lapantapis rurapäkunki.
13 Tsawraqa rey Darío apatsishqan cartacho nishqannölami tsay provinciapa gobernadornin Tatnai, Setar-boznai y mandäshiqninkunapis rurapäkurqan.
14 Tsaymi Israel mayor runakuna Tayta Dios nishqannöla templu sharkatsiyta ushapäkurqan. Tsaynöpami profëta Hageo y Iddupa tsurin profëta Zacarías wilakushqan cumplikarqan.* Tsaynöpis cumplikarqan Persia nacionpa mandaqnin rey Ciro, rey Darío y rey Artajerjes nishqan.
15 Tsaymi rey Darío soqta watana Persia nacionpa mandaqnin kaykaptin Adar killa kimsa kaq junaqcho* templu sharkatsiyta ushapäkurqan.
16 Usharkuptinmi cürakuna, *levitakuna y Babiloniapita Judáman chayamuq lapan Israel runakuna Diospa templunta inaurar fiestata kushishqa rurapäkurqan.
17 Tsay fiestachömi Tayta Diospaq sacrificiuta rupatsipäkurqan pachak (100) turitukunata, ishkay pachak (200) carnikunata, chusku pachak (400) carnishkunata y chunka ishkay chïvukunata. Tsay chïvukunataqa Israel runakunapa cada trïbunpaq jukta rupatsipäkurqan purificatsina sacrificiu kananpaq.
18 Nirkurmi Moisés qelqashqancho nishqannöla Tayta Diosta Jerusaléncho sirvipäkunanpaq cürakunata según turnun töcashqanpita churapäkurqan. Tsaynölami levitakunatapis churapäkurqan.*
19 Tsaynömi Babiloniapita Judáman chayamuqkuna *Pascua fiestata rurapäkurqan wata qalaykunan killa chunka chusku junaqcho.* *
20 Tsay fiestapaqqa cürakuna y levitakuna purificakushqanami karkaykarqan. Tsaymi Pascua fiestapaq carnishta pishtar sacrificiuta rupatsipäkurqan Babiloniapita Judáman chayamuq Israel mayinkunapaq, cüra mayinkunapaq y kikinkunapaqpis.
21 Babiloniapita chayamuq Israel runakunawanmi wakin mana Israel runakunapis tsay carnishkunata Pascua fiestacho mikupäkurqan. Tsay runakunaqa jutsa ruraq runakunapa mana ali costumbrinkunata kacharirnami Israel runakunata kuyaq TAYTA DIOSTA *ashipäkurqan.
22 Tsaypita qanchis junaqyaqmi Levadüraynaq Tantata Mikupäkunan fiestata kushishqa rurapäkurqan. Tsayno kushikärirqan templunta yapay sharkatsinanpaq Asiria* nacionpa mandaqnin reyta TAYTA DIOS yarpayta qoshqa kaptinmi.
Ichic wilacuycuna
^ 6.14 Esd. 5.1-2; Hag. 1.1; Zac. 1.1.
^ 6.15 Calendariuntsichöqa tsay junaq karqan 12 de marzu wata 516 a. C.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 6.18 1Crón. 23—27.
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 6.19 Calendariuntsichöqa tsay junaq karqan 21 de abril wata 516 a. C.
^ 6.19-22 Éxo. 12.1-20; Deut. 16.1-8.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 6.22 Persia nacionpa mandaqnin rey kaykaptinpis Asiria nacionpa mandaqnin rey kashqantami kay textucho niykan. Tsayno niykan Asiria nación munaynincho kaptinmi.
