Marcos 4:1-41
4 Tsaypitanami yapay qocha kuchuncho Jesús yachatsiyta qalaykurqan. Tsayman atska runakuna juntapaptinmi qocha kuchuncho kaykaq *büquiman witsarkur jamakurqan.*
2 Nirkurnami imamanpis tinkutsiypa atska yachatsikuykunata yachatsir kayno nirqan:
3 “Shumaq mayapäkamay. Juk runashi trïgu muruq aywarqan.
4 Muruta matsiptinshi näniman wakin chayarqan. Tsaytashi pishqukuna shamur upshakurkurqan.
5 Wakin kaq murushi shalaman chayarqan. Tsaycho alpa mana kaptinshi jeqamurpis
6 sapin mana kaptin shanaywan tsakikäkurqan.
7 Wakin kaq murushi kashakuna rurinman chayarqan. Jeqarkamurpis kashakuna nitiptinshi mana wayurqantsu.
8 Wakin kaq murunashi ali alpaman chayarqan. Tsaycho ali winamurshi jatusaq espïgayuq karqan. Wakin espïgashi kimsa chunka (30) trïguta wayurqan, wakin espïgashi soqta chunka (60) trïguta wayurqan y wakinnashi pachak (100) trïguta wayurqan”.
9 Tsayno yacharkatsirmi Jesús kayno nirqan: “Rinriyuq kaqkunaqa nishqäkunata wiyakäritsun”.
Tinkutsiypa imanir yachatsishqanta Jesús tantiyatsishqan
Mateo 13.10-17; Lucas 8.9-10
10 Tsaypita runakuna aywakuptinnami Jesús quëdarqan chunka ishkay discïpulunkunawan y tsaycho kaykaq wakin runakunalawanna. Paykunami Jesústa manakärirqan tsay yachatsishqanta tantiyatsinanpaq.
11 Tsayno manakuptinmi Jesús kayno nirqan: “Qamkunataqa Tayta Dios *mandaykashqan imano kashqantapis shumaqmi tantiyatsishayki. Wakin runakunatami itsanqa imamanpis tinkutsiypa wilapaykä.
12 Tsaymi rikaykarpis cuentata qokärintsu y wiyaykarpis tantiyapäkuntsu. Tantiyashpanqa jutsa ruraykunata kacharir perdonashqami kanqa”.*
Muruqman tinkutsishqanta Jesús tantiyatsishqan
Mateo 13.18-23; Lucas 8.11-15
13 Tsawraqa Jesús kayno nirqan: “Tsay yachatsishqäta ¿manaku tantiyapäkunki? Tsaykunalatapis mana tantiyaykarqa ¿imanöpataq wakinkunata tantiyapäkunkiman?
14 “Muruq runaqa Tayta Diospa wilakuyninta wilakuqmi kaykan.
15 Wakin runakunaqa chukru näninömi kaykan. Tsaymi Tayta Diospa wilakuyninta mayaptinpis *Satanás shamur mayashqalantapis qonqaykatsin.
16 “Wakin runakunaqa shalanömi kaykan. Paykunaqa Diospa wilakuyninta mayar kushishqami chaskikärin.
17 Kushishqa chaskikurpis Tayta Diosman janan shonqula yärakurmi sapitsayta mana kamäpakuq trïguno karkaykan. Tsawraqa Diospa palabranta chaskikushqanpita runakuna chikiptin o nakaykuna chayaptin qepaman kutikärin.
18 “Wakin runakunaqa kasha kasha chakranömi kaykan. Paykunaqa Diospa wilakuyninta mayarpis
19 kay vïdacho imaykankunapaqpis lakikur y rïcu kanalanpaq yarpachakurmi Diospa wilakuyninta qonqaykur mana wayuq trïguno karkaykan.
20 “Wakin runakunami itsanqa ali alpano kaykan. Paykunaqa Tayta Diospa wilakuyninta chaskikurmi Tayta Dios munashqanno kawapäkun. Tsaymi ali alpacho juk murulapita kimsa chunka (30) trïgu o soqta chunka (60) trïgu o juk pachak (100) trïgu wayushqanno karkaykan”.
Wilakuyninta atskiman Jesús tinkutsishqan
Lucas 8.16-18
21 Tsaypitami Jesús kayno nirqan: “Pipis atskita ratarkatsir ¿cajón rurinman o kawitu rurinman pakanmantsuraq? ¿Manaku lapanta atsikyapänanpaq alayrinninman churan?*
22 Tsaynömi yachatsishqäkuna kanan pakaraykaqno karpis musyakanqapaq. Kanan mana tantiyakarpis wara warantinkunaqa tantiyakanqami.
23 Rinriyuq kaqkunaqa nishqäkunata wiyakäritsun”.
24 Nirkurpis Jesús kaynömi nirqan: “Nishqäkunata shumaq cäsukäriy. Cäsukärishqaykiman tupumi Tayta Dios yanapashunki mas yachaq kanaykipaq. [Shumaq wiyakäriptikiqa] mastaraqmi tantiyatsishunki.
25 Yachatsishqäta cäsukuqkunaqa masmi tantiyakärinqa. Mana cäsukuqkunami itsanqa ichiklata tantiyashqalantapis qonqaykärinqa”.*
Trïgu muruman Jesús tinkutsishqan
26 Tsaypitanami Jesús kayno nirqan: “Tayta Dios *mandaykashqan kaykan juk runa trïguta murushqannömi.
27 Muruykuptinqa paqaspapis junaqpapis winakamunmi. Imano winashqanta tsay runa mana tantiyaptinpis
28 tsay trïgu puntata qewanölami jeqamun. Atayarkurnami espijayta qalaykur poqun.
29 Poqurkuptinnami ösiwan cosechan”*.
Ñäpush muruman Jesús tinkutsishqan
Mateo 13.31-32; Lucas 13.18-19
30 Mastapis Jesús kayno nirqan: “Tayta Dios *mandaykashqanta ¿imamanraq tinkutsïman? ¿Ima tinkutsikuywanraq tantiyatsïman?
31 Tayta Dios mandaykashqanqa kaykan ñäpush muruta juk runa chakranman murushqannömi. Lapan murupitapis mas ichiknaylami kaykan.
32 Mururkuptinnami winamurqa wakin jachakunapitapis mas jatun winan. Tsaymi rämankunacho pishqukunapis qeshwankunata rurapäkun”.*
Imapaq tinkutsiypa Jesús yachatsishqanpis
Mateo 13.34-35
33 Tsaynöpami runakuna tantiyananpaq tupuyla Tayta Diospa wilakuyninta imamanpis tinkutsiypa Jesús yachatsirqan.
34 Imamanpis mana tinkutsiypaqa manami imaypis yachatsirqantsu. Discïpulunkunatanami itsanqa kikilankuna kaykashqan höra lapanta tantiyatsiq.
Wayrapaqwan yakupaq Jesús munayniyuq kashqan
Mateo 8.23-27; Lucas 8.22-25
35 Tsay junaq patsa tsakaykaptinnami discïpulunkunata Jesús kayno nirqan: “Wak tsimpaman pasashun”.
36 Nirkurnami tsaycho kaykaq runakunata kachaykur *büquiwan wak tsimpaman aywarqan. Wakin runakunapis büquinkunawanmi aywapäkurqan.
37 Qochata tsimparkaykaptinmi fiyupa wayra qalakuykurqan. Yakupis pulchaqyarmi büquita talpukätsinanpaqna kaykarqan.
38 Jesúsnami büquipa qepa jamakunancho jawnata jawnakurkur punukashqa kaykarqan. Tsaymi discïpulunkuna pasaypa mantsakashpan Jesústa rikchatsir kayno nirqan: “¡*Rabí, talpukaykantsinami! ¿Imanirtaq jawka punukunki?”
39 Tsayno niptinmi Jesús sharkurkur wayrata y yakuta olqüpar kayno nirqan: “¡Chawayna!” Olqüpaptinmi jinan höra wayrapis yakupis chawarqan.
40 Tsaypitanami discïpulunkunata kayno nirqan: “¿Imanirtaq mantsakärinki? ¿Manaku yärakärimanki?”
41 Tsawraqa mantsakashqa kikinpura kayno nipäkurqan: “Yakupis wayrapis tsayno cäsunanpaqqa ¡pitaq kay runaqa!”
Ichic wilacuycuna
^ 4.1 Luc. 5.1-3.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 4.12 Isa. 6.9-10.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 4.21 Mat. 5.15; Luc. 11.33.
^ 4.25 Mat. 13.12; 25.29; Luc. 19.26.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 4.32 Tsayno nirmi Jesús kayno nirqan: Takshala murulapita ñäpush jeqarkamur winashqannömi Tayta Diospa wilakuynin maytsaymanpis chayanqa.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
