1. ¿Imataraj babiloniocuna nipäcurgan Danielta ricar?

 JOVINLARAJ caycaptinmi, Danieltaga caru marcapa babiloniocuna esclavutano apacärergan. Babiloniachona caycar Daniel mozuga ‘runa ricashallanpaga’ “cuyayllapaj camarajlla, sänu” cargan, ayluncunapis ricu imachi cargan (1 Sam. 16:7, TDI). Chayraycurshi Babiloniacho acrapäcurgan reypa palaciuncho sirvinanpaj (Dan. 1:3, 4, 6).

2. ¿Imanotaj Jehovaga Danielta ricargan? (Ezequiel 14:14).

² Jehovaga Danielta cuyargan, manami ricu castayoj cashganraycurlachu ni cuyaylapaj mozu cashganraycurlachu, paytaga cuyargan cäsucoj ali shongu mozu cashganraycurmi. Chayga rasunpami cargan, chay wichanpäga 20 watayoj imachi Daniel caycargan, y Noepitawan Jobpita Jehová parlaptenga Danielpitapis nergan ali yäracoj cashganta (Gén. 5:32; 6:9, 10; Job 42:16, 17; leiriy Ezequiel 14:14). Wanushgancamami Danieltaga Jehová cuyargan, payga lapan cawayninchomi mana yamacaypa Jehovata sirvirgan (Dan. 10:11, 19).

3. ¿Imapitataj cananga yachacushun?

³ Cananmi yachacushun Jehovapa ricayninpaj ali cananpäga imano runa Daniel cashganpita. Naupataga yachacushun imacunapa pasartaj Danielga valiente runa cargan y cäsucoj cashpan imanotaj Diosta mana raquicaypa sirvirgan. Nircur yachacushun imataj Danieltaga yanapargan chayno runa cananpaj. Ushanapäna yachacushun imacunata rurartaj noganchipis Danielnola cashwan. Cay lapan yachacuycuna jovincunapaj caycaptinpis lapanchicunami Danielpitaga yachacuyta puedinchi.

4. ¿Imapaj pasashganchotaj Danielga valiente cargan?

⁴ Öraga valiente runacunapis manchacärinmanmi, chayno captinpis ali cajcunata jinala rurarcaycan, jucmi cargan  Daniel mozu. ¿Imataj pasargan babiloniucuna Jerusalenta ushacächishganpita ishcay watacunano pasaptin? Nabucodonosor reymi manchanaypaj sueñuynincho ricargan juc jatuncaray monumentuta. Ricchapacaramurmi musyaj caj runacunataga yachachergan ima sueñushganta wilananpaj y tantiachinanpäpis, chaychomi quiquin Danielpis caycargan. Paycunacush Nabucodonosor ima sueñushganta mana wilacärinmanchu cargan, wanuynincunalachi shuyaraycanman cargan (Dan. 2:3-5). Pipis wanunanta mana munarmi, Danielga jucla reyta ashergan y “ruwaran imapaj suyñushan cashantapis willapänanpäga shuyaycunanpäraj” (Dan. 2:16, TDI). Chayta rurananpäga mana facilchu cargan. ¿Imanir? Unaycho Danielga manami pitapis sueñushganpita tantiachirganchu, chaymi payga ali yäracurcur valurcharcushgarächi. Quimsa amiguncunawanpis parlapacushgarämi cargan Sadrac, Mesac y Abednego jutiyoj, b “paycunataga willaparan janaj pachacho caycaj Tayta Diosta mañacunanpaj” (Dan. 2:18, TDI). Mañacärishgancunataga Jehová contestarganmi, Danielta yanapargan Nabucodonosorta wilananpaj ima sueñushganta y tantiachinanpäpis. ¡Danielwan amiguncunaga wanuypita libracärirganmi!

5. ¿Imapaj más pasashganchotaj Daniel valiente cargan?

⁵ Tiempuwanga yapaymi Danielga valiente cashganta ricächicurgan, Nabucodonosor sueñuyninta wilapashganpita tantiachinanpaj. Payga sueñushga cargan juc jatuncaray arbultami. Daniel valurwan Nabucodonosorta wilargan ima sueñushganpita, tiempuwan locuyänanpaj y jinamanpis rey manana cananpaj (Dan. 4:25). Ichanga chayta wiyarga Nabucodonosor yarparganchi Daniel contrancho churacaycashganta y wañuchinanpäpis mandanmanchi cargan, pero Danielga valurcharcurganmi ima wilananpaj cajtaga lapantami wilargan.

6. ¿Imaraj Danielta yanapargan valiente cananpaj?

⁶ ¿Pipitataj Daniel yachacurgan lapan cawaynincho valiente cananpaj? Mozula cashgan wichan taytancunapitami. Papäninwan mamänenga Jehovata cäsucurchi cawapäcurgan y chasquishgan Leypitapis cutin cutinchi Danielta parlapargan (Deut. 6:6-9). Payga manami Chunca Mandamientucunalapitachu  yachacushga cargan, Danielga musyarganmi israelitacunapa ima micuycuna impuro cashganta (Lev. 11:4-8; Dan. 1:8, 11-13). c Jina musyarganmi unaycho Diospa marcan mana cäsucoj captin ima pasashganta (Dan. 9:10, 11). Lapan cawaynincho imaycacunapa pasashganchomi cuentata gocurgan quiquin Jehovapis y angelnincunapis yanapänanpaj listo caycashganta (Dan. 2:19-24; 10:12, 18, 19).

7. ¿Ima mastaj Danielta yanapargan valiente runa cananpaj? (Dibujutapis ricay).

⁷ Danielga imaypis yachacuycashgalami cargan Diospa profetancunapita, jucnin cajmi cargan Jeremías. Ali yachacushganraycurchi cuentatapis gocurgan judiucuna Babiloniapita cutimunanpaj tiempo chayaycämushgantana (Dan. 9:2). Lapan profeciacuna imano cumplicuycashganta ricarga, masrämi Taytan Jehovaman yäracurgan. Pipis Jehovaman yäracunanpaj alapa calpachacuptinrämi selläma valiente runaman ticranga (Romanos 8:31, 32, 37-39 textucunawan tincuchiy). Cawaynincho imaypis valurcharcunanpäga Jehovata cutin cutin mañacushganmi yanapargan (Dan. 6:10). Ima pantashganpita y shongulancho ima yarpashgantapis lapantami Diosta wilapaj yanapänanpaj (Dan. 9:4, 5, 19). Daniel quiquilanpitaga manami valiente carganchu. Lapan cawayninchomi payga calpachacoj valiente cananpaj, chaypäga profeciacunapita yachacoj, Taytan Jehovata cutin cutin mañacoj y payman lapan shongunwan yäracoj.

8. ¿Imacunata rurartaj valiente runa cashun?

⁸ Valiente canapaj taytanchicuna yanapämaptinchipis quiquinchipitami canga imacunapa pasarpis valurcharcunapaj. Pipis valiente cananpäga yachacunanrämi, manami jinaylapitachu yurimunga. Waquincuna yachachimaptinchi imatapis ruranapaj calpachacunchimi atentula caycänapaj, nircur paynola ruranapaj. Chay japuyla calpachacunanchirämi Diosta sirvej valiente runacunapita yachacunapaj y nircur paycunanola canapaj. Chauraga, ¿imatataj Danielpitaga yachacunchi? Bibliapitaga manami janan jananla yachacushwanchu, Jehovapa amigun canapäga cutin cutinmi y shongunchita mashtapaycurmi mañacunanchi, jina yäracushwan Diosninchi yanapaycalämänanchipaj. Chay lapanta rurarga imayca sasacunapa pasarga valientimi caycäshun.

9. ¿Imanirtaj alapa ali caycan valiente runa captinchi?

⁹ Parlarcushun Alemaniapita Ben jutiyoj mozupita. d Mä imata rurarshi payga valiente cargan. Escuelancho compañeruncunaga burlacurmi parlapacärej Dios lapanta camashgancunaga ‘juc cuentula cashganta’ nir. Juc cutichoshi nipäcurgan lapanpa guepancho Camacoj Dios caycashganpita parlacaramunanpaj, y payga mana manchacuylapash Biblia ima nishganpita shumaj tantiachicurgan. Paymi cayno nin: “Profesornëga wiyaycalämashgami y ali yachachicunäpaj anotacushgäcunatapis copiacunatapis jorgurcur estudiaj masëcunata aypurgä”. Ima nirgantaj quiquin compañeruncunapis caytash nipäcurgan: “Alimi tantiachicamushcanqui Ben, shumajmi cashga”. Ali valurcharcur Ben ima rurashganga yarpächimanchi noganchipis valiente captinchega waquincunaga respetamäshunmi, y Jehovapitaga masrächi yachacuyta  munapäcunga. Chaymi valiente canapaj calpachacuptinchega alapa alimi canga.

10. ¿Ima ninantaj cuyapäcoj car pitapis yanapänapaj?

¹⁰ Bibliaga parlamunmi cuyapäcoj car pitapis yanapänapaj. Pipitapis más cuyapäcoj y yanapacoj caycan quiquin Tayta Jehovami, payga imaypis cachaycunchu sirvejnincunata. Jina Bibliaga parlamunmi Diospa sirvejnincuna jucnin jucnin cuyanacärinanpaj (2 Sam. 9:6, 7). Piwanpis cuyapäcoj canapaj jinala calpachacuptinchega tiempuwanga yarpaylapis yarpanchinachu raquicäcunapaj. Cayga clarumi ricacan Daniel pasashgancho.

11. ¿Ima pruebapataj Daniel pasargan auquinna caycaptin? (Garancho caycaj dibujuta ricay).

¹¹ Danielpa lapan cawayninchomi ricacämurgan Jehovata amatar cuyashgan. Ichanga 90 watacunayoj caycaptin juc jatun pruebapa pasargan. Chay wichanchoga Babilonia naciunga medocunapa y persacunapa munayninchomi caycargan, reyga Darío runami caycargan. Reypa mandätuncho caycaj waquin carguyoj runacunaga pasaypami Danielta chiquipäcoj, quiquin Jehovapäpis ima respetulapis carganchu. Danieltaga juc trampatano churapäcurgan. Chay chiquicojcunaga adrede documentuta ruraycur reyta firmachergan Danielwan piñacunanraycur, chauraga chaychomi ricacänan cargan Jehovata o chay reyta cäsucunanpaj. Chay reyta cäsucuptenga 30 junajcunapa manash Diosta ruwacunmanchu cargan. ¿Imatataj Daniel rurargan? Jehovata cushichiyta munarmi payta cäsucurgan, ichanga reyta mana cäsucushganraycur leoncuna caycashgan uchcuman gaycupäcurgan. Pero chaypitaga Jehová salvarganmi (Dan. 6:12-15, 20-22). ¿Imata rurar-raj Danielnopis Diospita mana raquicuycarla caycäshun?

12. ¿Imatataj Daniel rurargan Jehovata cuyar paypita mana raquicänanpaj?

¹² Jehovapita mana raquicänapaj y yarpaylapis mana yarpänapäga paytami amatar cuyananchi. Chaytami Daniel rurargan Jehovata cuyashpanmi, paylata lapan cawaynincho adurargan. Diosta masraj cuyananpäga, Danielga yarpachacojchi lapan cawaynincho Jehová imano yanapashganta (Dan. 9:4). Jina Danielga cutin cutinchi agradecicoj  quiquinpaj y waquin israelitacunapaj Jehová imaycata rurashganpita (Dan. 2:20-23; 9:15, 16).

13. 1) ¿Ima pruebacunapataj Diosta sirvej mozucuna pasapäcun? Gabriel jovinpita wilacamuy. (Fotutapis ricay). 2) ¿Imataraj nishwan pipis tapupämaptinchi Jehovapa testiguncunaga alitanochu rican homosexualcunapa ruraynincunata? (Cay videuta ricay jw.org paginacho “Jehová munashganta ruraptinchega jaucala goyäshun”).

¹³ Daniel cawashgan wichannolami, canan wichanpis runacunaga Jehovata ni Palabrantapis respetapäcunchu. Chay runacunaga Diosta cuyaj mozucunataga jamurparmi burlacärin y Diosta sirvipäcushgan ‘upa ruraycashganta’ nipäcun. Australiapita Gabriel jutiyoj mozupita parlarcushun. Colegiuncho caycaptinshi profesoranga lapan alumnucunata tapurgan: ¿Imataraj rurapäcunquiman pipis homosexual cashganta wilapäshuptiqui? Nircurshi chay profesoraga nergan: “Homosexualcunapa ruraynincunata alitano ricaj caypa shamuchun” nir. Gabriel wilacun: “Nogawan juccaj Testiguga mana aywapäcurgächu, waquincuna ichanga profesora ima nishganta cäsucur jucla aywapäcurgan”. Chayraycur ima pasashganga Gabriel mozupäga juc jatun pruebashi cargan. Paymi nin: “Clasëcuna ushashgancamami profesoräpis y estudiaj masëcunapis burlacur pasaypa ashlipäcamargan. Calpachacurgämi upälala cacunäpaj y ali shimilapa creenciäpita parlanäpaj. Ichanga paycunaga rinrin chapashgano carcaycargan”. Chay lapanpita Gabriel mozuga caytapis ninmi: “Cutin cutin insultapäcamashganga gustamarganchu, ichanga cushishga ricacurgä, Jehovata cuyashpä waquincunapa naupancho ali valurcharcur creenciäta defendiptë”.

14. ¿Imatataj rurashwan Jehovata cuyashpanchi paypita imaypis mana raquicäcunapaj?

¹⁴ Danielno Jehovata cuyanapaj calpachacuptinchega paypitaga imaypis raquicäcushunchu. Payta masraj cuyananchipäga pay imano cashganta shumaj reguinanchi y chayta rurashwan camashgancunapita yachacurmi (Rom. 1:20). Mozu jipashcuna, ¿imataraj rurapäcunquiman Jehovata respetashgayqui y cuyashgayquipis masraj ricacämunanpaj? Ali canman “¿Jinaylapitachuraj yurimushga?” nishgancho caycaj videucunata ricarcunayquipaj. Jina ¿Es la vida obra de un Creador? y El origen de la vida nishgan folletucunapis caycan yachacunayquipaj. Dinamarca naciunpita Esther jutiyoj jipash chay folletucunata leishganpita cayno nin: “Chay folletucuna ima aycata tantiachicushgancunaga shumajmi caycan. Manami nishunquichu imaman creinapaj, chaypa trucanga yanapämanchi quiquinchiraj cuentata gocunapaj imaman creinapaj”. Näga parlashganchi Ben jutiyoj mozupis caytami nin: “Cay folletucunaga yanapämashga Diosman masraj yäracunäpaj ima cawaypis jinaylapita mana yurimushganta”. Gampis chay folletucunapita yachacurga Apocalipsis 4:11 texto nishganwanga convenciduchi caycanquipaj, chaycho nin: “Tayta Diosnilä, qamlami lapanpaq munayniyuq kaykanki. Qammi lapan imaykatapis kamashqanki”. e

15. ¿Ima mastataj rurashwan Jehovapita imaypis mana raquicäcunanchipaj?

¹⁵ Jesuspita yachacushganchipis yanapämäshunmi Jehovata amatar cuyanapaj. Mä parlarcushun Alemania naciunpita Samira jutiyoj cristianapita. Paymi nin: “Jesuspita yachacurmi Jehová imano cashganpita masraj yachacurgä”. Wamralaraj caycaptinshi payga yarpachacoj ‘Diosta mana ricaycaptinchega ¿rasunpachuraj cuyamanchi?’ nir. Ichanga  Jesuspita yachacuptenga chaynoga manash yarpajchu. Caytapis ninmi: “Jesusga wamracunatami cuyaj, paypa amigunman ticranapäga facilmi cargan”. Pero Samira cristianaga calpachacurganmi Jehovata reguir masraj payta cuyananpaj, chaypäga Jesuspita masraj yachacurgan. Chaymi caytapis nin: “Jesuspita yachacushgäga quiquin Taytanpita yachacushgänomi cargan, cuentatapis gocurgä cay Pachaman Wamrantaga Jehová mandamushga quiquinta más shumaj reguinanchiraycurmi” (Juan 14:9). Mozu jipashcuna Jehovata cuyashpayqui y paypita imaypis mana raquicäcunayquipäga, ¿manachuraj alapa ali canman Jesuspita masraj yachacäriptiqui? Chayta rurapäcuptiquega, caway vidayquicunachoga Jehovata sirvirlami carcaycanqui.

16. ¿Imanoraj goyäcushun cuyacoj y mana jaguicoj captinchega? (Salmo 18:25; Miqueas 6:8).

¹⁶ Wiyacoj y yanapacoj captinchega piwanpis amistäninchega rätula ushacanchu (Rut 1:14-17). Jehovalata sirvir paypita imaypis mana raquicäcurga jauca jaucalami o tranquilula goyäcushun (leiriy Salmo 18:25; Miqueas 6:8). Payga amiguntano ricamashpanchimi imaypis jaguiycalämäshunchu. Pantaj runa captinchipis Camacoj Taytalanchi Jehovaga amatar cuyaycalämanchi ¿au? Chauraga nacaypis wanuypis ni imalapis Jehovapitaga raquicächimashwanchu (Dan. 12:13; Luc. 20:37, 38; Rom. 8:38, 39). Alimi cashga Danielpita yachacushganchega, yarpächimashcanchi Jehovata cuyar paylata imaypis aduranapaj.

17, 18. ¿Imacuna mastaj caycan Danielpita yachacunapaj?

¹⁷ Cananga walcalatami Danielpita yachacushcanchi. Caycanraj más paypita yachacunapaj. Sueñushgancunachomi Danieltaga Jehová imaycata ricächergan, jina espiritunta gorgan sueñushganta guelgananpaj y ima wilacuycunapitapis tantiachicunanpaj. Wilacushgan waquin profeciacunaga mayna cumplicushga, waquincuna ichanga cumplicunanpäna caycan, mä imacunash cay Pachacho pasanga.

¹⁸ Gatejnin yachacuycho yachacushun Daniel librucho caycaj ishcay profeciacunapita. Chaycunata yachacushganchega lapanchitami yanapämäshun canan wichan alicunalata rurar caycänapaj. Chay profeciacunaga Jehovapita mana raquicäcunapaj y valurta jorgunapämi yanapämäshun. Cay mundupa ushacaynin chayamunanpäna caycaptenga canan wichan ima pruebacunatapis aguantaycäshunla.