Juc taytami ganchis watayoj wamranta cayno nin: “Unay tiempuchomi Diosninchi camashga Pachata y lapan chaycho cajcunata. Jina intita, quillata y goyllarcunatapis”. Juc ratu yarpachacurirmi wamran cayno tapucun: “Papá... ¿y Diostaga pitaj camashga?”.

“Diostaga manami pipis camashgachu hiju” nir contestan papänin. Pishilaraj car wamraga manami más tapucunnachu. Pero más winashganmannomi más tapucuycunata ruracun. Manami shumajga tantianchu Diosga quiquilan yurimushganta, “¿imanoraj chayga caycunman? Hasta cielucunapis camashgami cashga” nir yarpachacun. Y jinalami pï Diosta camashgantaga shumaj tantianchu.

¿Ima nintaj Biblia? Cay wamrapa taytan nishgannolami Bibliapis nin. Moisesmi cayno nirgan Jehovata: “Jirkakuna manaraq kaptinpis y kay patsa manaraq kaptinpis unaypita patsa imayyaqpis qamlami Dios kaykanki” (Salmo 90:1, 2). Profeta Isaiaspis chaynolami nirgan: “TAYTA DIOSQA imayyaqpis kawaqmi kaykan. ¿Manaku tsayta musyapäkunki? ¿Manaku tsayta mayapäkushqanki? Paymi intëru kay patsata kamarqan” (Isaías 40:28). Y Judas cartaga nin: “Imayyaqpis reymi kaykan” (Judas 25).

Cay versiculucunami tantiachimanchi Diosninchiga “imayyaqpis kawaq” Dios cashganta apóstol Pablo nishgannopis (1 Timoteo 1:17). Chaurasga, payga imaypis cawashgami y manami yurishgachu. Y manami imaypis ushacangachu (Apocalipsis 1:8). Diospäga manami canchu ni yuricuynin ni ushacaynin; chaymi paynoga pipis canchu.

¿Imanirtaj chayta creinanchi ichic sasa canman? Noganchiga raslami ushacanchi, y manami watacunata Jehová yupashgannochu yupanchi. Mana ushacaj captinmi Paypäga waranga watacunapis juc junajnola (2 Pedro 3:8). Cayman yarpachacurishun. Juc chuclusga 50 junajcunalami cawan. ¿Tantianmanchuraj noganchino 70 o 80 watacuna cawayta? ¡Manachi! Noganchipis chay chuclusnolami canchi Taytanchi Jehová cawashganwan cawayninchita tincuchiptinchiga. Umanchiga manacajlami Jehovapawan igualachiptinchiga (Isaías 40:22; 55:8, 9). Chaymi pay imano cashganta shumajga tantianchichu.

Imay-yajpis cawaj cashganta shumaj mana tantiarpis, caytami ali tantiananchi. Diosta pipis camashga carga chay camajchi canman Camacoj. Bibliaga nin quiquin Camacoj cashgantami (Apocalipsis 4:11). Jina musyanchimi juc tiempupäga cielo ni Pachapis mana cashganta (Génesis 1:1, 2). ¿Imanotaj yurimushga? Chaycuna yurimunanpäga camajnin cargannami, churinpis y angelcunapis manaraj captin (Job 38:4, 7; Colosenses 1:15). Chaurasga clarumi caycan, Diosninchi imatapis manaraj camarga quiquilanmi caycargan. Paytaga manami pipis camashgachu, chay wichanga manami paypita masga pipis carganchu.

Noganchi, Pachapis y cielupis camashga cashganmi ali claro tantiachimanchi imay-yajpis cawaj Dios cashganta. Pachata y cielucho cajcunatapis shumaj contrulashganta tumachinanpäga mana ushacaj Diosmi canman. Paylami lapan cawajcunata cawayta goycun (Job 33:4).