PA RI junio 1970 in kʼo pa ri hospital re Pensilvania (Estados Unidos). Kʼateʼ 20 nujunabʼ, in soldado y xinriq jun nimalaj infección, cada media hora jun enfermero amaqʼel kril ri nupresión. Ri areʼ are nabʼeʼal chnuwach y xwilo che sibʼalaj xsach ukʼuʼx rumal che ri nupresión tajin kqajik. Rumal laʼ xinbʼij che: «Qʼalaj che kʼo ta jumul awilom jun winaq che kkamik». Sibʼalaj xsaqtubʼarik y xubʼij chwe: «No, kʼo ta jumul wilom». Xa jubʼiqʼ xraj xinkamik, are kʼu xinkʼasik. ¿La kawaj kawetaʼmaj chrij ri xinkʼulmaj pa ri nukʼaslemal?

Pa julio 1969, xinbʼe pa ri chʼoj re Vietnam. Are chiʼ xinopanik, xinuxlan jun semana rech kkʼaman chwe ri qʼaqʼ che kubʼan chilaʼ y ri hora. Utz xinaʼ kitoʼik ri yawabʼibʼ y ri winaq che kiriqom kʼax, y xwaj xinux cirujano. Rumal laʼ xintobʼan pa ri sala re operaciones. Y chilaʼ xinriq wi ri jun nimalaj infección che xinbʼij chiwe.

Xinchakun pa jun hospital militar pa delta río Mekong. Chilaʼ e kʼi helicópteros kekikʼam lo soldados che kiriqom kʼax. Ri in sibʼalaj nim xwil wi ri nutinamit y utz kinaʼo kinchakunik, rumal laʼ xwaj xentoʼ ri nuwinaq. Y ri salas re operaciones yaʼom pa taq nimaʼq chʼichʼ che kʼo aire acondicionado chupam. E kebʼ kunanelabʼ y kebʼ enfermeros kkikoj kichuqʼabʼ che kitoʼik konojel ri winaq che keʼopanik. Xuqujeʼ xwilo chiʼ ri helicopteros kikʼamom lo nimaʼq taq qʼeq bolsas. Xkibʼij chwe che kinqasaj taj, rumal che chupam ri bolsas riʼ e kʼo wi uchʼaqapil ri kicuerpos ri soldados che xekam rumal ri bombas. Ronojel wariʼ xwil pa ri chʼoj.

Xwetaʼmaj kiwach ri testigos rech Jehová are chiʼ kʼa in ala na. Xkiya etaʼmanik rech ri Biblia che ri nunan, ri areʼ xubʼan ta ri uqasanjaʼ. Are kʼu ri in sibʼalaj utz xwil ri tajin kkʼutik. Jun qʼij oj kebʼ rukʼ ri rachajil ri nunan xojqʼax bʼi chuwach jun Ja rech Ajawbʼal xintaʼ che: «¿Jas ubʼanik wajun lugar riʼ?». Xubʼij chwe: «¡Matkʼojiʼ kukʼ ri winaq riʼ!». Xinkoj ri xubʼij chwe rumal che kinkubʼsaj nukʼuʼx chrij y kʼo ta chi jumul xintzijon kukʼ ri testigos rech Jehová.

Rumal ri jastaq che xwil pa Vietnam, chiʼ xintzalij lo pa ri chʼoj kʼa knaʼtaj na chwe jujun taq jastaq che xqakʼulmaj. Xinchomaj, che kʼo ta nijun kuchʼobʼ ri tajin kkʼulmataj pa ri chʼoj. Knaʼtaj chwe che pa Estados Unidos ri winaq xkibʼan protestas rumal che kkichomaj che ri soldados rech Estados Unidos kekikamisaj ri alaj taq akʼalabʼ che kʼo ta kimak. Ronojel wariʼ xubʼano che xintzukuj ri Dios.

Rumal che xinmaj utzukuxik ri Dios xinbʼe pa kʼi taq iglesias. Sibʼalaj kinloqʼoqʼej ri Dios, are kʼu utz ta xwil ri kkibʼano. Chiʼ xqʼax ri tiempo xinbʼe pa jun Ja rech Ajawbʼal pa Delray Beach (Florida). Ri nabʼe riqbʼal ibʼ che xinbʼe wi are jun domingo re ri ikʼ febrero 1971.

Are chiʼ xinok pa ri Ja rech Ajawbʼal xwilo che ri nabʼe uchʼaqapil re ri riqbʼal ibʼ xa jubʼiqʼ chik kraj kkʼisik. Rumal laʼ xinkanaj kan pa ri etaʼmanik re Ri Chajinel qas xintatabʼej ri xbʼixik y xinwil ri xkibʼano. Knaʼtaj ta chwe jas xyaʼ ubʼixik pa ri kʼutunem, are kʼu ri knaʼtaj chwe are che konojel ri akʼalabʼ kkitzukuj ri textos pa ri Biblia. Sibʼalaj utz xwil wariʼ. Are kʼu chiʼ xa jubʼiqʼ chi kraj kinel lo pa ri Ja rech Ajawbʼal, xtzijon jun qachalal wukʼ che kʼo 80 ujunabʼ. Jim Gardner ubʼiʼ. Xuya ri wuj chwe La verdad que lleva a vida eterna. Xinkʼamo y xqabʼij che pa jueves aqʼabʼil kqamajij ri etaʼmanik re ri Biblia.

Xinbʼe pa chak are chiʼ xkʼis ri riqbʼal ibʼ. Pa ri hospital re Boca Ratón (Florida) xinchakun wi. A las once chaqʼabʼ kinmaj ri nuturno y kkʼis a las siete aqʼabʼil. Rumal che aqʼabʼ qas ta kʼi winaq keʼopanik, xinmajij usikʼixik ri wuj La verdad. Jun enfermera xrilo che tajin kinsikʼij uwach, xqebʼ wukʼ, xuchap ri wuj y rukʼ oyowal xubʼij chwe: «Matux testigo rech Jehová». Y xinbʼij che: «Kinux testigo rech Jehová, paneʼ kʼateʼ nikʼaj nusikʼim che ri wuj». Xbʼe ri ixoq, y xinkunik xinsikʼij ronojel ri wuj pa wajun chaqʼabʼ riʼ.

Ri nabʼe mul che xqamaj ri etaʼmanik rech ri Biblia rukʼ ri qachalal Gardner xintaʼ che: «¿Jas kqil kimik?». Xubʼij chwe: «Ri wuj che xinya chawe». Xinbʼij che, che ya xinsikʼij uwach ronojel. Rukʼ utz taq tzij xubʼij chwe: «Chqilampeʼ ri nabʼe kʼutunem». Are chiʼ xqamajij unikʼoxik, sibʼalaj xinmayo che kʼi taq jastaq xinchʼobʼ taj are chiʼ xinsikʼij uwach. Ri areʼ xubʼij chwe che kintzukuj ri e textos pa ri nuBiblia. Chanim riʼ tajin kwetaʼmaj ri qastzij chrij ri Jehová. Pa wajun aqʼabʼil riʼ oxibʼ kʼutunem re ri wuj xqilo. Y ronojel taq jueves je kqabʼano. ¡Sibʼalaj utz xwil ri xwetaʼmaj! ¡Y sibʼalaj kinkikotik che ri qachalal riʼ xux wajtij rumal che are jun chke ri kebʼe pa ri kaj y xretaʼmaj uwach ri qachalal Russell!

Chiʼ qʼaxinaq chi kebʼ oxibʼ semanas che numajim chi retaʼmaxik chrij ri Biblia xinmajij utzijoxik ri utzij ri Dios. Sibʼalaj kʼax xinbʼan che utzijoxik ri utzij ri Dios cho taq ja. Are kʼu, Jim xinutoʼo rech kinxibʼij ta wibʼ (Hechos 20:20). Rumal ri utobʼanik sibʼalaj nim xwil wajun chak riʼ. Ri nimalaj eqeleʼn che yaʼom chwe are che kinkunik kinkʼut chkiwach ri winaq chrij ri Dios. Utz kinnaʼo kintobʼan rukʼ ri areʼ pa wajun chak riʼ (1 Cor. 3:9).

Kwaj kintzijoj chiwe jun jastaq che sibʼalaj nim ubʼanik chnuwach. Kʼo ubʼanik rukʼ ri tiempo che xinmajij uloqʼoqʼexik ri Jehová (Apocalipsis 2:4). Wajun loqʼoqʼebʼal riʼ ubʼanom che kinchoman ta chi chrij ri xinkʼulmaj pa ri chʼoj y nikʼaj chik jastaq che nuriqom (Isaías 65:17).

Pa 1971 kʼo ta chi wachoch jawiʼ kinkanaj wi kanoq. Chiʼ majaʼ kkʼulmataj wariʼ xinkʼojiʼ pa jun apartamento kech ri nutat nunan. Are kʼu ri rachajil ri nunan xubʼij chwe, che kukʼulaj ta jun testigo rech Jehová. Xa jubʼiqʼ nurajil kʼolik, y pa ri hospital cada quince días kintojik. Xinsach ronojel ri nurajil rumal che xinloqʼ watzʼyaq che kinkoj che utzijoxik ri utzij ri Dios, rech ri winaq utz kechʼaw chrij ri Jehová. Numulim kan nikʼaj nurajil, are kʼu kʼo kan pa Míchigan, pa ri estado che xinalax wi. Rumal laʼ kʼi taq qʼij xinkanaj kan pa ri nucarro. Kinjosqʼij wibʼ y kinbʼan rasurar wibʼ pa taq ri baños che e kʼo pa ri gasolineras.

Are chiʼ xaq pa ri nucarro kinkʼojiʼ wi kanoq, jun qʼij xinel pa ri nuchak y xinbʼe pa ri Ja rech Ajawbʼal. Chilaʼ kqamulij wi qibʼ rech kojel che utzijoxik ri utzij ri Dios. Are kʼu ri e qachalal xebʼeyetaj na jubʼiqʼ rumal laʼ xintʼuyiʼ chrij ri Ja rech Ajawbʼal rech kenweyej. Xaq kʼateʼ xnaʼtaj chwe ri xinkʼulmaj pa Vietnam: xnaʼtaj chwe ri kikʼ che xinwilo, xinaʼ ri ruxlabʼ ri kibʼaqil ri winaq che kekʼatik. Y jetaneʼ xinta ri kiraqoj chiʼaj ri winaq che kkitaʼ tobʼanik chwe y kkito we kekʼasik. In wetaʼm che kekamik, are kʼu kinkoj nuchuqʼabʼ che ukubʼsaxik kikʼuʼx. Pa ri qʼij riʼ sibʼalaj xinbʼisonik.

Rukʼ oqʼej xinbʼan nuchʼawem che ri Jehová (Salmos 56:8). Xinchoman chrij ri kʼastajibʼal. Kʼo ta jumul in chomanaq chrij ri ubʼanik ri jeʼlalaj eyebʼal riʼ, ri Jehová kuya chi na kikʼaslemal ri alabʼom che xekamik y kekunik kketaʼmaj na chrij ri Dios. Are chiʼ kkʼulmataj wariʼ, ksach na ronojel ri kʼax che xqakʼulmaj pa ri chʼoj (Hechos 24:15). Uchʼobʼik wariʼ xubʼano che más xinloqʼoqʼej ri Jehová. Wajun qʼij riʼ sibʼalaj nim ubʼanik chnuwach. Are chiʼ kinkʼulmaj jun kʼax kinkoj nuchuqʼabʼ che uchomaxik ri loqʼoqʼebʼal che xukʼut ri Jehová chwe.

Are chiʼ ri winaq kebʼe pa ri chʼoj, kkibʼan itzelalaj taq jastaq, in xuqujeʼ xinbʼano. Are kʼu inutoʼm kebʼ textos re ri Biblia. Ri nabʼe are ri kʼo pa Apocalipsis 12:10, 11. Chilaʼ kubʼij wi che ri ukikʼel ri Jesucristo y ri utzijoxik ri utzij ri Dios kchʼakan puwiʼ ri Satanás. Ri ukabʼ are Gálatas 2:20, kunaʼtasaj chwe che ri Jesús xkam rumal wech. Rumal ri ukamikal ri Jesús ri Jehová xukuy numak rumal ri jastaq che xinbʼan kan ojer. Kimik kʼo chi jun chʼajchʼoj retaʼmabʼal nukʼuʼx y kwaj kinya ubʼixik chke ri winaq che ri Jehová are jun Dios che kutoqʼobʼisaj qawach (Hebreos 9:14).

Jujun taq mul kinchoman chrij ri xinkʼulmaj pa ri nukʼaslemal, y amaqʼel knaʼtaj chwe che ri Jehová ukʼutum utzilal chwe. Jun kʼutbʼal, are chiʼ ri wajtij xretaʼmaj che xa pa ri nucarro kinwar wi kanoq, ri areʼ xchʼaw rukʼ jun qachalal che kuya jujun taq cuartos pa qajik. Wetaʼm che are ri Jehová xekojow wa taq qachalal riʼ rech xinriq jun lugar jawiʼ kinkʼojiʼ wi, qas wetaʼm che ri Jehová sibʼalaj utz. Amaqʼel keʼuchajij ri upatanelabʼ.

Pa ri mayo 1971 xinbʼe pa Míchigan. Are chiʼ majaʼ kinbʼe pa Florida, xinkʼam bʼi kʼi taq wuj pa ri nucarro rech kinkunik kintzijoj ri utzij ri Dios pa ri bʼe. Are kʼu chiʼ majaʼ kinopan pa unikʼajil ri bʼe xekʼis ri wuj che nukʼamom bʼik. Rukʼ kikotemal xintzijoj ri utzij ri Dios pa jalajoj taq lugar. Xintzijoj pa taq ri cárceles xuqujeʼ xinya jujun taq wuj chke ri achijabʼ che xenriq pa taq ri baños che kojuxlan wi. Amaqʼel kinchoman chrij we kʼo jun winaq xkunik xretaʼmaj chrij ri Jehová (1 Corintios 3:6, 7).

Are chiʼ xinmajij retaʼmaxik chrij ri Biblia, chiʼ kintzijoj ri utzij ri Dios, kinkʼaq chkipalaj ri winaq ri tajin kkibʼano y más na chke ri nufamilia. Rumal che sibʼalaj kenloqʼoqʼej ri wachalal John y Ron, xinkoj nuchuqʼabʼ rech ri e areʼ kekojon chrij ri wetaʼmam in. Chiʼ xqʼax ri tiempo xinta kuybʼal numak chke. Kimik junam ta qakojonik kukʼ, are kʼu amaqʼel kinta che ri Jehová che kopan jun qʼij che kketaʼmaj ri qastzij. Rumal ri utobʼanik ri Jehová, kimik rukʼ utzilal kintzijoj ri utzij ri Dios y kinkʼut chkiwach ri winaq (Colosenses 4:6).

Ri wachilanik rukʼ ri Jehová are ri más nim ubʼanik pa ri nukʼaslemal. Are kʼu xuqujeʼ e kʼo jujun winaq che sibʼalaj kenloqʼoqʼej. Sibʼalaj kinloqʼoqʼej ri wixoqil ubʼiʼ Susan. Amaqʼel xwaj xinkʼuliʼ rukʼ jun ixoq che kinutoʼ che upatanexik ri Jehová. Ri al Susan are jun ixoq che sibʼalaj kuloqʼoqʼej ri Jehová. Are chiʼ tajin kqachʼabʼej qibʼ, jun qʼij xinbʼe che rilik pa ri rachoch ri utat unan. Xinwilo che tajin kusikʼij ri wuj Ri Chajinel y tajin kunikʼoj rukʼ ri uBiblia. Sibʼalaj xinmay ri tajin kubʼano, rumal che tajin kutzukuj ronojel ri textos paneʼ are ta tajin kusikʼij jun kʼutunem re etaʼmanik. Xwilo che ri rachilanik rukʼ ri Jehová are más nim ubʼanik pa ri ukʼaslemal. Xojkʼuliʼ pa diciembre 1971. Sibʼalaj kinmaltyoxinik rumal che xinriq jun ixoq che kinutoʼ pa ri nukʼaslemal. Ri más utz kwil che, are che más kuloqʼoqʼej ri Jehová chnuwach in.

Ri Jehová xuya kebʼ qalkʼwal, kibʼiʼ Jesse y Paul. Y ri e areʼ kiyaʼom che are ri Jehová kkʼamow kibʼe pa ri kikʼaslemal y kʼo jun utzalaj kachilanik rukʼ (1 Samuel 3:19). Wariʼ sibʼalaj kuya kikotemal chqe rukʼ ri al Susan. Ri e kebʼ más che veinte junabʼ tajin kkipatanij ri Jehová pa tiempo completo y kiyaʼom ta kan ri kichak rumal che sibʼalaj kkiloqʼoqʼej ri Jehová. Xuqujeʼ kinkikotik che xekʼuliʼ kukʼ e kebʼ ixoqibʼ che kkiloqʼoqʼej y kkipatanij ri Jehová junam kukʼ areʼ (Efesios 6:6). Stephanie y Racquel kibʼiʼ, sibʼalaj kinkikot kumal. Kinaʼo che jetaneʼ e numiʼal.

Dieciséis junabʼ xinpatanin pa Rhode Island. Chilaʼ xenriq kʼi taq wachiʼl. Kʼa kenaʼtaj na chwe ri kʼamal taq bʼe che xeʼux utzalaj taq wachiʼl. Sibʼalaj kinmaltyoxij ri tobʼanik che xkiya ri solinelabʼ chwe pa taq ri tiempo riʼ. Sibʼalaj nim kwilo che xinchakun kukʼ achijabʼ che kiyaʼom ta kan upatanexik ri Jehová. Pa 1987 xojbʼe pa Carolina del Norte rech kojtobʼan che utzijoxik ri utzij ri Dios, xuqujeʼ xeqariq chi nikʼaj qachiʼl chilaʼ. *

Pa ri agosto 2002, xojsikʼix pa Betel che kʼo pa Patterson Estados Unidos. In xinchakun pa ri Departamento de Servicio, y ri al Susan pa ri lavandería. Ri areʼ sibʼalaj utz xril ri uchak. Pa agosto 2005, xinux jun chke ri Jupuq Ajkʼamal bʼe cho ronojel uwach Ulew kech ri testigos rech Jehová. Xinnaʼo che kinkun ta che ubʼanik wajun chak riʼ. Ri al Susan xuqujeʼ xuxibʼij ribʼ che ri eqeleʼn y ri chak che kubʼan na. Y utz ta kunaʼo kbʼe pa ri avión, are kʼu kimik riʼ xaq chilaʼ chik kojbʼe wi. Sibʼalaj xtobʼan che ri al Susan ri pixabʼ che xkiya ri kixoqil ri e nikʼaj chi qachalal che e kʼo pa ri Jupuq Ajkʼamal bʼe cho ronojel uwach Ulew. Ri areʼ kraj kinutoʼo rumal laʼ sibʼalaj kinloqʼoqʼej.

E kʼo kʼi taq fotos pa ri nuʼoficina, che kunaʼtasaj chwe ri jeʼlalaj taq jastaq che nuriqom pa ri nukʼaslemal. Ri Jehová sibʼalaj in utewchim rumal ri loqʼoqʼebʼal che kinnaʼ che.