Ri Biblia xukʼex ri kikʼaslemal

¿Jas ri más utz xril jun empresario escocés chuwach ri ucarrera? ¿Jas xubʼan jun achi che kel pa Brasil rech xuya kan ri itzel ukʼaslemal xuqujeʼ ri utijik cocaína? ¿Jas xtoʼw jun ala esloveno rech xuya kan utijik tzam? Chqilaʼ ri kkiya ubʼixik.

«Qas ta xinkikot pa ri nukʼaslemal» (JOHN RICKETTS)

XALAX PA RI JUNABʼ: 1958

TINAMIT: ESCOCIA (REINO UNIDO)

NIKʼAJ CHIK: XKʼOJIʼ UQʼINOMAL

RI OJER NUKʼASLEMAL: Chiʼ in nitzʼ na xkʼojiʼ ronojel ri xajwataj chwe. Rumal che ri nutat are jun oficial rech ri ejército británico, rumal wariʼ xojbʼe pa jalajoj taq tinamit rukʼ ri nufamilia. Chiʼ oj kʼo pa Esocia, xojbʼe chi pa Inglaterra, Alemania, Kenia, Malasia, Irlanda xuqujeʼ Chipre. Chiʼ kʼo ocho nujunabʼ xinbʼe pa jalajoj taq tijobʼal re Escocia, tekʼuriʼ xinbʼan graduar wibʼ pa ri Universidad de Cambridge.

Are chiʼ xtzʼaqat 20 nujunabʼ, ocho junabʼ xinchakun pa jun industria petrolera. Nabʼe xinchakun pa América del Sur, tekʼuriʼ pa África, y chukʼisbʼal pa Australia Occidental, chilaʼ xinkoj jun empresa tekʼuriʼ xinkʼayij kanoq.

Are chiʼ kʼo 40 nujunabʼ xinkʼayij ri empresa, rukʼ ri pwaq che xyaʼ chwe xinchakun ta chik. Are kʼu ¿jawiʼ kinkoj chi wi ri nutiempo? Xinbʼe pa waʼkatem pa ronojel ri uwach Ulew. Kamul xinsolij Austrialia chrij moto. Sibʼalaj utz xinwil ri nukʼaslemal.

RI BIBLIA XUKʼEX RI NUKʼASLEMAL: Are chiʼ majaʼ kinya kan ri nuchak, xinnaʼo che rajawaxik kinmaltyoxij che ri Dios rumal che uyaʼom jun utzalaj nukʼaslemal. Rumal laʼ xinmajij bʼenam pa ri Iglesia Anglicana, are waʼ ri kojonem che xkʼut chnuwach chiʼ kʼa in nitzʼ na, chilaʼ qas ta kkikʼut ri kubʼij ri Biblia. Tekʼuriʼ xinmajij jun etaʼmanik kukʼ ri mormones, Are kʼu utz ta xwil ri kkikʼutu rumal che nim ta kkil ri Biblia.

Jun qʼij, ri testigos rech Jehová xeʼopan cho wachoch. Tekʼuriʼ xwilo che ronojel ri kkikʼutu kesam chupam ri uTzij ri Dios. Y jun chke ri textos che xkikʼut chnuwach are 1 Timoteo 2:3, 4, chilaʼ kubʼij che «ri Dios kraj chi kekolotaj ri winaq chi nimalaj konojel, xuqujeʼ chi kketaʼmaj ri qastzij». Xinmayo che ri testigos rech Jehová xaq xiw ta nim kkil wi ri kubʼij ri Biblia, xaneʼ kkaj kketaʼmaj ri qastzij.

Chiʼ xinmaj jun etaʼmanik kukʼ ri Testigos, xwetaʼmaj ri qastzij. Sibʼalaj xinkikotik are chiʼ xinchʼobʼo che ri Dios y ri Jesús e are ta jun trinidad. Xinchoman chrij ri kʼi tiempo che xintzaq che uchʼobʼik wajun kʼutunem riʼ che qastzij taj (Juan 14:28; 1 Corintios 11:3). ¡Are kʼu kʼax ta xinbʼan che uchʼobʼik ri kubʼij ri Biblia!

Tekʼuriʼ xinmaj bʼenam pa taq ri kiriqbʼal ibʼ ri Testigos. Sibʼalaj utz xwil ri xkibʼan che nuchʼabʼexik y ri utz taq kibʼantajik. Xwilo che e utz taq winaq. Rukʼ ri loqʼoqʼebʼal che kkikʼut chbʼil kibʼ xwilo che are ri qastzij kojonem (Juan 13:35).

RI TEWCHIBʼAL CHE NURIQOM: Are chi’ xinbʼan nuqasanjaʼ xinchʼobʼ uwach Diane, are jun jeʼlalaj ixoq che xkʼiy pa jun familia che testigos rech Jehová. Sibʼalaj utz xwil ri utzalaj taq ubʼantajik, chiʼ xqʼax ri tiempo xojkʼuliʼk. Ri rachilanik y ri utobʼanik are jun tewchibʼal che xuya ri Jehová chwe.

Xqaj xojbʼe pa jun lugar jawiʼ kajwataj wi tobʼanik rech ktzijox ri utzij ri Dios, rumal laʼ pa ri 2010 xojbʼe pa Belice, Centroamérica. Chilaʼ xojtzijon kukʼ ri winaq che kkiloqʼoqʼej y che kkaj kketaʼmaj más chrij ri Dios.

Kimik che wetaʼm chi ri qastzij chrij ri Dios y ri Biblia, uyaʼom kikotemal chwe. Rumal che tajin kinpatanin pa tiempo completo, e nutoʼm kʼi winaq rech kkichʼobʼ ri uTzij ri Dios. Sibʼalaj kuya kikotemal chwe are chiʼ kinkʼut ri pixabʼ re ri Biblia chke ri winaq y che kkikʼex ri kikʼaslemal junam rukʼ ri xinbʼan in. Rukʼ wariʼ kinkunik kinmaltyoxij ri nukʼaslemal che ri Jehová.

«Utz ri xkibʼan che nuchʼabʼexik» (MAURÍCIO ARAÚJO)

XALAX PA RI JUNABʼ: 1967

TINAMIT: BRASIL

NIKʼAJ CHIK: XEʼUCHʼABʼEJ ACHIJABʼ IXOQIBʼ

RI OJER NUKʼASLEMAL: Xinkʼiy pa Avaré, jun alaj tinamit re ri tinamit São Paulo, ri alaj tinamit riʼ are sibʼalaj mebʼaʼ.

Are chiʼ majaʼ kinalaxik xkam ri nutat. Chiʼ kʼa in nitzʼ na kinkoj ri ratzʼyaq ri nunan chiʼ kʼo ta cho ja. Xkʼextaj ri nubʼantajik, rumal laʼ ri winaq kkibʼij che in homosexual. Chiʼ xqʼax ri tiempo xinmajij ubʼanik tzʼil taq mak kukʼ ri alabʼom xuqujeʼ kukʼ achijabʼ che nim chi kijunabʼ.

Are chiʼ kʼa in ala na amaqʼel xinbʼe pa taq clubes, bares xuqujeʼ iglesias che kitzukuxik achijabʼ ixoqibʼ rech kinqʼoyiʼ kukʼ. Are chiʼ kbʼan ri carnaval, kinkoj atzʼyaq ke ixoqibʼ y kinxojow chkiwach winaq pa taq ri escuelas de samba. Sibʼalaj utz xinnaʼ ubʼanik wariʼ.

Ri e wachiʼl xuqujeʼ e homosexuales, prostitutas y kkitij drogas. Jujun chke xinkitaqchiʼj rech kintij droga ubʼiʼ crack (cocaína en piedra), xkʼaman chwe y amaqʼel chi kintijo. Jujun taq mul jun aqʼabʼ kojkanaj kan che utijik; y jujun taq mul xaq nutukel kintijo. Sibʼalaj xinbʼaqirik rumal laʼ ri winaq xkichomaj che sida kʼo chwe.

RI BIBLIA XUKʼEX RI NUKʼASLEMAL: Xwetaʼmaj kiwach ri testigos rech Jehová. Sibʼalaj utz xkibʼan che nuchʼabʼexik. Y xkisikʼij chnuwach ri kubʼij Romanos 10:​13, chilaʼ kubʼij che «konojel ri kkitaʼ ri utoʼbʼanik ri Ajawaxel, kekolotaj na». Xwetaʼmaj che rajawaxik kinkoj ri ubʼiʼ ri Dios. Ronojel aqʼabʼ are chiʼ ktijtaj ri crack wumal kinjaq ri ventana y kinkaʼy chikaj rukʼ oqʼej kintaʼ che ri Jehová che kinutoʼo.

Xwilo che ri nunan sibʼalaj kbʼison rumal ri tajin kinbʼan pa ri nukʼaslemal, rumal laʼ xinkoj nuchuqʼabʼ rech kintij ta chi drogas. Qʼaxinaq chi jubʼiqʼ tiempo xinmajij jun etaʼmanik re ri Biblia kukʼ ri Testigos. Xkibʼij chwe che rukʼ ri etaʼmanik riʼ kinkunik kinya kan ri tajin kinbʼano, y je xkʼulmatajik.

Are chiʼ xwetaʼmaj más chrij ri kubʼij ri Biblia, xwilo che rajawaxik kinkʼex ri nukʼaslemal. Kʼax xinbʼan kan che uyaʼik ri jastaq re homosexual, rumal che kʼa in nitzʼ na chiʼ xinmaj ubʼanik. Xwilo che rajawaxik kinya kan ri itzel taq wachiʼl y kinbʼe ta chi pa taq ri bares y clubes.

Paneʼ kʼax xinbʼan kan che uyaʼik wariʼ, are kʼu xukubʼsaj nukʼuʼx che ri Jehová nim kinril wi y nim kril ri chuqʼabʼ che tajin kinkojo (1 Juan 3:19, 20). Xinya kan ubʼanik ri tzʼil taq mak y ri utijik drogas, pa ri 2002 xinbʼan nuqasanjaʼ y xinux testigo rech Jehová.

RI TEWCHIBʼAL CHE NURIQOM: Are chiʼ ri nunan xrilo che xinkʼex ri nukʼaslemal sibʼalaj xumayo, rumal laʼ xumajij jun etaʼmanik re ri Biblia. Are kʼu sibʼalaj bʼisobʼal rumal che xuya jun yabʼil pa ri ujolom (infarto cerebral). Paneʼ je uriqom, are kʼu kuloqʼoqʼej ri Jehová y nim kril wi ri uTzij.

Ocho junabʼ chik tajin kentoʼ ri winaq rech kketaʼmaj chrij ri Biblia. Kimik tajin kinkoj nuchuqʼabʼ chuwach ri itzel taq rayinik, are kʼu wetaʼm che ri Jehová kkikot wukʼ are chiʼ kinbʼan ta ri nurayibʼal.

Retaʼmaxik uwach ri Jehová y ubʼanik ri kqaj chuwach, ubʼanom che nim kwil wi ri nukʼaslemal. Kimik qastzij chi kinkikot pa ri nukʼaslemal.

«Kinnoj ta che utijik tzam» (LUKA ŠUC)

XALAX PA RI JUNABʼ: 1975

TINAMIT: ESLOVENIA

NIKʼAJ CHIK: KUTIJIJEJ TZAM

RI OJER NUKʼASLEMAL: Xinalax pa Liubliana, ri capital re Eslovenia. Chiʼ kʼa in nitzʼ na sibʼalaj kinkikotik, are kʼu chiʼ kajibʼ nujunabʼ ri nutat xukamisaj ribʼ. Rumal laʼ ri nunan rajawaxik kchakunik rech kuya ri kajwataj chqe rukʼ ri wachalal.

Are chiʼ 15 nujunabʼ xinbʼe rukʼ ri watiʼt. Utz kwilo kinkʼojiʼ rukʼ rumal che kinkunik kinkʼojiʼ más tiempo kukʼ ri wachiʼl junam taj are chiʼ in kʼo rukʼ ri nunan. Are chiʼ kʼo 16 nujunabʼ xenwachilaj winaq che ronojel ri fines de semana keqʼabʼarik. Xinnimarisaj ri nuwiʼ y ri atzʼyaq che kinkojo xaq junam chi kukʼ ri kech ri alabʼom, tekʼuriʼ xinmajij utijik sikʼ.

Xintij jalajoj taq uwach drogas, are kʼu ri más utz xinnaʼ utijik are ri tzam. Nabʼe xa jubʼiqʼ kintijo tekʼuriʼ chiʼ xqʼax ri tiempo xaq nutukel chi kinkʼis jun botella tzam. Kqʼalajin ta chwe che in qʼabʼarel. Jujun taq mul are ri wuxlabʼ kkʼutuwik che in qʼabʼarel, y weneʼ kʼo ta kilowik che kʼi tzam nutijom.

Kʼi taq mul xa kenkʼam chi bʼi ri wachiʼl chiʼ kojel lo pa ri discoteca, paneʼ in más kʼi tzam nutijom chkiwach. Jumul jun wachiʼl xubʼij che ri jun chik che xa kinnoj ta chi che utijik tzam. Ri tzij che xubʼij xubʼan kʼax chwe, rumal che je kbʼix chke ri winaq pa Eslovenia che kkitijijej tzam y keqʼabʼar ta chik.

Wariʼ xubʼano che xinchoman chrij ri tajin kinbʼan rukʼ ri nukʼaslemal. Jujun taq mul kinnaʼo che kʼo ta nupatan. Y ri tajin kinbʼano kuya ta kikotemal chwe.

RI BIBLIA XUKʼEX RI NUKʼASLEMAL: Weneʼ pa taq ri tiempo riʼ, xwilo che jun wachiʼl pa ri escuela tajin kukʼex ri ukʼaslemal. Más jun utz winaq chik, xwaj xwetaʼmaj jas xubʼano, rumal laʼ xinbʼan invitar pa jun cafetería rech xojtzijonik. Xubʼij chwe che xumajij jun etaʼmanik re ri Biblia kukʼ ri testigos rech Jehová. Xuqujeʼ xubʼij chwe ri tajin kretaʼmaj. Kʼateʼ nabʼe mul xinta ri xubʼij rumal che pa ri nukojonem kʼo ta wetaʼmam. Xinmajij bʼenam pa ri e riqbʼal ibʼ kukʼ ri Testigos y xinmaj jun etaʼmanik re ri Biblia kukʼ.

Jewaʼ xinbʼan che retaʼmaxik ri qastzij che xukubʼsaj nukʼuʼx. Xwetaʼmaj che oj kʼo pa ri «kʼisbʼal taq qʼijol» junam rukʼ ri kubʼij ri Biblia y naj ta chik ri Dios kusachisaj na kiwach ri itzel taq winaq cho ri uwach Ulew, are kʼu ri e utz kkechbʼej na ri uwach Ulew chbʼe qʼij saq che kotzʼiʼj chi uwach (2 Timoteo 3:1-5; Salmo 37:29). Rumal laʼ xwaj xinkʼex ri nukʼaslemal rech kinkunik kinkʼojiʼ chkixoʼl ri utz taq winaq.

Are chiʼ xinbʼij chke ri wachiʼl che tajin kwetaʼmaj chrij ri Biblia, konojel xetzeʼn chwij. Wariʼ xinutoʼo rech xinwilo che e itzel taq achiʼl. Xuqujeʼ, xwil ri rumal che amaqʼel kinqʼabʼarik, rumal che utz ta xinbʼan che kichaʼik ri wachiʼl. Ri e areʼ xaq xiw keyem ri fin de semana rech keqʼabʼarik.

Xwaj ta chik xenwachilaj y rumal laʼ xentzukuj wachiʼl kukʼ ri testigos rech Jehová. Ri e areʼ xaq xiw ta xinkitoʼo, xaneʼ xuqujeʼ kkiloqʼoqʼej ri Dios rukʼ ronojel kanimaʼ y kkikoj kichuqʼabʼ rech kkibʼan pa kikʼaslemal ri kubʼij ri Biblia. Ri kachilanik xinutoʼo, y chiʼ xqʼax ri tiempo xinkunik xinya kan utijik tzam.

RI TEWCHIBʼAL CHE NURIQOM: Kinmaltyoxij che ri Jehová rumal che xinutoʼo y che kajwataj ta chi tzam chwe rech kinkikotik. Jas ta riʼ ri nukʼulmam we ta mat xinkʼex ri nukʼaslemal. Kimik sibʼalaj kinkikotik.

Sibʼalaj kinkikotik rumal che siete junabʼ xinchakun pa ri sucursal kech ri testigos rech Jehová pa Eslovenia. Qastzij che retaʼmaxik uwach ri Jehová xinutoʼo rech kʼo chi upatan ri nukʼaslemal kimik.