• XALAX PA RI JUNABʼ: 1963

• TINAMIT: GRAN BRETAÑA

• NIKʼAJ CHIK: XUYA KAN JUN CARRERA RI KUCHʼAK WI KʼI PWAQ

RI OJER NUKʼASLEMAL:

Xinalax pa ri distrito del sur re Londres ubʼiʼ Croydon. Ri nunan nutat pa ri isla caribeña de San Vicente ke’el wi. Oj nueve qachalal qibʼ, in ri in sexta. Paneʼ ri nunan kbʼe pa ri Iglesia Metodista, are kʼu ri in kʼo ta kwaj kwetaʼmaj chrij ri kojonem. Are chiʼ kʼa in nitzʼ na kʼi kwaj kwetaʼmaj. Pa taq ri vacaciones kinsikʼij kʼi wuj chuchiʼ jun lago che inkʼamom lo pa ri biblioteca.

Are chiʼ xinel pa ri escuela, xentoʼ ri winaq che kkiriq kʼax. Xinmajij kukʼ ri kʼo ta kachoch, ri tzʼaqat ta ri kicuerpo xuqujeʼ ri kʼax kkibʼan che retaʼmaxik jujun taq jastaq. Tekʼuriʼ pa ri universidad xinkʼam bʼi jun curso re ciencias de la salud. Are chiʼ xinbʼan graduar wibʼ, sibʼalaj utz ri xinriqo. Xinriq utzalaj chak che nim kintoj wi y rukʼ wariʼ xinkunik xinloqʼ kʼi taq jastaq che paqal rajil. Xinux gestora e investigadora social. Xaq xiw kajwataj Internet y jun computadora portátil chwe rech kinbʼan ri nuchak. Amaqʼel kinbʼe pa nikʼaj chi tinamit kʼi taq semanas kinkanaj kan pa ri hotel che más utz kwilo, xuqujeʼ kinbʼe pa taq ri gimnasios y pa taq ri lugares jawchiʼ kbʼan wi masajes de belleza y jeʼl kwil ri taq lugares. Xinchomaj che kʼo ronojel wukʼ rech kinkikotik. Are kʼu amaqʼel xinchoman chkij ri winaq che kajwataj tobʼanik chke.

RI BIBLIA XUKʼEX RI NUKʼASLEMAL:

Kʼi junabʼ xinchoman chrij jasche oj kʼo waral. Are kʼu xinchomaj ta utzukuxik ri urespuesta pa ri Biblia. Pa ri junabʼ 1999 ri nuchaqʼ, Margaret, y ri rachiʼl xinkisolij. Ri e kebʼ e testigos rech Jehová. Ri rachiʼl sibʼalaj utz xubʼan che nuchʼabʼexik y wariʼ xubʼano che xinmaj jun etaʼmanik re ri Biblia rukʼ. Are kʼu, ri nuchak y ri tajin kinbʼan pa ri nukʼaslemal sibʼalaj kresaj nutiempo, rumal laʼ aninaq ta xnimar ri nukojonik.

Pa ri verano 2002 xinbʼe pa ri suroeste re Inglaterra, rech kinwesaj jun curso re investigación social y kinwesaj jun doctorado. Oj kebʼ rukʼ ri wal xqamaj bʼenam pa taq ri kiriqbʼal ibʼ ri testigos rech Jehová. Paneʼ xinbʼe pa ri universidad, are kʼu xwetaʼmaj taj jasche kqariq kʼax pa ri qakʼaslemal y we kopan na jun qʼij che ksukʼumataj na, kʼateʼ xwetaʼmaj ri urespuesta are chiʼ xinmaj ri etaʼmanik chrij ri Biblia. Ri kubʼij pa Mateo 6:24 xukʼut chnuwach che kinkun taj kenpatanij e kebʼ ajawibʼ: La are ri Dios kinchaʼ upatanixik o are ri qʼinomal. Ri kinchaʼ ubʼanik pa nukʼaslemal kukʼutu jachin ri nim ubʼanik chnuwach.

Pa ri junabʼ kanoq amaqʼel xinbʼe cho kachoch jujun Testigos rumal che chilaʼ kyaʼ wi ri etaʼmanik chrij ri Biblia rech congregación, y are tajin knikʼox ri wuj ¿Existe un Creador que se interese por nosotros? * Rumal wariʼ, xwetaʼmaj che xaq xiw ri Jehová kkunik kusukʼumaj ronojel ri kʼax che kʼo cho ri uwach Ulew. Are kʼu, pa ri universidad xkʼut chnuwach che rajawaxik taj kojkojon chrij jun Bʼanol re ronojel ri jastaq rech kqariq kikotemal pa ri qakʼaslemal. Wariʼ xubʼano che xpe woyowal. Kʼateʼ kebʼ ikʼ in bʼenaq pa ri universidad, are kʼu xinya kanoq y are más xinya nutiempo rech kkʼojiʼ jun utzalaj wachilanik rukʼ ri Dios.

Ri xintoʼwik rech xinkʼex ri nukʼaslemal are ri texto rech Proverbios 3:​5, 6 che kubʼij: «Rukʼ ronojel awanimaʼ chakuʼbʼaʼ akʼuʼx chrij ri Ajawaxel man chrij ta kʼut ri awetaʼmanik pa awech wi. Chayaʼ uqʼij ri ukʼolem ri Ajawaxel pa ronojel ri kabʼano, chnaʼtaj ri Ajawaxel chawe, areʼ kʼu katkʼamow na bʼik pa ri sukʼalaj bʼe». Kʼo ta jun doctorado, qʼinomal y nikʼaj chi jastaq che más nim na ubʼanik chuwach uchʼobʼik uwach ri loqʼalaj qaDios. Are chiʼ más kwetaʼmaj chrij ri kubʼan na che ri uwach Ulew y che xuya ri ukʼojol rech xkam rumal qech, más kwaj kinjach ri nukʼaslemal che. Kʼisbʼal re xinbʼan nuqasanjaʼ y xinux testigos rech Jehová pa abril re ri junabʼ 2003. Xinmajij jun kʼaslemal rukʼ xa kebʼ oxibʼ jastaq.

RI TEWCHIB’AL CHE NURIQOM:

Ri wachilanik rukʼ ri Dios kʼo ta kjunamataj wi. Kimik rumal che kinchʼobʼ uwach, kinnaʼ chi jamaril y kikotemal. Xuqujeʼ kinkikotik are chiʼ kewachilaj ri sukʼalaj taq upatanelabʼ ri Dios.

Más tajin kkʼiy ri wetaʼmanik rukʼ ri unikʼoxik ri Biblia y ri bʼenam pa ri e riqbʼal ibʼ. Xuqujeʼ utz kinnaʼo kinbʼij chke nikʼaj chik. Rumal laʼ, xinbʼano che wariʼ kux ri nucarrera pa ronojel ri nukʼaslemal, y umajim lo pa junio re ri junabʼ 2008, tajin kinpatanij ri Dios pa tiempo completo. Je wariʼ kintobʼanik rech ri winaq kkiriq utzilal pa ri kikʼaslemal xuqujeʼ kentoʼo rech kekunik kekʼasiʼ pa jun jeʼlalaj uwach Ulew pa ri petinaq. Qas nuriqom ri qastzij kikotemal. Sibʼalaj kinmaltyoxij che ri Dios, rumal che ri nukʼaslemal kʼo chi upatan.

• XALAX PA RI JUNABʼ: 1973

• TINAMIT: AUSTRIA

• NIKʼAJ CHIK: SIBʼALAJ XETZʼAN CHRIJ RI PWAQ

RI OJER NUKʼASLEMAL:

Xinalax pa jun familia católica pa ri alaj tinamit re Braunau (Austria). Are jun lugar che kʼo jamaril y kʼo ta itzelal.

Pa ri junabʼ 1984, knaʼtaj chwe chiʼ kʼo 11 nujunabʼ, xkʼulmataj jun jastaq pa ri nukʼaslemal. Ri utzalaj wachiʼl, che xojetzʼan rukʼ chrij pelota, xkam pa jun accidente re tránsito. Sibʼalaj kʼi junabʼ xinbʼisoj y wariʼ xubʼan kʼax chwe. Amaqʼel xinchomaj jas kqakʼulmaj chiʼ kojkamik.

Are chiʼ xinel pa ri tijobʼal, xinmajij chak che electricista. Chiʼ qʼaxinaq chi ri tiempo xbʼe nukʼuʼx che uchʼakik pwaq rukʼ ri apuestas. Sibʼalaj kʼi pwaq kinkoj pa ri apuestas, are kʼu kʼo ta jun qʼij che mat xkʼojiʼ nupwaq. Xuqujeʼ utz kwil ri taq deportes y utz kinta ri música heavy metal y punk. Pa ri nukʼaslemal xinbʼan itzel taq jastaq xuqujeʼ xaq pa taq discoteca y pa taq nimaqʼij kinbʼe wi. Xinbʼan ronojel wariʼ, are kʼu xinkikot taj.

RI BIBLIA XUKʼEX RI NUKʼASLEMAL:

Pa ri junabʼ 1995, jun testigo rech Jehová che nim chi ujunabʼ xchʼaw chuchiʼ ri wachoch y xuya jun wuj chwe che esam pa ri Biblia ri wuj riʼ kubʼan ri pregunta «¿Jas kkʼulmatajik chiʼ kkam jun winaq?». Xinkʼam ri wuj rumal che kʼa kinbʼisoj na ri wachiʼl. Y xaq xiw ta xinsikʼij ri capítulo che kuya urespuesta ri pregunta, xaneʼ xinsikʼij ronojel ri wuj.

Xinriq ri respuestas chrij ri kamikal xuqujeʼ xwetaʼmaj nikʼaj chi jastaq. Xinkʼiy pa ri iglesia católica, y xaq xiw wetaʼm chrij ri Jesucristo. Are kʼu, rumal ri etaʼmanik re ri Biblia, nojimal xkʼiy jun utzalaj wachilanik rukʼ ri Jehová Dios. Sibʼalaj xinkikotik are chiʼ xwetaʼmaj che ri Dios naj ta kʼo wi chqe y kqebʼ kukʼ konojel ri ketzukun che (Mateo 7:7-11). Xuqujeʼ xwetaʼmaj che are kunaʼ bʼis y che amaqʼel kubʼan ri kubʼij. Wariʼ xubʼano che xwaj xwetaʼmaj más chrij ri profecías che kʼo pa ri Biblia. Ri xwetaʼmaj xubʼano che xnimar ri nukojonik chrij ri Dios.

Xwetaʼmaj che xaq xiw ri Testigos kkikoj kichuqʼabʼ che kitoʼik ri winaq rech kketaʼmaj chrij ri Biblia. Xintzʼibʼaj ronojel ri versículos che kʼo chupam ri e kiwuj tekʼuriʼ xintzukuj pa ri Biblia católica. Are chiʼ más kinsikʼij uwach ri kiwuj xwilo che xinriq ri qastzij kojonem.

Pa ri Biblia xuqujeʼ xwetaʼmaj che ri Jehová kraj che kinnimaj ri utaqanik. Are chiʼ xinsikʼij Efesios 4:22-24, xwetaʼmaj che rajawaxik kinya kan ri ojer nukʼaslemal y kinwatzʼyaqij «ri kʼakʼ kʼaslemal jas ri kqaj chuwach ri Dios». Rumal laʼ, aninaq xinya kan ri itzel taq jastaq, xinya kan ri apuestas che kubʼano che kinrayij más pwaq (1 Corintios 6:​9, 10). Are kʼu, rech kinkunik kinbʼan wariʼ rajawaxik kenya kan ri e wachiʼl, y kentzukuj nikʼaj chik che kʼo utz taq kibʼantajik.

Kʼax xinbʼan che kiyaʼik kan ri e wachiʼl. Are kʼu xenriq utz taq wachiʼl are chiʼ xinmaj bʼenam pa taq ri e riqbʼal ibʼ kukʼ ri testigos rech Jehová. Xuqujeʼ xinya ta kan ri etaʼmanik re ri Biblia y xinchoman chrij ri tajin kwetaʼmaj. Nojimal chi nojimal xkʼextaj ri nuchomanik chrij ri música, chrij ri kinchomaj ubʼanik pa ri nukʼaslemal y xinkʼex ri atzʼyaq che kinkojo. Y pa ri junabʼ 1995 xinbʼan nuqasanjaʼ.

RI TEWCHIBʼAL CHE NURIQOM:

Kimik más utz chi ri nuchomanik chrij ri pwaq y chrij ri qʼinomal. Xuqujeʼ xwetaʼmaj che utz taj aninaq kpe woyowal junam rukʼ nabʼe kanoq. Kinbʼison ta chi chrij ri kinkʼulmaj na pa ri petinaq.

Sibʼalaj kinkikotik rumal che in kʼo chkixoʼl ri winaq cho ronojel ri uwach Ulew che kkipatanij ri Jehová. Paneʼ jalajoj taq kʼax kkiriq pa ri kikʼaslemal, are kʼu kkiya ta kan ri kisukʼilal che ri Dios. Kimik are más tajin kinya chi ri nutiempo che upatanixik ri Jehová y che kipatanexik ri nikʼaj chik. Are ta chi kinbʼan ri nurayibʼal.

• XALAX PA RI JUNABʼ: 1963

• TINAMIT: GRAN BRETAÑA

• NIKʼAJ CHIK: XBʼISON RUMAL RI XUKʼULMAJ PA RI UKʼASLEMAL

RI OJER NUKʼASLEMAL:

Xinalax pa Inglaterra, are kʼu chiʼ kʼo siete nujunabʼ xojbʼe kukʼ ri nufamilia pa Australia, pa jun lugar turístico pa Queensland che kbʼix Gold Coast che. Paneʼ oj qʼinomabʼ taj, are kʼu kʼo ta jumul mat xqariq ri kajwataj chqe.

Paneʼ xqariq ronojel ri kajwataj chqe, are kʼu xinkikot taj. Kinbʼison pa ri nukʼaslemal. Ri in qas ta kinloqʼoqʼej ri nutat rumal che amaqʼel kqʼabʼarik y utz ta kwilo are chiʼ kubʼan kʼax che ri nunan. Are kʼu chiʼ xqʼax ri junabʼ xwetaʼmaj ri rumal che ri nutat are sibʼalaj itzel, xwetaʼmaj che ri areʼ xuriq kʼax pa ri ejército che kimik are Malasia.

Are chiʼ kʼa in ala na, xinmajij utijik tzam. Chiʼ 16 nujunabʼ xinya kan ri escuela y xinbʼe pa ri Marina. Pa ri tiempo riʼ, xinmajij utijik drogas, y xinnaqʼatisaj wibʼ che utijik sikʼ y amaqʼel xinqʼabʼarik. Nabʼe xaq xiw kinqʼabʼar pa ri fin de semana tekʼuriʼ xinmaj ronojel taq qʼij.

Weneʼ 20 ri nujunabʼ are chiʼ xinchoman chrij we qastzij kʼo ri Dios. Xinchomaj: «We kʼolik ¿jasche xaq kuyaʼo che kqariq kʼax y kojkamik?» Xinbʼan poemas jachiʼ kubʼij wi che are ri Dios ri ajmak che ri kʼax che kʼo cho ri uwach Ulew.

23 nujunabʼ are chiʼ xinya kan ri Marina. Xinriq jalajoj taq nuchak y pa jun junabʼ xinsolij jalajoj taq tinamit, are kʼu amaqʼel kinnaʼo che ri nukʼaslemal kʼo ta upatan. Kʼo ta kwaj kinbʼano. Y xwilo che kʼo ta upatan che kinbʼan jun wachoch, o kinriq jun utzalaj nuchak. Xaq xiw kwaj kinqʼabʼarik y kintatabʼej música.

Knaʼtaj na chwe are chiʼ xwaj xinriq kikotemal pa ri nukʼaslemal. Chiʼ in kʼo pa Polonia, xinsolij ri campo de concentración che k’o pa Auschwitz. Nutom jubʼiqʼ che wajun lugar riʼ kʼi kʼax xbʼan chilaʼ, are kʼu chiʼ xwil rukʼ ri nubʼaqʼwach sibʼalaj xinmayo y sibʼalaj xinbʼisonik. Kinchʼobʼ taj jasche ri winaq kkibʼan kʼi taq kʼax. Are chiʼ tajin kinbʼin pa ri lugar, rukʼ oqʼej kinbʼij: «¿Jasche, jasche xkibʼan wariʼ?».

RI BIBLIA XUKʼEX RI NUKʼASLEMAL:

Pa ri junabʼ 1993, are chiʼ xintzalij lo pa ri nutinamit, xintzukuj urespuestas ri nupreguntas pa ri Biblia. Majaʼ naj, kebʼ testigos rech Jehová xeʼopan wukʼ cho wachoch y xkibʼij chwe che kinbʼe kukʼ pa ri nim riqbʼal ibʼ che kbʼan pa ri estadio che kʼo naqaj che ri wachoch. Y xinbʼek.

Okʼowinaq chi jujun ikʼ xinbʼe pa wajun estadio riʼ che rilik jun etzʼanem, are kʼu xwilo che ri winaq e junam taj. Ri Testigos utz kkibʼan che uchʼabʼexik kibʼ, utz kibʼanom bʼi che katzʼyaqixik kibʼ y ri kalkʼwal e utzalaj taq akʼalabʼ. Pa ri unikʼajil qʼij xkibʼan jun jastaq che sibʼalaj xinmayo: e kʼi Testigos xewaʼ pa ri campo, are kʼu, kʼo ta mes xkiya kanoq chiʼ xetzalij bʼi pa ri kilugar. Ri más xinmayo are che konojel kekikotik y kʼo jamaril chkixoʼl, are waʼ ri amaqʼel xintzukuj. Paneʼ knaʼtaj ta chwe ri xbʼix pa taq ri chʼabʼal, are kʼu ksachan ta chwe ri utzalaj kibʼantajik ri Testigos.

Pa wajun chaqʼabʼ riʼ xnaʼtaj chwe che ri nuprimo usikʼim uwach ri Biblia y unikʼom jalajoj taq kojonem, y ubʼim chwe, che junam rukʼ ri xubʼij ri Jesús, ri qastzij cristianos kchʼobʼotaj kiwach rukʼ ri kibʼantajik (Mateo 7:​15-​20). Rumal laʼ xinchomaj che utz we kwetaʼmaj jasche jalan ri kibʼantajik ri Testigos. Are ri nabʼe mul che xinnaʼo che kʼo jun kubʼsal nukʼuʼx.

Chi’ xqʼax jun semana, ri kebʼ Testigos che xkibʼij chwe che kinbʼe pa ri nim riqbʼal ibʼ xopan chi jumul wukʼ. Y xinmajij jun etaʼmanik re ri Biblia kukʼ xuqujeʼ xinmajij bʼenam kuk’ pa taq ri e riqbʼal ibʼ.

Rukʼ ri tajin kwetaʼmaj pa ri Biblia, xkʼextaj ri nuchomanik chrij ri Dios. Xwetaʼmaj che are ta ajmak che ri kʼaxkʼolil che kkiriq ri winaq cho ri uwach Ulew, y che kbʼison rumal ri itzelal che kkibʼan ri winaq (Génesis 6:6; Salmo 78:​40, 41). Xinchomaj ubʼanik ronojel rech kinya ta kʼax che ri Dios. Kwaj che kkikot wumal (Proverbios 27:11). Xinya kan ri sikʼ, ri tzam y ri inmoralidad. Y pa marzo re ri junabʼ 1994, xinbʼan nuqasanjaʼ y xinux testigo rech Jehová.

RI TEWCHIBʼAL CHE NURIQOM:

Kimik sibʼalaj kinkikot chik. Kintij ta chi tzam are chiʼ kinbʼison rumal jun jastaq, xaneʼ kintaʼ ri utobʼanik ri Jehová (Salmo 55:22).

Diez junabʼ chik in kʼulan rukʼ jun jeʼlalaj Testigo ubʼiʼ Karen, y kʼo jun utzalaj ral che kʼo qukʼ ubʼiʼ Nella. Oj oxibʼ kqaya qatiempo rech kqatzijoj ri utzij ri Dios y keqatoʼ ri winaq rech kketaʼmaj ri qastzij chrij ri Dios. Kimik kinnaʼo che ri nukʼaslemal kʼo chi upatan.