Xinkʼiy pa Santo Domingo, ri capital re ri República Dominicana; in ri in chʼiʼp chke ri kajibʼ alkʼwalaxelabʼ. Ri e nutat nunan kʼo nim ketaʼmabʼal rumal laʼ kkaj che qas utz kkibʼan che qakʼiyisaxik. Kajibʼ junabʼ nabʼe kanoq chiʼ majaʼ kinkʼojiʼk, e areʼ xkichʼobʼ kiwach jujun misioneros mormones y sibʼalaj xkimay ri xkilo rumal che ri mormones e utz taq winaq y e chʼajchʼoj, y qas utz kkibʼan che usukʼumaxik kibʼ. Pa jubʼiqʼ tiempo, ri nufamilia are ri nabʼe xebʼe pa ri Iglesia de Jesucristo de los Santos de los Últimos Días o ri Iglesia Mormona pa ri República Dominicana.

Ri in amaqʼel xinya nutobʼanik pa ri Iglesia, are kʼu ri más utz xinwilo are che más nim kekil ri familia y kkikoj kichuqʼabʼ rech kʼo utz taq kibʼantajik. Sibʼalaj xinkikotik rumal che in mormón y xinkoj nuchuqʼabʼ rech xinux misionero.

Are chiʼ xtzʼaqat 18 nujunabʼ, ri nufamilia xbʼe pa Estados Unidos rech ri in kinkunik kinbʼe pa jun utzalaj universidad. Chiʼ qʼaxinaq chi jun junabʼ, ri nutíos che e Testigos xepe che qilik pa Florida, y xkibʼij chqe che kojbʼe kukʼ pa jun nim riqbʼal ibʼ. Sibʼalaj xinmayo rumal che konojel tajin kkitzukuj ri textos pa ri kiBiblia xuqujeʼ tajin kkitzʼibʼaj ri kketaʼmaj, rumal laʼ xwaj xinbʼan we xintaʼ jun lapicero y xintaʼ jun wuj rech kintzʼibʼaj ri kwetaʼmaj.

Are chiʼ xkʼis ri nim riqbʼal ibʼ, ri nutíos xkibʼij chwe che kkaj kinkitoʼo rech kwetaʼmaj más chrij ri kubʼij ri Biblia. Utz xintaʼ ri xkibʼij chwe, rumal che más wetaʼm ri kubʼij ri Libro de Mormón chuwach ri kubʼij ri Biblia.

Are chiʼ ri nutíos xetzalij cho kachoch, amaqʼel xechʼaw lo wukʼ pa teléfono rech xinkitoʼ che uchʼobʼik ri kubʼij ri Biblia. Amaqʼel xkibʼij chwe che kinjunamaj ri wetaʼmam rukʼ ri kubʼij ri Biblia. Xkaj che nutukel xinwetaʼmaj ri qastzij.

Kʼo kʼi jastaq che kukʼut ri nukojonem, are kʼu wetaʼm taj we kriqitaj pa ri Biblia. Ri nutía xutaq lo ri revista ¡Despertad! número 8 re noviembre 1995 chwe, che bʼanom kumal ri testigos rech Jehová, chupam wajun revista riʼ ko kebʼ kʼutunem che kchʼaw chkij ri mormón. Sibʼalaj xinmayo rumal che ko kʼi jastaq che wetaʼm taj che kchʼaw chrij ri nukojonem, rumal laʼ xintzukuj tobʼanik pa ri qasitio oficial kech ri mormones rech kwetaʼmaj we qastzij ri kubʼij wajun revista riʼ; y xinwilo che qastzij ri kubʼij. Y más xwetaʼmaj chrij are chiʼ xinsolij jujun museos mormones pa ri estado rech Utah.

Amaqʼel xinchomaj che ri Biblia y ri Libro de Mormón junam ri kkibʼij. Are kʼu are chiʼ qas xinsikʼij ri kuya ubʼixik ri Biblia xinwilo che junam ta ri kubʼij. Jun kʼutbʼal Ezequiel 18:4 ri Biblia kubʼij che ri animaʼ (alma) kkamik. Are kʼu pa ri Libro de Mormón pa ri wuj Alma 42:9 kubʼij che ri animaʼ kkam taj.

Xuqujeʼ kʼo chi nikʼaj jastaq xubʼano che qas ta xinchʼobʼ chi ri kkikʼut ri mormones. Jun chke are che kkibʼij che kimik ri kotzʼiʼjalaj Edén kʼo pa ri condado de Jackson (Misuri, Estados Unidos). Xuqujeʼ ri profetas rech ri Iglesia kkibʼij che chiʼ ri uQʼatbʼal tzij ri Dios kumaj uqʼatik tzij, kukoj na ri Estados Unidos rech kusukʼumaj ronojel uwach itzelal y kʼaxkʼolil che kʼo cho ronojel ri uwach Ulew.

Xinchoman chrij jas kkʼulmataj rukʼ ri nutinamit in —y ri nikʼaj chi tinamit— are chiʼ kmajtaj wariʼ. Jun qʼij xinuchʼabʼej jun winaq che tajin ktijoxik rech kux misionero y xintaʼ che chrij wariʼ. Xinbʼij che: «Wet ri atinamit kubʼan chʼoj rukʼ jun chik, ¿la katchʼojin riʼ kukʼ ri mormones ri e kʼo pa jun chi tinamit?». Sibʼalaj xinmayo are chiʼ xubʼij che kchʼojinik. Xintzukuj más etaʼmanik chrij ri nukojonem xuqujeʼ xintaʼ tobʼanik chke jujun taq kʼamal bʼe rech ri kojonem, xkibʼij chwe che ri nupreguntas kchʼobʼotaj taj y che nojimal riʼ kwetaʼmaj.

Sibʼalaj xinbʼisonik chiʼ xkibʼij wariʼ chwe. Tekʼuriʼ xinchoman chrij jasche kwaj kinux misionero, rukʼ wariʼ xinwilo che xaq xiw are jun tobʼanik kinya chke ri winaq y che kyaʼ jastaq chqe che paqal rajil. Are kʼu kʼo ta wetaʼm chrij ri Dios. Kʼi taq mul nusikʼim ri kubʼij ri Biblia are kʼu qas ta in chomanaq chrij ri kubʼij. Xuqujeʼ wetaʼm taj jasche ri Dios xubʼan ri uwach Ulew y ri winaq.

Are chiʼ xinnikʼoj ri Biblia kukʼ ri testigos rech Jehová xinwetaʼmaj kʼi jastaq: jas ri ubʼiʼ ri Dios, jas kqakʼulmaj chiʼ kojkamik, ri chak che kubʼan ri Jesús rech kbʼan ri kraj ri Dios... Kʼateʼ tajin kwetaʼmaj ri jeʼlalaj taq jastaq che kubʼij wajun wuj riʼ, ¡y sibʼalaj utz kinwilo kintzijoj chke nikʼaj chik ri tajin kwetaʼmaj! Amaqʼel wetaʼm che kʼo Dios, are kʼu kimik kinkunik kintzijon rukʼ junam rukʼ jun utzalaj wachiʼl. Xinbʼan nuqasanjaʼ pa ri 12 re julio 2004 y chiʼ qʼaxinaq chi seis ikʼ xinmaj upatanexik ri Dios pa tiempo completo.

Cinco junabʼ xinchakun pa ri sede mundial kech ri testigos rech Jehová, pa Brooklyn (Nueva York). Sibʼalaj kinkikotik rumal che xinya jubʼiqʼ nutobʼanik rech xebʼan biblias y nikʼaj chi wuj rech kyaʼ tobʼanik chke winaq cho ronojel ri uwach Ulew. ¡Pa ronojel ri junabʼ riʼ nunaʼom nim kikotemal rumal che kentoʼ ri wajil nutzʼaqat che uchʼobʼik uwach ri Dios!