Are chiʼ kʼa in nitzʼ na utz kwil ri naturaleza. Amaqʼel kinbʼe kukʼ ri nufamilia kojewaʼkat pa ri kʼachelaj y pa ri lagos che e kʼo chunaqaj ri qatinamit, Jyväskylä, pa ri tinamit rech Finlandia. Xuqujeʼ utz keʼinwil ri awaj. ¡Are chiʼ kʼa in nitzʼ na utz kinwiloʼ keʼinqʼaluj ri tzʼiʼ y ri e meʼs! Are chiʼ xinnimarik xinwilo che kbʼan kʼax chke ri awaj, rumal laʼ xinok pa jun organización che keʼutoʼ ri awaj che kbʼan kʼax chke. E kʼo winaq chilaʼ che junam ri qachomanik kukʼ chkij ri awaj.

Xqabʼan campañas chrij ri kʼax che kbʼan chke ri awaj. Xqajach wuj y xqabʼan manifestaciones chkij ri tiendas che kkikʼayij kitzʼumal ri awaj y ri laboratorios. Xqabʼan jun organización rech kqatoʼ kiwiʼ ri awaj. Wariʼ amaqʼel xojuya pa chʼoj kukʼ ri qʼatbʼal tzij. Kʼi taq mul xinkʼam bʼi kumal ri policías.

Xuqujeʼ kinbʼisoj nikʼaj jastaq chik, xinok pa jun organizaciones como Amnistía Internacional y Greenpeace, y xinya ronojel ri nuchuqʼabʼ y ri nutiempo che kitoʼik. Xeʼintoʼ ri e mebʼaʼ.

Chiʼ xqʼax ri tiempo xwilo che kinkun taj kinkʼex ri kʼax che kʼo cho ri uwach Ulew. Paneʼ jujun taq mul xojchʼakan chrij ri chʼoj, ri nimaʼq taq chʼoj kubʼan chqe che kqariq kʼax. Jetaneʼ ri kʼaxkʼolil are tajin ktaqan pa uwiʼ ronojel ri uwach Ulew y maj jun kel ukʼuʼx che. Kinnaʼo che jetaneʼ che kʼo ta nupatan.

Rumal che kʼo ta kinkun che ubʼanik, xinmajij retaʼmaxik chrij ri Dios y chrij ri Biblia. Paneʼ nabʼe kanoq xyaʼ etaʼmanik chwe chrij ri Biblia kumal ri testigos rech Jehová xinmaltyoxij rumal che nim xinkiloʼ, are kʼu pa ri tiempo riʼ xinkun taj xinkʼex ri nukʼaslemal. Are kʼu chanim je taj.

Xintzukuj jun Biblia y xinsikʼij uwach. Are xinutoʼ chuwach ri kʼax che tajin kinkʼulmaj. Xinmajij usikʼixik kʼi textos che xinutoʼ rech nim keʼinwil wi ri awaj. Jun kʼutbʼal, Proverbios 12:10 kubʼij: «Ri sukʼ retaʼm kerilij ri rawaj». Xuqujeʼ xwetaʼmaj che are ta ri Dios ri ajmak che ri chʼoj che kʼo cho ri uwach Ulew. Ri rumal che kʼo kʼax are che ri winaq kkiya ta bʼe che kkʼam kibʼe rumal ri Jehová. Sibʼalaj xinnaʼ kikotemal, nim xinwil wi ri upaciencia y ri uloqʼoqʼebʼal ri Jehová che kukʼut chqe (Salmo 103:8-14).

Pa taq ri tiempo riʼ xinriq ri wuj ¿Jas qas kukʼut ri Biblia? y xintaq bʼi pa jun correo. Naj ta tiempo qʼaxinaq xeʼopan jun kʼulaj testigos rech Jehová wukʼ y xkitzujun jun etaʼmanik re ri Biblia chwe. Xinkʼam ri etaʼmanik che xkibʼij chwe. Xuqujeʼ xinmajij bʼenam pa ri e riqbʼal che kebʼan pa ri Ja rech Ajawbʼal. Nojimal chi nojimal, ri qastzij re ri Biblia qas xopan pa wanimaʼ.

Sibʼalaj kinkikotik rumal che ri Biblia, xinutoʼo rech xinkunik xinkʼex ri nukʼaslemal. Xinya kan utijik sikʼ y ri tzam; xinsukʼumaj nubʼantajik xuqujeʼ ri kinchʼawik, y xinkʼex ri kinbʼan che kilik ri qʼatal taq tzij (Romanos 13:1). Xuqujeʼ xinkʼex ri nuchomanik chrij ri inmoralidad sexual.

Are kʼu kʼax xinbʼan kan che uyaʼik ri organizaciones che tajin kinya wi nutobʼanik. Nabʼe xinchomaj che utz taj kinya kanoq. Are kʼu xwilo che xaq xiw ri uQʼatbʼal tzij ri Dios kkunik kuya jun eyebʼal chke ri winaq, rumal laʼ xinkoj ronojel ri nuchuqʼabʼ che ubʼixik chke (Mateo 6:33).

Are chiʼ xwaj xinkʼex ri kʼax cho ri uwach Ulew keʼintas ri winaq: ri e utz y ri itzel taq winaq, y kinbʼan kʼax chke ri itzel taq winaq. Chanim, kinkikotik rumal che ri Biblia, xinutoʼo rech xinya kan ri itzel nuchomanik y kinkoj nuchuqʼabʼ rech nim keʼinwil wi konojel ri winaq (Mateo 5:44). Ri loqʼoqʼenik che kinnaʼ chke, jalajoj kinbʼan che ukʼutik. Jun kʼutbʼal, kintzijoj ri utzalaj taq tzij re ri uQʼatbʼal tzij ri Dios chke. Sibʼalaj kinnaʼ kikotemal rumal wajun utzalaj chak che kuya kikotemal y jamaril, y kuya jun jeʼlalaj eyebʼal chke ri winaq pa ri petinaq.

Xinya kan ronojel pa uqʼabʼ ri Jehová, wariʼ ubʼanom chwe che nuriqom kikotemal pa ri nukʼaslemal. Qas kinkubʼsaj nukʼuʼx che ri ajBʼanol re ronojel ri jastaq kuya ta bʼe che ri winaq kkibʼan kʼax chke ri awaj xuqujeʼ kkibʼan más kʼax che ri uwach Ulew. Naj ta chi kraj kukoj ri uQʼatbʼal tzij, rech kusukʼumaj ri kʼax che tajin kkibʼan ri winaq (Isaías 11:1-9). Kinnaʼ nimalaj kikotemal, xaq xiw ta rumal che xwetaʼmaj chrij ri qastzij, xaneʼ rumal che keʼintoʼ nikʼaj rech xuqujeʼ kketaʼmaj chrij ri qastzij. Kimik kinkoj ta chi nuchuqʼabʼ che ukʼexik ri kʼax.