Xinkʼiy pa Roma pa jun barrio che sibʼalaj mebʼaʼ. Sibʼalaj xinriq kʼax pa ri nukʼaslemal, xwetaʼmaj ta uwach ri nunan y qas ta xqachʼabʼej qibʼ rukʼ ri nutat. Xaq pa taq bʼe xinkʼojiʼ wi.

Xinmajij elaqʼanik are chiʼ kʼo 10 nujunabʼ, y xinel bʼi cho wachoch are chiʼ kʼo 12 nujunabʼ. Kʼi mul xinukʼamaʼ ri nutat kukʼ ri policías. Amaqʼel kinchʼojin kukʼ ri winaq y sibʼalaj in kʼaʼn, are chiʼ 14 chi ri nujunabʼ xinel bʼi pa ri wachoch. Xinkʼojiʼ pa taq bʼe y xintij drogas. Are chiʼ kok aqʼabʼ kintzukuj jun carro y kinwar kan chupam; tekʼuriʼ kintzukuj jubʼiqʼ joron rech kinjosqʼij wibʼ.

Xinux jun nimalaj elaqʼom. Kintoqij ri taq bolsas pa taq ri bʼe y chaqʼabʼ kinok pa taq ja rech kenwelaqʼaj ri kijastaq ri winaq. E kʼi winaq xketaʼmaj che kinelaqʼanik rumal laʼ xinsikʼix pa jun pandilla, y wariʼ xubʼano che xinbʼan más nimaʼq taq elaqʼ rumal che xinmajij elaqʼanik pa taq bancos. Wariʼ xubʼano che sibʼalaj nim xinkil wi ri winaq pa ri pandilla. Amaqʼel xwukʼaj ri nupistola y amaqʼel kinya chuxeʼ ri nuchʼakat are chiʼ kinwarik. Kinmakun kukʼ ixoqibʼ y kinbʼij itzel taq tzij. Ri policías amaqʼel xinkalwachij rumal laʼ kʼi mul xinkʼam bʼi pa cárcel. Kʼi taq junabʼ xinkʼojiʼ pa ri bʼe y pa ri cárcel.

Jumul are chiʼ xinel lo pa cárcel, xenchʼabʼej ri nutía. In wetaʼm taj che ri areʼ y kebʼ chke ri nuprimos e testigos rech Jehová. Xinkisikʼij pa jun riqbʼal ibʼ y xinbʼek rumal che kwaj kenwilaʼ jas kkibʼano. Are chiʼ xojopan pa ri Ja rech Ajawbʼal, xwaj xinkanaj kan chuchiʼ ri ja rech kwilo jachin taq keʼok loq y jachin taq keʼel bʼik, y wukʼam ri nupistola.

Wajun riqbʼal ibʼ riʼ xukʼex ri nukʼaslemal. Rumal che xinchomaj: «¡Jawchiʼ in kʼo wi!». Rumal che ri winaq sibʼalaj e utz y ketzeʼnik. Kʼa kimik riʼ knaʼtaj na chwe ri utzilal che xkikʼut ri Testigos chnuwach. ¡Jetaneʼ xinnaʼo che in kʼo pa jun chi lugar!

Xinmaj retaʼmaxik chrij ri Biblia kukʼ ri Testigos. Are chiʼ más xwetaʼmaj chrij ri Biblia xwilo che rajawaxik kinkʼex ri nukʼaslemal. Jun kʼutbʼal xinbʼan ri kubʼij Proverbios 13:20: «Chawukʼaj awibʼ kukʼ ri ajnoʼjabʼ kariq kʼu na anoʼj chawukʼaj awibʼ kukʼ ri man kʼo ta kinoʼj kkisachisaj kʼu na awach». Rukʼ wariʼ xinchʼobʼo che rajawaxik kinel kan pa ri pandilla. Kʼax xinbʼan che ubʼanik are kʼu rukʼ ri utobʼanik ri Jehová xinkunik xinbʼano.

Sibʼalaj xinkoj nuchuqʼabʼ rech xinya kan utijik sikʼ y drogas. Xinqopij ri nimalaj nuwiʼ, xinwesaj ri xkinaj che nukojom y xinya kan ubʼixik itzel taq tzij. Kʼateʼ nabʼe mul xinnaʼo che kinkunik kinkʼex wibʼ.

Utz ta kinnaʼo kinsikʼij wuj rumal laʼ sibʼalaj xinkoj nuchuqʼabʼ rech amaqʼel xinnikʼoj uwach ri Biblia. Are kʼu nojimal chi nojimal xnimar ri nuloqʼoqʼenik che ri Jehová. Tekʼuriʼ xinmajij ubʼisoxik ronojel ri numak che xinbʼan kan ojer, wariʼ sibʼalaj xuya bʼis chwe y xinchomaj che ri Jehová kukuy ta ri numak che xinbʼan kan ojer. Pa taq ri qʼij riʼ xinmajij usikʼixik ri ubʼanom ri Jehová che ukʼutik che kukuy qamak. Xinsikʼij chrij ri xubʼan ri qʼatal tzij David che xubʼan nimaʼq taq makaj are kʼu xkuy umak rumal ri Jehová (2 Samuel 11:1–12:13).

Jun chi jastaq che xinkoj nuchuqʼabʼ chuwach are che xintzijoj ri utzij ri Dios chke ri winaq (Mateo 28:19, 20). Sibʼalaj xinxeʼj wibʼ che kinriq jun winaq che xinbʼan kʼax che ojer kanoq. Tekʼuriʼ nojimal chi nojimal xel ri xibʼin ibʼ chwe. Xinmajij tzijonem kukʼ ri winaq chrij ri Qatat che kʼo pa ri kaj che kukuy qamak.

Retaʼmaxik uwach ri Jehová xukol ri nukʼaslemal. E kʼi chke ri wachiʼl e kaminaq o e kʼo pa cárcel. Are kʼu ri in kinkikot pa ri nukʼaslemal y kweyeʼj ri jeʼlalaj kʼaslemal che kpe na. Chanim riʼ kinkʼut chi machʼachʼem y kinnimanik xuqujeʼ aninaq taj kpe woyowal. Wariʼ ubʼanom che kʼo utz wachilanik kukʼ ri winaq che e kʼo chnunaqaj. In kʼulan rukʼ jun jeʼlalaj ixoq ubʼiʼ, Carmen. Pa junamam kqakʼut chke ri qavecinos chrij ri Biblia.

Haa y kamik kinelaqʼ ta chik, tajin na kinchakun pa jun banco are kʼu xa ta elaqʼ kinbʼan chilaʼ xa kinmesonik.