1 Samuel 1:1-28
1 Efrain+ jirkakunachö këkaq Ramataim-Zofim*+ markachömi Elcanä*+ jutiyoq nuna kawarqan. Pëqa Jerohampa tsurinmi karqan, Jerohamnam Elihüpa tsurin karqan, Elihünam Tohupa tsurin karqan y Tohunam Zufpa tsurin karqan.
2 Elcanäqa ishkë warmiyoqmi karqan. Y jutinkunaqa Äna y Peninämi karqan. Peninäpaqa wamrankuna kapurqanmi, peru Änapaqa manam jukllëllapis karqantsu.
3 Elcanäqa cada watam, Silö markata ëwaq angelkunata mandaq Jehovä Diosta adoranampaq* y animalta pishtëkur rupatsinampaq.+ Tsëchömi Elïpa ishkan tsurinkuna Hofnïwan Finehas+ sacerdöti kayarqan y Jehovä Diosta sirwiyarqan.+
4 Juk junaqmi, Elcanäqa pishtashqa animalta Teyta Diospaq rupatsirqan. Y tsë ëtsatam warmin Peninäta y ollqu y warmi wamrankunata mikuyänampaq qararqan.+
5 Änatanam alläpa kuyarnin mas allin kaq ëtsata qararqan. Peru Jehovä Diosqa Äna qolloq kanantam permitirqan.
6 Äna qolloq kananta Jehovä Dios permitishqa kaptinmi, Peninäqa chikiparnin Änapita imëpis burlakoq.
7 Tsënömi Peninäqa Teyta Jehoväta adorayänan carpa* wayiman cada wata ëwayaptin, Änata cöleratseq.+ Tsëmi pëqa waqarlla kakur imatapis mikoqnatsu.
8 Tsënam Elcanäqa warmin Änata nirqan: “¿Imanirtan waqanki? ¿Imanirtan mikunkitsu? ¿Imanirtan llakishqalla këkanki?* ¿Manaku noqaqa qampaq chunka wamrapitapis mas alli kä?”.
9 Tsëpitanam Silö markachö mikupakur y upupakur ushariyaptin, Änaqa sharkur yarqurqan. Tsë höram sacerdöti Elïqa, Jehoväpa templumpa* punkun lädunchö këkaq+ täkunanchö jamarëkarqan.
10 Änaqa llakishqa karmi Teyta Jehoväman mañakur qallëkurqan,+ y mana pärëpam waqarqan.
11 Y kënö nirmi änirqan: “¡Angelkunata mandaq Jehovä Diosllä! Alläpam sufrikä, rikëkallämë. Yarpëkallämë, ama qonqëkallämëtsu. Teyta Jehovä, juk ollqu wamrayoq kanäta permitïkuptikiqa,+ qampaqmi kanqa y wanukunqanyaqmi o wañukunqanyaqmi sirwishunki. Y manam imëpis aqtsanta rutupuyanqatsu”.+
12 Jehovä Diosman Äna unëpa mañakuptinmi, Elïqa shiminllata kuyutseqta rikarqan.
13 Änaqa shonqunllachömi Teyta Diosta parlapëkarqan. Shiminllam kuyuykarqan y parlanqanqa manam wiyakarqantsu. Tsëmi Elïqa machashqa kanqanta pensarqan.
14 Tsëmi nirqan, “¿imë hörayaqtan machashqa kakunki? Amana vïnuta upyënatsu”.
15 Änanam nirqan: “¡Manam teytallë! Manam ni vïnuta ni ima washkutapis upurqötsu. Alläpa llakishqam këkä, tsëmi shonqüchö imanö sientikunqäta Teyta Jehoväta willëkä.+
16 Imapaqpis mana sirweq warmitanöqa ama rikëkallämëtsu. Alläpa llakikurmi kë hörayaq tsënö parlëkarqö”.
17 Tsënam Elïqa nirqan: “Mañakunqëkinö Israelpa Diosnin bendicïkushuy. Kananqa mana yarpachakurlla ëwakuy”.+
18 Y pënam, “gracias teytallë, alli nunam kallanki” nirqan. Tsëpitanam ëwakurnin mikur qallëkurqan, y mananam llakikurqannatsu.
19 Waräninnam, patsa waräriptinlla* shärikurir y Teyta Jehoväta adorarir, Ramä+ markachö këkaq wayinkunaman kutikuyarqan. Tsëpitanam Elcanäqa warmin Änawan punurqan y Jehovä Diosmi Äna mañakunqanta yarparqan.+
20 Tsëmi Änaqa qeshyaq tikrarqan, y mañakunqampita juk watapis manaraq pasaptinmi wamran yurirqan. Y “Jehovä Diostam mañakurqö” nirmi, Samuel* nir jutin churarqan.+
21 Tiempu pasariptinnam, Elcanäqa cada wata ruranqannö, animalta pishtëkur Teyta Jehoväpaq rupatsinampaq+ y änikunqampita qarëta aparkur familianwan ëwayarqan.
22 Peru Änaqa manam ëwarqantsu.+ Tsëmi Elcanäta nirqan: “Wamrantsikta wasqirir-ran Teyta Jehoväta sirwinampaq aparkur ëwashaq, y tsëpita witsëpaqa tsëchönam quedakunqa”.+
23 Tsënam Elcanäqa nirqan: “Qam ninqëkinö katsun.* Wamrantsikta wasqinqëkiyaq këchö quedakuy. Ninqëkita Jehovä Dios cumplïkutsun”. Tsëmi pëqa wayinchö quedakurqan wamranta chichirnin* hasta wasqinqanyaq.
24 Wamranta wasqirirnam, pusharkur Silö markata ëwarqan. Y kima watayoq töruta, onci kïlustanö* harinata y juk jatun järra vïnutam aparqan.+ Silö+ markaman chärirnam, Änaqa Teyta Jehoväta adorayänan carpa* wayiman wamranta aparkur ëwarqan.
25 Tsëpitanam töruta pishtayarqan y wamrankunatam Elïman apayarqan.
26 Änam Elïta nirqan: “¡Teytallë! Rasumpa kaqllatam kanan nillaq, noqam kallä pasaqchö Jehovä Diosta läduykichö mañakoq warmi.+
27 Teyta Jehovätam mañakurqä wamrayoq këta munar, y pëmi bendicimashqa wamrayoq kanäpaq.+
28 Tsëmi Teyta Jehoväta kanan entreguëkü.* Wanukunqanyaqmi o wañukunqanyaqmi Jehovällapaq kanqa”.
Y pëqa* Jehovä Diosta adoranampaqmi qonqurikurqan.
Nötakuna
^ Elcanäqa Efrain kastapa markanchömi täkurqan, tsëmi efraimïta nir reqiyaq. Peru pëqa levïta nunam karqan. Rikäri 1 Crönicas 6:19, 22-28 textuta.
^ O “Ramäpita juk zufïta”.
^ O “puntanman qonqurikunampaq”.
^ Kënöpis niyanmi: toldu.
^ O “shonquykichö alläpa llakikunki”.
^ Tsëqa Diosta adörana carpa o toldu wayim.
^ Kënöpis niyanmi: qoya qoyalla; tuta tutalla.
^ Tsë jutiqa, “Diospa jutin” ninanmi.
^ Hebreu idiömachöqa “Qampa rikënikichö alli kanqanta rurë” ninmi.
^ Kënöpis niyanmi: chuchurnin.
^ Hebreu idiömachöqa “1 efätanö” ninmi. Tsëqa 22 litrusnömi karqan. Rikäri “Masllata musyanapaq” neqchö B14 kaqta.
^ Kënöpis niyanmi: toldu.
^ Hebreu idiömachöqa “prestëkü” ninmi.
^ Këchöqa capaz Elcanäpaq parlëkan.
