Salmus 102:1-28
Llakitsiyaptin imanö këtapis mana puëdir Teyta Diosman mañakunqan. Teyta Jehovätam llapan yarpachakunqanta willan.+
102 Teyta Jehovä, mañakamuptï wiyëkallämë,+yanapamänëkipaq rogakamur qayakamuptï wiyëkallämë.+
2 Llakishqa kanqä höra ama dejëkamëtsu.+
Qayakamuptï wiyëkamë,tsë höra yanapëkallämë.+
3 Kawënïpis qoyënömi o qoshninömi ushakärin,y tullükunapis hornuchö rupashqanömi këkan.+
4 Planta lapikar tsakireqnömi shonqü këkan,+y mikunäpaqpis manam gänasnï kantsu.
5 Alläpa llakikurllam kakü,+tsëmi qaranwan tullunllana këkä.+
6 Tsunyaq sitiuchö pelïcanu niyanqan pishqunömi kallä,raqäkunachö päraq tukunömi kakullä.
7 Manam punuytapis tarïtsu,teja jananchö japallan kakoq pishqunömi kallä.+
8 Chikimaqnïkunaqa imë hörapis insultayämanmi,+noqapita asikoqkunaqa, jutïta parlarmi wakinkunata maldiciyan.
9 Mikunqä mikuyqa uchpanömi,+upunqä yakupis weqiwan juntam këkan.+
10 Tsënöqa këkä noqawan cölerashqa kaptikim,juk läduman jitamänëkillapaqmi yanapamarqunkipis.
11 Wäni o llantuy pasareqnöllam kawënïpis ushakärin,+planta tsakireqnömi ushakärï.+
12 Peru Teyta Jehovä, qamqa imëyaqpis këkankim,+reqishqa kanqëkiqa manam imëpis ushakanqatsu.+
13 Qamqa shamurmi Sion jirkata llakipëkunki,*+yanapanëki tiempum chämushqa,+citanqëki tiempun chäramushqa.+
14 Sirwishoqnikikunaqa perqaraq ruminkunata rikarmi kushikuyan,+y allpantapis kuyayanmi.+
15 Teyta Jehovä, mëtsë nacionchö nunakunam jutikita respetayanqa,*y patsachö gobernantikunam puëdeq kaptiki respetayäshunki.+
16 Teyta Jehovämi Sionta yapë ruranqa,+poderösu kanqantam rikäyanqa.+
17 Waktsakuna mañakuyanqantam cäsunqa,+pëqa mañakuyanqantam ruranqa.+
18 Qepa yureqkunapaqmi këqa qellqarëkan,+qepa yureqkunam Teyta Jehoväta* alabayanqa.
19 Teyta Jehoväqa sagrädu sitiumpitam rikëkämun,+pëqa ciëlupitam entëru patsata rikëkämun,
20 carcelarëkaqkuna mañakuyanqanta wiyanampaq+y wanuyänampaq condenashqakunata salvanampaq.+
21 Tsënöpa Sionchö+ Teyta Jehoväpa jutinta willakuyänampaq,y Jerusalenchö alabashqa kanampaq.
22 Tsëqa pasanqa mëtsë markapita nunakuna y gobernantikuna juntakar Teyta Jehoväta sirwiyaptinmi.+
23 Pëmi kallpätapis ushakätsishqa,wallka tiempulla kawanäpaqmi permitimashqa.
24 Tsëmi nirqä:
“Teyta Dios, jövinllaraq këkaptïqa ama wanuykatsimëtsu,qamqa imëyaqpis kawakoq Diosmi kanki.+
25 Qamqa unëpitam patsapa cimientunta patsätsirqëki,y makikiwanmi ciëlutapis rurarqëki.+
26 Patsawan ciëlu ushakaptimpis qamqa këkankillam.
Röpanö makwayarmi ushakäyanqa, y röpata cambiaqnömi cambianki.
Qam munarqa ushakätsinkim.
27 Peru qamqa imëpis kanqëkinöllam këkanki, y manam imëpis ushakankitsu.+
28 Sirwishoqnikikunapa tsurinkunaqa tranquïlum kawakuyanqa,y pëkunapa kastankunapis puntëkichömi imëyaqpis kawakuyanqa”.+
Nötakuna
^ Kënöpis niyanmi: ankupëkunki; kuyapëkunki.
^ Hebreu idiömachöqa “mantsayanqa” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “Jäh” ninmi. “Jäh” neq palabraqa wallka letrallachö Jehoväpa jutinmi.