Salmus 107:1-43
107 Allillata ruranqampita Teyta Jehoväta agradecikuyë,+pëqa imëpis alläpa kuyakoqllam këkan.+
2 Tsënö niyätsun Teyta Jehovä salvanqan nunakuna,chikeqninkunapita salvamunqan nunakuna,+
3 mëtsë nacionpita kutitsimunqan nunakuna,+inti o rupay jeqanan y yarqamunan lädupita,norti lädupita y sur lädupita kutitsimunqan nunakuna.+
4 Pëkunaqa oqrakashqanömi tsunyaq sitiuchö wakpa këpa puriyarqan,manam tariyarqantsu kawakuyänampaq markaman ëwaq nänita.
5 Mallaqäyarqanmi y yakunäyarqanmi,y alläpa purishqa kayaptinmi kallpankunapis karqannatsu.
6 Imanö këtapis mana puëdirmi Teyta Jehoväman rogakur mañakuyarqan.+
Pëqa tsënö sufrikäyaptinmi salvarqan.+
7 Teyta Diosqa, alli nänipam pusharqan.+
Tsëmi kawakuyänampaq markaman chäyarqan.+
8 Alläpa kuyakoq kanqampita y nunakunapaq imëkata ruranqampita,+Teyta Jehoväta llapan nunakuna agradecikuyätsun.+
9 Pëmi yakunëkaq nunata yakun qarashqa,y mallaqëkaq nunatam alli allita mikutsishqa.+
10 Wakinkunaqa wanuyänampaqnam këkäyarqan,alli cadenashqa prësurarmi alläpa sufriyarqan.
11 Tsënöqa sufriyarqan Teyta Dios ninqanta mana cäsukuyanqampitam,Llapanta Gobernaq Poderösu Diosta mana respetayanqampitam.+
12 Humildi këta yachakuyänampaqmi Teyta Diosqa imëkapa pasayänanta permitirqan+y mana allikunaman ishkiriyaptinqa manam ni pï yanaparqantsu.
13 Imanö këtapis mana puëdirmi Teyta Jehoväman rogakur mañakuyarqan.
Pëqa tsënö sufrikäyaptinmi salvarqan.
14 Wanuyänampaqna këkäyaptinmi salvarqan,y cadenashqa këkäyaptinmi librarqan.+
15 Alläpa kuyakoq kanqampita+ y nunakunapaq imëkata ruranqampita,Teyta Jehoväta llapan nunakuna agradecikuyätsun.
16 Pëmi cobripita rurashqa punkukunata ushakätsishqa,y fiërrupita rurashqa trancankunatapis pakirmi ushashqa.+
17 Pëkunaqa upam kayarqan,tsëmi jutsata* rurayanqampita+ y mana allikunata rurayanqampita sufriyarqan.+
18 Pëkunaqa mikuypa gustuntapis manam tariyarqantsuy ushakäyänampaqnam këkäyarqan.
19 Imanö këtapis mana puëdirmi Teyta Jehoväman rogakur mañakuyarqan.
Pëqa tsënö sufrikäyaptinmi salvarqan.
20 Teyta Diosqa parlaparmi alliyätsirqan,+y sepultürapitanam salvamurqan.
21 Alläpa kuyakoq kanqampita y nunakunapaq imëkata ruranqampita,Teyta Jehoväta llapan nunakuna agradecikuyätsun.
22 Agradecikur qarëkunata rupatsiyätsun,+y llapan ruranqampita qayëkachar kushishqa willakuyätsun.
23 Barcuwan viajaqkunay lamarllapa juk nacionpita imëkata apamur trabajaqkunam,+
24 Teyta Jehovä lamarchö imëkakunata kamanqanta rikäyashqa.+
25 Tsëchömi rikäyashqa,parlariptinlla alläpa vientuwan lamar yaku laqcheqsaqta.+
26 Barcuwan pureqkunatam yaku laqcheqsar altuman pallarkun.*
Tsëpita kutirkatsimurnam yaku rurinman illakäratsin,y mantsakarmi ima rurëtapis puëdiyantsu.
27 Machashqanömi wakman këman ishkiyan,barcuwan alli purita yacharpis manam ima rurëta puëdiyantsu.+
28 Tsëmi pëkunaqa imanö këtapis mana puëdir, yanapëkunampaq Teyta Jehoväman mañakuyan,+y pëqa alläpa sufrikäyaptinmi salvan.
29 Alläpa vientuta päratsiptinmi,laqcheqsëkaq lamarpis päran.+
30 Laqcheqsëkaq yaku pärariptinmi pëkunaqa kushikuyan.
Teyta Diosqa chëta munayanqan puertumanmi pushan.
31 Alläpa kuyakoq kanqampita y nunakunapaq imëkata ruranqampita,Teyta Jehoväta llapan nunakuna agradecikuyätsun.+
32 Mëtsika nunakuna juntarëkäyanqanchö alabayätsun,+dirigeqkuna niyanqannö alabayätsun.
33 Teyta Diosqa mayukunatam* tsaki patsaman tikratsin,y yaku kanqan sitiukunatapis tsaki patsaman tikratsin.+
34 Alli wayoq chakrakunata kachiman tikratsiptinmi ni imapis wayunnatsu.+
Tsëtaqa ruran tsëchö kawaqkuna mana allita rurayaptinmi.
35 Yaku mana kanqan sitiukunachömi plantayoq qochakunata* yuritsin.
Tsaki chakrakunachömi pukyukunata yuritsin.+
36 Tsëmanmi Teyta Diosqa,+mallaqëpita sufreq nunakunata churan markankuna rurakuyänampaq.+
37 Tsëchömi murupakuyan y früta wayoq plantakunata plantayan,+y mëtsikatam cosechayan.+
38 Teyta Diosmi bendicin, tsëmi mëtsika familiayoq tikrayan,y animalninkunapis mëtsikam miran.+
39 Chikeqninkuna sufritsiyaptiny imëka desgraciapa pasarmi wallkaqllana quedayan.
40 Teyta Diosmi gobernaqkunata penqakatsin,y tsunyaq sitiukunachö oqrakashqa puriyänantam permitin.+
41 Peru waktsakunataqa, nuna mayinkuna mana sufritsiyänampaqmi Teyta Dios cuidan,+y familiankunapis mëtsika üshanö kayänantam permitin.
42 Tsëta rikarmi allita ruraq nunakunaqa kushikuyan,+peru mana allita ruraq nunakunaqa upällam kayan.+
43 Yachaq nunaqa këkunamanmi yarparanqa,+alläpa kuyakoq kar Teyta Jehovä llapan ruranqankunamanmi pensanqa.+
Nötakuna
^ Kënöpis niyanmi: pecäduta.
^ Kënöpis niyanmi: joqarkun.
^ Kënöpis niyanmi: riukunatam.
^ O “mëtsika yakuyoq qochakunata”.